យុគសម័យ - នាថ្ងៃទី ២៤ ខែមេសាក្រុមប្រឹក្សាសន្តិសុខអង្គការសហប្រជាជាតិ (អ. ស. ប) បានបើកកិច្ចប្រជុំតាមអ៊ិនធឺរណែតស្តីពីសកម្មភាពរបស់ក្រុមបេសកកម្ម របស់អង្គការសហប្រជាជាតិ ប្រចាំនៅកូសូវ៉ូ (UNMIK) ។
ឯកអគ្គរដ្ឋទូតលោក Dang Dinh Quy ប្រធានក្រុមបេសកកម្មវៀតណាមប្រចាំ នៅអង្គការសហប្រជាជាតិ (រូបថត៖ vnanet)
ក្រុមប្រឹក្សាសន្តិសុខនៃអង្គការសហប្រជាជាតិ នាថ្ងៃទី ២៤ ខែមេសាបានបើកកិច្ចប្រជុំតាមរយៈប្រព័ន្ធវីដេអូ ដើម្បីពិភាក្សាអំពីស្ថានភាពកូសូវ៉ូ (Kosovo)។ នៅក្នុងកិច្ចប្រជុំនេះ បណ្ដាប្រទេសជាសមាជិកបានអំពាវនាវដល់ភាគីទាក់ទិននានាស្វែងរកដំណោះស្រាយដោយសន្តិវិធីចំពោះបញ្ហាកូសូវ៉ូ ។
ប្រេសិតពិសេសរបស់អគ្គលេខាធិការ អ.ស.ប លោក Zahir Tanin ក៏បានអំពាវនាវឱ្យមេដឹកនាំស៊ែប៊ី និងកូសូវ៉ូចូលរួមយ៉ាងសកម្មក្នុងការសន្ទនានិងស្វែងរកដំណោះស្រាយដោយសន្តិវិធីចំពោះបញ្ហាកូសូវ៉ូ។ ឧបនាយករដ្ឋមន្រ្តីរដ្ឋមន្រ្តីក្រសួងការបរទេសស៊ែប៊ីលោក Ivica Dačić បាននិយាយថា បានត្រៀមខ្លួនជាស្រេច ដើម្បីជួយប្រជាជនកូសូវ៉ូក្នុងការប្រយុទ្ធប្រឆាំងនឹងជំងឺកូវីដ១៩ (Covid-19) បានបញ្ជូនក្រុមគ្រូពេទ្យនិងផ្គត់ផ្គង់ ឧបករណ៍ពេទ្យជាច្រើនទៅកូសូវ៉ូ ព្រមទាំងសន្យាធ្វើកិច្ចសន្ទនាជាមួយកូសូវ៉ូ។ តំណាងកូសូវ៉ូបានលើកឡើងពី ឧបសគ្គក្នុងដំណើរការសន្ទនារួម ក្នុងនោះមានការបាត់ខ្លួនជនជាតិកូសូវ៉ូនិងការទទួលស្គាល់ឯករាជ្យនៅកូសូវ៉ូផងដែរ។
អញ្ជើញថ្លែងនៅទីនេះ ឯកអគ្គរដ្ឋទូតលោក Dang Dinh Quy ប្រធានក្រុមបេសកកម្មវៀតណាមប្រចាំ នៅអង្គការសហប្រជាជាតិបានស្នើឱ្យប្រទេស ស៊ែប៊ីនិង កូសូវ៉ូ អនុវត្តកិច្ចព្រមព្រៀងដែលបានចុះហត្ថលេខា និងដោះស្រាយភាពជាប់គាំងក្នុងទំនាក់ទំនងទ្វេភាគី។ ឯកអគ្គរដ្ឋទូត លោក Dang Dinh Quy ក៏បានស្នើឲ្យភាគីទាំងពីរជំរុញការសន្ទនាដ៏ជាក់ស្ដែង ដើម្បីសម្រេចបានដំណោះស្រាយគ្រប់ជ្រុងជ្រោយចំពោះបញ្ហា កូសូវ៉ូ ដោយផ្អែកលើគោលការណ៍មូលដ្ឋាននៃច្បាប់អន្តរជាតិ ធម្មនុញ្ញនៃអង្គការសហប្រជាជាតិ និងសេចក្ដីសម្រេចចិត្តលេខ ១៤២២ (ឆ្នាំ ១៩៩៩) នៃក្រុមប្រឹក្សាសន្តិសុខ។
ឯកអគ្គរដ្ឋទូត លោក Dang Dinh Quy ក៏បានគាំទ្រសកម្មភាពរបស់ក្រុមបេសកកម្មរដ្ឋបាលបណ្តោះអាសន្នរបស់អង្គការសហប្រជាជាតិនៅកូសូវ៉ូ ដើម្បីកសាងជំនឿទុកចិត្ត ជំរុញកិច្ចសហប្រតិបត្តិការរវាង ស៊ែប៊ីនិងកូសូវ៉ូ ក៏ដូចជា ជួយឧបត្ថម្ភសហគមន៍ កូសូវ៉ូ ក្នុងការទប់ទល់នឹងជំងឺរាតត្បាតសកលកូវីដ១៩ផងដែរ៕
（បកប្រែដោយ ហេងវុធ្ធី）
មតិពីមិត្តអ្នកអាន