វៀតណាម មានបំណងចង់ដាក់ឱ្យអនុវត្តអនុសញ្ញាហាណូយប្រកបដោយប្រសិទ្ធភាពក្នុងពេលឆាប់ៗខាងមុខ

វៀតណាម បន្តបង្កើនកិច្ចសហប្រតិបត្តិការជាមួយទីភ្នាក់ងារ UNODC

នាថ្ងៃទី ១៣ ខែឧសភា នៅទីស្នាក់ការអង្គការសហប្រជាជាតិ ក្នុងរដ្ឋធានីវីយែន (សាធារណរដ្ឋអូទ្រីស) អគ្គនាយិកាថ្មីនៃការិយាល័យអង្គការសហប្រជាជាតិប្រចាំនៅទីក្រុងវីយែន (UNOV) ព្រមទាំងជានាយិកាប្រតិបត្តិនៃទីភ្នាក់ងារអង្គការសហប្រជាជាតិប្រឆាំងគ្រឿងញៀន និងបទល្មើស (UNODC) លោកស្រី Monica Kathina Juma បានចូលកាន់តំណែងជាផ្លូវការ និងបានជួបសំណេះសំណាលជាមួយបណ្ដាឯកអគ្គរដ្ឋទូត និងប្រធានស្ថានតំណាងអចិន្ត្រៃយ៍នៃបណ្ដាប្រទេសប្រចាំនៅអង្គការសហប្រជាជាតិ ព្រមទាំងបណ្ដាអង្គការអន្តរជាតិនៅទីក្រុងវីយែន។

អញ្ជើញចូលរួមក្នុងជំនួបនោះ ឯកអគ្គរដ្ឋទូត លោក Vu Le Thai Hoang ប្រធានស្ថានតំណាងអចិន្ត្រៃយ៍វៀតណាមប្រចាំនៅអង្គការសហប្រជាជាតិ និងបណ្ដាអង្គការអន្តរជាតិនៅទីក្រុងវីយែន បានប្រគល់លិខិតអបអរសាទររបស់រដ្ឋមន្ត្រីក្រសួងការបរទេសលោក Le Hoai Trung ជូនចំពោះលោកស្រី Monica Kathina Juma ព្រមទាំងតំណាងឱ្យរដ្ឋ និងរដ្ឋាភិបាលវៀតណាម ផ្ញើសារអបអរសាទរជូនចំពោះលោកស្រីក្នុងឋានៈថ្មីនេះ។

ឯកអគ្គរដ្ឋទូត លោក Vu Le Thai Hoang បានបញ្ជាក់ថា វៀតណាមវាយតម្លៃខ្ពស់ចំពោះតួនាទី និងការជួយឧបត្ថម្ភរបស់ UNODC ក្នុងការលើកកម្ពស់សមត្ថភាពជាតិអំពីការបង្ការ និងទប់ស្កាត់បទល្មើស, យុត្តិធម៌ព្រហ្មទណ្ឌ, ការត្រួតពិនិត្យគ្រឿងញៀន ក៏ដូចជាការឆ្លើយតបទៅនឹងបណ្ដាបញ្ហាប្រឈមសន្តិសុខមិនមែនប្រពៃណី ជាពិសេសគឺបទល្មើសតាមប្រព័ន្ធអ៊ីនធឺណិត។ វៀតណាមតែងតែចាត់ទុកជាសំខាន់នូវទំនាក់ទំនងសហប្រតិបត្តិការជាមួយ UNODC ហើយភាគីទាំងពីរបានសម្របសម្រួលយ៉ាងមានប្រសិទ្ធភាពក្នុងសកម្មភាពទ្វេភាគីជាច្រើន ក៏ដូចជាបណ្ដាលំហូរដំណើរការពហុភាគីនានាដែលពាក់ព័ន្ធនឹងការបង្ការ និងទប់ស្កាត់បទល្មើសឆ្លងដែន។

ក្នុងឱកាសនេះដែរ ប្រធានស្ថានតំណាងវៀតណាមក៏បានថ្លែងអំណរគុណចំពោះ UNODC ដែលបានសម្របសម្រួលយ៉ាងជិតស្និទ្ធជាមួយវៀតណាម ក្នុងការរៀបចំប្រកបដោយជោគជ័យនូវពិធីបើកឱ្យចុះហត្ថលេខាលើអនុសញ្ញាអង្គការសហប្រជាជាតិស្តីពីការប្រឆាំងបទល្មើសតាមប្រព័ន្ធអ៊ីនធឺណិត នៅទីក្រុងហាណូយ នាខែតុលា ឆ្នាំ ២០២៥ កន្លងទៅ ដែលត្រូវបានហៅម្យ៉ាងទៀតថា “អនុសញ្ញាហាណូយ”។ វៀតណាមមានបំណងចង់បន្តសម្របសម្រួលជាមួយ UNODC ក្នុងបណ្ដាលំហូរដំណើរការការទូត និងគតិយុត្តិចាំបាច់នានា ដើម្បីឱ្យអនុសញ្ញានេះចូលជាធរមានក្នុងពេលឆាប់ៗ និងត្រូវបានដាក់ឱ្យអនុវត្តប្រកបដោយប្រសិទ្ធភាពក្នុងស្ថានភាពជាក់ស្តែង ដែលរួមចំណែកបង្កើនសន្តិសុខបណ្តាញអ៊ីនធឺណិត ការបង្ការ និងទប់ស្កាត់បទល្មើសបច្ចេកវិទ្យាខ្ពស់ ព្រមទាំងជួយឧបត្ថម្ភដល់បណ្ដាប្រទេសក្នុងការជំរុញនវានុវត្តន៍ និងការអភិវឌ្ឍបច្ចេកវិទ្យាប្រកបដោយសុវត្ថិភាព និងចីរភាព។

