ប្រព័ន្ធផ្សព្វផ្សាយសិង្ហបុរី៖ បណ្តាអាទិភាពក្នុងគោលនយោបាយការបរទេសរបស់វៀតណាម

នារសៀលថ្ងៃទី ១៤ ខែមេសា នៅទីក្រុងប៉េកាំង លោកអគ្គលេខាបក្ស និងជាប្រធានរដ្ឋ To Lam ព្រមទាំងភរិយា បានជួបសំណេះសំណាលជាមួយកម្មាភិបាល បុគ្គលិកនៃស្ថានទូត និងតំណាងសហគមន៍ជនជាតិវៀតណាមដែលកំពុងរស់នៅប្រទេសចិន។

អ្នកយកព័ត៌មាននៃទីភ្នាក់ងារសារព័ត៌មានវៀតណាម ប្រចាំនៅសិង្ហបុរី ដោយដកស្រង់ប្រភពពី CAN បានឱ្យដឹងថា នាថ្ងៃទី ១៤ ខែមេសា លោកអគ្គលេខាបក្ស និងជាប្រធានរដ្ឋ To Lam បានអញ្ជើញទៅដល់ប្រទេសចិន ក្នុងដំណើរទស្សនកិច្ចនៅបរទេសលើកដំបូងក្នុងឋានៈជាប្រមុខរដ្ឋ ដែលជាសញ្ញាបង្ហាញអំពីបណ្តាអាទិភាពក្នុងគោលនយោបាយការបរទេសរបស់វៀតណាម។

ដំណើរទស្សនកិច្ចរបស់លោកអគ្គលេខាបក្ស និងជាប្រធានរដ្ឋ To Lam ទៅកាន់ប្រទេសចិន គឺជាដំណើរទស្សនកិច្ចនៅបរទេសលើកដំបូង ក្នុងចំណោមដំណើរទស្សនកិច្ចជាច្រើននាពេលខាងមុខ ក្នុងឋានៈជាប្រមុខរដ្ឋ។

ជាមួយនឹងតួនាទីដឹកនាំដ៏រឹងមាំទាំងក្នុងនាមជាអគ្គលេខាបក្សកុម្មុយនីស្តវៀតណាម និងជាប្រធានរដ្ឋ បណ្តាអ្នកវិភាគជឿជាក់ថា លោកអគ្គលេខាបក្ស និងជាប្រធានរដ្ឋ To Lam កំពុងស្ថិតក្នុងឋានៈដ៏ល្អបំផុត ដើម្បីទាញយកផលប្រយោជន៍ប្រកបដោយប្រសិទ្ធភាពពីបណ្តាក្របខ័ណ្ឌសហប្រតិបត្តិការអន្តរជាតិ ដើម្បីបម្រើដល់គោលដៅអភិវឌ្ឍន៍ប្រទេសជាតិ។

ដំណើរទស្សនកិច្ចនេះប្រព្រឹត្តទៅក្នុងបរិបទដែលវៀតណាមកំពុងស្វែងរកតួនាទីកាន់តែធំក្នុងភូមិសាស្ត្រនយោបាយ ដែលជាការផ្លាស់ប្តូរដ៏ធំមួយត្រូវបានដាក់ចេញនៅក្នុងមហាសន្និបាតតំណាងទូទាំងប្រទេសលើកទី ១៤ នៃបក្សកុម្មុយនីស្តវៀតណាម កាលពីខែមករាកន្លងទៅ។

វៀតណាមកាន់តែបញ្ជាក់ពីឋានៈរបស់ខ្លួនជាតួអង្គដ៏សកម្មនៅលើឆាកអន្តរជាតិ។ ក្នុងឆ្នាំ ២០២៤ វៀតណាមបានផ្តួចផ្តើមបង្កើត "វេទិកាអនាគតអាស៊ាន" ជាវេទិកាប្រចាំឆ្នាំ ដែលទាក់ទាញបណ្តាមេដឹកនាំសកលលោក រួមមាន នាយករដ្ឋមន្ត្រីម៉ាឡេស៊ី លោក Anwar Ibrahim ប្រធានាធិបតីទីម័រឡេស្តេ លោក Jose Ramos-Horta និងនាយករដ្ឋមន្ត្រីនូវែលហ្សេឡង់ លោក Christopher Luxon។

