VITM 2026 ទទួលភ្ញៀវបានជាង ៩០.០០០ នាក់ ដែលឆ្លុះបញ្ចាំងពីនិន្នាការទេសចរណ៍ថ្មី

ចំណូលសម្រេចបានលើសពី ១៩៥ ពាន់លានដុង

នារសៀលថ្ងៃទី ១២ ខែមេសា ពិព័រណ៍ទេសចរណ៍អន្តរជាតិវៀតណាម (VITM) ឆ្នាំ ២០២៦ បានបិទបញ្ចប់ជាផ្លូវការ បន្ទាប់ពីសកម្មភាពយ៉ាងរស់រវើកអស់រយៈពេល ៤ ថ្ងៃ។ ក្នុងការកត់ត្រានូវលទ្ធផលនៃពិព័រណ៍ លោក Nguyen Hong Hai - អនុប្រធានសមាគមទេសចរណ៍វៀតណាម បានឱ្យដឹងថា ពិព័រណ៍នេះបានទទួលភ្ញៀវមកទស្សនា ទទួលបទពិសោធន៍ និងទិញទំនិញបានជាង ៩០.០០០ នាក់។

លោក Nguyen Hong Hai បានសង្កត់ធ្ងន់ថា៖ “VITM 2026 បន្តអះអាងថាជាព្រឹត្តិការណ៍ជំរុញទេសចរណ៍ឈានមុខគេនៃទេសចរណ៍វៀតណាម និងជាពិធីបុណ្យប្រចាំឆ្នាំរបស់បណ្ដាសហគ្រាសទេសចរណ៍វៀតណាម”។

ព្រឹត្តិការណ៍ឆ្នាំនេះ បានប្រមូលផ្ដុំសហគ្រាសជិត ៤.៥០០ មកពីក្នុង និងក្រៅប្រទេស ដោយបង្កើតឱ្យមានជំនួបពិភាក្សា និងការតភ្ជាប់កិច្ចសហប្រតិបត្តិការជាង ២៥.០០០ លើក ព្រមទាំងបានណែនាំខ្សែទស្សនកិច្ច (tour) និងផលិតផលទេសចរណ៍បញ្ចុះតម្លៃប្រហែល ១៥.០០០។

តាមការស្ទង់មតិរហ័សចំពោះបណ្ដាអង្គភាពដែលបានចូលរួមក្នុងពិព័រណ៍ ចំណូលពីការលក់ផលិតផលទេសចរណ៍សម្រេចបានជាង ១៩៥ ពាន់លានដុង។ សហគ្រាសចំនួន ៩៥% សម្រេចបានតាមគោលដៅនៅពេលចូលរួមពិព័រណ៍ ក្នុងនោះមាន ៨,២% សម្រេចបានលើសពីការរំពឹងទុក; ហើយសហគ្រាសជាង ៩២% មានភាពពេញចិត្តចំពោះសកម្មភាពនានានៅក្នុងពិព័រណ៍។

ក្រុមហ៊ុន Vietravel ភាគខាងជើង កត់ត្រាបានភ្ញៀវប្រហែល ១.៨០០ នាក់ចុះឈ្មោះប្រើប្រាស់សេវាកម្ម ជាមួយនឹងចំណូលជាង ៣០ ពាន់លានដុង។ ក្រុមហ៊ុនទេសចរណ៍ Hanoitourist សម្រេចបានប្រហែល ១៦ ពាន់លានដុង។ ទន្ទឹមនឹងនោះ ក្រុមហ៊ុន BestPrice Travel បានឱ្យដឹងថា ចំនួនអ្នកកក់ទុក (booking) និងការដាក់ប្រាក់កក់នៅនឹងកន្លែង បានកើនឡើងទ្វេដង បើធៀបនឹងលើកមុន ហើយចំណូលបានកើនឡើងប្រហែល ១,២ ដង។

ភ្ញៀវទេសចរចូលរួមបទពិសោធន៍លេងហ្គេមតូចៗ (minigame) ដោយការជិះកង់បង្កើតថាមពលដើម្បីកិនទឹកក្រឡុក នៅឯស្ដង់តាំងបង្ហាញក្នុងពិព័រណ៍ VITM 2026។

ភ្ញៀវទេសចរមិនត្រឹមតែ “ប្រមាញ់” ខ្សែទស្សនកិច្ច តម្លៃថោកប៉ុណ្ណោះទេ

ការកត់ត្រាជាក់ស្តែងបង្ហាញថា ទោះបីជាបរិបទអន្តរជាតិនៅមានការប្រែប្រួលច្រើនក៏ដោយ ក៏ចំនួនភ្ញៀវមកកាន់ពិព័រណ៍នៅតែមានច្រើនកុះករ។ ផលិតផលដែលទទួលបានការចាប់អារម្មណ៍ខ្លាំង រួមមានខ្សែទស្សនកិច្ចទៅក្រៅប្រទេស តម្លៃពិសេស និងកញ្ចប់សេវាកម្ម សំបុត្រយន្តហោះ - សណ្ឋាគារ ទៅកាន់គោលដៅទេសចរណ៍សមុទ្រនានាដូចជា Da Nang, Phu Quoc, Nha Trang, Quy Nhon ដែលរួមចំណែកជំរុញចំណូលនៃព្រឹត្តិការណ៍ទាំងមូល។

