សំនៀងរបស់ Trinh Cong Son តាមរលកធាតុអាកាសវិទ្យុនានា នាថ្ងៃទី ៣០ មេសា ១៩៧៥

តន្ត្រីករ Trinh Cong Son

ចាប់តាំងពីពាក់កណ្តាលទសវត្សរ៍ឆ្នាំ ១៩៦០ បទចម្រៀង "Noi vong tay lon" បានក្លាយជាបទចម្រៀងដ៏ពេញនិយមក្នុងសកម្មភាពជួបជុំសមូហភាពរបស់សិស្ស និស្សិត។ ប៉ុន្តែមានថ្ងៃមួយ ដែលប្រជាជនសៃហ្គនបានឮលោក Trinh Cong Son ច្រៀងបទនេះដោយផ្ទាល់តាមវិទ្យុយ៉ាងភ្ញាក់ផ្អើល។

នោះគឺនៅរសៀលថ្ងៃទី ៣០ ខែមេសា ឆ្នាំ ១៩៧៥ តន្ត្រីករ Trinh Cong Son បានថ្លែងមតិ និងច្រៀងបទ "តភ្ជាប់រង្វង់ដៃធំ" នៅលើរលកធាតុអាកាសនៃស្ថានីយវិទ្យុសៃហ្គន (ដែលនៅពេលនោះត្រូវបានស្ថានីយវិទ្យុរំដោះចូលមកគ្រប់គ្រង)។

តន្ត្រីកររូបនេះបានប្រើប្រាស់សម្លេងរបស់លោក ដើម្បីអំពាវនាវដល់មជ្ឈដ្ឋានសិល្បករ សិស្ស និស្សិត និងបងប្អូនរួមជាតិនៅភាគខាងត្បូងទាំងមូល ឱ្យរួមសាមគ្គីគ្នា គាំទ្រ និងរួមដំណើរជាមួយរដ្ឋាភិបាលបដិវត្តន៍បណ្តោះអាសន្ននៃសាធារណរដ្ឋវៀតណាមខាងត្បូង ដោយម្នាក់ៗឆ្ពោះទៅរកគោលដៅរួមគឺការកសាងប្រទេសជាតិឱ្យរឹងមាំ និងមានឯកភាព។

លោក Nguyen Trung Truc តំណាងគ្រួសាររបស់សពតន្ត្រីករ Trinh Cong Son បានឱ្យដឹងថា៖ “បង Son គឺជាមនុស្សដែលមានមហិច្ឆតាពុះកញ្ជ្រោលជានិច្ចអំពីប្រទេសជាតិដែលមានសន្តិភាព បងប្អូនខាងជើង និងខាងត្បូងនឹងមករស់នៅក្រោមដំបូលផ្ទះតែមួយ។ នារសៀលថ្ងៃទី ៣០ មេសា ១៩៧៥ ទោះបីជាស្ថានភាពនៅសៃហ្គននៅតែមានភាពច្របូកច្របល់ក៏ដោយ ក៏បងនៅតែធ្វើដំណើរទៅកាន់ស្ថានីយវិទ្យុសៃហ្គន”។

ក្នុងមួយជីវិត និងក្នុងអាជីពរបស់លោក តន្ត្រីករ Trinh Cong Son តែងតែមានការឈឺចាប់ក្នុងចិត្តចំពោះទុក្ខវេទនានៃសង្គ្រាមដែលបងប្អូនរួមជាតិត្រូវស៊ូទ្រាំ ហើយនោះក៏ជាវត្ថុធាតុដើមចម្បងមួយដែលលោកប្រើប្រាស់ដើម្បីបង្កើតជាបទចម្រៀងដែលរស់នៅជារៀងរហូត។ នៅខណៈពេលដែលប្រទេសជាតិត្រូវបានបង្រួបបង្រួម សពតន្ត្រីកររូបនេះមិនអាចលាក់បាំងនូវក្តីសប្បាយរីករាយរបស់ខ្លួនបានឡើយ។

លោកបានថ្លែងតាមរលកធាតុអាកាសវិទ្យុថា៖ "ថ្ងៃនេះគឺជាថ្ងៃដែលពួកយើងទាំងអស់គ្នាស្រមៃចង់បាន... រាល់អ្វីៗដែលបងប្អូនប្រាថ្នាចង់បានជាយូរមកហើយគឺឯករាជ្យ សេរីភាព និងឯកភាព គឺថ្ងៃនេះពួកយើងសម្រេចបាននូវលទ្ធផលទាំងអស់នោះហើយ"។

ទោះបីជាមិនមានហ្គីតាក៏ដោយ ក៏តន្ត្រីករ Trinh Cong Son នៅតែរួមជាមួយមនុស្សគ្រប់គ្នាដែលមានវត្តមាននៅស្ថានីយវិទ្យុសៃហ្គននាថ្ងៃនោះ ច្រៀងបន្លឺឡើងនូវបទ "តភ្ជាប់រង្វង់ដៃធំ"។ គ្រប់គ្នាបានទះដៃ ឬគោះលើតុ ដើម្បីធ្វើជាចង្វាក់កំដរដល់បទចម្រៀងនេះយ៉ាងរំភើបរីករាយ។

