Can Tho៖ សម្ពោធមណ្ឌលកម្សាន្តកុមារនៅសាលាមត្តេយ្យ Vinh Vien ១

សំណង់នេះត្រូវបានសាងសង់ឡើងក្នុងកញ្ចប់ថវិកាសរុប ៥០០ លានដុង។ នេះមិនត្រឹមតែជាផ្នែកមួយនៃហេដ្ឋារចនាសម្ព័ន្ធបម្រើជីវភាពស៊ីវិលប៉ុណ្ណោះទេ ប៉ុន្តែមណ្ឌលកម្សាន្តនេះក៏ជាអំណោយដ៏មានអត្ថន័យ បង្ហាញពីការយកចិត្តទុកដាក់យ៉ាងជ្រាលជ្រៅចំពោះជំនាន់ពន្លកថ្មី ដែលជាម្ចាស់នាពេលអនាគតនៃមាតុភូមិ និងប្រទេសជាតិ។

សំណង់នេះរួមមានទីធ្លាលេងដែលមានផ្ទៃដីជាង ៣២០ ម៉ែត្រការ៉េ ដែលត្រូវបានរចនាឡើងជាមណ្ឌលកម្សាន្តធ្វើចលនារាងកាយតភ្ជាប់គ្នានៅក្រៅវាលដែលមានដំបូល រួមមាន៖ វាលស្មៅសិប្បនិម្មិត ក្ដាររំអិល កន្ត្រកវិល; លំហអាកាសបទពិសោធន៍ធម្មជាតិដែលមានសួនច្បារបៃតង និងរូបតំណាងសត្វ; ព្រមទាំងតំបន់ល្បែងកម្សាន្តតាមប្រធានបទដូចជា ល្បែងប្រជាប្រិយ និងល្បែងតួអង្គ។ ឧបករណ៍ទាំងអស់សុទ្ធតែសម្រេចបាននូវបទដ្ឋានសុវត្ថិភាព សមស្របតាមវ័យ ដែលរួមចំណែកបង្កើតបរិយាកាសធ្វើចលនារាងកាយដ៏ល្អប្រសើរ គាំទ្រដល់កុមារក្នុងការអភិវឌ្ឍគ្រប់ជ្រុងជ្រោយទាំងផ្នែករាងកាយ និងស្មារតី ព្រមទាំងកែលម្អលក្ខខណ្ឌនៃគ្រឿងបរិក្ខាររូបវន្តអប់រំនៅមូលដ្ឋាន។

សំណង់នេះត្រូវបានសាងសង់ឡើងជាមួយនឹងផ្នែកប្រើប្រាស់ជាក់ស្តែងជាច្រើន ដែលសម្រេចបាននូវបទដ្ឋានសុវត្ថិភាព និងសមស្របតាមវ័យ ដែលរួមចំណែកបង្កើតបរិយាកាសធ្វើចលនារាងកាយដ៏ល្អប្រសើរ និងគាំទ្រដល់កុមារក្នុងការអភិវឌ្ឍគ្រប់ជ្រុងជ្រោយទាំងផ្នែករាងកាយ និងស្មារតី។

ថ្លែងក្នុងពិធីនេះ លោក Vo Xuan Tan ប្រធានគណៈកម្មាធិការប្រជាជនឃុំ Vinh Vien ទីក្រុង Can Tho បានសង្កត់ធ្ងន់ថា សំណង់នេះត្រូវបានសម្ពោធឡើងក្នុងបរិបទដែលមូលដ្ឋានទើបតែឈានចូលដំណាក់កាលអភិវឌ្ឍន៍ថ្មី បន្ទាប់ពីការអនុវត្តសេចក្តីសម្រេចចិត្តលេខ ១៦៨៨ ចុះថ្ងៃទី ១៦ ខែមិថុនា ឆ្នាំ ២០២៥ របស់គណៈកម្មាធិការអចិន្ត្រៃយ៍នៃរដ្ឋសភា។ តាមនោះ ឃុំ Vinh Vien ត្រូវបានបង្កើតឡើងលើមូលដ្ឋាននៃការរួមបញ្ចូលគ្នារវាងទីរួមស្រុក Vinh Vien និងឃុំ Vinh Vien A ដោយចាប់ផ្ដើមដំណើរការជាផ្លូវការចាប់ពីថ្ងៃទី ១ ខែកក្កដា ឆ្នាំ ២០២៥។ ព្រឹត្តិការណ៍នេះបានបើកនូវឱកាសអភិវឌ្ឍន៍ជាច្រើន ប៉ុន្តែក៏បានដាក់ចេញនូវការលំបាក និងបញ្ហាប្រឈមមិនតិចនោះទេសម្រាប់មូលដ្ឋាន។