លោក Pham Van Bay - នាយកមជ្ឈមណ្ឌលភ្ញៀវរាយនៃក្រុមហ៊ុន Vietravel ភាគខាងជើង - បានឱ្យដឹងថា ភ្ញៀវទេសចរទៅក្រៅប្រទេសមានចំនួន ៥៥%, ភ្ញៀវក្នុងស្រុកមាន ៤៥%, ក្នុងនោះបណ្ដាកញ្ចប់សេវាកម្មទេសចរណ៍សមុទ្រតាមផ្លូវអាកាស ទទួលបានការចាប់អារម្មណ៍ច្រើន ដោយសារមានការបញ្ចុះតម្លៃរហូតដល់ ២០%។

លោក Pham Van Bay បានឱ្យដឹងបន្ថែមថា៖ “ស្ដង់តាំងបង្ហាញរបស់ Vietravel ក៏មានសកម្មភាពជាច្រើនទាក់ទាញភ្ញៀវទស្សនាយ៉ាងច្រើនកុះករដូចជា Photobooth AI សម្រាប់ថតរូបយកភ្លាមៗដើម្បី check-in នៅតាមគោលដៅទេសចរណ៍ក្រៅប្រទេស, ការគូររូបឌីជីថល Teamlap, ការជិះកង់បៃតងដើម្បីទទួលទានទឹកក្រឡុកផ្លែឈើ។ សកម្មភាពសហប្រតិបត្តិការជាមួយអគ្គនាយកដ្ឋានទេសចរណ៍ប្រទេសថៃ កូរ៉េខាងត្បូង សិង្ហបុរី ដូចជាការទទួលទាននំ tart ស្វាយ, ការធ្វើរូបភាពពីសម្បកខ្យង, ការធ្វើកម្រងផ្កា... ក៏ទទួលបានការចាប់អារម្មណ៍ពីភ្ញៀវទេសចរជាច្រើនផងដែរ”។

បណ្ដាផលិតផលសម្រាកលំហែកាយលំដាប់ខ្ពស់នៅតាមរីសត (resort) កម្រិត ៥ ផ្កាយ ក៏កត់ត្រាបានចំនួនភ្ញៀវមានស្ថិរភាព ដែលភាគច្រើនធ្វើដំណើរជាក្រុមតូចៗ ដែលបង្ហាញថា តម្រូវការទទួលបទពិសោធន៍ប្រកបដោយគុណភាពខ្ពស់ កំពុងតែមានរូបរាងកាន់តែច្បាស់។

ពិព័រណ៍បានប្រគល់រង្វាន់កិត្តិយសដល់បណ្ដាស្ដង់តាំងបង្ហាញដែលបានរៀបចំសកម្មភាពលេចធ្លោ និងទាក់ទាញភ្ញៀវទស្សនាបំផុតនៅ VITM 2026។

លោក Bui Thanh Tu - នាយកផ្នែកទីផ្សារ នៃក្រុមហ៊ុន BestPrice Travel បានផ្ដល់ព័ត៌មានថា មានភ្ញៀវរាប់ពាន់នាក់បានមកទស្សនា និងទទួលការប្រឹក្សាយោបល់ដោយផ្ទាល់នៅឯស្ដង់តាំងបង្ហាញ។ អត្រាភ្ញៀវដែលចាប់អារម្មណ៍លើផលិតផលបែបឯកជនភាវូបនីយកម្ម និងខ្សែទស្សនកិច្ច បែប “No Shopping” (មិនចូលហាងលក់ទំនិញបង្ខំ) មានចំនួនជាង ៦០%។

លោក Bui Thanh Tu បានឱ្យដឹងថា៖ “អ្វីដែលគួរឱ្យកត់សម្គាល់នោះគឺ ឥរិយាបថរបស់អតិថិជនបានបង្ហាញពីការផ្លាស់ប្តូរយ៉ាងច្បាស់លាស់៖ ពួកគេលែងផ្ដល់អាទិភាពលើខ្សែទស្សនកិច្ចតម្លៃថោកទៀតហើយ ប៉ុន្តែបានប្តូរមកជ្រើសរើសខ្សែទស្សនកិច្ចដែលត្រូវតាមតម្រូវការ និងផ្ដល់នូវបទពិសោធន៍ដ៏សមស្របវិញ”។