លោកស្រី Doan Thi Thanh Thuy អតីតកម្មាភិបាលនៃស្ថានីយវិទ្យុរំដោះ បានរៀបរាប់ថា៖ "នាពេលនោះ ខ្ញុំកំពុងថតសំឡេងកម្មវិធីមហោស្រពសិល្បៈ ដែលរៀបចំឡើងដោយក្រុមសិល្បៈនៃអគ្គនាយកដ្ឋាននយោបាយកងទ័ពរំដោះ នៅខេត្ត Dong Nai។ សំនៀងរបស់ Trinh Cong Son ដែលបានបន្លឺឡើងចំខណៈពេលប្រវត្តិសាស្ត្រ បានធ្វើឱ្យពួកយើងស្ងប់ស្ងាត់ទៅ រួចក៏រំភើបចិត្តរហូតដល់ស្រក់ទឹកភ្នែក។ ទោះបីជានៅឆ្ងាយពីសៃហ្គនក៏ដោយ ប៉ុន្តែខ្ញុំនៅតែអាចមានអារម្មណ៍យ៉ាងច្បាស់នូវក្តីសប្បាយរីករាយយ៉ាងខ្លាំងក្លានៃថ្ងៃបង្រួបបង្រួមប្រទេសជាតិ"។

ក្រោយឆ្នាំ ១៩៧៥ លោក Trinh Cong Son នៅតែបន្តរស់នៅ និងតាក់តែងនិពន្ធតន្ត្រីនៅទីក្រុងហូជីមិញ។ ក្នុងដំណាក់កាលនេះ លោកបាននិពន្ធបទចម្រៀងជាច្រើនដែលអំពាវនាវដល់មជ្ឈដ្ឋានបញ្ញវន្ត កុំឱ្យចាកចេញពីទីក្រុង។

អស់រយៈពេល ២៥ ឆ្នាំហើយ ចាប់តាំងពីថ្ងៃដែលតន្ត្រីករ Trinh Cong Son បានទទួលមរណភាព (១៩៣៩-២០០១) និង ៥១ ឆ្នាំដែលប្រទេសជាតិត្រូវបានបង្រួបបង្រួម ប៉ុន្តែខណៈពេលដ៏ពិសិដ្ឋនោះ នៅតែបន្លឺរំពងរហូតមកដល់ពេលបច្ចុប្បន្ន។ ឈ្មោះបទចម្រៀង "Noi vong tay lon' ក៏ត្រូវបានយកមកដាក់ឈ្មោះសម្រាប់រាត្រីតន្ត្រីរំលឹកដល់លោក Trinh Cong Son ជាច្រើនលើក និងបណ្តាកម្មវិធីអបអរសាទរថ្ងៃដែលប្រទេសជាតិត្រូវបានឯកភាពទាំងស្រុង ភាគខាងជើង និងខាងត្បូងមករស់នៅក្រោមដំបូលផ្ទះតែមួយ។

តន្ត្រីករ Trinh Cong Son ត្រូវបានលើកតម្កើងជាបុគ្គលឆ្នើម ដែលមានការរួមចំណែកយ៉ាងអស្ចារ្យក្នុងបុព្វហេតុកសាង ការពារ និងអភិវឌ្ឍន៍ទីក្រុងហូជីមិញ ក្នុងដំណាក់កាលឆ្នាំ ១៩៧៥-២០២៥៕

ទីតាំងទេសចរណ៍ចំនួន ៤ នៅភាគខាងជើងដែលមានទេសភាពស្អាត និងមិនសូវអ៊ូអរក្នុងឱកាសឈប់សម្រាកថ្ងៃទី ៣០ មេសា - ១ ឧសភា យុគសម័យ - ខាងក្រោមនេះគឺជាការណែនាំអំពីទីតាំងទេសចរណ៍ចំនួន ៤ នៅភាគខាងជើង ដែលមានទេសភាពស្អាត ប៉ុន្តែមិនបារម្ភរឿងមនុស្សកកកុញខ្លាំង ឬលើសចំណុះក្នុងអំឡុងពេលឈប់សម្រាកថ្ងៃទី ៣០ មេសា - ១ ឧសភា។

ទីតាំងទេសចរណ៍ចំនួន ៣ នៅក្បែរ Ha Noi សម្រាប់ឱកាសថ្ងៃទី ៣០ មេសា - ១ ឧសភា៖ ទេសភាពស្អាត មិនបារម្ភរឿងកកស្ទះមនុស្ស យុគសម័យ - ខាងក្រោមនេះគឺជាការណែនាំអំពីទីតាំងទេសចរណ៍ចំនួន ៣ នៅក្បែរ Ha Noi ដែលមានទេសភាពស្អាត ម្ហូបអាហារឆ្ងាញ់ ងាយស្រួលក្នុងការធ្វើដំណើរ ដែលភ្ញៀវទេសចរអាចពិគ្រោះបានក្នុងអំឡុងពេលឈប់សម្រាកថ្ងៃទី ៣០ មេសា - ១ ឧសភា។

ឌឹកអាញ់