ទេសចរណ៍វៀតណាម - ចិន៖ ការដោះដូរវប្បធម៌ ជំរុញទំនាក់ទំនងមិត្តភាព និងកិច្ចសហប្រតិបត្តិការ

ថ្លែងមតិនៅក្នុងកម្មវិធី លោក Truong Duc Son ប្រធានមជ្ឈមណ្ឌលវប្បធម៌ចិនប្រចាំនៅ Ha Noi បានឱ្យដឹងថា៖ ថ្ងៃទី ១៩ ខែឧសភា ឆ្នាំ ២០២៦ គឺជា «ទិវាទេសចរណ៍ចិន» លើកទី ១៦ ក្រោមប្រធានបទ «រីករាយជាមួយទេសចរណ៍ប្រកបដោយគុណភាព រួមគ្នាស្វែងយល់ពីទឹកដីដ៏ស្រស់ត្រកាល»។

យោងតាមលោក Truong Duc Son ប្រធានបទឆ្នាំនេះបានសង្កត់ធ្ងន់លើតួនាទីរបស់ទេសចរណ៍នៅក្នុងការផ្សព្វផ្សាយ, បង្កើនការដោះដូរវប្បធម៌ និងជំរុញទំនាក់ទំនងមិត្តភាពរវាងបណ្ដាប្រជាជាតិ។ លោកបានអះអាងថា ស្មារតីនេះគឺស្របតាមទិសដៅសហប្រតិបត្តិការវប្បធម៌ - ទេសចរណ៍ ដែលវៀតណាម និងចិនកំពុងរួមគ្នាជំរុញ។

លោក Truong Duc Son ប្រធានមជ្ឈមណ្ឌលវប្បធម៌ចិនប្រចាំនៅ Ha Noi ថ្លែងមតិ។

លោក Truong Duc Son បានឱ្យដឹងថា ស្ថិតក្រោមការតម្រង់ទិសយុទ្ធសាស្ត្ររបស់ថ្នាក់ដឹកនាំជាន់ខ្ពស់នៃប្រទេសទាំងពីរ ដំណាក់កាលឆ្នាំ ២០២៦ - ២០២៧ ត្រូវបានកំណត់ថាជា «ឆ្នាំសហប្រតិបត្តិការទេសចរណ៍វៀតណាម - ចិន»។ នេះត្រូវបានចាត់ទុកថាជាស្នាមរបត់ដ៏សំខាន់នៅក្នុងកិច្ចសហប្រតិបត្តិការវប្បធម៌ - ទេសចរណ៍ទ្វភាគី បង្កើតថែមនូវកម្លាំងចលករជំរុញការដោះដូរប្រជាជន និងអភិវឌ្ឍន៍ទេសចរណ៍ទៅតាមទិសដៅស៊ីជម្រៅ ជាក់ស្តែង និងផ្តល់ផលប្រយោជន៍ទៅវិញទៅមក។

លោក Truong Duc Son បានវាយតម្លៃថា ក្នុងបណ្ដាឆ្នាំជិតៗនេះ ការដោះដូរទេសចរណ៍ទ្វិទិសរវាងវៀតណាម និងចិន បន្តអភិវឌ្ឍន៍យ៉ាងរស់រវើក។ ចំណុចដៅជាច្រើនរបស់ចិនដូចជា Que Lam, Le Giang, Truong Gia Gioi ឬ Thien Son Thien Tri កាន់តែទាក់ទាញភ្ញៀវទេសចរវៀតណាម។ ទន្ទឹមនឹងនោះ Ha Noi, Thanh pho Ho Chi Minh, Vinh Ha Long, Da Nang និង Nha Trang ក៏បានក្លាយជាចំណុចដៅដ៏ស៊ាំធ្លាប់ចំពោះភ្ញៀវទេសចរចិនផងដែរ។

លោក Truong Quoc Hung ប្រធានក្លឹបទេសចរណ៍ UNESCO Ha Noi។

គួរឱ្យកត់សម្គាល់ លោក Truong Duc Son បានឱ្យដឹងថា ភាគីចិនកំពុងបន្តរៀបចំ កែសម្រួល និងតភ្ជាប់បណ្ដាខ្សែនិងចំណុចនៃតំបន់កេរដំណែលដែលពាក់ព័ន្ធនឹងប្រធាន Ho Chi Minh ដើម្បីកសាងបណ្ដាផលិតផលទេសចរណ៍ឯកទេស «តាមដានដានជើងប្រធាន Ho Chi Minh»។ បណ្ដាខ្សែនិងចំណុចទាំងនេះ គឺភ្ជាប់ជាមួយបណ្ដាទីកន្លែងដែលធ្លាប់បានកត់ត្រានូវសកម្មភាពបដិវត្តន៍របស់ប្រធាន Ho Chi Minh នៅប្រទេសចិន ដូចជា Quang Chau, Que Lam, Lieu Chau, Trung Khanh, Con Minh ឬ Dien An។

យោងតាមលោក Truong Duc Son មជ្ឈមណ្ឌលវប្បធម៌ចិនប្រចាំនៅ Ha Noi នឹងបន្តពង្រីកតួនាទីជាស្ពានចម្លងនៃការដោះដូរប្រជាជន បង្កើនការសហការជាមួយបណ្ដាសហគ្រាស និងអង្គភាពពាក់ព័ន្ធ សំដៅជំរុញសកម្មភាពសហប្រតិបត្តិការវប្បធម៌ - ទេសចរណ៍ដ៏សម្បូរបែបបន្ថែមទៀតនាពេលខាងមុខ។