ឯកអគ្គរដ្ឋទូត លោក Vu Le Thai Hoang បានសម្តែងនូវជំនឿចិត្តយ៉ាងមុតមាំថា ក្រោមការដឹកនាំរបស់លោកស្រី Monica Kathina Juma ទីភ្នាក់ងារ UNODC នឹងបន្តពង្រីកតួនាទីមជ្ឈិមក្នុងការជំរុញកិច្ចសហប្រតិបត្តិការអន្តរជាតិ ដើម្បីប្រយុទ្ធប្រឆាំងនឹងបទល្មើសចាត់តាំងឆ្លងដែន បង្កើនយុត្តិធម៌ នីតិរដ្ឋ និងជួយឧបត្ថម្ភដល់ការសម្រេចបាននូវបណ្ដាគោលដៅអភិវឌ្ឍន៍ប្រកបដោយចីរភាព។

រូបភាពឧទាហរណ៍

ថ្លែងមតិក្នុងជំនួបនោះ លោកស្រី Monica Kathina Juma បានសង្កត់ធ្ងន់ថា បណ្ដាប្រភេទបទល្មើសឆ្លងដែន ដូចជាការជួញដូរគ្រឿងញៀន ការជួញដូរមនុស្ស អំពើពុករលួយ អំពើភេរវកម្ម និងបទល្មើសតាមប្រព័ន្ធអ៊ីនធឺណិត កំពុងមានការវិវត្តន៍កាន់តែស្មុគស្មាញពីមួយថ្ងៃទៅមួយថ្ងៃ ដែលបង្កផលប៉ះពាល់អវិជ្ជមានដល់សន្តិសុខនៃប្រទេសជាច្រើន ក៏ដូចជាលំហូរដំណើរការនៃការសម្រេចបាននូវបណ្ដាគោលដៅអភិវឌ្ឍន៍ប្រកបដោយចីរភាពសកល។

តាមលោកស្រី Juma ប្រព័ន្ធពហុភាគី និងអង្គការសហប្រជាជាតិ នាពេលបច្ចុប្បន្នកំពុងទទួលរងនូវសម្ពាធជាច្រើន ជាពិសេសក្នុងបរិបទនៃការលំបាកផ្នែកហិរញ្ញវត្ថុ ដែលជះឥទ្ធិពលដល់សកម្មភាពរបស់អង្គការសហប្រជាជាតិនៅទីក្រុងវីយែន។ ទោះជាយ៉ាងណាក៏ដោយ លោកស្រីបានបញ្ជាក់ថា និយមពហុភាគីនៅតែរក្សាតួនាទីគន្លឹះក្នុងការឆ្លើយតបទៅនឹងបណ្ដាបញ្ហាប្រឈមសកលនាពេលបច្ចុប្បន្ន។

លោកស្រីបានចាត់ទុកថា ការលំបាកនាពេលបច្ចុប្បន្នក៏បានបើកចេញនូវឱកាសដើម្បីឱ្យអង្គការសហប្រជាជាតិជំរុញនវានុវត្តន៍ និងការកែទម្រង់សកម្មភាពផងដែរ។ តាមរយៈលំហូរដំណើរការកែទម្រង់ “UN80” ដែលបំផុសឡើងដោយអគ្គលេខាធិការអង្គការសហប្រជាជាតិ អង្គការនេះមិនត្រឹមតែឆ្ពោះទៅរកគោលដៅកាត់បន្ថយចំណាយប៉ុណ្ណោះទេ ប៉ុន្តែថែមទាំងលើកកម្ពស់ប្រសិទ្ធភាពប្រតិបត្តិការ បង្កើនភាពបត់បែន និងភាពជឿជាក់ក្នុងការដាក់ឱ្យអនុវត្តសកម្មភាពនានា ចំពោះមុខបរិបទអន្តរជាតិដែលកំពុងផ្លាស់ប្តូរយ៉ាងរហ័ស។

