យកចិត្តទុកដាក់ជាពិសេសលើដំណាក់កាលចាត់តាំងអនុវត្តភារកិច្ចអភិវឌ្ឍន៍សេដ្ឋកិច្ច - សង្គម ក្នុងដំណាក់កាល ២០២៦-២០៣០

សមមិត្ត Nguyen Thanh Nghi សមាជិកការិយាល័យនយោបាយ លេខាមជ្ឈិមបក្ស ប្រធានគណៈគោលនយោបាយ និងយុទ្ធសាស្ត្រមជ្ឈិម បានធ្វើបទឧទ្ទេសនាមនៅក្នុងសន្និសីទ។

នៅក្នុងសន្និសីទសហទូទាំងប្រទេស ដើម្បីស្រាវជ្រាវ រៀនសូត្រ ជ្រួតជ្រាប និងអនុវត្តសេចក្តីសម្រេចចិត្តនៃសន្និសីទលើកទី ២ របស់គណៈកម្មាធិការមជ្ឈិមបក្ស នីតិកាលទី ១៤ ដែលរៀបចំដោយការិយាល័យនយោបាយ និងលេខាធិការដ្ឋានមជ្ឈិមបក្ស កាលពីព្រឹកមិញនេះ (ថ្ងៃទី ១៣ ខែមេសា) បណ្តាតំណាងបានស្តាប់បទឧទ្ទេសនាមអំពីសេចក្តីសន្និដ្ឋានលេខ 18-KL/TW ចុះថ្ងៃទី ០២ ខែមេសា ឆ្នាំ ២០២៦ របស់គណៈកម្មាធិការមជ្ឈិមបក្ស នីតិកាលទី ១៤ ស្តីពីផែនការអភិវឌ្ឍន៍សេដ្ឋកិច្ច - សង្គម ហិរញ្ញវត្ថុជាតិ និងការខ្ចី បង់បំណុលសាធារណៈ ការវិនិយោគសាធារណៈរយៈពេលមធ្យម ៥ ឆ្នាំ ២០២៦-២០៣០ ផ្សារភ្ជាប់ជាមួយនឹងការអនុវត្តគោលដៅខិតខំសម្រេចឱ្យបាននូវកំណើន “លេខ ២ ខ្ទង់” ដែលបង្ហាញដោយសមមិត្ត Nguyen Thanh Nghi សមាជិកការិយាល័យនយោបាយ លេខាមជ្ឈិមបក្ស ប្រធានគណៈគោលនយោបាយ និងយុទ្ធសាស្ត្រមជ្ឈិម។

សមមិត្ត Nguyen Thanh Nghi បានសង្កត់ធ្ងន់ថា សេចក្តីសន្និដ្ឋាននេះមានអត្ថន័យយ៉ាងសំខាន់បំផុត ដោយបានបូកសរុបនូវខ្លឹមសារជាមូលដ្ឋាននៃគម្រោងបណ្តាដំណោះស្រាយយុទ្ធសាស្ត្រដើម្បីជំរុញកំណើនលេខ ២ ខ្ទង់ ដែលជាជំហានបញ្ជាក់ឱ្យជាក់ស្តែងនូវបណ្តាទិសដៅយុទ្ធសាស្ត្រ និងសេចក្តីសម្រេចចិត្តធំៗស្តីពីការអភិវឌ្ឍសេដ្ឋកិច្ច និងសង្គម នៅក្នុងសេចក្តីសម្រេចចិត្តនៃមហាសន្និបាតលើកទី ១៤ របស់បក្ស បង្ហាញពីការប្តេជ្ញាចិត្តយ៉ាងខ្លាំងក្លារបស់បក្សទាំងមូល កងទ័ពទាំងមូល និងប្រជាជនទាំងមូល ក្នុងការអនុវត្តគោលដៅកំណើនឆាប់រហ័ស និងប្រកបដោយចីរភាព។