កាលពីខែមីនាកន្លងទៅ ទីក្រុងហាណូយបានធ្វើជាម្ចាស់ផ្ទះរៀបចំ "កិច្ចសន្ទនាយុទ្ធសាស្ត្រថ្នាក់រដ្ឋមន្ត្រី ៣+៣" ជាលើកដំបូងរវាងវៀតណាម និងចិន ក្នុងវិស័យនគរបាល ការពារជាតិ និងការបរទេស។

វៀតណាមក៏កំពុងត្រៀមលក្ខណៈធ្វើជាម្ចាស់ផ្ទះរៀបចំ "វេទិកាសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក" (APEC) នៅឆ្នាំ ២០២៧ ហើយនឹងកាន់តួនាទីជាប្រធានអាស៊ានក្នុងពេលឆាប់ៗខាងមុខនេះ។ នេះគឺជាសញ្ញាដែលបង្ហាញពីឥទ្ធិពលការទូតដ៏កាន់តែខ្លាំងក្លារបស់វៀតណាម។

យោងតាមការយល់ឃើញរបស់ក្រុមអ្នកសង្កេតការណ៍ តួនាទីភូមិសាស្ត្រនយោបាយរបស់វៀតណាមកំពុងចាប់ផ្តើមផ្លាស់ប្តូរ។ វៀតណាមកំពុងសម្រេចគោលដៅសំខាន់ចំនួន ២៖ រក្សាការរីកចម្រើនសេដ្ឋកិច្ច និងពង្រឹងការការពារជាតិ និងសន្តិសុខ។

លោក Le Hong Hiep - អ្នកស្រាវជ្រាវជាន់ខ្ពស់ និងជាអ្នកសម្របសម្រួលកម្មវិធីស្រាវជ្រាវវៀតណាម នៅវិទ្យាស្ថាន ISEAS-Yusof Ishak បានវាយតម្លៃថា ក្នុងបរិបទបច្ចុប្បន្ន នៅពេលដែលបណ្តាភាពប្រែប្រួលនៃភូមិសាស្ត្រនយោបាយមាននិន្នាការធ្វើឱ្យចុះខ្សោយនូវសន្តិភាព និងស្ថិរភាពតំបន់ ភារកិច្ចការពារជាតិពីចម្ងាយ និងពីមុនពេលកើតមានឡើង បានក្លាយជាចំណុចលេចធ្លោជាងមុន តាមទស្សនៈរបស់បក្សកុម្មុយនីស្តវៀតណាម។

យោងតាមលោក Le Hong Hiep នេះគឺជាមូលហេតុដែលបក្សកុម្មុយនីស្តវៀតណាមលើកកម្ពស់តួនាទីនៃកិច្ចការបរទេស ទៅជាទីតាំងដ៏សំខាន់ និងជាប្រចាំ។

មានទស្សនៈដូចគ្នានេះដែរ លោក Lye Liang Fook - អ្នកស្រាវជ្រាវជាន់ខ្ពស់នៅវិទ្យាស្ថាន ISEAS-Yusof Ishak - បានយល់ឃើញថា ជាមួយនឹងចំនួនប្រជាជនដែលមានទំហំធំគួរសមនៅអាស៊ីអាគ្នេយ៍ និងភាពស្វាហាប់នៃសេដ្ឋកិច្ច វៀតណាមកំពុងស្វែងរកវិធីសាស្រ្តដើម្បីកាន់កាប់តួនាទីធំជាងមុនក្នុងភូមិសាស្ត្រនយោបាយ។ មុននឹងបញ្ហាប្រឈមជាសកលលោក វៀតណាម និងបណ្តាប្រទេសផ្សេងទៀតចាំបាច់ត្រូវតែដើរតួនាទីកាន់តែសកម្មជាងមុន ដើម្បីធ្វើពិពិធកម្មការអភិវឌ្ឍ ស្វែងរកឱកាសទីផ្សារថ្មីៗ និងសហប្រតិបត្តិការជាមួយដៃគូសំខាន់ៗ ដើម្បីបន្តការរីកចម្រើន និងរក្សាស្ថិរភាព។