ពេញមួយរយៈកាលនៃពិព័រណ៍នេះ ទីផ្សារទេសចរណ៍ទៅក្រៅប្រទេស នៅតែបន្តជាចំណុចលេចធ្លោមួយសម្រាប់ក្រុមហ៊ុន Vietluxtour។ ខ្សែទស្សនកិច្ចនៅតំបន់អាស៊ីរយៈពេលខ្លី នៅតែមានសមាមាត្រដ៏ធំ ដោយសារវាស្របតាមនិន្នាការទេសចរណ៍ពី ៤ ទៅ ៦ ថ្ងៃ ជាមួយនឹងចំណូលកើនឡើងប្រហែល ១៥% បើធៀបនឹងឆ្នាំមុន។

លោកស្រី Tran Thi Bao Thu - នាយកផ្នែកទីផ្សារ និងទំនាក់ទំនងនៃក្រុមហ៊ុន Vietluxtour បានចែករំលែកថា៖ “នៅក្នុងទីផ្សារក្នុងស្រុក តម្រូវការផ្តោតសំខាន់លើទេសចរណ៍សមុទ្រ - សម្រាកលំហែកាយ; ទេសចរណ៍វប្បធម៌ - ប្រវត្តិសាស្ត្រ; ទេសចរណ៍បៃតង - ទទួលបទពិសោធន៍។ អ្វីដែលគួរឱ្យចាប់អារម្មណ៍នោះគឺ និន្នាការទេសចរណ៍បែប free & easy (កក់សេវាកម្មដោយសេរី) និងការដើរជាក្រុមតូចៗ មានចំនួនប្រហែល ១៥% ដែលបង្ហាញថាភ្ញៀវទេសចរកាន់តែផ្ដល់អាទិភាពលើភាពបត់បែន និងការរៀបចំធ្វើដំណើរតាមចំណូលចិត្តផ្ទាល់ខ្លួន”។

ក្នុងពេលជាមួយគ្នានោះដែរ ស្ដង់តាំងបង្ហាញរបស់ក្រុមហ៊ុន Flamingo Redtours បានទទួលស្វាគមន៍ភ្ញៀវជាង ១.០០០ នាក់ ដែលមកទស្សនា និងស្វែងយល់ព័ត៌មានអំពីខ្សែទស្សនកិច្ច ។ ជំនួសឱ្យការជ្រើសរើសខ្សែទស្សនកិច្ចឆ្ងាយៗ និងរយៈពេលច្រើនថ្ងៃដូចមុន ភ្ញៀវទេសចរបានផ្ដល់អាទិភាពលើបណ្ដាខ្សែទស្សនកិច្ចជិតៗ ដើម្បីបង្កើនប្រសិទ្ធភាពចំណាយ។ ភ្ញៀវបានផ្ដោតសំខាន់លើបណ្ដាខ្សែទស្សនកិច្ចក្នុងស្រុក ការបើកបររថយន្តដោយខ្លួនឯង ឬការកក់សំបុត្ររថភ្លើង រថយន្តឈ្នួល និងជ្រើសរើសបណ្ដាមណ្ឌលសម្រាកលំហែកាយដែលមានសេវាកម្មគ្រប់ជ្រុងជ្រោយ។

តម្រូវការទេសចរណ៍ទៅក្រៅប្រទេស ជាពិសេសគឺបណ្ដាខ្សែទស្សនកិច្ចឆ្ងាយៗមានការថយចុះ។ ភ្ញៀវទេសចរបានជ្រើសរើសគោលដៅជិតៗ ស្ថិតក្នុងតំបន់អាស៊ីអាគ្នេយ៍ដូចជា ប្រទេសថៃ សិង្ហបុរី ម៉ាឡេស៊ី; និងតំបន់អាស៊ីឦសានដូចជា ប្រទេសចិន កូរ៉េខាងត្បូង ជប៉ុន... ជាដើម៕

អាជីវកម្ម និងអ្នកទស្សនាជាង ៦០.០០០ នាក់ ដើរទិញឥវ៉ាន់នៅ VITM Hanoi ២០២៣ យុគសម័យ - ពិព័រណ៍ទេសចរណ៍អន្តរជាតិវៀតណាម - VITM ហាណូយឆ្នាំ ២០២៣ បានក្លាយទៅជាចំណុចលេចធ្លោនៃឧស្សាហកម្មទេសចរណ៍វៀតណាម។ បន្តអះអាងនូវម៉ាកយីហោនាំមុខគេ និងជំហររបស់ពិព័រណ៍ទេសចរណ៍អន្តរជាតិនៅវៀតណាម។

ផ្សព្វផ្សាយ​ទេសចរណ៍ វប្បធម៌ប្រពៃណីវៀតណាមនៅ VITM ហាណូយឆ្នាំ ២០២៣ ការតាំងពិព័រណ៍ទេសចរណ៍អន្តរជាតិវៀតណាម - VITM ទីក្រុងហាណូយឆ្នាំ ២០២៣ នឹងបើកនៅព្រឹកថ្ងៃទី ១៣ មេសា នៅវិមានវប្បធម៌ Huu Nghi ទីក្រុងហាណូយ។

ហេង វុធ្ធី