យុគសម័យ - យោងតាមភ្នាក់ងារសារព័ត៌មាន Quang Ninhបានឲ្យដឹងថា គណៈកម្មាធិការប្ជាជនប្រចាំខេត្ត Quang Ninh របស់វៀតណាមបានចេញគម្រោងអភិវឌ្ឍន៍តំបន់សេដ្ឋកិច្ច Van Don ដែលមានតម្លៃសរុប ៣៥៧.២លានដុល្លារដើម្បីអភិវឌ្ឍន៍ហេដ្ឋារចនាសម្ព័ន្ធនៅឆ្នាំ ២០៣០ ។
ព្រលានយន្តហោះអន្តរជាតិ Van Don
គម្រោងនេះមានគោលដៅធ្វើឲ្យ Van Don ក្លាយជាមជ្ឈមណ្ឌលសេដ្ឋកិច្ចរបស់ប្រទេសវៀតណាមមួយ និងធ្វើឲ្យទីក្រុងក្លាយជាទីក្រុងល្អបំផុតសម្រាប់រស់នៅក្នុងតំបន់អាស៊ីប៉ាស៊ីហ្វិក ។ ខេត្ត Quang Ninh បានឲ្យដឹងថាមានកិច្ចការសំខាន់ៗ៥ដែលពួកគេត្រូវសម្រេចដើម្បីសម្រេចគោលដៅខាងលើ ។ កិច្ចការសំខាន់ជាងគេគឺអភិវឌ្ឍន៍ហេដ្ឋារចនាសម្ព័ន្ធក្នុងតំបន់សេដ្ឋកិច្ចនេះដែលមានដូចជាប្រព័ន្ធដឹកជញ្ជូនផ្លូវអាកាស ផ្លូវគោក និងផ្លូវទឹក រួមទាំងហេដ្ឋារចនាសម្ព័ន្ធសម្រាប់ទេសចរណ៍ជាដើម ។
ផែនការខាងលើស្នើឲ្យមានការសិក្សាពីការបង្កើនសមត្ថភាពក្នុងការទទួលអ្នកដំណើរប្រចាំឆ្នាំរបស់អាកាសយានដ្ឋាន Van Don មកស្មើ៥លាននាក់ និងសមត្ថភាពក្នុងការទទួលទំនិញមកស្មើ ៣០,០០០តោនផងដែរនៅឆ្នាំ ២០៣០ ។
ពួកគេក៏មានគម្រោងទាក់ទាញវិនិយោគឲ្យសាងសង់ចំណតឧទ្ធម្ភាគចក្រលើកោះរបស់ខេត្តនេះដែរដើម្បីសម្របស្រួលការធ្វើដំណើររវាង Van Don និង Ha Long, Mong Cai និងកោះដទៃទៀត ។ ផែនការខាងលើនឹងពន្លឿនការសាងសង់ផ្លូវ ហាយវេ ពី Van Don ទៅ Mong Cai និងស្ពានដែលតភ្ជាប់ទីក្រុង Cam Pha ទៅ តំបន់សេដ្ឋកិច្ច Van Don ទៀតផង។
ខេត្តខាងលើមានគម្រោងសាងសង់ផ្លូវតាមបណ្តាយឆ្នេរសមុទ្រតាមទីប្រជុំជនថ្មីៗនៃឆ្នេរ Bai Tu Long និងអភិវឌ្ឍន៍ផ្លូវរវាង Quan Lan និង Minh Chau និងរថយន្តខ្សែកាបពី Cai Bau ទៅ Tra Ngo ទៅ Cai Lim ជាដើម ។
Van Don អាចទាក់ទាញការវិនិយោគសម្រាប់ហេដ្ឋារចនាសម្ព័ន្ធផ្លូវសមុទ្រថែមទៀតដែលរួមមានការវិនិយោគសម្រាប់កំពង់ផែ Hon Net និង Con Ong កំពង់ផែ Cai Bau និងកំពង់ផែទេសចរណ៍លើកោះ Minh Chau, Quan Lan, Ngoc Vung, Thang Loi និង Van Canh ។
គម្រោងខាងលើនឹងផ្តល់អាទិភាពដល់ការជំរុញដល់វិនិយោគិនសំខាន់ៗក្នុងវិស័យទេសចរណ៍ និងរមណីយដ្ឋានផ្សេងៗ។ វានឹងជួយឲ្យវិនិយោគិនសម្រេចដំណើរការវិនិយោគសម្រាប់សណ្ឋាគារលំដាប់ខ្ខពស់ក្នុងទីប្រជុំជន Bai Dai និង Cai Rong ។ កិច្ចការសំខាន់ៗដទៃទៀតរួមមានការអភិវឌ្ឍន៍វិស័យទេសចរណ៍បច្ចេកវិទ្យាខ្ពស់ កសិកម្មបច្ចេកវិទ្យាខ្ពស់ និងជលវប្បកម្មចរិភាពជាដើម ៕
(ប្រភព៖ baoquangninh.com.vn ប្រែសម្រូលដោយវិច្ឆិកា)
មតិពីមិត្តអ្នកអាន