លើកកម្ពស់កម្រិតការងារនយោបាយ និងសតិអារម្មណ៍ ចំពោះមុខការប្រែប្រួលយ៉ាងឆាប់រហ័ស ស្មុគស្មាញ និងពិបាកប៉ាន់ស្មាន

សមមិត្ត Trinh Van Quyet សមាជិកការិយាល័យនយោបាយ លេខាមជ្ឈិមបក្ស ប្រធានគណៈឃោសនាអប់រំ និងចលនាមហាជនមជ្ឈិម បានបង្ហាញនូវបទឧទ្ទេសនាមអំពីខ្លឹមសារជាមូលដ្ឋាននៃបទប្បញ្ញត្តិស្ដីពីការងារនយោបាយ និងសតិអារម្មណ៍នៅក្នុងបក្ស។

នៅក្នុងសន្និសីទសហទូទាំងប្រទេស ដើម្បីស្រាវជ្រាវ រៀនសូត្រ ជ្រួតជ្រាប និងអនុវត្តសេចក្តីសម្រេចចិត្តនៃសន្និសីទលើកទី ២ របស់គណៈកម្មាធិការមជ្ឈិមបក្ស នីតិកាលទី ១៤ ដែលរៀបចំដោយការិយាល័យនយោបាយ និងលេខាធិការដ្ឋានមជ្ឈិមបក្ស កាលពីព្រឹកមិញនេះ (ថ្ងៃទី ១៣ ខែមេសា) បណ្តាតំណាងបានស្តាប់សមមិត្ត Trinh Van Quyet សមាជិកការិយាល័យនយោបាយ លេខាមជ្ឈិមបក្ស ប្រធានគណៈឃោសនាអប់រំ និងចលនាមហាជនមជ្ឈិម បង្ហាញនូវបទឧទ្ទេសនាមអំពីខ្លឹមសារជាមូលដ្ឋាននៃបទប្បញ្ញត្តិស្តីពីការងារនយោបាយ និងសតិអារម្មណ៍នៅក្នុងបក្ស។

តាមសមមិត្ត Trinh Van Quyet សន្និសីទលើកទី ២ របស់គណៈកម្មាធិការមជ្ឈិមបក្ស នីតិកាលទី ១៤ បានចេញផ្សាយបទប្បញ្ញត្តិលេខ 19-QD/TW ចុះថ្ងៃទី ០៨ ខែមេសា ឆ្នាំ ២០២៦ ស្តីពីការងារនយោបាយ និងសតិអារម្មណ៍នៅក្នុងបក្ស។ នេះជាលើកដំបូងហើយ ដែលបក្សយើងបានចេញផ្សាយបទប្បញ្ញត្តិមួយដែលមានលក្ខណៈជាប្រព័ន្ធ គ្រប់ជ្រុងជ្រោយ ដោយអះអាងពីជំហានអភិវឌ្ឍន៍ថ្មីនៃផ្នត់គំនិតទ្រឹស្តី និងការប្តេជ្ញាចិត្តនយោបាយយ៉ាងខ្ពស់បំផុត ក្នុងការកសាង និងកែទម្រង់បក្ស ព្រមទាំងលើកកម្ពស់សមត្ថភាពដឹកនាំ និងកម្លាំងប្រយុទ្ធរបស់បក្ស។

បទប្បញ្ញត្តិគឺជាការរួមផ្ដុំ និងការអភិវឌ្ឍប្រកបដោយសង្គតិភាពនៃផ្នត់គំនិតទ្រឹស្ដីរបស់បក្ស ការបញ្ជាក់ឱ្យជាក់ស្ដែងនូវស្មារតីនៃមហាសន្និបាតលើកទី ១៤ ព្រមទាំងដាក់ចេញនូវតម្រូវការលើកកម្ពស់កម្រិតការងារនយោបាយ និងសតិអារម្មណ៍ ចំពោះមុខការប្រែប្រួលយ៉ាងឆាប់រហ័ស ស្មុគស្មាញ និងពិបាកប៉ាន់ស្មាននៃសភាពការណ៍ពិភពលោក តំបន់ និងក្នុងប្រទេស។

នៅក្នុងសន្និសីទ សមមិត្ត Trinh Van Quyet បានលើកឡើងយ៉ាងច្បាស់នូវខ្លឹមសារនានាដែលទាក់ទងនឹងភាពចាំបាច់ក្នុងការចេញផ្សាយបទប្បញ្ញត្តិ; បណ្ដាខ្លឹមសារជាមូលដ្ឋាននៃបទប្បញ្ញត្តិ; និងតម្រូវការក្នុងការចាត់តាំងអនុវត្ត។