បច្ចុប្បន្ននេះ ឃុំ Vinh Vien មានភូមិចំនួន ១២ មានផ្ទៃដីធម្មជាតិ ៦៩,០២ គីឡូម៉ែត្រការ៉េ និងមានប្រជាជនចំនួន ២៤.៩០៨ នាក់។ នេះគឺជាតំបន់ជនបទកសិកម្មសុទ្ធសាធ ជាកន្លែងដែលប្រជាជនផ្សារភ្ជាប់ជីវភាពជាមួយវាលស្រែ ព្រែកជីក និងរដូវច្រូតកាត់ដែលពោពេញដោយផលស្រូវ។ មិនត្រឹមតែប៉ុណ្ណោះ Vinh Vien ក៏ជាទឹកដីដែលមានប្រពៃណីបដិវត្តន៍ដ៏សម្បូរបែបផងដែរ។ ក្នុងអំឡុងឆ្នាំនៃសង្គ្រាម ទីនេះធ្លាប់ជាមូលដ្ឋានទ័ពដ៏សំខាន់ ដែលបានរួមចំណែកបិទបាំង និងចិញ្ចឹមបីបាច់កម្លាំងបដិវត្តន៍។ កូនចៅជាច្រើននៃមាតុភូមិបានតស៊ូយ៉ាងក្លាហាន និងបូជាជីវិតដើម្បីការពាររាល់ចំអាមដី ដែលបានបណ្ដុះនូវគុណសម្បត្តិរឹងមាំ និងមិនចុះញ៉មរបស់ប្រជាពលរដ្ឋមូលដ្ឋានរហូតមកដល់សព្វថ្ងៃ។

ទិដ្ឋភាពទូទៅនៃពិធីទាំងមូល។

ទោះបីជាសង្គ្រាមបានកន្លងផុតទៅជាយូរមកហើយក្តី ប៉ុន្តែការលំបាកនៅតែមានវត្តមាន។ ទូទាំងឃុំបច្ចុប្បន្ននៅមានគ្រួសារក្រីក្រចំនួន ៥៥ គ្រួសារ (ស្មើនឹង ០,៩៨%) និងគ្រួសារក្បែរក្រីក្រចំនួន ៤៩ គ្រួសារ (ស្មើនឹង ០,៨៧%)។ ទាំងនេះមិនត្រឹមតែជាតួលេខស្ថិតិប៉ុណ្ណោះទេ ប៉ុន្តែក៏ជាក្តីកង្វល់ និងជាការទទួលខុសត្រូវរបស់បក្ស និងអាជ្ញាធរមូលដ្ឋាន ក្នុងកិច្ចខិតខំប្រឹងប្រែងកែលម្អជីវភាពរស់នៅរបស់ប្រជាជន។

នាពេលកន្លងមក តាមរយៈការយកចិត្តទុកដាក់ពីសំណាក់ថ្នាក់ដឹកនាំគ្រប់លំដាប់ថ្នាក់ រួមជាមួយការរួមដំណើរពីសហគ្រាស សប្បុរសជន និងកូនចៅនៃមាតុភូមិ ឃុំ Vinh Vien បានកៀងគរប្រភពធនធានជាច្រើនដើម្បីវិនិយោគលើការអភិវឌ្ឍ។ ខ្សែផ្លូវប្រាស្រ័យទាក់ទងជាច្រើនត្រូវបានលើកកម្ពស់ សាលារៀនត្រូវបានសាងសង់ ហើយរូបរាងជនបទត្រូវបានផ្លាស់ប្តូរជាវិជ្ជមានជាបណ្តើរៗ។ ទោះជាយ៉ាងណាក៏ដោយ ប្រភពធនធានថវិកាមូលដ្ឋាននៅមានកម្រិត ហេដ្ឋារចនាសម្ព័ន្ធមិនទាន់មានភាពស៊ីសង្វាក់គ្នា ហើយការតភ្ជាប់រវាងតំបន់នានានៅជួបការលំបាកច្រើន។

ក្នុងបរិបទនោះ ការគាំទ្រពីបណ្តាអង្គការ និងសហគ្រាស កាន់តែមានតម្លៃមិនអាចកាត់ថ្លៃបាន។ សំណង់មណ្ឌលកម្សាន្តនៅសាលាមត្តេយ្យ Vinh Vien 1 ដែលត្រូវបានដាក់ឱ្យប្រើប្រាស់ គឺជាសក្ខីភាពដ៏រស់រវើកសម្រាប់ស្មារតីចែករំលែក និងការទទួលខុសត្រូវសង្គមចំពោះសហគមន៍។ វាមិនត្រឹមតែនាំមកនូវតម្លៃរូបវន្តប៉ុណ្ណោះទេ ប៉ុន្តែថែមទាំងបង្កើតបាននូវលំហអាកាសកម្សាន្តប្រកបដោយសុវត្ថិភាព និងល្អប្រសើរ ដែលរួមចំណែកនាំមកនូវស្នាមញញឹមដ៏បរិសុទ្ធ និងកុមារភាពដ៏ពេញលេញសម្រាប់កុមារតូចៗ។

