មិត្តភក្តិអន្តរជាតិវាយតម្លៃខ្ពស់ចំពោះសមិទ្ធផលអភិវឌ្ឍន៍ និងទិសដៅថ្មីរបស់វៀតណាម

លោកស្រី Poldi Sosa Schmidt ប្រធានវិទ្យាស្ថានវប្បធម៌ អាហ្សង់ទីន-វៀតណាម (ICAV) ផ្ដល់កិច្ចសម្ភាសន៍ដល់អ្នកយកព័ត៌មាននៃទីភ្នាក់ងារសារព័ត៌មានវៀតណាម ប្រចាំនៅប្រទេសអាហ្សង់ទីន។

ក្នុងឱកាសរំលឹកខួបលើកទី ៥១ នៃទិវារំដោះភាគខាងត្បូង បង្រួបបង្រួមប្រទេសជាតិ (៣០/០៤/១៩៧៥ - ៣០/០៤/២០២៦) អ្នកយកព័ត៌មាននៃទីភ្នាក់ងារសារព័ត៌មានវៀតណាម ប្រចាំនៅទីក្រុង Buenos Aires បានធ្វើកិច្ចសម្ភាសន៍ជាមួយលោកស្រី Poldi Sosa Schmidt ប្រធានវិទ្យាស្ថានវប្បធម៌ អាហ្សង់ទីន-វៀតណាម (ICAV) អំពីសមិទ្ធផលអភិវឌ្ឍន៍របស់វៀតណាម ក៏ដូចជាទស្សនវិស័យនៃទំនាក់ទំនងរវាងប្រទេសទាំងពីរ។

លោកស្រី Poldi Sosa Schmidt បានឱ្យដឹងថា ជាមួយនឹងរយៈពេលជាង ៦០ ឆ្នាំដែលបានផ្សារភ្ជាប់ជាមួយប្រជាជនវៀតណាម និងបានមកបំពេញទស្សនកិច្ចនៅប្រទេសអាស៊ីអាគ្នេយ៍មួយនេះជិត ៣០ ដង លោកស្រីចាត់ទុកវៀតណាមដូចជាស្រុកកំណើតទីពីររបស់ខ្លួនអញ្ចឹង។

យោងតាមលោកស្រី ក្រោយរយៈពេលជាង ៥០ ឆ្នាំចាប់តាំងពីប្រទេសជាតិត្រូវបានរំដោះ វៀតណាមបានឈានចូលដំណាក់កាលផ្លាស់ប្តូរយ៉ាងខ្លាំងក្លាបំផុត ចាប់ពីប្រទេសមួយដែលទទួលរងនូវផលវិបាកយ៉ាងធ្ងន់ធ្ងរពីសង្គ្រាម ក្លាយទៅជាសេដ្ឋកិច្ចមួយក្នុងចំណោមបណ្តាសេដ្ឋកិច្ចដែលមានភាពរស់រវើកឈានមុខគេនៅអាស៊ី ដោយរក្សាបាននូវល្បឿនកំណើនប្រកបដោយស្ថិរភាព និងលើកកម្ពស់ជីវភាពរស់នៅរបស់ប្រជាជនជាជំហានៗ។

លោកស្រី Poldi Sosa បានវាយតម្លៃខ្ពស់ចំពោះសមិទ្ធផលក្នុងការកាត់បន្ថយភាពក្រីក្រ ការអភិវឌ្ឍហេដ្ឋារចនាសម្ព័ន្ធ ក៏ដូចជាការធ្វើសមាហរណកម្មអន្តរជាតិយ៉ាងជ្រាលជ្រៅរបស់វៀតណាម តាមរយៈការចូលរួមក្នុងកិច្ចព្រមព្រៀងពាណិជ្ជកម្មសេរីជាច្រើន។ ទន្ទឹមនឹងនោះ វិស័យអប់រំ សុខាភិបាល វិទ្យាសាស្ត្រ-បច្ចេកវិទ្យា និងសេដ្ឋកិច្ចឌីជីថល ក៏សម្រេចបាននូវវឌ្ឍនភាពយ៉ាងច្បាស់លាស់ ដែលរួមចំណែកបង្កើតជាគ្រឹះស្ថានសម្រាប់ការអភិវឌ្ឍប្រកបដោយចីរភាព។ ក្រៅពីនេះ វៀតណាមនៅតែលេចធ្លោក្នុងការទាក់ទាញការវិនិយោគពីបរទេស ការអភិវឌ្ឍការនាំចេញ និងចូលរួមយ៉ាងជ្រាលជ្រៅជាជំហានៗទៅក្នុងខ្សែចង្វាក់តម្លៃសកល ដែលតាមរយៈនោះលើកកម្ពស់ឋានៈនៅលើឆាកអន្តរជាតិ។

