យុវជនគឺជាកម្លាំងកំណត់ទម្រង់នាពេលអនាគតនៃទំនាក់ទំនងវៀតណាម - ចិន

កម្មវិធីផ្លាស់ប្តូរយោបល់នេះ មានការចូលរួមពីសំណាក់និស្សិត អ្នកប្រាជ្ញ និងនិស្សិតបរទេសនៃប្រទេសទាំងពីរលើវិស័យសហប្រតិបត្តិការវប្បធម៌ អប់រំ ទេសចរណ៍ និងការផ្លាស់ប្តូររវាងប្រជាជននិងប្រជាជន។ តាមប្រសាសន៍របស់ឯកអគ្គរដ្ឋទូត លោក Pham Thanh Binh គ្រឹះស្ថានដ៏ជ្រាលជ្រៅ និងរឹងមាំបំផុតនៃទំនាក់ទំនងវៀតណាម - ចិន គឺមនោសញ្ចេតនារវាងប្រជាជននៃប្រទេសទាំងពីរ ដែលក្នុងនោះយុវជននឹងក្លាយជាកម្លាំងកំណត់ទម្រង់នាពេលអនាគតនៃទំនាក់ទំនងទ្វេភាគី។

និស្សិតចិនយ៉ាងច្រើនកុះករដែលកំពុងសិក្សានៅសាកលវិទ្យាល័យភាសាបរទេសប៉េកាំង, សាកលវិទ្យាល័យប៉េកាំង, សាកលវិទ្យាល័យ Tsinghua នៃប្រទេសចិន ព្រមទាំងតំណាងនិស្សិតវៀតណាមដែលកំពុងសិក្សានៅទីនោះ បានអញ្ជើញចូលរួមក្នុងកម្មវិធីផ្លាស់ប្តូរយោបល់នេះ។

ឯកអគ្គរដ្ឋទូត លោក Pham Thanh Binh បានណែនាំដល់លោកគ្រូ អ្នកគ្រូ និងនិស្សិតចិននូវបណ្តាសមិទ្ធផលអភិវឌ្ឍន៍លេចធ្លោរបស់វៀតណាម គោលដៅយុទ្ធសាស្ត្រអភិវឌ្ឍន៍ប្រទេសជាតិរហូតដល់ឆ្នាំ ២០៣០ និងចក្ខុវិស័យរហូតដល់ឆ្នាំ ២០៤៥ ព្រមទាំងបានចែករំលែកអំពីបណ្តាទិសដៅធំៗក្នុងទំនាក់ទំនងវៀតណាម - ចិន នាពេលខាងមុខ។ ឯកអគ្គរដ្ឋទូតបានវាយតម្លៃខ្ពស់ចំពោះប្រវត្តិសហប្រតិបត្តិការអប់រំ ការបណ្តុះបណ្តាល និងការស្រាវជ្រាវរវាងប្រទេសទាំងពីរ; ដោយបានឱ្យដឹងថា បច្ចុប្បន្នមានសាកលវិទ្យាល័យប្រមាណ ៣០ នៅប្រទេសចិនបានដាក់បញ្ចូលភាសាវៀតណាមទៅក្នុងកម្មវិធីបង្រៀន ដែលនេះឆ្លុះបញ្ចាំងពីតម្រូវការកាន់តែរស់រវើកចំពោះសហប្រតិបត្តិការអប់រំ និងការស្រាវជ្រាវអំពីវៀតណាម។

ឯកអគ្គរដ្ឋទូតបានចាត់ទុកថា ការផ្លាស់ប្តូររវាងប្រជាជននិងប្រជាជននៃប្រទេសទាំងពីរ កំពុងត្រូវបានពង្រីកកាន់តែធំទូលាយ តាមរយៈតន្ត្រី វិស័យភាពយន្ត បណ្តាញសង្គម ការផ្លាស់ប្តូរការសិក្សាអប់រំ និងបណ្តាសកម្មភាពយុវជន។ ឯកអគ្គរដ្ឋទូតបានសម្តែងនូវជំនឿចិត្តថា ការអនុវត្ត «ឆ្នាំសហប្រតិបត្តិការទេសចរណ៍វៀតណាម - ចិន ២០២៦-២០២៧» នឹងបន្តបង្កើតជាកម្លាំងចលករជម្រុញការផ្លាស់ប្តូរជាក់ស្តែងជាងមុនរវាងប្រជាជននៃប្រទេសទាំងពីរ បង្កើនការយល់ដឹង និងការតភ្ជាប់សង្គម។