សភាពការណ៍ពិភពលោកក្នុងដំណាក់កាល ២០២១-២០២៥ មានទាំងលក្ខណៈអំណោយផល កាលានុវត្តភាព និងការលំបាក បញ្ហាប្រឈមនៅលាយឡំគ្នា ប៉ុន្តែការលំបាក និងបញ្ហាប្រឈមគឺជាចំណុចចម្បង។ ទោះជាយ៉ាងណាក៏ដោយ ជាមួយនឹងការចូលរួមយ៉ាងម៉ឺងម៉ាត់នៃប្រព័ន្ធនយោបាយទាំងមូល បក្សទាំងមូល ប្រជាជនទាំងមូល និងកងទ័ពទាំងមូល ក្រោមការដឹកនាំយ៉ាងជិតស្និទ្ធរបស់បក្ស; ការត្រួតពិនិត្យ ការរួមដំណើរ និងការសម្របសម្រួលរបស់រដ្ឋសភា; ការចង្អុលបង្ហាញ និងការគ្រប់គ្រងប្រកបដោយការសម្រេចចិត្ត បត់បែន ទាន់ពេលវេលា និងមានប្រសិទ្ធភាពរបស់រដ្ឋាភិបាល នាយករដ្ឋមន្ត្រី បណ្តាក្រសួង ស្ថាប័ន និងមូលដ្ឋាន ប្រទេសយើងបន្តសម្រេចបាននូវសមិទ្ធផលសំខាន់ៗ និងគ្រប់ជ្រុងជ្រោយ; សម្រេចបាន និងលើស ២២ ក្នុងចំណោម ២៦ សូចនាករសេដ្ឋកិច្ច - សង្គមចម្បងៗក្នុងដំណាក់កាល ២០២១-២០២៥ ដែលក្នុងនោះបានបំពេញសព្វគ្រប់នូវរាល់សូចនាករផ្នែកសង្គម។

ទោះជាយ៉ាងណាក៏ដោយ មូលដ្ឋានគ្រឹះសេដ្ឋកិច្ចវិបុលភាពមិនទាន់រឹងមាំពិតប្រាកដនៅឡើយ; ផលិតភាព គុណភាព ប្រសិទ្ធភាព លទ្ធភាពទប់ទល់ និងសមត្ថភាពប្រកួតប្រជែងនៃសេដ្ឋកិច្ចមិនទាន់ខ្ពស់។ វិទ្យាសាស្ត្រ បច្ចេកវិទ្យា ការផ្លាស់ប្តូរថ្មីប្រកបដោយការច្នៃប្រឌិត និងការផ្លាស់ប្តូរឌីជីថល នៅមានការរួមចំណែកតិចតួចចំពោះកំណើន។ មិនទាន់មានយន្តការ និងគោលនយោបាយខ្លាំងក្លាគ្រប់គ្រាន់ ដើម្បីទាក់ទាញប្រភពធនធានពីវិស័យឯកជន និងការវិនិយោគពីបរទេស...

ឈានចូលដំណាក់កាល ២០២៦-២០៣០ សភាពការណ៍ពិភពលោកមានការវិវត្តថ្មីៗយ៉ាងស្មុគស្មាញ និងពិបាកប៉ាន់ស្មានបំផុត; ជាពិសេសគឺជម្លោះនៅមជ្ឈិមបូព៌ា បង្កឱ្យមានការរំខានដល់ខ្សែសង្វាក់ផ្គត់ផ្គង់ ធ្វើឱ្យតម្លៃប្រេង ឧស្ម័ន និងថ្លៃដឹកជញ្ជូនកើនឡើងខ្ពស់ ជះឥទ្ធិពលអវិជ្ជមានដល់ពាណិជ្ជកម្ម ការវិនិយោគអន្តរជាតិ និងជះឥទ្ធិពលដោយផ្ទាល់ដល់ការអនុវត្តគោលដៅ ភារកិច្ចអភិវឌ្ឍន៍សេដ្ឋកិច្ច - សង្គម របស់ប្រទេសយើង។

ផ្អែកលើមូលដ្ឋាននៃការវាយតម្លៃគ្រប់ជ្រុងជ្រោយអំពីភាពអំណោយផល និងការលំបាក គណៈកម្មាធិការមជ្ឈិមបានឯកភាពលើបណ្ដាគោលដៅ និងសូចនាករ ដើម្បីសម្រេចបាននូវកំណើនសេដ្ឋកិច្ចក្នុងកម្រិត “លេខ ២ ខ្ទង់” សំដៅបំពេញឱ្យបាននូវគោលដៅយុទ្ធសាស្ត្រ ១០០ ឆ្នាំទាំងពីររបស់ប្រទេសជាតិ។

សេចក្តីសន្និដ្ឋានបានកំណត់ក្រុមទស្សនៈដឹកនាំចំនួន ៤ ដែលអាចសង្ខេបនូវខ្លឹមសារចម្បងៗដូចជា៖ ធានានូវការដឹកនាំ និងការចង្អុលបង្ហាញគ្រប់ជ្រុងជ្រោយ និងដោយផ្ទាល់របស់បក្ស; លើកកម្ពស់តួនាទីកសាងការអភិវឌ្ឍរបស់រដ្ឋ; ការត្រួតពិនិត្យ និងការផ្តល់មតិរិះគន់របស់រណសិរ្សមាតុភូមិវៀតណាម; ប្តេជ្ញាអនុវត្តឱ្យបានជោគជ័យនូវសេចក្តីសម្រេចចិត្តនៃមហាសន្និបាតលើកទី ១៤ របស់បក្ស បណ្ដាសេចក្តីសម្រេចចិត្ត និងសេចក្តីសន្និដ្ឋានរបស់មជ្ឈិម ការិយាល័យនយោបាយ លេខាធិការដ្ឋាន ដើម្បីសម្រេចបាននូវគោលដៅកំណើនលេខ ២ ខ្ទង់ ផ្សារភ្ជាប់ជាមួយនឹងស្ថិរភាពសេដ្ឋកិច្ចវិបុលភាព ការគ្រប់គ្រងអតិផរណា និងការធានានូវតុល្យភាពធំៗនៃសេដ្ឋកិច្ច។