តាមនោះ បទប្បញ្ញត្តិស្ដីពីការងារនយោបាយ និងសតិអារម្មណ៍នៅក្នុងបក្ស ត្រូវបានរៀបចំឡើងដោយមាន ៥ ជំពូក និង ១៦ មាត្រា ដែលមានលក្ខណៈហ្មត់ចត់ វិទ្យាសាស្ត្រ និងគ្របដណ្ដប់គ្រប់ជ្រុងជ្រោយលើខ្លឹមសារស្នូលនានា។ ស្មារតីទម្លុះទម្លាយនៃបទប្បញ្ញត្តិ គឺការធ្វើឱ្យមានលក្ខណៈស្តង់ដារ ការចងភ្ជាប់ការទទួលខុសត្រូវ ការត្រួតពិនិត្យតាមរយៈលទ្ធផល និងការវាស់វែងតាមរយៈប្រសិទ្ធភាពជាក់ស្ដែង។

បទប្បញ្ញត្តិបានកំណត់ច្បាស់ពីវិសាលភាពកែសម្រួល និងមុខសញ្ញាអនុវត្ត គឺជាបណ្ដាអង្គការបក្សទាំងមូល និងកម្មាភិបាល សមាជិកបក្សទាំងអស់នៅក្នុងបក្ស ដោយគ្មានការលើកលែង ដើម្បីធានាបាននូវសង្គតិភាព និងភាពស៊ីសង្វាក់គ្នាក្នុងការចាត់តាំងអនុវត្ត។ ការងារនយោបាយ និងសតិអារម្មណ៍ គឺជាភារកិច្ចបង្ខំ និងគ្មាន “ចន្លោះប្រហោង” ឡើយ ចំពោះគ្រប់អង្គការបក្ស និងគ្រប់កម្មាភិបាល សមាជិកបក្សទាំងអស់។

ចំពោះគោលបំណង គឺសំដៅឆ្ពោះទៅរកការកសាងបក្សឱ្យរឹងមាំលើផ្នែកនយោបាយ សតិអារម្មណ៍ សីលធម៌ និងកម្មាភិបាល; លើកកម្ពស់ការយល់ដឹង ការទទួលខុសត្រូវ ជំហរនយោបាយ កម្រិត សមត្ថភាពការងារ និងលទ្ធភាពសម្របខ្លួនរបស់កម្មាភិបាល សមាជិកបក្ស ចំពោះមុខការប្រែប្រួល និងសភាពការណ៍ជាក់ស្ដែងដ៏ស្មុគស្មាញ; រក្សាឱ្យបានខ្ជាប់ខ្ជួននូវគោលដៅ និងឧត្តមគតិបដិវត្តន៍ ម្ចាស់ការបង្ការ ទប់ស្កាត់ និងរុញច្រានការធ្លាក់ចុះនៃសតិអារម្មណ៍នយោបាយ សីលធម៌ របៀបរស់នៅ និងបាតុភូត “ស្វ័យប្រែប្រួល” “ស្វ័យផ្លាស់ប្តូរ”។

បទប្បញ្ញត្តិបានដាក់ចេញនូវតម្រូវការត្រូវតែបង្កើតកម្លាំងចលករសម្រាប់ការផ្លាស់ប្តូរថ្មីនៃផ្នត់គំនិតយុទ្ធសាស្ត្រ លើកកម្ពស់សមត្ថភាពរៀបចំផែនការគោលនយោបាយ និងមាគ៌ា; កសាងបរិយាកាសនយោបាយ និងសតិអារម្មណ៍ឱ្យបានបរិសុទ្ធ និងស្អាតស្អំនៅក្នុងបក្សទាំងមូល; លើកកម្ពស់ប្រជាធិបតេយ្យផ្សារភ្ជាប់ជាមួយនឹងការពង្រឹងវិន័យ និងសណ្ដាប់ធ្នាប់ កសាងវប្បធម៌នៅក្នុងបក្ស លើកកម្ពស់ការទទួលខុសត្រូវបុគ្គល ជាពិសេសគឺតួនាទីជាគំរូរបស់អ្នកដឹកនាំ; តម្រូវឱ្យកសាងប្រព័ន្ធលក្ខវិនិច្ឆ័យវាយតម្លៃ និងការកំណត់បរិមាណនៃលទ្ធផលការងារនយោបាយ និងសតិអារម្មណ៍ ដោយយកប្រសិទ្ធភាពនៃការអនុវត្តភារកិច្ចនយោបាយ និងកម្រិតនៃភាពពេញចិត្តរបស់ប្រជាជន ធ្វើជាខ្នាតវាស់វែងដើម្បីវាយតម្លៃប្រសិទ្ធភាពនៃការដឹកនាំរបស់អង្គការបក្ស និងសមាជិកបក្សម្នាក់ៗ។

