នាយករដ្ឋមន្ត្រីឡាវ និងកម្ពុជា រៀបចំអញ្ជើញមកបំពេញទស្សនកិច្ចនៅវៀតណាម និងចូលរួមវេទិកាអនាគតអាស៊ាន

តបតាមការអញ្ជើញរបស់នាយករដ្ឋមន្ត្រី លោក Le Minh Hung នាយករដ្ឋមន្ត្រីឡាវ លោក Sonexay Siphandone នឹងអញ្ជើញមកបំពេញទស្សនកិច្ចផ្លូវការនៅប្រទេសវៀតណាម និងចូលរួមវេទិកាអនាគតអាស៊ាន ចាប់ពីថ្ងៃទី ៧ ដល់ថ្ងៃទី ៩ ខែមិថុនា។ នាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត នឹងអញ្ជើញមកបំពេញទស្សនកិច្ចផ្លូវការនៅប្រទេសវៀតណាម និងចូលរួមវេទិកានេះ ចាប់ពីថ្ងៃទី ៨ ដល់ថ្ងៃទី ៩ ខែមិថុនា។

បណ្តាដំណើរបំពេញទស្សនកិច្ចនេះប្រព្រឹត្តទៅក្នុងបរិបទដែលទំនាក់ទំនងរវាងវៀតណាមជាមួយប្រទេសជិតខាងទាំងពីរ បន្តរក្សាបាននូវសន្ទុះអភិវឌ្ឍន៍ជាវិជ្ជមាន ជាមួយយន្តការសហប្រតិបត្តិការទ្វេរភាគី និងពហុភាគីជាច្រើនត្រូវបានជម្រុញយ៉ាងខ្លាំងក្លានារយៈពេលថ្មីៗនេះ។

នាយករដ្ឋមន្ត្រី លោក Le Minh Hung (កណ្តាល) ពិសាអាហារពេលព្រឹក និងធ្វើការងារជាមួយនាយករដ្ឋមន្ត្រីកម្ពុជា លោក ហ៊ុន ម៉ាណែត (ឆ្វេង) និងនាយករដ្ឋមន្ត្រីឡាវ លោក Sonexay Siphandone (ស្តាំ) ក្នុងឱកាសអញ្ជើញចូលរួមកិច្ចប្រជុំកំពូលអាស៊ានលើកទី ៤៨ នៅទីក្រុង Cebu ប្រទេសហ្វីលីពីន នាខែឧសភា ឆ្នាំ ២០២៦។

នៅក្នុងសន្និសីទសារព័ត៌មានជាប្រចាំនាថ្ងៃទី ៤ ខែមិថុនា អ្នកនាំពាក្យក្រសួងការបរទេស លោកស្រី Pham Thu Hang បានឱ្យដឹងថា ទំនាក់ទំនងវៀតណាម - ឡាវ បន្តត្រូវបានពង្រឹងតាមទិសដៅកាន់តែជាក់ស្តែង និងមានប្រសិទ្ធភាព។ ប្រទេសទាំងពីររក្សាកម្រិតទំនុកចិត្តនយោបាយខ្ពស់ ផ្តល់ឱ្យគ្នានូវការយកចិត្តទុកដាក់អាទិភាពជាពិសេសនៅក្នុងគោលនយោបាយការបរទេស ទន្ទឹមនឹងនោះបន្តធ្វើឱ្យកាន់តែស៊ីជម្រៅនូវខ្លឹមសារ «ការផ្សារភ្ជាប់យុទ្ធសាស្ត្រ» ដើម្បីឆ្លើយតបទៅនឹងតម្រូវការអភិវឌ្ឍន៍ក្នុងដំណាក់កាលថ្មី។

ចំពោះទំនាក់ទំនងវៀតណាម - កម្ពុជា លោកស្រី Pham Thu Hang បានវាយតម្លៃថា កិច្ចសហប្រតិបត្តិការទ្វេរភាគីកំពុងអភិវឌ្ឍតាមទិសដៅកាន់តែសម្បូរបែប និងមានប្រសិទ្ធភាពជាងមុនលើវិស័យជាច្រើន។ បណ្តាជំនួបពិភាក្សា និងការផ្លាស់ប្តូរកម្រិតខ្ពស់នារយៈពេលកន្លងមក បានបង្កើតជាគ្រឹះស្ថានសម្រាប់ដំណាក់កាលសហប្រតិបត្តិការថ្មី ដោយមានចំណុចស្នូលគឺការលើកកម្ពស់ប្រសិទ្ធភាពនៃការសម្របសម្រួល និងការពង្រឹងទំនុកចិត្តយុទ្ធសាស្ត្ររវាងប្រទេសទាំងពីរ។

