កម្លាំងចលករថ្មីសម្រាប់កិច្ចសហប្រតិបត្តិការវៀតណាម-ស្រីលង្កា

យោងតាមលោក Fernando ដំណើរទស្សនកិច្ចនេះ មិនត្រឹមតែបង្ហាញពីការប្តេជ្ញាចិត្តយ៉ាងមុតមាំរបស់វៀតណាម ក្នុងការជំរុញទំនាក់ទំនងទ្វេភាគីប៉ុណ្ណោះទេ ប៉ុន្តែថែមទាំងបើកកាលានុវត្តភាពឱ្យស្រីលង្កា បង្កើនការតភ្ជាប់ជាមួយវៀតណាមដោយឡែក និងជាមួយតំបន់អាស៊ីអាគ្នេយ៍ជារួម។

លោក Fernando យល់ឃើញថា ស្រីលង្កា រួមទាំងវិស័យឯកជន ចាំបាច់ត្រូវទាញយកកម្លាំងចលករពីដំណើរទស្សនកិច្ចនេះ ដើម្បីកសាងទំនាក់ទំនងដៃគូសេដ្ឋកិច្ច និងយុទ្ធសាស្ត្រឱ្យកាន់តែស៊ីជម្រៅជាមួយវៀតណាម។ លទ្ធផលមួយក្នុងចំណោមលទ្ធផលដែលត្រូវបានរំពឹងទុកបំផុត គឺការដាក់ឱ្យដំណើរការឆាប់ៗនូវខ្សែជើងហោះហើរត្រង់រវាងប្រទេសទាំងពីរ ដែលនេះជាអ្វីដែលសហគមន៍អាជីវកម្ម និងវិស័យទេសចរណ៍នៃភាគីទាំងពីរបានទន្ទឹងរង់ចាំជាយូរមកហើយ។ តាមលោក ការតភ្ជាប់ផ្លូវអាកាសដោយផ្ទាល់ នឹងរួមចំណែកយ៉ាងសំខាន់ក្នុងការជំរុញការជួបប្រាស្រ័យរវាងប្រជាជន ពាណិជ្ជកម្ម និងទេសចរណ៍។

ទន្ទឹមនឹងនោះ នាយកប្រតិបត្តិនៃវិទ្យាស្ថាន Advocata បានសង្កត់ធ្ងន់ថា ដំណើរទស្សនកិច្ចនេះក៏បាននាំមកនូវមេរៀនមានតម្លៃសម្រាប់ស្រីលង្កា ក្នុងដំណើរការកែទម្រង់សេដ្ឋកិច្ចផងដែរ។ លោកបានវាយតម្លៃថា គោលនយោបាយ “ផ្លាស់ប្តូរថ្មី” របស់វៀតណាម គឺជាសក្ខីភាពយ៉ាងច្បាស់ដែលបង្ហាញថា ការធ្វើសមាហរណកម្មពាណិជ្ជកម្ម និងការកែទម្រង់តាមតម្រូវការទីផ្សារ អាចបង្កើតឱ្យមានការប្រែប្រួលយ៉ាងខ្លាំងក្លាសម្រាប់ខឿនសេដ្ឋកិច្ច និងលើកកម្ពស់សមត្ថភាពប្រកួតប្រជែងជាតិ។

លើកឡើងអំពីការដែលភាគីទាំងពីរបានចុះហត្ថលេខាលើឯកសារសហប្រតិបត្តិការជាច្រើនក្នុងដំណើរទស្សនកិច្ចនេះ លោក Fernando យល់ថា បញ្ហាប្រឈមធំបំផុត មិនមែនស្ថិតនៅលើការចុះហត្ថលេខានោះទេ ប៉ុន្តែគឺស្ថិតនៅលើដំណាក់កាលអនុវត្តជាក់ស្តែង។

តាមលោក ស្រីលង្កាធ្លាប់បានចុះហត្ថលេខាលើអនុស្សរណៈនៃការយោគយល់គ្នាជាច្រើនជាមួយបណ្តាប្រទេសដទៃទៀត រួមទាំងវៀតណាមផងដែរ ប៉ុន្តែការប្រែក្លាយរាល់ការប្តេជ្ញាចិត្តឱ្យទៅជាលទ្ធផលជាក់ស្តែង តែងតែជាបញ្ហាស្នូល។ ហេតុដូច្នេះ លោកបានវាយតម្លៃខ្ពស់ចំពោះការដែលអគ្គលេខាបក្ស និងជាប្រធានរដ្ឋ លោក To Lam បានសង្កត់ធ្ងន់លើសារៈសំខាន់នៃការអនុវត្តប្រកបដោយប្រសិទ្ធភាពនូវរាល់កិច្ចព្រមព្រៀងដែលសម្រេចបាន។

