យុគសម័យ - នាថ្ងៃទី ៣០ ខែមីនា អគ្គលេខាបក្ស ប្រធានរដ្ឋវៀតណាម លោក Nguyen Phu Trong បានចេញសេចក្តីអំពាវនាវដល់បងប្អូនជនរួមជាតិ យុទ្ធជននៅទូទាំងប្រទេសក៏ដូចជាជនរួមជាតិនៅបរទេសឲ្យត្រូវរួបរួមគ្នានិងសាមគ្គីគ្នាក្នុងការប្រយុទ្ធប្រឆាំងឲ្យបានជ័យជំនះលើជម្ងឺរាតត្បាតកូវីដ១៩ផងដែរ។
អគ្គលេខាបក្ស ប្រធានរដ្ឋវៀតណាម លោក Nguyen Phu Trong (រូបថត៖ vnanet)
ក្នុងបរិបទដែលជំងឺកូវីឌ១៩(COVID-19) បន្តរីករាលដាលពាសពេញពិភពលោកនិងប៉ះពាល់យ៉ាងខ្លាំងទាំងស្រុងទៅលើជីវភាពរស់នៅនិងសេដ្ឋកិច្ច-សង្គមរបស់ប្រទេសទាំងអស់ដែលក្នុងនោះមានប្រទេសវៀតណាម នាថ្ងៃទី ៣០ ខែមីនា អគ្គលេខាបក្ស ប្រធានរដ្ឋវៀតណាម លោក Nguyen Phu Trong បានចេញសេចក្តីអំពាវនាវដល់បងប្អូនជនរួមជាតិ យុទ្ធជននៅទូទាំងប្រទេសក៏ដូចជាជនរួមជាតិនៅបរទេសឲ្យត្រូវរួបរួមគ្នា សាមគ្គីគ្នា និងមានឆន្ទៈរួមគ្នាយ៉ាងជិតស្និទនិងប្តូរផ្តាច់ក្នុងការអនុវត្តរាល់គោលការណ៍របស់បក្សនិងរដ្ឋ ក៏ដូចជាប្រកាន់យ៉ាងខ្ជាប់ខ្ជួនក្រោមការណែនាំនិងគ្រប់គ្រង់របស់រដ្ឋាភិបាលនិងលោកនាយករដ្ឋមន្រ្តីវៀតណាម ព្រមទាំងខិតខំប្រឹងប្រែងអនុវត្តកិច្ចសហប្រតិបត្តិការឱ្យបានទាន់ពេលវេលាជាមួយប្រទេសដទៃទៀត ដើម្បីធានាបាននូវជ័យជំនះលើជម្ងឺរាតត្បាតកូវីដ១៩ផងដែរ។
អគ្គលេខាបក្ស ប្រធានរដ្ឋវៀតណាម លោក Nguyen Phu Trong បានសង្កត់ធ្ងន់ថាប្រជាជនវៀតណាមមានប្រពៃណីស្នេហាជាតិនិងមនុស្សធម៌។ ក្នុងរយៈពេលកន្លងមក ប្រជាជនទាំងមូលបានឯកភាពនិងរួមទុក្ខរួមសុខជាមួយបក្សនិងរដ្ឋ ដើម្បីការពារនិងគ្រប់គ្រងជំងឺឆ្លងឱ្យមានប្រសិទ្ធភាពផងដែរ។ ក្នុងរយៈពេលខាងមុខនេះ វៀតណាមប្រហែលជានឹងជួបការលំបាកច្រើនដងទៀតដែលទាមទារការខិតខំប្រឹងប្រែងកាន់តែខ្លាំងឡើងថែមទៀតផង។
ក្នុងស្មារតីដាក់សុខភាពនិងអាយុជីវិតមនុស្សជាចម្បង លោក Nguyen Phu Trong បានអំពាវនាវដល់បងប្អូនជនរួមជាតិនិងយុទ្ធជនទូទាំងប្រទេស ក៏ដូចជាជនរួមជាតិនៅឯក្រៅប្រទេសឲ្យត្រូវរួបរួមគ្នាដើម្បីទប់ស្កាត់ការរីករាលដាលនៃជម្ងឺដ៏កាចសាហាវនេះឲ្យបានចប់សព្វគ្រប់ផងដែរ។ លោក Nguyen Phu Trong បានចាត់ទុកដាប្រជាជនម្នាក់ជាយុទ្ធជនមួយនៅលើសមរភូមិបង្កានិងប្រយុទ្ធប្រឆាំងនឹងជម្ងឺរាតត្បាតផងដែរ។
អគ្គលេខាបក្ស ប្រធានរដ្ឋវៀតណាម លោក Nguyen Phu Trong (រូបថត៖ vnanet)
ក្នុងនាមជាសមាជិកសកម្មនិងមានការទទួលខុសត្រូវក្នុងសហគមន៍អន្តរជាតិ វៀតណាមសំដែងការចាប់អារម្មណ៍ ការរួមវិភាគទាននិងយោគយល់គ្នាយ៉ាងជ្រាលជ្រៅ ហើយវៀតណាមកំពុងខិតខំប្រឹងប្រែងឱ្យអស់ពីសមត្ថភាពក្នុងកិច្ចសហប្រតិបត្តិការជាក់ស្តែង ព្រមទាំងសម្របសម្រួលទាន់ពេលវេលាជាមួយបណ្តាប្រទេស ជាពិសេសប្រទេសដែលរងផលប៉ះពាល់យ៉ាងធ្ងន់ធ្ងរដោយជំងឺរាតត្បាតកូវីដ១៩។
លោក Nguyen Phu Trong ក៏បានបញ្ជាក់ទៀតថាក្នុងស្ថានភាពបច្ចុប្បន្ននេះ សាមគ្គីភាពនិងការសម្របសម្រួលគ្នាគឺជាមូលដ្ឋានដើម្បីធានាបាននូវជ័យជំនះចុងក្រោយរបស់ពិភពលោកលើជំងឺរាតត្បាតនេះតែម្តង។ប្រជាជាតិវៀតណាមទាំងមូល សូមចូលរួមចំណែករួមដៃសាមគ្គីគ្នាដើម្បីជំនះពុះពាររាល់ការលំបាកនិងបញ្ហាប្រឈមនានានិងយកឈ្នះលើការរីករាលដាលនៃជំងឺកូវីដ១៩!៕
（បកប្រែដោយ ហេងវុធ្ធី）
（ប្រភពព័ត៌មាន: VGP）
មតិពីមិត្តអ្នកអាន