ការផ្លាស់ប្តូររវាងប្រជាជន វប្បធម៌ និងទេសចរណ៍ ជាចំណុចលេចធ្លោក្នុងទំនាក់ទំនងវៀតណាម-ឥណ្ឌា

ក្នុងឱកាសនៃដំណើរទស្សនកិច្ចផ្លូវរដ្ឋរបស់អគ្គលេខាបក្ស និងជាប្រធានរដ្ឋ លោក To Lam នៅប្រទេសឥណ្ឌា ចាប់ពីថ្ងៃទី ៥-៧ ឧសភា ឆ្លើយតបនឹងបទសម្ភាសន៍ជាមួយសារព័ត៌មាន ឯកអគ្គរដ្ឋទូតវិសាមញ្ញ និងពេញសមត្ថភាពវៀតណាមប្រចាំនៅឥណ្ឌា ទទួលបន្ទុកប្រទេសនេប៉ាល់ និងប៊ូតង់ លោក Nguyen Thanh Hai បានបញ្ជាក់ថា៖

ជាដំបូង ដំណើរទស្សនកិច្ចនេះមានអត្ថន័យប្រវត្តិសាស្ត្រ ដោយសារនេះជាលើកដំបូងដែលអគ្គលេខាបក្ស និងជាប្រធានរដ្ឋនៃប្រទេសវៀតណាម អញ្ជើញមកបំពេញទស្សនកិច្ចផ្លូវរដ្ឋនៅប្រទេសឥណ្ឌា។

ជាពិសេស ដំណើរទស្សនកិច្ចនេះប្រព្រឹត្តទៅមិនយូរប៉ុន្មាន បន្ទាប់ពីមហាសន្និបាតលើកទី XIV របស់បក្សទទួលបានជោគជ័យយ៉ាងត្រចះត្រចង់ និងរដ្ឋសភាវៀតណាមបានបង្រួបបង្រួមនូវរាល់តំណែងថ្នាក់ដឹកនាំគន្លឹះ ដែលបង្ហាញពីការយកចិត្តទុកដាក់ខ្ពស់បំផុតរបស់វៀតណាមចំពោះឥណ្ឌា ដែលជាមិត្តភក្តិជិតស្និទ្ធ និងជាដៃគូយុទ្ធសាស្ត្រគ្រប់ជ្រុងជ្រោយ។

អគ្គលេខាបក្ស និងជាប្រធានរដ្ឋ លោក To Lam ជួបពិភាក្សាការងារជាមួយនាយករដ្ឋមន្ត្រីឥណ្ឌា លោក Narendra Modi ក្នុងក្របខ័ណ្ឌនៃសន្និសីទកំពូលនៃអនាគត និងសម័យប្រជុំពិភាក្សាកម្រិតខ្ពស់នៃមហាសន្និបាតអង្គការសហប្រជាជាតិ នៅទីក្រុងញូវយ៉ក (សហរដ្ឋអាមេរិក) កាលពីខែកញ្ញា ឆ្នាំ ២០២៤។

ដំណើរទស្សនកិច្ចនេះក៏បានបង្ហាញយ៉ាងច្បាស់នូវមាគ៌ាការបរទេសដែលមហាសន្និបាតលើកទី XIV របស់បក្សបានដាក់ចេញ នោះគឺឯករាជ្យ ម្ចាស់ការ ភាពធន់ សន្តិភាព មិត្តភាព សហប្រតិបត្តិការ និងការអភិវឌ្ឍ ពហុភាគីភាវូបនីយកម្ម និងការធ្វើឱ្យមានភាពសម្បូរបែបនៃទំនាក់ទំនងការបរទេស។

ទីពីរ ដំណើរទស្សនកិច្ចនេះប្រព្រឹត្តទៅចំពេលដែលប្រទេសទាំងពីរប្រារព្ធខួបលើកទី ១០ នៃការបង្កើតទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយ (២០១៦-២០២៦)។ ឥណ្ឌាគឺជាប្រទេសមួយក្នុងចំណោមប្រទេសទាំងបីដំបូងគេ ដែលវៀតណាមបានបង្កើតទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយ។ ក្នុងរយៈពេល ១០ ឆ្នាំកន្លងមកនេះ ទំនាក់ទំនងរវាងប្រទេសទាំងពីរបានរីកចម្រើនកាន់តែស៊ីជម្រៅ និងទូលំទូលាយ ប៉ុន្តែនៅតែមានសក្ដានុពលជាច្រើនទៀត។