លោកក៏យល់ឃើញដែរថា វិស័យឯកជននៃប្រទេសទាំងពីរ រួមជាមួយបណ្តាស្ថាប័នមានសមត្ថកិច្ច ចាំបាច់ត្រូវសហការគ្នាយ៉ាងជិតស្និទ្ធ ដើម្បីនាំយកកិច្ចព្រមព្រៀងស្តីពីពាណិជ្ជកម្ម ការផ្លាស់ប្តូរឌីជីថល វិទ្យាសាស្ត្របច្ចេកវិទ្យា និងអប់រំ ទៅកាន់ការអនុវត្តជាក់ស្តែង។ ក្នុងបរិបទដែលស្រីលង្កានៅតែប្រឈមមុខនឹងការលំបាកសេដ្ឋកិច្ចជាច្រើន ការពង្រីកការឈានចូលទីផ្សារវៀតណាម ក៏ដូចជាទីផ្សារអាស៊ីខាងកើត ត្រូវបានចាត់ទុកថាមានសារៈសំខាន់ជាពិសេសសម្រាប់ប្រទេសនេះ។

ក្រៅពីនេះ លោក Fernando យល់ថា ស្រីលង្កាមានចំណុចជាច្រើនដែលអាចរៀនសូត្របានពីភាពជោគជ័យរបស់វៀតណាមក្នុងការអភិវឌ្ឍសេដ្ឋកិច្ច ជាពិសេសគឺការរីកចម្រើននៃការនាំចេញ និងបណ្តាសមិទ្ធផលអភិវឌ្ឍន៍សង្គម។

តាមលោក មិនដូចវៀតណាមនោះទេ បច្ចុប្បន្នស្រីលង្កានៅតែរក្សាកម្រិតពន្ធនាំចូលខ្ពស់ រួមជាមួយរបាំងពាណិជ្ជកម្មជាច្រើន ព្រមទាំងមានកិច្ចព្រមព្រៀងពាណិជ្ជកម្មសេរីតិចតួច ដែលធ្វើឱ្យសហគ្រាសក្នុងស្រុកជាច្រើនមិនទាន់មានសមត្ថភាពប្រកួតប្រជែងគ្រប់គ្រាន់ និងមិនទាន់មានទិសដៅឈានទៅរកទីផ្សារអន្តរជាតិ។

លោកបានដកស្រង់ទិន្នន័យរបស់អគ្គនាយកដ្ឋានស្ថិតិវៀតណាម ដោយបញ្ជាក់ថា សរុបប្រាក់ចំណូលនាំចេញទំនិញរបស់វៀតណាមក្នុងឆ្នាំ ២០២៥ សម្រេចបាន ៤៧៥.០៤ ពាន់លានដុល្លារ កើនឡើង ១៧% ខណៈដែលប្រាក់ចំណូលនាំចូលសម្រេចបាន ៤៥៥.០១ ពាន់លានដុល្លារ កើនឡើង ១៩.៤%។ តាមលោក តួលេខទាំងនេះបង្ហាញថា មិនអាចកសាងទំនាក់ទំនងសេដ្ឋកិច្ចឱ្យរឹងមាំ ឬសម្រេចបាននូវការអភិវឌ្ឍប្រកបដោយចីរភាពបានឡើយ ប្រសិនបើខ្វះពាណិជ្ជកម្មសេរី និងសមាហរណកម្មឱ្យបានស៊ីជម្រៅ។

អគ្គលេខាបក្ស និងជាប្រធានរដ្ឋ លោក To Lam និងនាយករដ្ឋមន្ត្រីស្រីលង្កា លោកស្រី Harini Amarasuriya អញ្ជើញធ្វើជាសាក្សីក្នុងពិធីប្រគល់បណ្តាឯកសារសហប្រតិបត្តិការរវាងប្រទេសទាំងពីរ។

វាយតម្លៃអំពីវិសាលភាពសហប្រតិបត្តិការនាពេលខាងមុខ លោក Fernando បានកត់សម្គាល់ជាពិសេសចំពោះសំណើរបស់អគ្គលេខាបក្ស និងជាប្រធានរដ្ឋ លោក To Lam ស្តីពីការកសាងក្របខ័ណ្ឌថ្មីសម្រាប់សហប្រតិបត្តិការពាណិជ្ជកម្ម និងការវិនិយោគរវាងប្រទេសទាំងពីរ។ តាមលោក ស្រីលង្កាគួរតែសិក្សាឱ្យបានហ្មត់ចត់ និងជំរុញគំនិតផ្តួចផ្តើមនេះ ព្រមទាំងឈានទៅដកចេញជាបណ្តើរៗនូវរាល់របាំងពាណិជ្ជកម្ម និងការវិនិយោគ។