សេចក្តីសន្និដ្ឋានបានដាក់ចេញនូវក្រុមភារកិច្ច និងដំណោះស្រាយចម្បងៗចំនួន ០៤ ក្រុម៖ អំពីសេដ្ឋកិច្ច - សង្គម; អំពីហិរញ្ញវត្ថុជាតិ; អំពីការខ្ចី និងការបង់បំណុលសាធារណៈ; និងអំពីការវិនិយោគសាធារណៈរយៈពេលមធ្យម ព្រមទាំងឧបសម្ព័ន្ធចំនួន ០៣ ផងដែរ។

តាមសមមិត្ត Nguyen Thanh Nghi ការជ្រួតជ្រាប និងការអនុវត្តប្រកបដោយប្រសិទ្ធភាពនូវភារកិច្ចអភិវឌ្ឍន៍សេដ្ឋកិច្ច - សង្គម ក្នុងដំណាក់កាល ២០២៦-២០៣០ មិនត្រឹមតែជាតម្រូវការបន្ទាន់ប៉ុណ្ណោះទេ ប៉ុន្តែថែមទាំងជាភារកិច្ចនយោបាយស្នូលទៀតផង; ដែលទាមទារឱ្យកម្មាភិបាល សមាជិកបក្សម្នាក់ៗត្រូវលើកកម្ពស់ការទទួលខុសត្រូវ ភាពជាអ្នកត្រួសត្រាយ “ហ៊ានគិត ហ៊ានធ្វើ ហ៊ានទទួលខុសត្រូវ” ដើម្បីក្លាយជាស្នូលនៅក្នុងដំណើរការផ្លាស់ប្តូរមុខមាត់ថ្មីគ្រប់ជ្រុងជ្រោយរបស់ប្រទេសជាតិក្នុងយុគសម័យថ្មី។

សមមិត្ត Nguyen Thanh Nghi បានបញ្ជាក់យ៉ាងច្បាស់ថា ដើម្បីឱ្យសេចក្តីសន្និដ្ឋានលេខ ១៨ នៃសន្និសីទលើកទី ២ របស់គណៈកម្មាធិការមជ្ឈិមបក្ស នីតិកាលទី ១៤ អាចចូលទៅក្នុងសភាពការណ៍ជាក់ស្តែងបានឆាប់រហ័ស បញ្ចេញនូវប្រសិទ្ធភាព និងជំរុញការអភិវឌ្ឍសេដ្ឋកិច្ច - សង្គមឱ្យបានឆាប់រហ័ស និងប្រកបដោយចីរភាព ព្រមទាំងខិតខំសម្រេចឱ្យបាននូវកំណើន “លេខ ២ ខ្ទង់” នោះ គឺទាមទារឱ្យបណ្តាស្ថាប័ននៅក្នុងប្រព័ន្ធនយោបាយ គ្រប់ជាន់ថ្នាក់ គ្រប់វិស័យ និងគ្រប់មូលដ្ឋាន ត្រូវយកចិត្តទុកដាក់ជាពិសេសលើការចាត់តាំងអនុវត្ត ដោយធានានូវភាពម្ចាស់ការ បន្ទាន់ បត់បែន និងមានប្រសិទ្ធភាព។

តាមនោះ គណបក្សរដ្ឋាភិបាល និងគណបក្សរដ្ឋសភា ត្រូវចង្អុលបង្ហាញឱ្យមានការរាយការណ៍អំពីបណ្ដាផែនការ ដើម្បីឱ្យរដ្ឋសភាពិន្យត្យ និងសម្រេច; សម្របសម្រួលឱ្យបានជិតស្និទ្ធ និងទាន់ពេលវេលាក្នុងការពិនិត្យ កែសម្រួលឱ្យបានសមស្របនៅពេលមានការប្រែប្រួល ឬមានឥទ្ធិពលខ្លាំងដល់បណ្ដាគោលដៅសេដ្ឋកិច្ចវិបុលភាព និងតុល្យភាពថវិការដ្ឋ។