ក្នុងបរិបទដែលទាំងឥណ្ឌា និងវៀតណាមកំពុងងើបឡើងយ៉ាងខ្លាំងក្លា ហើយសភាពការណ៍ពិភពលោក និងតំបន់កំពុងមានការប្រែប្រួលយ៉ាងជ្រាលជ្រៅ ដំណើរទស្សនកិច្ចនេះគឺជាឱកាសមួយសម្រាប់ថ្នាក់ដឹកនាំនៃប្រទេសទាំងពីរ មិនត្រឹមតែក្រឡេកមើលឡើងវិញនូវទំនាក់ទំនងទ្វេភាគីក្នុងរយៈពេល ១០ ឆ្នាំកន្លងមកប៉ុណ្ណោះទេ ប៉ុន្តែថែមទាំងរួមគ្នាបង្កើតទម្រង់នៃកិច្ចសហប្រតិបត្តិការរវាងប្រទេសទាំងពីរក្នុងដំណាក់កាលថ្មីផងដែរ។

ទីបី ដំណើរទស្សនកិច្ចនេះគឺជាឱកាសដើម្បីរឹតបន្តឹងបន្ថែមទៀតនូវទំនាក់ទំនងរវាងថ្នាក់ដឹកនាំនៃប្រទេសទាំងពីរ និងទំនាក់ទំនងរវាងបក្សកាន់អំណាចទាំងពីរ។ នេះក៏ជាឱកាសដ៏ល្អប្រសើរដើម្បីបង្កើនការតភ្ជាប់គ្រប់ជ្រុងជ្រោយរវាងបណ្តាក្រសួង ស្ថាប័ន មូលដ្ឋាននៃប្រទេសទាំងពីរ និងរវាងបណ្តាសហគ្រាសដែលកំពុងប្រតិបត្តិការលើវិស័យនានា ក្នុងនោះមានបណ្តាក្រុមហ៊ុនបច្ចេកវិទ្យា ក្រុមហ៊ុនចាប់ផ្តើមអាជីវកម្ម និងមជ្ឈមណ្ឌលនវានុវត្តន៍នៃប្រទេសទាំងពីរផងដែរ។

“ខ្ញុំយល់ថា ភាគីទាំងពីរចាំបាច់ត្រូវតែងតែផ្តល់អាទិភាពដល់ការជំរុញការផ្លាស់ប្តូររវាងប្រជាជន វប្បធម៌ អប់រំ និងទេសចរណ៍ ដើម្បីរួមចំណែកពង្រឹងគ្រឹះស្ថានសង្គម បង្កើតការផ្សារភ្ជាប់យូរអង្វែង និងរឹងមាំរវាងប្រទេសទាំងពីរ ព្រមទាំងគាំទ្រដោយផ្ទាល់ដល់កិច្ចសហប្រតិបត្តិការសេដ្ឋកិច្ច និងនយោបាយ។ ប្រទេសទាំងពីរមានចំណុចស្រដៀងគ្នា និងការរួមបញ្ចូលគ្នាជាច្រើនផ្នែកវប្បធម៌-ប្រវត្តិសាស្ត្រ ជាពិសេសគឺតាមរយៈពុទ្ធសាសនា និងបណ្តាបេតិកភណ្ឌវប្បធម៌ ដែលបង្កលក្ខណៈងាយស្រួលដើម្បីជំរុញការផ្លាស់ប្តូរផ្នែកសិក្សាធិការ សិល្បៈ និងសហប្រតិបត្តិការលើការអភិរក្ស។ ប្រទេសទាំងពីរត្រូវជំរុញសកម្មភាពសម្បូរបែបជាច្រើន ដូចជាមហោស្រពវប្បធម៌ សប្តាហ៍ភាពយន្ត ការផ្លាស់ប្តូរសិល្បៈ សហប្រតិបត្តិការអប់រំ ដែលតាមរយៈនោះរួមចំណែកផ្សព្វផ្សាយរូបភាពប្រទេសជាតិ មនុស្សជាតិ និងអត្តសញ្ញាណរបស់ភាគីនីមួយៗ។ ទន្ទឹមនឹងនោះ ភាគីទាំងពីរក៏ចាំបាច់ត្រូវបង្កើនចំនួនជើងហោះហើរត្រង់។ លក្ខណៈងាយស្រួលគឺបណ្តាក្រុមហ៊ុនអាកាសចរណ៍ទាំងរបស់វៀតណាម និងឥណ្ឌា សុទ្ធតែមានបំណងចង់បង្កើនចំនួនជើងហោះហើរ...”។ ឯកអគ្គរដ្ឋទូតវិសាមញ្ញ និងពេញសមត្ថភាពវៀតណាមប្រចាំនៅឥណ្ឌា ទទួលបន្ទុកប្រទេសនេប៉ាល់ និងប៊ូតង់ លោក Nguyen Thanh Hai

