បើតាមរបាយការណ៍ ពីក្រសួងកសិកម្ម ការនាំចេញអង្កររបស់កម្ពុជានៅរយៈពេល ៦ខែ នៃឆ្នាំ២០២០នេះ គឺធ្វើបានយ៉ាងល្អ ដោយសម្រេចបានបរិមាណនាំចេញជិត៤០ម៉ឺនតោន កើនឡើងប្រមាណជិត ១២ម៉ឺនតោន ឬស្មើនឹងអត្រកំណើន ជាង៤១% ធៀបនឹងរយៈពេលដូចគ្នាកាលពីឆ្នាំ២០១៩ ទោះបិជាពិភពលោគនៅតែរងផលប៉ះពាល់ពីជំងឺកូវិដ - ១៩ ក៍ដោយ។
ដោយសារខ្វះស្បៀង ប្រទេសទីម័រខាងកើត ស្នើសុំឲ្យកម្ពុជានាំអង្ករចូល (រូបភាព៖ ហ្វេសប៊ុក CRF)
របាយការណ៍បានឲ្យដឹងទៀតថា សម្រាប់ខែមិថុនា ឆ្នាំ២០២០នេះ ការនាំចេញអង្កររបស់កម្ពុជាមានជាង៤ម៉ឺនតោន កើនឡើងប្រមាណជាង៣២,៥% ធៀបនឹងខែមិថុនាឆ្នាំ២០១៩។
តាមរយៈតួលេខ នៅពាក់កណ្ដាលឆ្នាំនេះ បង្ហាញថា គោលដៅនាំចេញអង្កររបស់កម្ពុជា ១លានតោន អាចនឹងប្រកៀកប្រកិតសម្រេចបាន។
ការនាំចេញអង្ករកម្ពុជាក្នុងរយៈពេល៦ខែដើមដំបូងនៅឆ្នាំនេះបើប្រៀបធៀបទៅនឹង៦ខែដំបូងកាលពីឆ្នាំ២០១៩ គឺមានកំណើននៅគ្រប់គោលដៅនាំចេញទាំងអស់។ តួយ៉ាង សហភាពអ៊ឺរ៉ុបកើនឡើងចំនួន ៤៥,១៩%, ប្រទេសចិនកើនចំនួន ២៥,២០%, បណ្តាប្រទេសសមាជិកអាស៊ានកើនចំនួន ៤៧,៦៩%, និងគោលដៅដទៃទៀតបានកើនឡើងចំនួន ៧៩,២៦% ។
ប្រទេសដែលបានបញ្ជាទិញអង្ករពីកម្ពុជាមានចំនួន ៥៦ប្រទេស ក្នុងនោះ សម្រាប់ក្នុងសហភាពអ៊ឺរ៉ុបមានប្រទេសចំនួន ២៤ ក្នុងចំណោម២៨ ប្រទេស,បន្ទាប់ពីនេះគឺ ប្រទេសចិន, ប្រទេសសមាជិកអាស៊ានចំនួន ៦ ហើយនិងនៅទ្វីបដទៃទៀតចំនួន ២៥ ប្រទេស ។ ទន្ទឹមនឹងនេះ ក៏មានក្រុមហ៊ុនចំនួន ៥ ក្នុងចំណោម ៦៦ ក្រុមហ៊ុន ដែលបាននាំចេញអង្ករច្រើនជាងគេ។
ឯកឧត្តម ងិន ឆាយ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានកសិកម្ម ធ្លាប់បានអះអាងថា បើទោះបីរងការគំរាមកំហែងពីជំងឺកូវីដ-១៩ ក៏ដោយ ក៏ប៉ុន្ដែអង្ករកម្ពុជា ត្រូវបានគេរំពឹងថា អាចនឹងត្រូវនាំចេញទៅក្រៅប្រទេសប្រហែល ៨០ម៉ឺនតោន ឬអាចដល់ ១លានតោន នៅឆ្នាំ២០២០នេះ៕
（សរុបដោយវិច្ឆិកា）
មតិពីមិត្តអ្នកអាន