នៅព្រឹកថ្ងៃទី២៦ ខែឧសភា កិច្ចប្រជុំប្រចាំសប្តាហ៍អំពីសកម្មភាពការងាររបស់គណៈកម្មការជំនាញចំនួនពីរ និងបន្តពិនិត្យស្លាកសញ្ញា និមិត្តរូប និងបាវចនា ឬពាក្យស្លោកនៃស៊ីហ្គេមលើកទី៣២ ឆ្នាំ២០២៣ បានរៀបចំឡើងក្រោមអធិបតីភាពនៃឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (SEA Games) លើកទី៣២ ឆ្នាំ២០២៣ (CAMSOC)។
ទិដ្ឋភាពនៃកិច្ចប្រជុំ។
ឯកឧត្តម វ៉ាត់ ចំរើន អគ្គលេខាធិការ CAMSOCគូសបញ្ជាក់ក្រោយបញ្ចប់កិច្ចប្រជុំថា អង្គប្រជុំប្រចាំសប្តាហ៍របស់គណៈអចិន្ត្រៃយ៍ ដែលដឹកនាំដោយឯកឧត្តម ថោង ខុន បានអនុញ្ញាតឱ្យប្រធាន គណៈកម្មការជំនាញចំនួនពីរមកធ្វើបទបង្ហាញពីផែនការរបស់ខ្លួន ដើម្បីឆ្លងជូន និងសម្រេចពីសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC។
ក្នុងកិច្ចប្រជុំនេះ អ្វីដែលជាការកត់សម្គាល់ឃើញថា ក្រោយពីបានស្តាប់នៃបទបង្ហាញរបស់ឯកឧត្តម ជា ច័ន្ទបរិបូរណ៍ រដ្ឋលេខាធិការ ក្រសួងព័ត៌មាន និងជាប្រធានគណៈកម្មការព័ត៌មាន និងផ្សព្វផ្សាយ និងគណៈកម្មការវប្បធម៌-បរិស្ថាន និងអប់រំកីឡា គឺកិច្ចការនេះបានប្រមាណ៦០ភាគរយ ទៅ៧០ភាគរយហើយ និងអង្គប្រជុំបានវាយតម្លៃថាយើងមានវឌ្ឍនភាព និងបានពន្លឿងលើកិច្ចការរបស់គណៈកម្មការជំនាញទាំងពីរនេះហើយដែរ ដោយគណៈកម្មការជំនាញពីរនេះត្រូវចេញដំណើរមុនគេ ដើម្បីធ្វើសកម្មភាពការងារឆ្ពោះទៅទទួលរៀបចំធ្វើជាម្ចាស់ផ្ទះ ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣។
ឯកឧត្តមអគ្គលេខាធិការក៏បានបញ្ជាក់ផងដែរទៅលើការត្រួតពិនិត្យលើស្លាកសញ្ញា «Logo» និមិត្ត សញ្ញា «Mascot» និងបាវចនា ឬពាក្យស្លោក «Motto» គឺនៅមានភាពស្មុគស្មាញច្រើន ដោយយើងត្រូវបន្ត ពិនិត្យសម្រិតសម្រាំងឱ្យមានភាពច្បាស់លាស់បន្ថែមទៀតមុននឹងសម្រេច។ ដោយសារនេះគឺជានិមិត្ត រូបនៃស៊ីហ្គេម លើកទី៣២ ឆ្នាំ២០២៣ ទាំងមូល។ ឯកឧត្តម ថោង ខុន បានជំរុញឱ្យយើងបន្តកែលម្អធ្វើ យ៉ាងណាឱ្យស្លាកសញ្ញា និមិត្តសញ្ញា និងបាវចនា ឬពាក្យស្លោកនេះមានភាពទាក់ទាញ និងត្រូវទៅនឹងគោលការណ៍នយោបាយកីឡាផងព្រមទាំងស្របទៅតាមគោលនយោបាយរបស់ព្រះរាជាណាចក្រកម្ពុជាយើងផង ពីព្រោះ ស៊ីហ្គេម គឺជារបស់យើងទាំងអស់គ្នា។
ឯកឧត្តម វ៉ាត់ ចំរើន បានបន្ថែមថា ការត្រួតពិនិត្យស្លាកសញ្ញានេះគឺយើងប្រជុំចំនួន៣លើករួចមកហើយៗនៅតែបន្តការកែសម្រួលលម្អរបន្ថែមទៀត ប៉ុន្តែអ្វីដែលគណៈអចិន្ត្រៃយ៍បានឯកភាពគ្នា គឺទៅលើនិមិត្តសញ្ញា «Mascot» ដែលមានរូបទន្សាយតំណាង និងបាវចនា ឬពាក្យស្លោកនេះ។ នេះគឺជាការសម្រេចនៅក្នុងគណៈអចិន្ត្រៃយ៍នៅឡើយទេ ដែលយើងនឹងយកការសម្រេចនេះទៅឆ្លងសម្តេចពិជ័យសេនា ទៀ បាញ់ និងបន្តឆ្លងទៅរាជរដ្ឋាភិបាលសម្តេចអគ្គមហាសេនាបតីតេជោ ហ៊ុន សែន ដើម្បីសម្រេចជាចុងក្រោយបំផុត។ «កិច្ចប្រជុំនេះទទួលបានលទ្ធផលនៃវឌ្ឍនភាពការងារនៃគណៈកម្មការជំនាញពីរនេះ ហើយនៅ សប្តាហ៍ក្រោយ គណៈអចិន្ត្រៃយ៍នឹងបន្តកិច្ចប្រជុំលើគណៈកម្មការពិធីបើក-បិទ ដែលជាគណៈកម្មការសំខាន់ នៃព្រឹត្តិការណ៍ ស៊ីហ្គេម លើកទី៣២ ឆ្នាំ២០២៣ ផងដែរ»។ នេះជាការលើកឡើងបន្ថែមចុងក្រោយរបស់ឯកឧត្តមអគ្គលេខាធិការ CAMSOC៕
(សរុបដោយវិច្ឆិកា)
មតិពីមិត្តអ្នកអាន