“អាចនិយាយបានថា ដំណើរទស្សនកិច្ចផ្លូវរដ្ឋនៅប្រទេសឥណ្ឌារបស់អគ្គលេខាបក្ស និងជាប្រធានរដ្ឋ លោក To Lam លើកនេះ ត្រូវបានរំពឹងទុកថានឹងបង្កើតនូវកម្លាំងចលករថ្មី បើកចេញនូវលំហសហប្រតិបត្តិការកាន់តែធំធេង និងលើកកម្ពស់កម្រិតនៃទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយ វៀតណាម-ឥណ្ឌា ក្នុងយុគសម័យថ្មី ឱ្យសមស្របទៅនឹងសក្ដានុពល និងឋានៈនៃប្រទេសទាំងពីរនៅក្នុងតំបន់ និងលើពិភពលោក នាំមកនូវផលប្រយោជន៍ជាក់ស្តែងសម្រាប់ប្រជាជន មូលដ្ឋាន និងសហគ្រាស រួមចំណែកធ្វើឱ្យសម្រេចបាននូវគោលដៅអភិវឌ្ឍន៍របស់ប្រទេសនីមួយៗ និងចូលរួមចំណែកយ៉ាងសកម្មក្នុងសន្តិភាព ស្ថិរភាព សហប្រតិបត្តិការ និងការអភិវឌ្ឍនៅក្នុងតំបន់ និងលើពិភពលោក” នេះជាការសង្កត់ធ្ងន់របស់លោកឯកអគ្គរដ្ឋទូត Nguyen Thanh Hai។

យោងតាមលោកឯកអគ្គរដ្ឋទូត Nguyen Thanh Hai ផងដែរ ឥណ្ឌាគឺជាដៃគូដំបូងគេមួយដែលវៀតណាមបានបង្កើតទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយ។ បន្ទាប់ពីរយៈពេល ១០ ឆ្នាំ ទំនាក់ទំនងរវាងប្រទេសទាំងពីរបានរីកចម្រើនគ្រប់ជ្រុងជ្រោយ ជាក់ស្តែង និងកាន់តែស៊ីជម្រៅ ដោយក្លាយជាក្របខ័ណ្ឌសហប្រតិបត្តិការមួយក្នុងចំណោមក្របខ័ណ្ឌសហប្រតិបត្តិការដែលមានភាពរស់រវើក និងប្រសិទ្ធភាពបំផុតនៅក្នុងតំបន់។

សហប្រតិបត្តិការនយោបាយរវាងប្រទេសទាំងពីរត្រូវបានពង្រឹងឥតឈប់ឈរ កម្រិតនៃទំនុកចិត្តត្រូវបានលើកកម្ពស់។ ថ្នាក់ដឹកនាំនៃប្រទេសទាំងពីរតែងតែអញ្ជើញទៅសួរសុខទុក្ខគ្នាទៅវិញទៅមក និងមានការជួបពិភាក្សានៅក្រៅកិច្ចប្រជុំអន្តរជាតិនានា ដែលបង្ហាញពីការប្តេជ្ញាចិត្តនយោបាយយ៉ាងមុតមាំចំពោះទំនាក់ទំនងទ្វេភាគី។ ទន្ទឹមនឹងនោះ ចំនួននៃដំណើរទស្សនកិច្ចទៅវិញទៅមករបស់ថ្នាក់ដឹកនាំបណ្តាក្រសួង ស្ថាប័ន និងមូលដ្ឋាននៃប្រទេសទាំងពីរក៏កាន់តែមានការកើនឡើងផងដែរ។

