ក្រុមហ៊ុនជប៉ុនចំនួន ១០ នឹងមកចូលរួមអភិវឌ្ឍន៍គ្រប់ជ្រុងជ្រោយលើខ្សែច្រវាក់ផលិតកម្មកសិកម្មសុវត្ថិភាពនៅកម្ពុជា សម្រាប់ផ្គត់ផ្គង់ទីផ្សារនៅក្នុងស្រុក និងការនាំចេញទៅកាន់ទីផ្សារនៅក្រៅប្រទេស ទៅតាមជំនាញនីមួយៗរបស់ក្រុមហ៊ុន។
ពិធីចុះហត្ថលេខាលើអនុស្សរណនៃការយោគយល់គ្នាស្តីពី “ការអភិវឌ្ឍបន្លែសុវត្ថិភាពសម្រាប់ទីផ្សារក្នុងស្រុក និងការនាំចេញ”។ (រូបថត៖ propertyarea.asia)
លោក Nabeshima Katsuhito នាយកក្រុមហ៊ុន Yamato Green Co., Ltd នៅក្នុងពិធីចុះហត្ថលេខាលើអនុស្សរណនៃការយោគយល់គ្នាស្តីពី “ការអភិវឌ្ឍបន្លែសុវត្ថិភាពសម្រាប់ទីផ្សារក្នុងស្រុក និងការនាំចេញ”នៅថ្ងៃទី១៥ ខែកក្កដា ឆ្នាំ២០២០នេះបានឱ្យដឹងថា ក្រុមហ៊ុនទាំង ១០នេះ នឹងខិតខំប្រឹងប្រែងឱ្យអស់ពីសមត្ថភាព ប្រើប្រាស់សក្តានុពល និងធនធានដែលខ្លួនមាន នាំយកបច្ចេកវិទ្យាចុងក្រោយនៃវិស័យផលិតកម្មបន្លែទាំងអំឡុងពេលដាំដុះ និងប្រមូលផល រហូតដល់លើតុសម្រាប់អ្នកបរិភោគ មកអនុវត្តនៅកម្ពុជា ដើម្បីលើកកម្ពស់ផលិតភាពផលិតកម្មបន្លែកម្ពុជា ធានាបរិមាណផ្គត់ផ្គង់ គុណភាព និងសុវត្ថិភាព ឆ្លើយតបតាមតម្រូវការទីផ្សារ និងស្តង់ដារនាំចេញ។
ជាមួយគ្នានេះ លោកបានស្នើសុំឲ្យក្រសួង និងស្ថាប័នពាក់ព័ន្ធ ចូលរួមសហការឲ្យបានពេញលេញដើម្បីកាអនុវត្តគម្រោងនេះដំណើរការទៅដោយរលូន និងទទួលបានជោគជ័យទាំងក្រុមហ៊ុន និងកសិករ ឬដៃគូផលិតបន្លែទាំងអស់។
តំណាងក្រុមហ៊ុន Yamato Green បានលើកឡើងថា ក្រុមហ៊ុន នឹងនាំយកនូវបច្ចេកទេសក្នុងការដាំដុះមកធ្វើការបង្ហាញដល់ប្រជាកសិករកម្ពុជា ដើម្បីការដាំដុះទទួលបានទិន្នផលខ្ពស់ និងមានគុណភាព ក្នុងនោះក្រុមហ៊ុនមានគោលការណ៍ដាំដុះក្នុងផ្ទះសំណាញ់ផងដែរ។
ភាគីជប៉ុន បានបង្ហាញនូវសុច្ឆន្ទៈ ក្នុងការនាំចេញកសិផលរបស់កម្ពុជាទៅកាន់ទីផ្សារពិភពលោកក្រោមស្លាកផលិតនៅកម្ពុជា “Made in Cambodia “ ដោយលើកកម្ពស់ការដាំដុះទាំងបន្លែ ផ្លែឈើ ព្រមទាំងការចិញ្ចឹមត្រីតាមបច្ចេកទេសជប៉ុន។
គួរបញ្ជាក់ថា បើតាម ឯកឧត្តមរដ្ឋមន្ត្រី វេង សាខុន កម្ពុជាបានត្រៀមខ្លួនរួចជាស្រេច ដើម្បីធ្វើកិច្ចសហការជាមួយនឹងខាងក្រុមហ៊ុនជប៉ុនក្នុងការជម្រុញការអភិវឌ្ឍន៍បន្លែសុវត្ថិភាព និងគាំទ្រដល់ប្រជាកសិករកម្ពុជាក្នុងការបង្កើនការផលិតផលិតផលកសិកម្មប្រកបដោយគុណភាពឆ្លើយតបតម្រូវការក្នុងស្រុកនិងការនាំចេញ៕
（បូកសរុបដោយឌីណា）
មតិពីមិត្តអ្នកអាន