យុគសម័យ - នៅព្រឹកថ្ងៃ ទី៥ ខែវិច្ឆិកា ឆ្នាំ២០១៨ នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកសន្និសីទអន្តរជាតិថ្នាក់តំបន់ស្តីពី«ការប្រយុទ្ធប្រឆាំងឱសថក្លែងក្លាយ និងអន់គុណភាព»។
ទិដ្ឋភាពនៃសន្និសីទ (រូបថតៈ FB Samdech Hun Sen)
សន្និសីទអន្តរជាតិថ្នាក់តំបន់ជាលើកដំបូងស្តីពី «ការប្រយុទ្ធប្រឆាំងឱសថក្លែងក្លាយ និងអន់គុណភាព» ត្រូវបានបង្កើតឡើងបន្ទាប់ពីមានការផ្តួចផ្តើមគំនិតរវាង សម្តេចតេជោ ហ៊ុន សែន និងលោក ហ្សង់ ដេវិត ឡឺវីត ប្រធានក្រុមប្រឹក្សាភិបាល នៃវិទ្យាស្ថានស្រាវជ្រាវប្រឆាំងឱសថក្លែងក្លាយកាលពីពេលកន្លងទៅ។ សន្និសីទនេះគឺធ្វើឡើងរយៈពេលពីរថ្ងៃ ចាប់ពីថ្ងៃទី០៥-០៦ ខែវិច្ឆិកា ដោយមានការអញ្ជើញចូលរួមពី មន្ត្រីពាក់ព័ន្ធនៃប្រទេសបារាំង ប្រទេសតំបន់ទន្លេមេគង្គរួមមាន កម្ពុជា, ឡាវ, មីយ៉ាន់, ថៃ និងវៀតណាម រួមទាំងប្រទេសចិន ព្រមទាំងមកពីក្រសួងស្ថាប័នពាក់ព័ន្ធរបស់ រាជរដ្ឋាភិបាលកម្ពុជា អង្គភាព នានា តាមបណ្តាលរាជធានី ខេត្ត ភ្ញៀវជាតិ អន្តរជាតិ និងតំណាងវិស័យឯកជនមួយចំនួនចូលរួម ប្រមាណសរុប ៤៥០នាក់។
សន្និសីទនេះ ផ្តោតលើកិច្ចពិភាក្សាអំពីការទប់ស្កាត់ការទំនាក់ទំនង និងលប់បំបាត់នូវឱសថ ក្លែងក្លាយ និងអន់គុណភាព ដោយបង្កើតឲ្យមានយុទ្ធសាស្ត្រយ៉ាងត្រឹមត្រូវក្នុងការទំនាក់ទំនងជាមួយបណ្តា ប្រទេសនៅក្នុងតំបន់ និងពិភាក្សាអំពីការធ្វើវិនិសោធនកម្មច្បាប់ដើម្បីបន្ថែមទោសអោយបានធ្ងន់ ចំពោះអ្នកផលិត អ្នកនាំចូល និងអ្នកចរាចណ៍ឱសថក្លែងក្លាយអោយស្របតាមសន្ធិសញ្ញា PALEMO ដែលព្រះរាជាណាចក្រកម្ពុជា និងបណ្តាប្រទេសជិតខាងបានធ្វើសច្ចាប័នទទួលស្គាល់រួចហើយ និង បង្កើតជំនាញអាចបំពេញការងារយ៉ាងមានប្រសិទ្ធភាពបំផុត៕
（យោងតាម FB Samdech Hun Sen）