គណៈឃោសនាអប់រំ និងចលនាមហាជនមជ្ឈិម ធ្វើជាអធិបតីក្នុងការផ្តល់យោបល់ជូនការិយាល័យនយោបាយ និងលេខាធិការដ្ឋាន ដើម្បីចាត់តាំងការជ្រួតជ្រាប និងធ្វើការឃោសនាជាប្រចាំអំពីការអនុវត្ត និងលទ្ធផលនៃការអនុវត្តសេចក្តីសន្និដ្ឋាន។

គណបក្សរដ្ឋាភិបាល ធ្វើជាអធិបតី និងសម្របសម្រួលជាមួយគណៈគោលនយោបាយ និងយុទ្ធសាស្ត្រមជ្ឈិម ព្រមទាំងការិយាល័យមជ្ឈិមបក្ស ដើម្បីតាមដាន រុញច្រាន និងវាយតម្លៃលទ្ធផលនៃការអនុវត្ត; រាយការណ៍លទ្ធផលជូនការិយាល័យនយោបាយ និងលេខាធិការដ្ឋាន រៀងរាល់ ៦ ខែម្តង ដើម្បីដឹកនាំចង្អុលបង្ហាញ។

សមមិត្ត Nguyen Thanh Nghi បានស្នើឱ្យបណ្ដាសមមិត្តលេខាគណៈកម្មាធិការបក្សខេត្ត ក្រុង គណបក្សបណ្ដាក្រសួង ស្ថាប័ន និងអង្គភាពនៅមជ្ឈិម លើកកម្ពស់តួនាទីជាគំរូរបស់អ្នកដឹកនាំ ដឹកនាំ និងចង្អុលបង្ហាញដោយផ្ទាល់នូវការកសាងកម្មវិធី ផែនការ និងយុទ្ធសាស្ត្រជាក់ស្ដែងឱ្យស្របតាមសភាពការណ៍ជាក់ស្ដែង ព្រមទាំងម្ចាស់ការចាត់តាំងអនុវត្តឱ្យបានម៉ឺងម៉ាត់ ស៊ីសង្វាក់គ្នា ទាន់ពេលវេលា និងមានប្រសិទ្ធភាព។

ទន្ទឹមនឹងនោះ ត្រូវពង្រឹងការត្រួតពិនិត្យ តាមដាន និងរុញច្រាន; ដោះស្រាយឱ្យបានដាច់ស្រឡះនូវបណ្ដាបញ្ហាដែលស្ថិតក្នុងសមត្ថកិច្ច; ទទួលខុសត្រូវរហូតដល់ទីបញ្ចប់ចំពោះលទ្ធផលនៃការអនុវត្ត; លើកទឹកចិត្ត និងបង្កលក្ខណៈងាយស្រួល ដើម្បីឱ្យសហគមន៍អាជីវកម្ម និងប្រជាជនគ្រប់ស្រទាប់វណ្ណៈ បានចូលរួមយ៉ាងសកម្ម និងរួមចំណែកដល់គោលដៅរួមរបស់ប្រទេសជាតិ៕

វិស័យទេសចរណ៍របស់ទីក្រុងហាណូយកំពុងមានការរីកចម្រើនគួរឱ្យចាប់អារម្មណ៍ ដោយស្វាគមន៍ភ្ញៀវទេសចរជិត ៩ លាននាក់នៅក្នុងត្រីមាសទីមួយនៃឆ្នាំ ២០២៦ យុគសម័យ - យោងតាមមន្ទីរទេសចរណ៍ហាណូយ ក្នុងខែមីនា ឆ្នាំ២០២៦ វិស័យទេសចរណ៍របស់រដ្ឋធានីបានបន្តកត់ត្រាកំណើនគួរឱ្យចាប់អារម្មណ៍ជាមួយនឹងភ្ញៀវទេសចរសរុបចំនួន ៣,០៥ លាននាក់។ ប្រាក់ចំណូលសរុបពីវិស័យទេសចរណ៍ក្នុងខែមីនាបានឈានដល់ប្រមាណ ១២,៩ ពាន់ពាន់លានដុង...

ភារកិច្ចព័ត៌មាន និងទំនាក់ទំនងរបស់សារព័ត៌មានក្នុងឆ្នាំ ២០២៦ យុគសម័យ - សារព័ត៌មានត្រូវមានភាពសកម្ម ច្នៃប្រឌិត បញ្ចុះបញ្ចូល និងមនុស្សធម៌ ក្នុងការណែនាំព័ត៌មាន និងចូលរួមចំណែកដល់ការអភិវឌ្ឍថ្មីរបស់ប្រទេសនៅឆ្នាំ ២០២៦។

ហេង វុធ្ធី