យន្តការសហប្រតិបត្តិការជាង ២០ រវាងប្រទេសទាំងពីរ កំពុងរួមចំណែកដល់ការអនុវត្តកិច្ចសហប្រតិបត្តិការទ្វេភាគីប្រកបដោយប្រសិទ្ធភាព។ ទន្ទឹមនឹងនោះ កិច្ចព្រមព្រៀងសំខាន់ៗជាច្រើនត្រូវបានចុះហត្ថលេខា និងអនុវត្ត។ អ្វីដែលគួរឱ្យកត់សម្គាល់នោះគឺ សេចក្តីថ្លែងការណ៍ចក្ខុវិស័យរួមស្តីពីសន្តិភាព វិបុលភាព និងប្រជាជន (ខែធ្នូ ឆ្នាំ ២០២០) និងបណ្តាកម្មវិធីសកម្មភាពអនុវត្តទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយ។

លើវិស័យសហប្រតិបត្តិការពហុភាគី ភាគីទាំងពីរមានទស្សនៈស្រដៀងគ្នាលើបញ្ហាតំបន់ និងអន្តរជាតិជាច្រើន ព្រមទាំងបានសម្របសម្រួលគ្នាយ៉ាងជិតស្និទ្ធនៅតាមវេទិកាពហុភាគីនានា ដូចជាអង្គការសហប្រជាជាតិ, សមាគមប្រជាជាតិអាស៊ីអាគ្នេយ៍ (អាស៊ាន) ក៏ដូចជាបណ្តាយន្តការសហប្រតិបត្តិការតំបន់ផងដែរ។

សហប្រតិបត្តិការការពារជាតិ-សន្តិសុខ ត្រូវបានពង្រីក និងអភិវឌ្ឍឥតឈប់ឈរជាមួយនឹងទម្រង់ដ៏សម្បូរបែប និងជាក់ស្តែង។ ភាគីទាំងពីរបានចុះហត្ថលេខាលើសេចក្តីថ្លែងការណ៍ចក្ខុវិស័យរួមស្តីពីទំនាក់ទំនងដៃគូការពារជាតិ វៀតណាម-ឥណ្ឌា រហូតដល់ឆ្នាំ ២០៣០។ សហប្រតិបត្តិការលើវិស័យដូចជា ការហ្វឹកហ្វឺន បណ្តុះបណ្តាល លើកកម្ពស់សមត្ថភាព សហប្រតិបត្តិការរវាងកងទ័ពនៃអង្គភាពនីមួយៗ ការធ្វើសមយុទ្ធរួមគ្នា និងបណ្តាសកម្មភាពរក្សាសន្តិភាពរបស់អង្គការសហប្រជាជាតិ... ត្រូវបានអនុវត្តយ៉ាងមានប្រសិទ្ធភាព។

ក្នុងវិស័យសេដ្ឋកិច្ច ពាណិជ្ជកម្ម និងវិនិយោគ សហប្រតិបត្តិការរវាងប្រទេសទាំងពីរកាន់តែមានភាពមមាញឹក។ ទំហំពាណិជ្ជកម្មទ្វេភាគីក្នុងឆ្នាំ ២០២៥ សម្រេចបានកម្រិតឯតទគ្គកម្ម ១៦,៤៦ ពាន់លានដុល្លារអាមេរិក កើនឡើង ១០,៥% បើធៀបនឹងឆ្នាំ ២០២៤ និងកើនឡើងប្រហែល ២,៥ ដង បើធៀបនឹងពេលបង្កើតទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយក្នុងឆ្នាំ ២០១៦។

ចំពោះការវិនិយោគ គិតត្រឹមដំណាច់ឆ្នាំ ២០២៥ ឥណ្ឌាមានគម្រោងចំនួន ៤៧៣ ដែលកំពុងមានសុពលភាពនៅវៀតណាម ជាមួយនឹងដើមទុនចុះបញ្ជីសរុបប្រហែល ១,១ ពាន់លានដុល្លារអាមេរិក; ផ្ទុយទៅវិញ សហគ្រាសវៀតណាមបានចាប់ផ្តើមពង្រីកវត្តមានរបស់ខ្លួននៅប្រទេសឥណ្ឌា ជាមួយនឹងគម្រោងខ្នាតធំ ដែលលេចធ្លោជាងគេគឺគម្រោងផលិតរថយន្តអគ្គិសនីនៅរដ្ឋ Tamil Nadu ជាមួយនឹងផែនការវិនិយោគរហូតដល់រាប់ពាន់លានដុល្លារអាមេរិក។