យោងតាមក្រុមអ្នកវិភាគនៅសិង្ហបុរី ការដែលវៀតណាមចូលរួមយ៉ាងទូលំទូលាយក្នុងបណ្តាសកម្មភាពជាសកល កាន់តែច្រើនឡើងៗ នឹងពង្រឹងរូបភាពរបស់ប្រទេសជា "មហាអំណាចកម្រិតមធ្យមដែលកំពុងងើបឡើង" ដែលត្រៀមខ្លួនជាស្រេចក្នុងការរួមចំណែកយ៉ាងសកម្មជាងមុន ក្នុងកិច្ចខិតខំប្រឹងប្រែងដើម្បីសន្តិភាពអន្តរជាតិ។ ជាឧទាហរណ៍ជាក់ស្តែង គឺការចូលរួមរបស់វៀតណាមក្នុងបណ្តាគណៈប្រតិភូរក្សាសន្តិភាពរបស់អង្គការសហប្រជាជាតិនៅទ្វីបអាហ្វ្រិក ក្នុងរយៈពេលមួយទសវត្សរ៍កន្លងមកនេះ ដែលជាសញ្ញាបង្ហាញថាវៀតណាមត្រៀមខ្លួនជាស្រេចក្នុងការទទួលខុសត្រូវជាសកលកាន់តែធំជាងមុន។

លោក Le Hong Hiep បានវាយតម្លៃថា៖ "វៀតណាមអាចដើរតួនាទីយ៉ាងសកម្មជាងមុនក្នុងពេលអនាគត ប្រសិនបើសិនជាអាចរក្សាការអភិវឌ្ឍសេដ្ឋកិច្ច និងមានប្រភពធនធានបន្ថែមទៀត សម្រាប់ការចូលរួមចំណែក ក៏ដូចជាការប្តេជ្ញាចិត្តជាអន្តរជាតិរបស់ខ្លួន"៕

លោក To Lam អគ្គលេខាបក្ស ត្រូវបានរដ្ឋសភាជ្រើសតាំងឲ្យកាន់តំណែងជាប្រធានរដ្ឋវៀតណាមសម្រាប់អាណត្តិ ២០២៦-២០៣១ នៅព្រឹកថ្ងៃទី៧ ខែមេសា នៅក្នុងសម័យប្រជុំលើកទី ១ នៃរដ្ឋសភានីតិកាលទី១៦ លោក To Lam អគ្គលេខាបក្ស ត្រូវបានរដ្ឋសភាជ្រើសតាំងឲ្យកាន់តំណែងជាប្រធានរដ្ឋវៀតណាម សម្រាប់អាណត្តិ ២០២៦-២០៣១។

អគ្គលេខាបក្ស To Lam ទទួលជួបប្រធានក្រុមមិត្តភាពសភាកូរ៉េ-វៀតណាម យុគសម័យ - អគ្គលេខាបក្សបានស្នើថា ក្រុមសមាជិកសភាមិត្តភាពវៀតណាម-កូរ៉េទាំងពីរ ពង្រឹងកិច្ចសហប្រតិបត្តិការ លើកកម្ពស់តួនាទីជាស្ពាន និងជំរុញការអនុវត្តកិច្ចព្រមព្រៀងដែលបានចុះហត្ថលេខា រួមចំណែកធ្វើឱ្យទំនាក់ទំនងទ្វេភាគីកាន់តែស៊ីជម្រៅ និងនិរន្តរភាព។

ហេង វុធ្ធី

thoidai.com.vn