ប្រធាន ICAV បានបញ្ជាក់ថា៖ "តាមខ្ញុំយល់ សមិទ្ធផលទាំងនេះមិនត្រឹមតែឆ្លុះបញ្ចាំងពីសមត្ថភាពគ្រប់គ្រង និងដឹកនាំប៉ុណ្ណោះទេ ប៉ុន្តែក៏បង្ហាញពីឆន្ទៈដ៏មោះមុត ស្មារតីសាមគ្គីភាព និងមហិច្ឆតាចង់ឈានឡើងយ៉ាងខ្លាំងក្លារបស់ប្រជាជនវៀតណាមផងដែរ។ នោះគឺជាអ្វីដែលគួរឱ្យគោរពបំផុត ហើយក៏ជាគ្រឹះស្ថានដើម្បីឱ្យវៀតណាមបន្តអភិវឌ្ឍប្រកបដោយចីរភាពនាពេលអនាគត"។

ដោយវាយតម្លៃអំពីបណ្តាសម្រេចចិត្តរបស់បក្សកុម្មុយនីស្តវៀតណាម ក្នុងមហាសន្និបាតលើកទី XIV ក៏ដូចជាក្នុងការបោះឆ្នោតសភានាពេលកន្លងមក លោកស្រី Poldi Sosa យល់ឃើញថា ការពង្រឹងរចនាសម្ព័ន្ធចាត់តាំង និងការផ្លាស់ប្តូរថ្មីនូវជួរថ្នាក់ដឹកនាំ គឺជាជំហានដើរដ៏វិជ្ជមាន ដែលធានាបាននូវភាពបន្តវេន និងការអភិវឌ្ឍ។

យោងតាមលោកស្រី ទិសដៅធំៗរបស់វៀតណាមបន្តផ្តោតលើគោលដៅអភិវឌ្ឍន៍ឆាប់រហ័ស និងប្រកបដោយចីរភាព ដែលក្នុងនោះគួរឱ្យកត់សម្គាល់គឺការខិតខំសម្រេចឱ្យបាននូវល្បឿនកំណើនខ្ពស់ ឆ្ពោះទៅរកកម្រិតកំណើនដែលមានលេខពីរខ្ទង់ ក្នុងលក្ខខណ្ឌអំណោយផល; ជំរុញឧស្សាហូបនីយកម្ម និងទំនើបកម្មផ្សារភ្ជាប់ជាមួយនឹងការបំប្លែងឌីជីថល; អភិវឌ្ឍសេដ្ឋកិច្ចឌីជីថល និងសង្គមឌីជីថល; លើកកម្ពស់គុណភាពអប់រំ សុខាភិបាល និងប្រព័ន្ធសុខុមាលភាពសង្គម; ទន្ទឹមនឹងនោះ បង្កើនការកសាងរដ្ឋអំណាចនីតិរដ្ឋសង្គមនិយម និងលើកកម្ពស់ប្រសិទ្ធភាពអភិបាលកិច្ច។

លោកស្រីក៏យល់ឃើញដែរថា ការពង្រីកសមាហរណកម្មអន្តរជាតិ ការធ្វើចម្រុះកម្មនៃទំនាក់ទំនងបរទេស និងការរក្សាស្ថិរភាពនយោបាយ-សង្គម នឹងក្លាយជាកត្តាសំខាន់ៗដែលជួយឱ្យវៀតណាមរក្សាបាននូវសន្ទុះកំណើន និងបន្ស៊ាំខ្លួនប្រកបដោយប្រសិទ្ធភាពចំពោះការប្រែប្រួលសកល។

លោកស្រី Poldi Sosa បានបញ្ជាក់យ៉ាងច្បាស់ថា៖ "ខ្ញុំមានការចាប់អារម្មណ៍ជាពិសេស ចំពោះការដែលវៀតណាមយកចិត្តទុកដាក់លើការអភិវឌ្ឍវិទ្យាសាស្ត្រ-បច្ចេកវិទ្យា និងនវានុវត្តន៍ទុកជាកម្លាំងចលករស្នូល; ព្រមទាំងនៅតែរក្សាបាននូវតុល្យភាពជាមួយបណ្តាគោលដៅសង្គម។ ក្នុងបរិបទដែលពិភពលោកប្រែប្រួលយ៉ាងឆាប់រហ័ស បណ្តាទិសដៅដែលមានលក្ខណៈវែងឆ្ងាយ រួមជាមួយការឯកភាពគ្នាក្នុងសង្គម និងស្មារតីសាមគ្គីភាព នឹងជួយឱ្យវៀតណាមបន្តសម្រេចបាននូវសមិទ្ធផលសំខាន់ៗបន្ថែមទៀត"។

