យុគសម័យ - នាព្រឹកថ្ងៃទី១៣ខែកញ្ញា នៅខាងក្រៅនៃកិច្ចប្រជុំកំពូល WEF ASEAN 2018 នាយករដ្ឋមន្ត្រីរដ្ឋាភិបាលវៀតណាមលោក Nguyen Xuan Phuc បានអញ្ជើញទទួលជួបជាមួយនាយករដ្ឋមន្ត្រីឡាវ លោក Thongloun Sisoulith និងនាយករដ្ឋមន្ត្រីកម្ពុជា សម្តេច តេជោ ហ៊ុនសែន។
នាយករដ្ឋមន្ត្រីរដ្ឋាភិបាលវៀតណាម លោក Nguyen Xuan Phuc អញ្ជើញទទួលជួបជាមួយនាយករដ្ឋមន្ត្រីឡាវ លោក Thongloun Sisoulith (រូបថតៈ VGP/Quang Hiếu)
នៅក្នុងជំនួប នាយករដ្ឋមន្ត្រី លោក Nguyen Xuan Phuc និងនាយករដ្ឋមន្ត្រីឡាវ លោក Thongloun Sisoulith បានសម្តែងក្តីសោមនស្សរីករាយចំពោះការអភិវឌ្ឍថ្មី នៃទំនាក់ទំនងមិត្តភាពជាប្រពៃណី សាមគ្គីភាពពិសេស និងកិច្ចសហប្រតិបត្តិការគ្រប់ជ្រុងជ្រោយវៀតណាម-ឡាវនាពេលកន្លងទៅ។ នាយករដ្ឋមន្ត្រីវៀតណាមលោក Nguyen Xuan Phuc បានស្នើសុំឱ្យរដ្ឋាភិបាលទាំងពីរបន្តផ្តោតការយកចិត្តទុកដាក់លើការអនុវត្តប្រកបដោយជោគជ័យ នូវកិច្ចព្រមព្រៀងស្តីពីកិច្ចសហប្រតិបត្តិការពលកម្ម កិច្ចព្រមព្រៀងស្តីពីការដោះស្រាយអន្តោប្រវេសន៍ដោយសេរី និងអនុវត្តន៍រូបសណ្ឋានត្រួតពិនិត្យ “ច្រកទ្វារមួយ ផ្អាកដំណើរមួយ” នៅច្រកទ្វារព្រំដែន Lao Bao - Densavanh។
ភាគីទាំងពីរបានឯកភាពបន្តផ្លាស់ប្តូរព័ត៌មាននិងការសម្របសម្រួលក្នុងបណ្តាវេទិការអន្តរជាតិនិងតំបន់ ដូចជាកិច្ច សហប្រតិបតិ្តការអង្គការសហប្រជាជាតិ អាស៊ាននិងរាល់យន្តការសហប្រតិបត្តិការអនុតំបន់ ជាពិសេសលើបញ្ហាជាយុទ្ធសាស្ត្រមួយចំនួនក្នុងនោះមានបញ្ហាសមុទ្រខាងកើត ដែលរួមចំណែកដល់ការថែរក្សាសន្តិភាព ស្ថិរភាពនិងការអភិវឌ្ឍន៍នៅក្នុងប្រទេសនិមួយៗក៏ដូចជាក្នុងតំបន់និងលើពិភពលោក។
ក្នុងឱកាសនេះ តាងនាមបក្ស រដ្ឋាភិបាលនិងប្រជាជនឡាវ នាយករដ្ឋមន្ត្រីឡាវ លោក Thongloun Sisolith បានសម្តែងនូវការដឹងគុណយ៉ាងជ្រាលជ្រៅចំពោះការជួយឧបត្ថម្ភទាំងខាងសម្ភារៈនិងស្មារតីរបស់បក្ស រដ្ឋាភិបាលនិងប្រជាជនវៀត ណាមចំពោះឡាវដើម្បីយកឈ្នះលើផលវិបាកនៃការខូចខាតដោយបាកទំនប់វារីអគ្គិសនីនៅក្នុងខេត្ត Attapeu កាលពីខែកក្កដាផងដែរ។
នាយករដ្ឋមន្ត្រីរដ្ឋាភិបាលវៀតណាម លោក Nguyen Xuan Phuc អញ្ជើញទទួលជួបជាមួយនាយករដ្ឋមន្ត្រីកម្ពុជា សម្តេច តេជោ ហ៊ុនសែន (រូបថតៈ VGP/Quang Hiếu)
