សម្ដេចតេជោ ហ៊ុន សែន ចេញសារាចរណែនាំឲ្យគ្រប់ក្រសួងស្ថាប័នរដ្ឋទាំងអស់

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។ (រូបថត៖Information.gov.kh)

វិធានការនេះបានធ្វើឡើងបន្ទាប់ពីកម្ពុជាបានរកឃើញនៅករណីកូវីដ១៩ ចំនួន ៤ករណីទៀត នៅលើខ្លួនជនជាតិខ្មែរឥស្លាម ២ នាក់ ជនជាតិខ្មែរដែលមកពីប្រទេសបារាំង ១ នាក់ និងកូនបុរសជនជាតិបារាំងអាយុ ៣៥ ឆ្នាំមួយនាក់ ដែលធ្វើឲ្យករណីឆ្លងកូវីដ១៩ នៅក្នុងប្រទេសកម្ពុជាកើនឡើងដល់ ១២នាក់ ដែលភាគច្រើននៃអ្នកឆ្លងជាពលរដ្ឋមកពីប្រទេសលោកខាងលិច។

ដើម្បីទប់ស្កាត់ការរីករាលដាលនេះ រាជរដ្ឋាភិបាលកម្ពុជា ដាក់ចេញនូវវិធានការដូចខាងក្រោម៖

១៖ ណែនាំដល់ប្រជាពលរដ្ឋទាំងអស់ សូមកុំធ្វើដំណើរទៅកាន់បណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ ប្រសិនបើមិនមានការចាំបាច់បំផុតដែលខានពុំបាន។

២៖ គ្រប់ក្រសួង ស្ថាប័នរដ្ឋទាំងអស់ ទាំងនៅថ្នាក់ជាតិ និងថ្នាក់ក្រោមជាតិមិនត្រូវអនុញ្ញាតឲ្យមន្ត្រីរាជការ បុគ្គលិកគ្រប់លំដាប់ថ្នាក់ ធ្វើដំណើរចូលរួមកិច្ចប្រជុំគ្រប់ប្រភេទ ទៅកាន់បណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ឡើយ។

៣៖ ក្នុងករណីចាំបាច់ខានមិនបាន ដែលតម្រូវឲ្យមានតំណាងរបស់កម្ពុជា ចូលរួមប្រជុំនៅបណ្ដាប្រទេសដូចជាបញ្ជាក់ខាងលើ ក្រសួង ស្ថាប័នពាក់ព័ន្ធនីមួយៗ ត្រូវធ្វើសំណើទៅកាន់ក្រសួងការបរទេស និងសហប្រតិបត្តិការអន្តរជាតិ ដើម្បីចាត់តំណាងស្ថានទូតប្រចាំនៅប្រទេសម្ចាស់ផ្ទះនៃការប្រជុំ ឲ្យចូលរួមជំនួស។

៤៖ ចំពោះមន្ត្រីរាជការ និងប្រជាពលរដ្ឋកម្ពុជាទាំងឡាយណា ដែលទើបវិលត្រឡប់ពីបណ្ដាលប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ ត្រូវដាក់ខ្លួនឱ្យនៅដោយឡែក ក្នុងរយៈពេល ១៤ថ្ងៃ គិតចាប់ពីថ្ងៃដែលបានត្រឡប់មកដល់ប្រទេសកម្ពុជាវិញ ស្របតាមនីតិវិធីកំណត់ដោយក្រសួងសុខាភិបាល។

សារាចរណែនាំសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។ (រូបថត៖ freshnewsasia)

ជាមួយគ្នានេះ នៅថ្ងៃទី ១៦ ខែមីនាស្ថានទូតកម្ពុជាប្រចាំនៅប្រទេសវៀតណាម​បាន​ជូនដំណឹង​ដល់និស្សិត និងប្រជាពលរដ្ឋទាំងអស់​នៃប្រទេសអំពីស្ថានភាព​នៃការរីករាលដាលនៃជំងឺ Cov-១៩ នៅវៀតណាម ហើយបានអំពាវនាវ ប្រជាជន​កម្ពុជា​រស់នៅនិងធ្វើការ នៅក្នុងប្រទេសវៀតណាម​ដោយប្រយ័ត្នប្រយែងបំផុត​និងអនុវត្តន៍​វិធានការដែលក្រសួងសុខាភិបាលនិងសមត្ថកិច្ច​វៀតណាមដែលបានណែនាំ ដើម្បីជៀសវាងការឆ្លង។ ប្រទេសវៀតណាមបានបញ្ជាក់ថា ការរីករាលដាលនៃ Covid-19 អាចត្រូវបានគ្រប់គ្រង./.

（សរុបដោយឌីណា）

（សរុបដោយឌីណា）