សមមិត្ត Trinh Van Quyet បានសង្កត់ធ្ងន់ថា ខ្លឹមសារនៃបទប្បញ្ញត្តិស្ដីពីការងារនយោបាយ និងសតិអារម្មណ៍នៅក្នុងបក្ស បានគ្របដណ្ដប់យ៉ាងពេញលេញនូវបញ្ហាស្នូលនានា ដែលមានទាំងលក្ខណៈគោលការណ៍ ទាំងលក្ខណៈជាក់ស្ដែង និងអាចអនុវត្តបាន; បង្កើតជាមូលដ្ឋានដ៏សំខាន់ដើម្បីលើកកម្ពស់គុណភាព និងប្រសិទ្ធភាពការងារនយោបាយ និងសតិអារម្មណ៍នៅក្នុងបក្សទាំងមូល ឆ្លើយតបទៅនឹងតម្រូវការកសាងបក្ស និងប្រព័ន្ធនយោបាយឱ្យបានបរិសុទ្ធ និងរឹងមាំលើគ្រប់ជ្រុងជ្រោយ។ នេះមិនត្រឹមតែជា “បទដ្ឋាននយោបាយ និងសតិអារម្មណ៍របស់បក្សទាំងមូលក្នុងយុគសម័យថ្មី” ប៉ុណ្ណោះទេ ប៉ុន្តែថែមទាំងជាគ្រឹះស្ថានស្មារតី និងជាស្ថាប័នដ៏សំខាន់ដើម្បីកសាងបក្សឱ្យរឹងមាំពិតប្រាកដតាំងពីឫសគល់ មានសមត្ថភាពគ្រប់គ្រាន់ក្នុងការដឹកនាំប្រទេសជាតិឈានចូលដំណាក់កាលអភិវឌ្ឍន៍ ជាមួយនឹងកម្ពស់ និងសេចក្តីប្រាថ្នាថ្មីៗ។

តាមសមមិត្ត Trinh Van Quyet បញ្ហាសម្រេចគឺស្ថិតនៅលើការចាត់តាំងអនុវត្ត ដែលជាចំណុចគន្លឹះ និងជាខ្នាតវាស់វែងពិតប្រាកដនៃការប្តេជ្ញាចិត្តនយោបាយ។ ត្រូវតែអនុវត្តបទប្បញ្ញត្តិក្នុងស្មារតីបន្ទាន់ ម៉ឺងម៉ាត់ និងជាក់ស្ដែង; ដោយយកការប្រែប្រួលនៃការយល់ដឹង សកម្មភាព និងលទ្ធផលជាក់ស្ដែងរបស់អង្គការបក្ស កម្មាភិបាល និងសមាជិកបក្ស ធ្វើជាខ្នាតវាស់វែងនៃប្រសិទ្ធភាព។

ការអនុវត្តបទប្បញ្ញត្តិមិនមែនជាជម្រើសតាមលក្ខណៈស្ម័គ្រចិត្តនោះទេ ប៉ុន្តែគឺជាភារកិច្ចនយោបាយបង្ខំចំពោះគ្រប់អង្គការបក្ស និងសមាជិកបក្សម្នាក់ៗ។ គណៈកម្មាធិការបក្សគ្រប់ជាន់ថ្នាក់ អង្គការបក្ស និងកម្មាភិបាល សមាជិកបក្សម្នាក់ៗ ត្រូវតែបំប្លែងតម្រូវការនៃបទប្បញ្ញត្តិឱ្យទៅជាការយល់ដឹងដោយស្វ័យវិចារ និងសកម្មភាពជាក់ស្ដែង ព្រមទាំងប្តេជ្ញាចិត្តជម្នះឱ្យបាននូវស្ថានភាពធ្វើតាមបែបបទបង្គ្រប់កិច្ច និងធ្វើដើម្បីតែការទប់ទល់។