នៅក្នុងកម្មវិធី លោក Truong Quoc Hung ប្រធានក្លឹបទេសចរណ៍ UNESCO Ha Noi បានវាយតម្លៃថា ចិនគឺជាប្រទេសមួយក្នុងចំណោមប្រទេសដែលមានវិស័យទេសចរណ៍អភិវឌ្ឍន៍ប្រកបដោយភាពរស់រវើក និងមានឥទ្ធិពលយ៉ាងធំធេងនៅលើពិភពលោក។

បណ្ដាតំណាងថតរូបទុកជាអនុស្សាវរីយ៍។

លោក Truong Quoc Hung បានចាត់ទុកថា ចំណុចលេចធ្លោនៃទេសចរណ៍ចិននាពេលបច្ចុប្បន្ន គឺការរួមបញ្ចូលគ្នារវាងកេរដំណែលប្រពៃណីជាមួយបច្ចេកវិទ្យាទំនើប រវាងការអភិរក្សវប្បធម៌ និងការអភិវឌ្ឍសេដ្ឋកិច្ចទេសចរណ៍។ យោងតាមលោក បណ្ដាគំរូទេសចរណ៍វៃឆ្លាត, ទេសចរណ៍បៃតង, ទេសចរណ៍ធម្មជាតិ, ទេសចរណ៍រាត្រី និងទេសចរណ៍វប្បធម៌ឌីជីថលនៅប្រទេសចិន កំពុងបង្កើតនូវនិន្នាការថ្មីៗជាច្រើនសម្រាប់តំបន់អាស៊ី។

លោក Truong Quoc Hung ក៏បានវាយតម្លៃខ្ពស់ចំពោះការបង្កើនការដោះដូរប្រជាជន តាមរយៈកិច្ចសហប្រតិបត្តិការទេសចរណ៍រវាងវៀតណាម និងចិនក្នុងបណ្ដាឆ្នាំជិតៗនេះ។ លោកបានវាយតម្លៃថា ដំណាក់កាលឆ្នាំ ២០២៦ - ២០២៧ នឹងបើកចេញនូវកាលានុវត្តភាពសហប្រតិបត្តិការកាន់តែច្រើនថែមទៀតសម្រាប់បណ្ដាមូលដ្ឋាន, សហគ្រាសទេសចរណ៍, ក្រុមហ៊ុនអាកាសចរណ៍ និងវិនិយោគិននៃប្រទេសទាំងពីរ នៅក្នុងបណ្ដាវិស័យទេសចរណ៍ផ្លូវដែក, អាកាសចរណ៍, ទេសចរណ៍ព្រំដែន និងទេសចរណ៍សម្រាប់យុវវ័យ។

នៅក្នុងក្របខ័ណ្ឌនៃកម្មវិធី តំណាងបណ្ដាសហគ្រាសទេសចរណ៍វៀតណាម បានចែករំលែកនូវបទពិសោធន៍ជាក់ស្តែងនៅពេលទៅកម្សាន្តទេសចរណ៍នៅប្រទេសចិន ណែនាំបណ្ដាចំណុចដៅលេចធ្លោ និងដោះដូរអំពីកាលានុវត្តភាពសហប្រតិបត្តិការវប្បធម៌ - ទេសចរណ៍រវាងសហគ្រាសនៃប្រទេសទាំងពីរ៕

ការផ្លាស់ប្តូរប្រជាជននិងប្រជាជន ជំរុញទំនាក់ទំនងមិត្តភាព និងកិច្ចសហប្រតិបត្តិការរវាងវៀតណាម និងនូវែលសេឡង់ យុគសម័យ - នាថ្ងៃទី៩ ខែកញ្ញា នៅប្រទេសនូវែលសេឡង់ អនុប្រធានរដ្ឋសភាវៀតណាម Nguyen Thi Thanh បានទទួលជួបជាមួយប្រធានសមាគមមិត្តភាពនូវែលសេឡង់-វៀតណាម លោក Anand Satyanand អតីតអគ្គទេសាភិបាលនូវែលសេឡង់ ដែលកំពុងបំពេញទស្សនកិច្ចការងារនៅអូស្ត្រាលី និងនូវែលសេឡង់។ ភាគីទាំងពីរបានសង្កត់ធ្ងន់លើសារៈសំខាន់នៃការផ្លាស់ប្តូរប្រជាជនទៅប្រជាជនក្នុងការលើកកម្ពស់ទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរ។

ទេសចរណ៍វៀតណាម៖ ឱកាសផ្សព្វផ្សាយខេត្ត Ninh Binh ទៅកាន់ទីផ្សារឥណ្ឌា និងអាស៊ីខាងត្បូង ខេត្ត Ninh Binh បានកំណត់តំបន់អាស៊ីខាងត្បូង ជាពិសេសប្រទេសឥណ្ឌាជាទីផ្សារដ៏ធំ និងសក្តានុពល ដោយសន្យាថានឹងអភិវឌ្ឍយ៉ាងឆាប់រហ័សនាពេលខាងមុខ។

ឌឹកអាញ់

thoidai.com.vn