ក្រៅពីនេះ សហប្រតិបត្តិការលើវិស័យវិទ្យាសាស្ត្រ-បច្ចេកវិទ្យា នវានុវត្តន៍ បរិវត្តកម្មឌីជីថល ថាមពល និងការអប់រំ-បណ្តុះបណ្តាល ក៏បន្តត្រូវបានជំរុញផងដែរ។ ថ្មីៗនេះ មានក្រុមហ៊ុនបច្ចេកវិទ្យា និងក្រុមហ៊ុនចាប់ផ្តើមអាជីវកម្ម ជាច្រើនរបស់វៀតណាម បានទៅប្រទេសឥណ្ឌាដើម្បីស្វែងយល់ពីឱកាសសហប្រតិបត្តិការ។

ស្របពេលដែលមាននិស្សិតវៀតណាមកាន់តែច្រើនឡើងទៅសិក្សានៅប្រទេសឥណ្ឌា នោះក៏មាននិស្សិតឥណ្ឌាជាច្រើនកំពុងមកសិក្សានៅប្រទេសវៀតណាមផងដែរ ជាពិសេសគឺនៅតាមបណ្តាសាកលវិទ្យាល័យវេជ្ជសាស្ត្រ។

ចំណុចលេចធ្លោក្នុងរយៈពេលកន្លងមក គឺការផ្លាស់ប្តូររវាងប្រជាជន វប្បធម៌ និងទេសចរណ៍បានរីកចម្រើនយ៉ាងខ្លាំងក្លា។ វៀតណាមកំពុងក្លាយជាគោលដៅដ៏ទាក់ទាញសម្រាប់ភ្ញៀវទេសចរឥណ្ឌា។ ដោយឡែកក្នុងឆ្នាំ ២០២៥ ចំនួនភ្ញៀវឥណ្ឌាមកកាន់វៀតណាមសម្រេចបាន ៧៤៦.០០០ នាក់ កើនឡើងប្រហែល ៥០% បើធៀបនឹងឆ្នាំ ២០២៤ និងជិត ៤ ដង បើធៀបនឹងឆ្នាំ ២០១៩។

ការតភ្ជាប់ផ្លូវអាកាសផ្ទាល់រវាងប្រទេសទាំងពីរបានកើនឡើងយ៉ាងខ្លាំង ចាប់ពីជើងហោះហើរត្រឹមតែពីរបីជើងក្នុងមួយសប្តាហ៍ក្រោយជំងឺរាតត្បាតកូវីដ-១៩ មកដល់កម្រិតជិត ៩០ ជើងក្នុងមួយសប្តាហ៍នាពេលបច្ចុប្បន្ន ដែលនេះគឺជាកម្លាំងរុញច្រានដ៏ធំ រួមចំណែកបង្កើនចំនួនភ្ញៀវទេសចរ និងការផ្លាស់ប្តូររវាងប្រជាជន និងប្រជាជននៃប្រទេសទាំងពីរ។

ពិនិត្យជារួម សមិទ្ធផលខាងលើបានបង្កើតនូវមូលដ្ឋានគ្រឹះយ៉ាងរឹងមាំ ដោយនាំឱ្យទំនាក់ទំនងវៀតណាម-ឥណ្ឌា ក្លាយជាទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយមួយដែលមានជម្រៅ ប្រសិទ្ធភាព និងមានលក្ខណៈបំពេញឱ្យគ្នាទៅវិញទៅមកខ្ពស់នៅក្នុងតំបន់។

លោកឯកអគ្គរដ្ឋទូត Nguyen Thanh Hai យល់ឃើញថា មូលដ្ឋានគ្រឹះដែលត្រូវបានកសាងឡើងបន្ទាប់ពីរយៈពេល ១០ ឆ្នាំនៃការបង្កើតទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយ បានបង្កើតនូវបុរេលក្ខខណ្ឌដ៏អំណោយផល ដើម្បីឱ្យប្រទេសទាំងពីរនាំយកទំនាក់ទំនងឱ្យរីកចម្រើនកាន់តែខ្លាំងក្លានាពេលខាងមុខ។