បណ្តាតំណាងអនុវត្តវិធានកាត់ខ្សែបូសម្ពោធដាក់ឱ្យប្រើប្រាស់ជាផ្លូវការ។

បក្ស អាជ្ញាធរ និងប្រជាជនឃុំ Vinh Vien កំណត់ថា ការវិវិយោគលើកុមារ គឺជាការវិនិយោគសម្រាប់អនាគត។ តាមរយៈសំណង់ជាក់ស្តែងបែបនេះ សិស្សានុសិស្សនឹងមានលក្ខខណ្ឌបន្ថែមក្នុងការសិក្សា កម្សាន្ត និងអភិវឌ្ឍន៍គ្រប់ជ្រុងជ្រោយទាំងផ្នែករាងកាយ និងស្មារតី។

ដើម្បីឱ្យសំណង់នេះបញ្ចេញប្រសិទ្ធភាពបានយូរអង្វែង ថ្នាក់ដឹកនាំមូលដ្ឋានបានស្នើឱ្យសមូហភាពកម្មាភិបាល និងគ្រូបង្រៀននៃសាលាមត្តេយ្យ Vinh Vien 1 ទទួលបន្ទុកគ្រប់គ្រង រក្សា និងប្រើប្រាស់ឱ្យចំគោលដៅ ដោយធានាសុវត្ថិភាពដាច់ខាតសម្រាប់កុមារ។ ទន្ទឹមនឹងនេះ មូលដ្ឋានក៏មានបំណងចង់បន្តទទួលបានការយកចិត្តទុកដាក់ និងការរួមដំណើរពីបណ្តាថ្នាក់ វិស័យ សហគ្រាស និងម្ចាស់ជំនួយនាពេលខាងមុខ។

ទោះបីជាខាងមុខនៅមានការលំបាកច្រើន ប៉ុន្តែជាមួយប្រពៃណីបដិវត្តន៍ ស្មារតីសាមគ្គីភាព និងឆន្ទៈពុះពារឡើង បក្ស និងប្រជាជនឃុំ Vinh Vien ប្តេជ្ញាកសាងមាតុភូមិឱ្យកាន់តែរីកចម្រើន លើកកម្ពស់ជីវភាពរស់នៅរបស់ប្រជាពលរដ្ឋ ដើម្បីឱ្យកុមារគ្រប់រូបបានទៅសាលារៀន ទទួលបានការថែទាំយ៉ាងពេញលេញ និងដើម្បីឱ្យ Vinh Vien ក្លាយជាទឹកដីនៃសេចក្តីស្រឡាញ់ និងគួរឱ្យចង់រស់នៅ។

ក្នុងឱកាសនេះ ក្រុមហ៊ុន Amway Vietnam ត្រូវបានប្រធានគណៈកម្មាធិការប្រជាជនទីក្រុង Can Tho ប្រគល់ប័ណ្ណសរសើរ និងប្រធានគណៈកម្មាធិការប្រជាជនឃុំ Vinh Vien ប្រគល់លិខិតសរសើរ ដោយសារមានសមិទ្ធផលក្នុងការងារសុខុមាលភាព និងសុខុមាលភាពសង្គមនៅមូលដ្ឋាន៕

អាណិកជនវៀតណាមនៅប្រទេសបារាំងរៀបចំពិធីបួងសួងសុំសេចក្តីសុខ នាដើមរដូវផ្ការីក នៅវត្ត Truc Lam Thien Vien យុគសម័យ - ក្នុងឱកាសថ្ងៃទី ១៥ រោច ខែមគិសិរ នាព្រឹកថ្ងៃទី១៣ ខែកុម្ភៈ វត្ត Truc Lam នៅទីក្រុង Villebon-sur-Yvette ក្បែរទីក្រុងប៉ារីស ប្រទេសបារាំង បានប្រារព្ធពិធីបួងសួងសុំសេចក្តីសុខជូនប្រជាជនវៀតណាមនៅទីក្រុងប៉ារីស និងតំបន់ជុំវិញ។

អាណិកជនវៀតណាមនៅបារាំងចូលរួមពិធីបុណ្យVu Lanនៅវត្ត Truc Lam Thien Vien ទីក្រុងប៉ារីស យុគសម័យ - ដោយសារជំងឺរាតត្បាតកូវីដ -១៩ ពិធីបុណ្យVu Lanឆ្នាំ ២០២១ នៅវត្ត Thien Vien Truc Lam ទីក្រុងប៉ារីស (ប្រទេសបារាំង) រហូតដល់ថ្ងៃទី ៥ ខែកញ្ញាទើបត្រូវបានប្រារព្ធឡើងដោយមានកម្មវិធីខ្លីជាងនិងចំនួនអ្នកចូលរួមមានកំណត់។

ឌឹកអាញ់

thoidai.com.vn