ក្នុងជំនួបជាមួយនាយករដ្ឋមន្ត្រីកម្ពុជា សម្តេច តេជោ ហ៊ុនសែន នាយករដ្ឋមន្រ្តីវៀតណាមលោក Nguyen Xuan Phuc បានថ្លែងនូវអំណរគុណយ៉ាងជ្រាលជ្រៅ ជូនចំពោះសម្តេច ហ៊ុនសែន ដែលបានអញ្ជើញមកចូលរួមវេទិកាសេដ្ឋកិច្ចពិភពលោកស្តីពីអាស៊ាន ២០១៨នេះ។ នាយករដ្ឋមន្រ្តីលោក Nguyen Xuan Phuc បន្តថា វត្តមានរបស់នាយករដ្ឋមន្ត្រីសម្តេច តេជោ ហ៊ុនសែន បានផ្តល់នូវសារៈសំខាន់ក្នុងវេទិកាសេដ្ឋកិច្ចពិភពលោក ពិសេសសុន្ទរកថារបស់សម្តេច ក្នុងពិធីបើកវេទិកាសេដ្ឋកិច្ចពិភពលោក និងបទអន្តរាគមន៍ក្នុងកិច្ចប្រជុំកំពូលពេញអង្គ ស្តីពីចក្ខុវិស័យថ្មីសម្រាប់តំបន់មេគង្គ គឺពិតជាមានអត្ថន័យនិងខ្លឹមសារយ៉ាងជ្រាលជ្រៅ ពិសេសផ្តល់នូវសារសំខាន់ សម្រាប់តំបន់អាស៊ាន និងប្រទេសក្នុងតំបន់មេគង្គ។
ជាមួយគ្នានេះ នាយករដ្ឋមន្រ្តី លោក Nguyen Xuan Phuc ក៏បានថ្លែងនូវការអបអរសារទរ យ៉ាងជ្រាលជ្រៅបំផុត ជូនចំពោះសម្តេចតេជោនាយករដ្ឋមន្រ្តី ដែលបានទទួលនូវការតែងតាំងសារជាថ្មីម្តងទៀត ក្នុងការបន្តដឹកនាំរាជរដ្ឋាភិបាលនីតិកាលទី៦ នៃរដ្ឋសភា បន្ទាប់ពីលទ្ធផលនៃការបោះឆ្នោតជ្រើសតាំងតំណាងរាស្រ្ត នីតិកាលទី៦ ប្រព្រឹត្តិទៅ កាលពីថ្ងៃទី២៩កក្កដឆ្នាំ២០១៨កន្លងទៅ ដែលគណបក្សប្រជាជនកម្ពុជា ទទួលបានជ័យជំនះភ្លូកទឹក ភ្លូកដី ពីការបោះឆ្នោតដ៏មានសារៈសំខាន់បំផុតនោះ។
អញ្ជើញឆ្លើយតបវិញ នាយករដ្ឋមន្ត្រីកម្ពុជា សម្តេចតេជោ ហ៊ុនសែន បានថ្លែងនូវអំណរគុណយ៉ាងជ្រាលជ្រៅ ជូនចំពោះលោកនាយករដ្ឋមន្រ្តីវៀតណាម ដែលបានផ្ញើនូវសារលិខិតអបអរសាទរជូនចំពោះ សម្តេចដែលទើបត្រូវបានតែងតាំងជានាយករដ្ឋមន្រ្តី នីតិកាលទី៦ នៃរដ្ឋសភា។
ក្នុងជំនួបពិភាក្សាគ្នានោះដែរ ប្រមុខដឹកនាំនៃប្រទេសទាំងពីរវៀតណាម-កម្ពុជា បានធ្វើការពិភាក្សាគ្នាយ៉ាងយកចិត្តទុកដាក់ លើការខិតខំបន្តថែរក្សាការពារសន្តិភាព ស្ថេរភាពនយោបាយ និងការអភិវឌ្ឍសម្រាប់ប្រទេសទាំងពីរ ពិសេសការការពារសន្តិភាព ស្ថេរភាព សន្តិសុខ នៅតាមតំបន់ព្រំដែន នៃប្រទេសទាំងពីរ សំដៅប្រែក្លាយតំបន់ព្រំដែនទៅជាតំបន់អភិវឌ្ឍ ការសំរួលពាណិជ្ជកម្មឆ្លងដែន ទេសចរណ៍ អប់រំ កីឡា សុខាភិបាល និងការតភ្ជាប់រវាងប្រជាជន និងប្រជាជន នៃប្រទេសទាំងពីរវៀតណាម-កម្ពុជា។
ក្នុងជំនួបពិភាក្សាគ្នានោះ ថ្នាក់ដឹកនាំនៃប្រទេសទាំងពីរ ក៏បានរិះរកគ្រប់មធ្យោបាយក្នុងការជំរុញកំណើនពាណិជ្ជកម្ម នៃប្រទេសទាំងពីរឲ្យបានសំរេចតាមគោលដៅដែលថ្នាក់ដឹកនាំទាំងពីរចង់បាន។ ទន្ទឹមនឹងនេះថ្នាក់ដឹកនាំនៃប្រទេសទាំងពីរក៏បានពិភាក្សាគ្នាយ៉ាងយកចិត្តទុកដាក់ ទៅលើទំនាក់ទំនងទ្វេភាគី ពហុភាគី តំបន់ និងអន្តរជាតិ ដែលមានការយកចិត្តទុកដាក់ដូចគ្នា៕
（សរុបព័ត៌មាន ដោយ ស្រីព្រេជ）
មតិពីមិត្តអ្នកអាន