យុគសម័យ - យោងតានព័ត៌មានចុងក្រោយបំផុតដែលចេញផ្សាយដោយទីភ្នាក់ងារសារព័ត៌មានវៀតណាមបានឱ្យដឹងថា រហូតមកដល់ពេលនេះ ចំនួនអ្នកស្លាប់និងរបួសនៅក្នុងការផ្ទុះចំនួន ៨ លើកនៅក្នុងប្រទេសស្រីលង្កា បានបណ្តាលឱ្យមនុស្ស ២០១៧ នាក់ត្រូវស្លាប់និង ៤៥០ នាក់រងរបួស។ កងកម្លាំង សមត្ថកិច្ចក៏បានចាប់ខ្លួនជនសង្ស័យ ៧ នាក់ផងដែរ។
កងកម្លាំងសន្តិសុខស្រីលង្កាបានដាក់ពង្រាយនៅខាងក្រៅវិហារ St. Anthony នៅទីក្រុង Colombo បន្ទាប់ពីការផ្ទុះគ្រាប់បែកជាច្រើនលើក នៅថ្ងៃទី ២១ ខែមេសា ឆ្នាំ ២០១៩ (រូបថត: THX / TTXVN)
ការវាយប្រហារ បំផ្ទុះគ្រាប់បែកបានកើតឡើងនៅថ្ងៃអាទិត្យ ទី២១ខែមេសានេះ ចំពេលដែលមនុស្សម្នាជាច្រើននាំគ្នាចូលរួមពិធីបុណ្យ គ្រឹស្ដសាសនា Easter Sunday នៅឯវិហារគ្រឹស្ដ St. Anthony ក្នុងទីក្រុង Colombo, វិហារគ្រឹស្ដ St. Sebastian នៃទីក្រុង Negombo និងវិហារគ្រឹស្ដ Zion Church ស្ថិតនៅទីក្រុង Batticaloa រួមទាំងសណ្ឋាគារចំនួន៣កន្លែង ផ្សេងទៀត ដូចជា Shangri-La, Cinnamon Grand និង Kingsbury ក្នុងទីក្រុង Colombo។ ប៉ុន្តែក្រោយក្នុងថ្ងៃ ដដែលក៏មានសេចក្ដីរាយការណ៍មានករណីផ្ទុះទី៧ និង៨កើតឡើងផងដែរនៅក្បែររដ្ឋធានីនៃប្រទេសស្រីលង្កា។
រដ្ឋាភិបាលស្រីលង្កាបានចេញបំរាមគោចរទូទាំងប្រទេសចាប់ពីម៉ោង ១៨ ដល់ ម៉ោង ៦ ព្រឹក ដែលមានសុពលភាពភ្លាមៗនិងអូសបន្លាយ ដរាបណាមានសេចក្តីជូនដំណឹងបន្ត។ បច្ចុប្បន្ន មិនទាន់មានអង្គការឬបុគ្គលណាមួយចេញមុខទទួលខុសត្រូវលើការវាយប្រហារនេះនៅឡើយទេ។
កងយោធាស្រីលង្កាការពារវិហារ St. Anthony នៅក្នុងទីក្រុង Colombo បន្ទាប់ពីការផ្ទុះគ្រាប់បែក នៅថ្ងៃទី ២១ ខែមេសា។ (រូបថត: Reuters)
ក្នុងពិធីបុណ្យគ្រឹស្ដសាសនា Easter Sunday ដែលបានប្រារព្ធធ្វើឡើងនៅបុរីវ៉ាទីកង់ សម្តេចប៉ាប Francis បានថ្កោលទោសលើការវាយប្រហារនៅស្រីលង្កាថា ជា"អំពើហឹង្សាឃោរឃៅ" និងបានសម្តែងការប្តេជ្ញាចិត្តរបស់ខ្លួនចំពោះ សហគម ន៍គ្រីស្ទាន។
នៅទីក្រុងយេរូសាឡឹម សមាគមគ្រីស្ទសាសនាបានសម្តែងនូវការសោកស្តាយ និងបាន “អធិស្ឋានសម្រាប់ព្រលឹងនៃអ្នកដែលត្រូវស្លាប់និងបួងសួងសុំឲ្យអ្នករងរបួសនឹងបានសះស្បើយបានយ៉ាងឆាប់រហ័ស”។
ទិដ្ឋភាពនៅកន្លែងកើតហេតុ (រូបថតៈ RT)
ប្រធានាធិបតីបារាំងលោក Emmanuel Macron និងអធិការបតីអាល្លឺម៉ង់លោកស្រី Angela Merkel ក៏បានចេញសេចក្តីថ្លែងការណ៍ ថ្កោលទោស “អំពើឃោរឃៅ និងការស្អប់ខ្ពើមខាងសាសនា” បន្ទាប់ពីការវាយប្រហារពោលខាងលើនិងបានសម្តែងនូវសាមគ្គីភាពជាមួយប្រជាជនស្រីលង្កា។
នាយករដ្ឋមន្ត្រីអូស្ត្រាលី លោក Scott Morrison បានសម្តែងការសោកស្តាយចំពោះជនរងគ្រោះនៅក្នុងការវាយប្រហារភេរវកម្មនៅក្នុងប្រទេសស្រីលង្កា ហើយបានឲ្យដឹងថា ប្រទេសអូស្ត្រាលីត្រៀមខ្លួនផ្តល់ជំនួយទាំងអស់ដែលប្រទេសស្រីលង្កាត្រូវការនៅក្នុងគ្រាដ៏លំបាកនេះ។
រូបថតៈ AP
ប្រធានាធិបតីអាមេរិក លោក Donald Trump បានបង្ហោះនៅលើបណ្តាញសង្គម Twitter ដោយសម្តែងនូវការសោកស្តាយយ៉ាងស្មោះស្ម័គ្រ បន្ទាប់ពីការវាយប្រហារភេរវកម្មនៅប្រទេសស្រីលង្កា និងបានអះអាងថា សហរដ្ឋអាមេរិកត្រៀមខ្លួនជួយប្រទេសស្រីលង្កាជំនះពុះពារលើផលវិបាក។
នៅឯប្រទេសអ៊ីរ៉ង់ រដ្ឋមន្ត្រីការបរទេស លោក Javad Zarif បានសង្កត់ធ្ងន់ថា: "លិទ្ធិភេរវកម្មគឺជាការគំរាមកំហែងជាសកល មិនថាសំដៅទៅលើសាសនាណាទេ ពោលគឺ ពិភពលោកត្រូវថ្កោលទោសនិងប្រឈមមុខផងដែរ”។
រូបថតៈ FN
នាយករដ្ឋមន្ត្រីលីបង់ លោក Saad Hariri បានថ្កោលទោស "អំពើភេរវកម្មដែលងងឹត" ហើយបានសម្តែងសេចក្តីសង្ឃឹមថា អ្នករងរបួសនឹងសះស្បើយក្នុងពេលឆាប់ៗនេះ៕
（សរុបព័ត៌មាន ដោយ ស្រីព្រេជ）
មតិពីមិត្តអ្នកអាន