ជាពិសេស ការងើបឡើងយ៉ាងខ្លាំងក្លារបស់ឥណ្ឌាក្នុងនាមជាមហាអំណាច និងការអភិវឌ្ឍយ៉ាងឆាប់រហ័សរបស់វៀតណាមក្នុងរយៈពេលប៉ុន្មានឆ្នាំកន្លងមកនេះ រួមជាមួយការចែករំលែករវាងប្រទេសទាំងពីរអំពីចក្ខុវិស័យអភិវឌ្ឍន៍ និងទស្សនៈចំពោះបញ្ហាអន្តរជាតិ និងតំបន់ជាច្រើន កំពុងបង្កើតឱកាសជាច្រើនសម្រាប់បង្កើនកិច្ចសហប្រតិបត្តិការរវាងប្រទេសទាំងពីរ។

ក្រៅពីការបន្តពង្រឹងបណ្តាវិស័យសហប្រតិបត្តិការដែលត្រូវបានបង្កើតឡើងរួចហើយ ភាគីទាំងពីរចាំបាច់ត្រូវជំរុញយ៉ាងខ្លាំងក្លានូវបណ្តាវិស័យសហប្រតិបត្តិការថ្មីៗ ដើម្បីឆ្លើយតបទៅនឹងតម្រូវការរបស់ប្រទេសនីមួយៗក្នុងដំណើរការអភិវឌ្ឍន៍។

ភាគីទាំងពីរត្រូវបង្កើនកិច្ចសហប្រតិបត្តិការលើផ្នែកនវានុវត្តន៍ ដើម្បីទាញយកប្រយោជន៍ពីឱកាសដែលបដិវត្តន៍បច្ចេកវិទ្យា និងបរិវត្តកម្មឌីជីថលកំពុងបង្កើតឡើង សំដៅបង្កើតនូវកម្លាំងចលករដ៏ខ្លាំងក្លាសម្រាប់ការអភិវឌ្ឍ រួមចំណែកបម្រើឱ្យការសម្រេចបាននូវគោលដៅនាំយកវៀតណាមឱ្យក្លាយជាប្រទេសអភិវឌ្ឍន៍នៅឆ្នាំ ២០៤៥ និងឥណ្ឌាក្លាយជាប្រទេសអភិវឌ្ឍន៍នៅឆ្នាំ ២០៤៧។

ភាគីទាំងពីរចាំបាច់ត្រូវបង្កើតនូវក្របខ័ណ្ឌ និងវេទិកានានាស្តីពីនវានុវត្តន៍ ដើម្បីឱ្យបណ្តាក្រសួង ស្ថាប័នពាក់ព័ន្ធ សហគ្រាស សមាគមបច្ចេកវិទ្យា និងក្រុមហ៊ុនចាប់ផ្តើមអាជីវកម្ម (startup) នៃប្រទេសទាំងពីរ បង្កើនកិច្ចសហប្រតិបត្តិការលើវិស័យថ្មីៗដែលមានលក្ខណៈទម្លាយភាពទាល់ច្រក ដូចជា៖ បច្ចេកវិទ្យាជាន់ខ្ពស់, បរិវត្តកម្មឌីជីថល, សេដ្ឋកិច្ចឌីជីថល, សេដ្ឋកិច្ចបៃតង, ថាមពលកកើតឡើងវិញ, គ្រឿងពាក់កណ្តាលចម្លង (semiconductor) និងបញ្ញាសិប្បនិម្មិត (AI)។

ទន្ទឹមនឹងនោះ ភាគីទាំងពីរត្រូវបន្តជំរុញសសរស្តម្ភនៃកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ។ ក្នុងនោះ ភាគីទាំងពីរត្រូវមានវិធានការខ្លាំងក្លាដើម្បីបើកចំហទីផ្សារឱ្យគ្នាទៅវិញទៅមក បង្កើនទំហំពាណិជ្ជកម្មទ្វេភាគីឱ្យកាន់តែច្រើនថែមទៀត ឱ្យសមស្របទៅនឹងទំហំនៃទីផ្សារ និងសេដ្ឋកិច្ចនៃប្រទេសនីមួយៗ។

ជាមួយគ្នានេះដែរ ភាគីទាំងពីរកំពុងមានឱកាសវិនិយោគដ៏ធំធេង ក្នុងបរិបទដែលបណ្តាសហគ្រាសវៀតណាមកំពុងរីកចម្រើនឡើង ហើយសហគ្រាសឥណ្ឌាជាច្រើនកំពុងយកចិត្តទុកដាក់ចំពោះវៀតណាម។