ចំពោះទិសដៅក្នុងពេលខាងមុខ លោកស្រី Monica Kathina Juma បានឱ្យដឹងថា អាទិភាពចម្បងមួយគឺការបំពេញបន្ថែមនូវយុទ្ធសាស្ត្រសកម្មភាពថ្មីរបស់ UNODC រួមជាមួយផែនទីបង្ហាញផ្លូវកែទម្រង់ដែលស្របគ្នា ដើម្បីជួយឱ្យអង្គការដំណើរការដោយផ្ដោតការយកចិត្តទុកដាក់ មានប្រសិទ្ធភាព និងបន្សាំខ្លួនបានល្អជាងមុនទៅនឹងបណ្ដាបញ្ហាប្រឈមដែលកំពុងលេចឡើងថ្មីៗ។

លោកស្រីបានប្តេជ្ញាបន្តជំរុញវិធីសាស្ត្រចូលទៅជិតប្រកបដោយលក្ខណៈគ្រប់ជ្រុងជ្រោយ និងបរិយាបន្ន បង្កើនការសម្របសម្រួលរវាងបណ្ដាកម្មវិធី និងវិស័យជំនាញ ព្រមទាំងពង្រីកកិច្ចសហប្រតិបត្តិការជាមួយបណ្ដាអង្គការក្នុងតំបន់ មជ្ឈដ្ឋានសិក្សាធិការ វិស័យឯកជន និងបណ្ដាតួអង្គបច្ចេកវិទ្យា ដើម្បីលើកកម្ពស់ប្រសិទ្ធភាពនៃការឆ្លើយតបទៅនឹងបញ្ហាប្រឈមសន្តិសុខមិនមែនប្រពៃណី។

ប្រមុខដឹកនាំនៃទីភ្នាក់ងារ UNODC ក៏បានសង្កត់ធ្ងន់លើភាពចាំបាច់ក្នុងការធានាឱ្យសំឡេងរបស់បណ្ដាប្រទេសកំពុងអភិវឌ្ឍន៍ ជាពិសេសគឺបណ្ដាប្រទេសដែលស្ថិតក្នុងតំបន់ភូមិភាគខាងត្បូងសកល (Global South) ត្រូវបានឆ្លុះបញ្ចាំងឱ្យបានពេញលេញជាងមុន ក្នុងដំណើរការកសាងបណ្ដាអាទិភាពរបស់អង្គការ។

ខិតជិតដល់ទីបញ្ចប់នៃសុន្ទរកថា លោកស្រី Monica Kathina Juma បានចែករំលែកនូវបាវចនាណែនាំផ្លូវចំនួនបីសម្រាប់អាណត្តិរបស់ខ្លួន រួមមាន “ការទទួលខុសត្រូវសមូហភាព” “ជំនឿចិត្ត” និង “ការប្តេជ្ញាចិត្ត” ព្រមទាំងបានបញ្ជាក់ថានឹងជំរុញកិច្ចសហប្រតិបត្តិការដោយបើកចំហ និងប្រកបដោយលក្ខណៈស្ថាបនាជាមួយបណ្ដាប្រទេសជាសមាជិកទាំងអស់ ដើម្បីលើកកម្ពស់ប្រសិទ្ធភាព និងផលប៉ះពាល់ជាក់ស្តែងរបស់ UNODC ចំពោះសហគមន៍សកលលោក៕

សារដ៏រឹងមាំអំពីវៀតណាមជាសមាជិកសកម្ម និងមានទំនួលខុសត្រូវនៃសហគមន៍អន្តរជាតិ យុគសម័យ - នៅថ្ងៃទី ៨ ខែសីហា ឆ្នាំ ២០២៤ នៅទីក្រុងញូវយ៉ក គណៈកម្មាធិការឯកទេសនៃអង្គការសហប្រជាជាតិបានអនុម័តសេចក្តីព្រាងអនុសញ្ញាអង្គការសហប្រជាជាតិប្រឆាំងនឹងឧក្រិដ្ឋកម្មតាមអ៊ីនធឺណិត។ ក្នុងឱកាសនេះ អនុរដ្ឋមន្ត្រីអចិន្ត្រៃយ៍ក្រសួងការបរទេស លោក Nguyen Minh Vu បានឆ្លើយសំណួររបស់អ្នកសារព័ត៌មាន។

ពិធីបើកសម្ពោធដ៏ឧឡារិកនៃការចុះហត្ថលេខាលើអនុសញ្ញាអង្គការសហប្រជាជាតិប្រឆាំងនឹងឧក្រិដ្ឋកម្មតាមអ៊ីនធឺណិត យុគសម័យ - ពិធីចុះហត្ថលេខា និងសន្និសីទកម្រិតខ្ពស់នៃអនុសញ្ញាអង្គការសហប្រជាជាតិប្រឆាំងនឹងឧក្រិដ្ឋកម្មតាមអ៊ីនធឺណិត ត្រូវបានប្រារព្ធឡើងយ៉ាងឱឡារិក ក្រោមប្រធានបទ "ប្រយុទ្ធប្រឆាំងនឹងឧក្រិដ្ឋកម្មតាមអ៊ីនធឺណិត ចែករំលែកការទទួលខុសត្រូវ សម្លឹងមើលទៅអនាគត"។

ឌឹកអាញ់

thoidai.com.vn