គណៈកម្មាធិការបក្សថ្នាក់លើ មានការទទួលខុសត្រូវក្នុងការចាត់តាំងការជ្រួតជ្រាបដល់ថ្នាក់ក្រោម; អ្នកដឹកនាំធ្វើជាអធិបតីក្នុងការចាត់តាំងការរៀនសូត្រ ជ្រួតជ្រាប និងលើកកម្ពស់ការទទួលខុសត្រូវជាគំរូក្នុងដំណើរការអនុវត្ត។ កម្មាភិបាល និងសមាជិកបក្សម្នាក់ៗ ត្រូវតែប្តេជ្ញាក្តាប់ឱ្យជាប់នូវខ្លឹមសារស្នូល កំណត់ឱ្យបានច្បាស់នូវការទទួលខុសត្រូវ និងប្តូរយ៉ាងខ្លាំងក្លាពី “ការរៀនសេចក្តីសម្រេចចិត្ត” ទៅជា “ការធ្វើតាមសេចក្តីសម្រេចចិត្ត”; អនុវត្តឱ្យបានម៉ឺងម៉ាត់តាមបាវចនា៖ “យល់ឱ្យស៊ីជម្រៅ - ធ្វើឱ្យត្រឹមត្រូវ - ធ្វើឱ្យដល់ទីបញ្ចប់ - ធ្វើឱ្យមានលទ្ធផល”។

“ខ្ញុំសូមស្នើឱ្យគណៈកម្មាធិការបក្សគ្រប់ជាន់ថ្នាក់ អង្គការបក្ស និងកម្មាភិបាល សមាជិកបក្សទាំងមូល លើកកម្ពស់ស្មារតីទទួលខុសត្រូវ ចាត់តាំងការអនុវត្តឱ្យបានបន្ទាន់ និងម៉ឺងម៉ាត់; ចាត់ទុកថានេះគឺជាកិច្ចការដែលត្រូវធ្វើជាប្រចាំ និងបន្តបន្ទាប់ក្នុងពេញមួយអាណត្តិ និងបណ្តាអាណត្តិបន្តបន្ទាប់ទៀត។ ជាមួយនឹងការប្តេជ្ញាចិត្តនយោបាយខ្ពស់ និងសកម្មភាពជាក់ស្តែង បទប្បញ្ញត្តិនេះប្រាកដជានឹងបង្កើតឱ្យមានការផ្លាស់ប្តូរយ៉ាងច្បាស់លាស់នៅក្នុងការងារនយោបាយ និងសតិអារម្មណ៍; រួមចំណែកកសាងបក្សយើងឱ្យកាន់តែបរិសុទ្ធ និងរឹងមាំលើគ្រប់ជ្រុងជ្រោយ សមស្របទៅនឹងជំនឿទុកចិត្ត និងការរំពឹងទុករបស់ប្រជាជន ឆ្លើយតបទៅនឹងតម្រូវការ និងភារកិច្ចនៃបុព្វហេតុកសាង និងការពារមាតុភូមិវៀតណាមសង្គមនិយមក្នុងយុគសម័យថ្មី” នេះគឺជាប្រសាសន៍របស់សមមិត្ត Trinh Van Quyet៕

មហាសន្និបាតតំណាងទូទាំងប្រទេសនៃរណសិរ្សមាតុភូមិវៀតណាម លើកទី ១១ រំពឹងថានឹងប្រព្រឹត្តទៅចាប់ពីថ្ងៃទី ១១ ដល់ថ្ងៃទី ១៣ ខែឧសភា ឆ្នាំ ២០២៦ យុគសម័យ - នាថ្ងៃទី ១២ ខែមេសា នៅទីក្រុងហាកូយ គណៈកម្មាធិការមជ្ឈិមរណសិរ្សមាតុភូមិវៀតណាម បានរៀបចំសន្និសីទគណៈប្រធានលើកទី ៧ អាណត្តិទី ១០ ដើម្បីពិភាក្សា និងផ្តល់មតិលើខ្លឹមសារសំខាន់ៗមួយចំនួន សម្រាប់ត្រៀមរៀបចំមហាសន្និបាតតំណាងទូទាំងប្រទេសនៃរណសិរ្សមាតុភូមិវៀតណាម លើកទី ១១។

វៀតណាម និងកម្ពុជា ពង្រឹងជំនឿទុកចិត្តនយោបាយឱ្យបានកាន់តែរឹងមាំ យុគសម័យ - វៀតណាម និងកម្ពុជា បង្កើនការសម្របសម្រួលលើវិស័យជាច្រើន ចាប់ពីសន្តិសុខរហូតដល់សេដ្ឋកិច្ច ដើម្បីពង្រឹងជំនឿទុកចិត្តនយោបាយ និងការអភិវឌ្ឍប្រកបដោយចីរភាព។

ហេង វុធ្ធី