“ខ្ញុំយល់ថា ភាគីទាំងពីរចាំបាច់ត្រូវតែងតែផ្តល់អាទិភាពដល់ការជំរុញការផ្លាស់ប្តូររវាងប្រជាជន វប្បធម៌ អប់រំ និងទេសចរណ៍ ដើម្បីរួមចំណែកពង្រឹងគ្រឹះស្ថានសង្គម បង្កើតការផ្សារភ្ជាប់យូរអង្វែង និងរឹងមាំរវាងប្រទេសទាំងពីរ ព្រមទាំងគាំទ្រដោយផ្ទាល់ដល់កិច្ចសហប្រតិបត្តិការសេដ្ឋកិច្ច និងនយោបាយ។

ប្រទេសទាំងពីរមានចំណុចស្រដៀងគ្នា និងការរួមបញ្ចូលគ្នាជាច្រើនផ្នែកវប្បធម៌-ប្រវត្តិសាស្ត្រ ជាពិសេសគឺតាមរយៈពុទ្ធសាសនា និងបណ្តាបេតិកភណ្ឌវប្បធម៌ ដែលបង្កលក្ខណៈងាយស្រួលដើម្បីជំរុញការផ្លាស់ប្តូរផ្នែកសិក្សាធិការ សិល្បៈ និងសហប្រតិបត្តិការលើការអភិរក្ស។

ប្រទេសទាំងពីរត្រូវជំរុញសកម្មភាពសម្បូរបែបជាច្រើន ដូចជាមហោស្រពវប្បធម៌ សប្តាហ៍ភាពយន្ត ការផ្លាស់ប្តូរសិល្បៈ សហប្រតិបត្តិការអប់រំ ដែលតាមរយៈនោះរួមចំណែកផ្សព្វផ្សាយរូបភាពប្រទេសជាតិ មនុស្សជាតិ និងអត្តសញ្ញាណរបស់ភាគីនីមួយៗ។

ទន្ទឹមនឹងនោះ ភាគីទាំងពីរក៏ចាំបាច់ត្រូវបង្កើនចំនួនជើងហោះហើរត្រង់។ លក្ខណៈងាយស្រួលគឺបណ្តាក្រុមហ៊ុនអាកាសចរណ៍ទាំងរបស់វៀតណាម និងឥណ្ឌា សុទ្ធតែមានបំណងចង់បង្កើនចំនួនជើងហោះហើរ...” នេះជាការសង្កត់ធ្ងន់របស់លោក Nguyen Thanh Hai ឯកអគ្គរដ្ឋទូតវិសាមញ្ញ និងពេញសមត្ថភាពវៀតណាមប្រចាំនៅឥណ្ឌា ទទួលបន្ទុកប្រទេសនេប៉ាល់ និងប៊ូតង់៕

ខេត្ត Tra Vinh (វៀតណាម)៖ ពិធីបើកសប្តាហ៍វប្បធម៌ និងទេសចរណ៍ ភ្ជាប់ជាមួយបុណ្យអកអំបុកនៅតាមមូលដ្ឋានជាច្រើន នាថ្ងៃទី៩ ខែវិច្ឆិកា សប្តាហ៍វប្បធម៌ និងទេសចរណ៍ដែលតភ្ជាប់ជាមួយបុណ្យអកអំបុក ត្រូវបានបើកនៅតំបន់ភាគខាងត្បូងវៀតណាម ដែលមានជនរួមជាតិខ្មែររស់នៅច្រើន។

ព្រឹត្តិការណ៍នេះលើកកម្ពស់ការរួមបញ្ចូលគ្នានៃសេដ្ឋកិច្ច វប្បធម៌ និងមុខម្ហូបនៅ «ផ្ទះវៀតណាម» នៅទីក្រុងវ៉ាស៊ីនតោនឌីស៊ី យុគសម័យ - អ្នកចូលរួមបានសម្តែងការចាប់អារម្មណ៍ចំពោះសមិទ្ធិផលអភិវឌ្ឍន៍សេដ្ឋកិច្ចរបស់វៀតណាម មានបំណងចង់ស្វែងយល់ពីទេសភាពដ៏ល្បីល្បាញនៅក្នុងតំបន់ទាំងបីនៃប្រទេសរបស់យើង និងស្វែងរកឱកាសវិនិយោគ និងធុរកិច្ចនៅវៀតណាម។

ឌឹកអាញ់

thoidai.com.vn