ឯកអគ្គរដ្ឋទូត លោក Pham Thanh Binh ថ្លែងសុន្ទរកថានៅក្នុងកម្មវិធីផ្លាស់ប្តូរយោបល់។

មុននោះ នៅក្នុងជំនួបសម្តែងការគួរសមជាមួយសាកលវិទ្យាធិការនៃសាកលវិទ្យាល័យភាសាបរទេសប៉េកាំង លោក Jia Wenjian ឯកអគ្គរដ្ឋទូត លោក Pham Thanh Binh បានអះអាងថា ស្ថានឯកអគ្គរដ្ឋទូតវៀតណាមប្រចាំនៅប្រទេសចិន ត្រៀមខ្លួនជាស្រេចក្នុងការដើរតួនាទីជាស្ពានចម្លងដើម្បីជម្រុញសហប្រតិបត្តិការរវាងសាកលវិទ្យាល័យភាសាបរទេសប៉េកាំង ជាមួយបណ្តាគ្រឹះស្ថានអប់រំ និងបណ្តុះបណ្តាលរបស់វៀតណាម, ពង្រីកបណ្តាកម្មវិធីភ្ជាប់ទំនាក់ទំនងបណ្តុះបណ្តាល ការផ្លាស់ប្តូរការសិក្សាអប់រំ និងការផ្លាស់ប្តូរនិស្សិតនាពេលខាងមុខ។

ភាគីសាកលវិទ្យាល័យភាសាបរទេសប៉េកាំង ក៏បានសម្តែងនូវបំណងប្រាថ្នាចង់បន្តអនុវត្តបណ្តាគំនិតផ្តួចផ្តើមសហប្រតិបត្តិការថ្មីៗ សំដៅបង្កើតបន្ថែមឱកាសសិក្សារៀនសូត្រ ស្រាវជ្រាវ និងផ្លាស់ប្តូរយោបល់សម្រាប់និស្សិតនៃប្រទេសទាំងពីរ។

នៅក្នុងបរិបទដែលទំនាក់ទំនងវៀតណាម - ចិន បន្តរក្សាបាននូវនិន្នាការអភិវឌ្ឍន៍ជាវិជ្ជមាន ការផ្លាស់ប្តូររវាងជំនាន់វ័យក្មេង សហប្រតិបត្តិការអប់រំ និងការតភ្ជាប់រវាងប្រជាជននិងប្រជាជន បន្តត្រូវបានចាត់ទុកថាជាគ្រឹះស្ថានដ៏សំខាន់ ដើម្បីពង្រឹងការយល់ដឹង ទំនុកចិត្ត និងអភិវឌ្ឍន៍ទំនាក់ទំនងទ្វេភាគីឱ្យមានភាពយូរអង្វែង និងរឹងមាំ៕

កងកម្លាំងនគរបាលសមុទ្រវៀតណាម ចេញដំណើរទៅល្បាតរួមជាមួយកងកម្លាំងនគរបាលសមុទ្រចិន យុគសម័យ - នាថ្ងៃទី ២០ ខែមេសា នៅទីក្រុងហាយហ្វុង ក្រុមនាវានៃកងកម្លាំងនគរបាលសមុទ្រវៀតណាម បានចាកចេញពីកំពង់ផែ ដើម្បីអនុវត្តភារកិច្ចល្បាតរួមជាមួយកងកម្លាំងនគរបាលសមុទ្រចិន នៅតំបន់សមុទ្រក្បែរខ្សែបន្ទាត់កំណត់ព្រំដែនក្នុងឈូងសមុទ្របាក់បូ លើកទី ១ ក្នុងឆ្នាំ ២០២៦។

កម្ពុជា-ចិន រៀបចំកិច្ចសន្ទនាយុទ្ធសាស្ត្រ "២+២" ជាលើកដំបូង យុគសម័យ - កម្ពុជា និងចិន នឹងចាប់ផ្តើមជាផ្លូវការនូវយន្តការកិច្ចសន្ទនាយុទ្ធសាស្ត្រ "២+២" ជាលើកដំបូង រវាងរដ្ឋមន្ត្រីការបរទេស និងរដ្ឋមន្ត្រីការពារជាតិនៃប្រទេសទាំងពីរ នៅល្ងាចថ្ងៃទី២២ ខែមេសា ខាងមុខនេះ។ ព្រឹត្តិការណ៍នេះ កត់សម្គាល់នូវជំហានរីកចម្រើនថ្មីមួយ ក្នុងទំនាក់ទំនងសហប្រតិបត្តិការយុទ្ធសាស្ត្ររវាងប្រទេសទាំងពីរ។

ឌឹកអាញ់

thoidai.com.vn