យុគសម័យ - លោកឧបនាយករដ្ឋមន្រ្តីវៀតណាម Pham Binh Minh បានបញ្ជាក់ថាតាមសមត្ថភាពរបស់ខ្លួនវៀតណាមនឹងចូលរួមក្នុងកិច្ចខិតខំប្រឹងប្រែងបង្ការនិងទប់ស្កាត់ជំងឺរាតត្បាតកូវីឌ១៩នេះនិងត្រៀមខ្លួនផ្តល់គ្រឿងសម្ភារៈបរិក្ខារពេទ្យដែល “ផលិតដោយវៀតណាម” (Made in VietNam) ដើម្បីរួមដៃគ្នាជាមួយសកលលោកក្នុងការការពារប្រយុទ្ធប្រឆាំងនឹងជំងឺរាតត្បាតកូវីដ១៩ផងដែរ ។
ឧបនាយករដ្ឋមន្ត្រីនិងជារដ្ឋមន្រ្តីការបរទេសវៀតណាម លោក Pham Binh Minh
តាមការអញ្ជើញរបស់រដ្ឋមន្រ្តីក្រសួងការបរទេសអាល្លឺម៉ង់ Heiko Maas នាថ្ងៃទី ១៦ ខែមេសាឧបនាយករដ្ឋមន្ត្រីនិងជារដ្ឋមន្រ្តីការបរទេសវៀតណាម លោក Pham Binh Minh បានចូលរួមសន្និសីទតាមអនឡាញ់សម្រាប់ថ្នាក់រដ្ឋមន្រ្តីការបរទេសក្រោមប្រធានបទសហប្រតិបត្តិការអន្តរជាតិស្តីពីការការពារនិងប្រយុទ្ធប្រឆាំងនឹងជំងឺរាតត្បាតកូវីដ១៩ក្នុងក្របខ័ណ្ឌនៃសហភាព ពហុភាគីនិយម។
លោក Pham Binh Minh បានចែករំលែកអំពីការខិតខំប្រឹងប្រែងយ៉ាងសកម្មនិងទាន់ពេលវេលារបស់ប្រទេសវៀតណាមក្នុងការឆ្លើយតបនឹងការរាលដាលដោយផ្តោតសំខាន់លើទស្សនៈនៃការដាក់ជីវិតនិងសុខភាពប្រជាជនជាចម្បង។ ដោយមានការប្តេជ្ញាចិត្តខាងនយោបាយខ្ពស់និងការមូលមតិគ្នាខាងសង្គម វៀតណាមបានអនុវត្តវិធានការដាក់នៅដាច់ដោយឡែកដោយបង្ខំ តាមដានស្វែងរកប្រវត្តិនៃទំនាក់ទំនងអ្នកប៉ះពាល់បនឹងជំងឺកូវីដ១៩ ព្រមទាំងពង្រីកការធ្វើតេស្តនិងការព្យាបាលជំងឺឆ្លងនេះប្រកបដោយប្រសិទ្ធភាពផងដែរ។ ជាមួយនឹងការខិតខំប្រឹងប្រែងទាំងនេះលោក Pham Binh Minh បានបញ្ជាក់ថារហូតមកដល់ពេលនេះ វៀតណាមបានគ្រប់គ្រងជំងឺនេះជាបណ្តើរៗដោយមានអ្នកឆ្លងតិចជាង ៣០០ នាក់និងគ្មានអ្នកស្លាប់នៅឡើយ។
ដើម្បីឱ្យសហគមន៍អន្តរជាតិឆ្លើយតបប្រកបដោយប្រសិទ្ធភាពចំពោះជំងឺរាតត្បាតនេះលោក Pham Binh Minh បានលើកឡើងសំណើយ៉ាងជាក់លាក់ចំនួន ០៤ ចំនុចដូចខាងក្រោម៖
ទីមួយ ពង្រឹងចំណងសាមគ្គីភាពអន្តរជាតិនិងកិច្ចសហប្រតិបត្តិការពហុភាគីជាមួយតួនាទីស្នូលរបស់អង្គការសហប្រជាជាតិនិងអង្គការសុខភាពពិភពលោក ព្រមទាំងពង្រឹងប្រសិទ្ធភាពនៃសកម្មភាពរបស់អង្គការសុខភាពពិភពលោក ដើម្បីធានានូវសមត្ថភាពក្នុងការគាំទ្រដល់ប្រទេសកំពុងអភិវឌ្ឍន៍ផងដែរ។ ក្នុងសមត្ថភាពរបស់ខ្លួនប្រទេសវៀតណាមនឹងចូលរួមចំណែកក្នុងការខិតខំនេះនិងត្រៀមខ្លួនជាស្រេចក្នុងការបរិច្ចាគគ្រឿងសម្ភារៈបរិក្ខារពេទ្យដែល "ផលិតដោយវៀតណាម"ផងដែរ ។
ទីពីរ បង្កើនការចែករំលែកព័ត៌មាន បទពិសោធន៍និងលទ្ធផលស្រាវជ្រាវ ព្រមទាំងធានា ថាមនុស្សគ្រប់រូបអាចទទួលបានវ៉ាក់សាំងនិងថ្នាំព្យាបាលដូចគ្នាផងដែរ។
ទីបី អំពាវនាវឱ្យបញ្ឈប់សកម្មភាពដែលប៉ះពាល់ដល់កិច្ចប្រឹងប្រែងឆ្លើយតបនឹងការរាតត្បាតជាពិសេសបញ្ឈប់សកម្មភាពជាឯកតោភាគីនិងមានឥទ្ធិពលផ្ទុយនឹងច្បាប់អន្តរជាតិ។ គាំទ្រការអំពាវនាវរបស់លោកអគ្គលេខាធិការអង្គការសហប្រជាជាតិឲ្យមានបទឈប់បាញ់ជាសកលនិងដកទណ្ឌកម្មដែលធ្វើឱ្យសមត្ថភាពរបស់ប្រទេសនានាដែលបន្សោយសមត្ថភាពក្នុងការឆ្លើយតបនឹងជំងឺរាតត្បាត។
ទីបួន រៀបចំផែនការអភិវឌ្ឍន៍ក្រោយពីជំងឺកូវីដ១៩ត្រូវបានទប់ស្កាត់ដោយផ្តោតសំខាន់លើការសម្របសម្រួលគោលនយោបាយនិងវិធានការណ៍ដើម្បីជំរុញកំណើនសេដ្ឋកិច្ចពាណិជ្ជកម្មនិងវិនិយោគធ្វើឱ្យមានស្ថេរភាពទីផ្សារហិរញ្ញវត្ថុនិងស្តារទំនុកចិត្តឡើងវិញរបស់អង្គភាពអាជីវកម្មនិងប្រជាជនផងដែរ៕
（បកប្រែដោយ ហេងវុធ្ធី）
（ប្រភពព័ត៌មាន: thoidai.com.vn）
មតិពីមិត្តអ្នកអាន