ប្រធាន ICAV បានបញ្ជាក់បន្ថែមថា៖ «ឯកភាពក្នុងទិសដៅអភិវឌ្ឍន៍ និងការយកចិត្តទុកដាក់ជាប់លាប់ចំពោះជីវភាពរស់នៅរបស់ប្រជាជន គឺជាកត្តាស្នូលមួយដែលបង្កើតនូវភាពជោគជ័យរបស់វៀតណាម។ ខ្ញុំជឿជាក់ថា ចំណុចទាំងនោះនឹងបន្តត្រូវបានលើកកម្ពស់បន្ថែមទៀតនាពេលខាងមុខ»។

ពាក់ព័ន្ធនឹងសកម្មភាពរបស់ ICAV លោកស្រី Poldi Sosa បានឱ្យដឹងថា វិទ្យាស្ថានត្រូវបានបង្កើតឡើងក្នុងឆ្នាំ ១៩៩៧ ហើយគ្រោងនឹងរៀបចំពិធីរំលឹកខួបលើកទី ៣០ នៃសកម្មភាពរបស់ខ្លួនក្នុងឆ្នាំ ២០២៧។ បច្ចុប្បន្ន វិទ្យាស្ថានមានសមាជិកជាង ២០ នាក់ ដែលបំពេញការងារលើស្មារតីស្ម័គ្រចិត្ត ដោយផ្តោតលើការជំរុញការផ្លាស់ប្តូរវប្បធម៌ ការសិក្សាស្រាវជ្រាវ និងពង្រឹងការយល់ដឹងគ្នាទៅវិញទៅមករវាងប្រជាជននៃប្រទេសទាំងពីរ។

នាពេលខាងមុខ វិទ្យាស្ថាននឹងបន្តរៀបចំបណ្តាសកម្មភាពនៅតាមសាកលវិទ្យាល័យនានាក្នុងប្រទេសអាហ្សង់ទីន ដើម្បីណែនាំអំពីវប្បធម៌ ប្រវត្តិសាស្ត្រ និងមនុស្សជាតិវៀតណាម តាមរយៈឯកសារ បោះពុម្ពផ្សាយ និងការចាក់បញ្ចាំងភាពយន្តឯកសារផ្សេងៗ។

សកម្មភាពទាំងនេះបាននាំមកនូវប្រសិទ្ធភាពជាក់ស្តែង ដោយទាក់ទាញការចាប់អារម្មណ៍ពីសំណាក់និស្សិត និងសាស្ត្រាចារ្យ ដែលតាមរយៈនោះរួមចំណែកជំរុញការផ្លាស់ប្តូរប្រជាជន និងប្រជាជន កិច្ចសហប្រតិបត្តិការអប់រំ ក៏ដូចជាវិស័យទេសចរណ៍រវាងប្រទេសទាំងពីរផងដែរ។

លោកស្រី Poldi Sosa យល់ឃើញថា ចាំបាច់ត្រូវបន្តរក្សា និងពង្រីកបណ្តាសកម្មភាពទាំងនេះ ដើម្បីធ្វើឱ្យទំនាក់ទំនងមិត្តភាពប្រពៃណីរវាងអាហ្សង់ទីន និងវៀតណាម កាន់តែស៊ីជម្រៅបន្ថែមទៀតនាពេលខាងមុខ៕

ការតភ្ជាប់ពាណិជ្ជកម្មរវាងសហគ្រាសទេសចរណ៍វៀតណាម និងអន្តរជាតិ យុគសម័យ - នាថ្ងៃទី៩ ខែមេសា នៅទីក្រុងហាណូយ សមាគមទេសចរណ៍វៀតណាម បានរៀបចំពិធីបើកកម្មវិធីតភ្ជាប់ពាណិជ្ជកម្មរវាងសហគ្រាសទេសចរណ៍វៀតណាម និងអន្តរជាតិ (B2B)។ នេះគឺជាព្រឹត្តិការណ៍ដ៏សំខាន់មួយ ស្ថិតក្នុងខ្សែសង្វាក់នៃសកម្មភាពនៃពិព័រណ៍ទេសចរណ៍អន្តរជាតិ VITM 2026 ដែលជាពិព័រណ៍ទេសចរណ៍អន្តរជាតិលើកទី១៥ រៀបចំឡើងដោយសមាគមទេសចរណ៍វៀតណាម។

អគ្គនាយកអង្គការពាណិជ្ជកម្មពិភពលោក (WTO) ស្វាគមន៍ចំពោះរាល់ការរួមចំណែកជាក់ស្តែងរបស់វៀតណាម យុគសម័យ - នាថ្ងៃទី១០ ខែមេសា លោក Mai Phan Dung ឯកអគ្គរដ្ឋទូត និងជាប្រធានបេសកកម្មវៀតណាម អមអង្គការពាណិជ្ជកម្មពិភពលោក (WTO) បានមានជំនួបពិភាក្សាជាមួយលោកស្រី Ngozi Okonjo-Iweala អគ្គនាយិកា WTO។

ឌឹកអាញ់

thoidai.com.vn