នៅក្នុងក្របខ័ណ្ឌនៃដំណើរបំពេញទស្សនកិច្ចនេះ ថ្នាក់ដឹកនាំរដ្ឋាភិបាលឡាវ និងកម្ពុជា ត្រូវបានគ្រោងទុកថានឹងអញ្ជើញចូលរួមសម័យពិភាក្សាទ្វេរភាគីជាមួយនាយករដ្ឋមន្ត្រី លោក Le Minh Hung, ចូលជួបសម្តែងការគួរសមជាមួយថ្នាក់ដឹកនាំជាន់ខ្ពស់វៀតណាម និងចូលរួមសកម្មភាពកិច្ចការបរទេសសំខាន់ៗជាច្រើនទៀត។

វេទិកាអនាគតអាស៊ានលើកទី ៣ នឹងប្រព្រឹត្តទៅនៅទីក្រុងហាណូយក្នុងរយៈពេលពីរថ្ងៃ គឺថ្ងៃទី ៩-១០ ខែមិថុនា ក្រោមប្រធានបទ «រួមគ្នាបង្កើតអនាគតរួម៖ សន្តិភាព វិបុលភាព យកប្រជាពលរដ្ឋជាមជ្ឈមណ្ឌល»។

តាមការឱ្យដឹងពីគណៈកម្មការរៀបចំ គិតមកទល់ពេលនេះមានប្រតិភូជាង ៦០០ រូបបានចុះឈ្មោះចូលរួម រួមមានបណ្តាអ្នកបង្កើតគោលនយោបាយ, អ្នកប្រាជ្ញ, សហគ្រាស និងតំណាងបណ្តាអង្គការជាច្រើនទាំងក្នុង និងក្រៅតំបន់។ ខ្លឹមសារនៃការពិភាក្សានៅឆ្នាំនេះ ផ្តោតការយកចិត្តទុកដាក់លើបណ្តាបញ្ហាលេចធ្លោ ដូចជាការលើកកម្ពស់សមត្ថភាពស្វ័យភាពនិងភាពធន់របស់អាស៊ាន, ការគ្រប់គ្រងបញ្ញាសិប្បនិម្មិត (AI), សន្តិសុខថាមពល, ការបង្ការជម្លោះ និងកិច្ចសហប្រតិបត្តិការអនុតំបន់។

ក្រៅពីបណ្តាសម័យពិភាក្សាផ្លូវការ វេទិកានៅមានសកម្មភាពក្រៅផ្លូវការជាច្រើនទៀត ដូចជាកិច្ចសន្ទនារវាងបណ្តាគណបក្សនយោបាយអាស៊ីអាគ្នេយ៍, សន្និសីទថ្នាក់ដឹកនាំបណ្តាទីក្រុងអាស៊ាន, ការពិភាក្សាអំពីកិច្ចសហប្រតិបត្តិការមេគង្គ និងតួនាទីរបស់យុវជននៅក្នុងដំណើរការកសាងសហគមន៍អាស៊ាន៕

សប្ដាហ៍វប្បធម៌វៀតណាមនៅប្រទេសកម្ពុជាឆ្នាំ ២០២៦ ៖ ចំណុចរបកគំហើញដ៏សំខាន់បង្កើនចំណងសាមគ្គីភាពមិត្តភាពប្រទេសជិតខាង យុគសម័យ - នាល្ងាចថ្ងៃទី ២៦ ខែឧសភា នៅរាជធានីភ្នំពេញ សប្ដាហ៍វប្បធម៌វៀតណាមនៅប្រទេសកម្ពុជាឆ្នាំ ២០២៦ ត្រូវបានបើកដំណើរការជាផ្លូវការ ក្រោមអធិបតីភាពរបស់អនុរដ្ឋមន្ត្រីក្រសួងវប្បធម៌ កីឡា ព្រមទាំងទេសចរណ៍ លោកស្រី Trinh Thi Thuy ព្រមទាំងរដ្ឋមន្ត្រីក្រសួងវប្បធម៌និងវិចិត្រសិល្បៈកម្ពុជា លោកស្រី Phouerng Sackona។

ដំណើរហែក្បួននាំយកយុទ្ធជនពលីត្រឡប់មកវិញពីប្រទេសមិត្ត យុគសម័យ - នៅក្នុង «យុទ្ធនាការ ៥០០ ថ្ងៃយប់ ជម្រុញខ្លាំងក្លាការអនុវត្តការស្វែងរក ការប្រមូលផ្តុំ ព្រមទាំងការកំណត់អត្តសញ្ញាណអដ្ឋិធាតុយុទ្ធជនពលី» (យុទ្ធនាការ) បណ្ដាក្រុមប្រមូលផ្តុំវៀតណាមកំពុងបន្តការស្វែងរកអដ្ឋិធាតុទ័ពស្ម័គ្រចិត្ត ព្រមទាំងអ្នកជំនាញការវៀតណាមដែលបានលះបង់ជីវិតនៅលើទឹកដីឡាវនិងកម្ពុជា ដោយដើរតាមការចងចាំរបស់បុគ្គលជាសាក្សី ព្រមទាំងការគាំទ្ររបស់ប្រជាជននៃប្រទេសមិត្ត ដើម្បីនាំយកបណ្ដាយុទ្ធជនពលីត្រឡប់មកកាន់មាតុភូមិកំណើតវិញ។

ឌឹកអាញ់

thoidai.com.vn