អភិបាលខេត្ដកែប លោក កែន សត្ថា បានឲ្យដឹងថា ការអភិវឌ្ឍលើហេដ្ឋារចនាសម្ព័ន្ធទេសចរណ៍និងសន្តិសុខសាធារណៈក្នុងខេត្តដែលជាប់ឆ្នេរសមុទ្រនេះមានដំណើរការរលូនចាប់តាំងពីវាត្រូវបានបង្កើតជាខេត្តដាច់ដោយឡែកពីខេត្តកំពតក្នុងឆ្នាំ ២០០៨ ។
អភិបាលខេត្ដកែប លោក កែន សត្ថា
ថ្លែងក្នុងសន្និសីទកាសែតកាលពីថ្ងៃអង្គារនៅភ្នំពេញ លោក កែន សត្ថា បាននិយាយថា វិស័យទេសចរណ៍ និងហេដ្ឋារចនាសម្ព័ន្ធក្នុងខេត្តកែបធ្លាប់បានស្គាល់ភាពចុះខ្សោយនៅឆ្នាំ ១៩៩៨ ។លោកថ្លែងថា៖ «យើងបានឃើញការរីកចម្រើនដ៏អស្ចារ្យនៅខេត្តកែបក្នុងរយៈពេល ២២ ឆ្នាំកន្លងមកនេះ។ បច្ចុប្បន្នខេត្តរបស់យើងបានក្លាយជាទិសដៅសម្រាប់ភ្ញៀវទេសចរជាតិនិងអន្តរជាតិ»។
លោកបានគូសបញ្ជាក់ពីសមិទ្ធិផលនានារបស់រដ្ឋាភិបាលរួមមានការបង្កើតសាលារៀនចំនួន ៩១ នៅទូទាំងស្រុកនិងឃុំសង្កាត់ សហគ្រាសពាណិជ្ជកម្មចំនួន ១៥៣ ដែលមាននិយោជិក ១ ២៤៣ នាក់ និងសណ្ឋាគារផ្ទះសំណាក់និងរមណីយដ្ឋានចំនួន ៩២ ។
ទាក់ទងនឹងការងារសាធារណៈនិងការអភិវឌ្ឍជនបទ លោក កែន សត្ថា បាននិយាយថា ផ្លូវដែលលាតសន្ធឹងសរុប ៤៦,០៥ គីឡូម៉ែត្រត្រូវបានសាងសង់នៅក្នុងខេត្ត រួមមានផ្លូវបេតុងជិត ២ គីឡូម៉ែត្រ ផ្លូវជនបទជាង ៧ គីឡូម៉ែត្រនិងផ្លូវក្រាលកៅស៊ូប្រវែង ៦ គីឡូម៉ែត្រ។
លោកបានបន្ថែមថាប្រព័ន្ធធារាសាស្ត្រចំនួន ៣១ មានប្រវែង ៤៣ គីឡូម៉ែត្រត្រូវបានសាងសង់ដោយមានទឹកគ្រប់គ្រាន់សម្រាប់ការដាំដុះកសិកម្មទាំងរដូវប្រាំងនិងរដូវវស្សា។ ទាក់ទងនឹងសន្តិសុខសាធារណៈវិញ លោក កែន សត្ថាបាននិយាយថា អាជ្ញាធរក្នុងឆ្នាំកន្លងមកបានបំពេញភារកិច្ចរបស់ខ្លួនយ៉ាងខ្ជាប់ខ្ជួនដើម្បីរក្សាសណ្តាប់ធ្នាប់និងសុវត្ថិភាពរបស់ប្រជាជន។
ជាចុងក្រោយលោកបានកត់សម្គាល់ឃើញថាមានការកើនឡើងចំនួន ៤,២៤ ភាគរយកាលនៃវិស័យទេសចរកាលពីឆ្នាំមុនបើប្រៀបធៀបទៅនឹងឆ្នាំ ២០១៨ ជាមួយនឹងតួលេខកើនឡើងដល់ ១,៧ លាននាក់។ ប្រជាជនជាង ៣ ០០០ នាក់ក៏ទទួលបានឱកាសការងារនៅក្នុងខេត្តនេះដែរ។
លោក កែន សត្ថាបានមានប្រសាសន៍ថា៖« ទោះបីជាមានសមិទ្ធិផលបែបនេះក៏ដោយខេត្តរបស់យើងនៅតែត្រូវជំនះឧបសគ្គមួយចំនួនដូចជាកង្វះការវិនិយោគក្នុងស្រុកនិងបរទេស» ៕
(ប្រភពព័ត៌មាន: khmertimeskh.com)
មតិពីមិត្តអ្នកអាន