លោកក៏បានវាយតម្លៃខ្ពស់ចំពោះការយល់ឃើញរបស់អគ្គលេខាបក្ស និងជាប្រធានរដ្ឋ លោក To Lam អំពីសក្តានុពលសម្រាប់ស្រីលង្កាក្នុងការក្លាយជាមជ្ឈមណ្ឌលឡូជីស្ទីក (Logistics) សម្រាប់បណ្តាសហគ្រាសវៀតណាមដែលចង់ឈានចូលទីផ្សារអាស៊ីខាងត្បូង។ តាមលោក នេះគឺជាកាលានុវត្តភាពជាក់ស្តែងដែលប្រទេសទាំងពីរអាចទាញយកផលប្រយោជន៍បានយ៉ាងឆាប់រហ័ស។ ទោះជាយ៉ាងនេះក្តី ដើម្បីធ្វើឱ្យបញ្ហានេះក្លាយជាការពិត ស្រីលង្កាចាំបាច់ត្រូវពិនិត្យមើលការលុបចោលនូវការរឹតត្បិតចំពោះការវិនិយោគបរទេសក្នុងវិស័យដឹកជញ្ជូនតាមសមុទ្រ និងឡូជីស្ទីក ដោយជាជំហានដំបូងអាចសាកល្បងបន្ធូរបន្ថយសម្រាប់សហគ្រាសវៀតណាម។

ក្រៅពីនេះ លោក Fernando បានវាយតម្លៃថា កសិកម្មក៏ជាវិស័យសហប្រតិបត្តិការដែលពោរពេញដោយសក្តានុពលផងដែរ។ លោកបានយល់ឃើញថា វៀតណាមកំពុងមានវិស័យកសិកម្មដែលមានការអភិវឌ្ឍ មានសមត្ថភាពប្រកួតប្រជែងខ្ពស់ និងការអនុវត្តបច្ចេកវិទ្យាប្រកបដោយប្រសិទ្ធភាព ក្នុងនោះមានការប្រើប្រាស់ដ្រូន កាន់តែរីកសុះសាយក្នុងការផលិតកសិកម្ម។ ទាំងនេះគឺជាបទពិសោធន៍ជាក់ស្តែងដែលស្រីលង្កាអាចរៀនសូត្របាន ក្នុងដំណើរការធ្វើទំនើបកម្មវិស័យកសិកម្មរបស់ខ្លួន៕

ជួបប្រាស្រ័យទាក់ទងជាមួយសហគមន៍ស្ត្រីវៀតណាមនៅស្រីលង្កា យុគសម័យ - ក្ក្នុងឱកាសអបអរសាទរទិវានារីវៀតណាម (២០ តុលា) ឆ្នាំនេះ ស្ថានទូតវៀតណាមប្រចាំនៅស្រីលង្កាបានរៀបចំកិច្ចប្រជុំ ផ្លាស់ប្តូរ និងពិភាក្សាជាមួយសហគមន៍វៀតណាមនៅស្រីលង្កា។

វិនិយោគិនស្រីលង្កាស្វែងរកឱកាសជាច្រើននៅវៀតណាម យុគសម័យ - “ក្នុងរយៈពេលដ៏ខ្លី វៀតណាមបានរីកចម្រើនពីប្រទេសក្រីក្រដែលត្រូវបានបំផ្លិចបំផ្លាញដោយសង្រ្គាម ទៅជាសេដ្ឋកិច្ចដ៏ខ្លាំងក្លានៅក្នុងតំបន់។ វិនិយោគិនស្រីលង្កាមើលឃើញឱកាសទាក់ទាញជាច្រើននៅក្នុងទីផ្សារវៀតណាម”។ លោក A. Saj U. Mendis ឯកអគ្គរដ្ឋទូតវិសាមញ្ញ និងពេញសមត្ថភាព និងពេញសមត្ថភាពរបស់ប្រទេសស្រីលង្កាប្រចាំនៅវៀតណាមបានថ្លែងបែបនេះក្នុងជំនួបជាមួយឯកអគ្គរដ្ឋទូត Nguyen Phuong Nga ប្រធានសហភាពអង្គការមិត្តភាពវៀតណាម (VUFO) នាថ្ងៃទី ១៤ ខែកុម្ភៈ នៅទីក្រុងហាណូយ។

ឌឹកអាញ់

thoidai.com.vn