នៅព្រឹកថ្ងៃទី ២៤ ខែកុម្ភៈនេះ សម្តេច ហ៊ុន សែននាយករដ្ឋមន្ត្រី កម្ពុជា បានលើកឡើងថា នៅអំឡុងពេលរោងចក្រកាត់ដេរបិទទ្វារបណ្ដោះអាសន្ន ដែលអាចនឹងចាប់ផ្ដើមឡើងនៅខែមីនាខាងមុខនេះ កម្មករកម្មការិនីរោងចក្រដេរ ដែលធ្វើការនៅក្នុងរោងចក្រនោះ នឹងត្រូវទទួលបានប្រាក់ខែ ៦០% នៃ ប្រាក់ខែសរុបបច្ចុប្បន្នរបស់ពួកគេ។
កម្មករកម្មការិនីរោងចក្រនាំគ្នាថតរូប selfie ជាមួយនាយករដ្ឋមន្ត្រី សម្ដេចតេជោ ហ៊ុន សែន កាលពីថ្ងៃទី២០ សីហា នៅក្នុងពិធីមួយនៅកោះពេជ្រ។ (ប្រភព៖ ហ្វេសប៊ុកនាយករដ្ឋមន្ត្រី)
សម្ដេច ហ៊ុន សែន អះអាងដូច្នេះ នៅក្នុងឱកាសដែលសម្ដេច អញ្ជើញថ្លែង សារពិសេសមួយជូនជនជាតិ ខ្មែរទាំងអស់ពាក់ព័ន្ធស្ថានភាពថ្មីៗចុងក្រោយ ដែលធ្វើឡើងនៅវិមានសន្តិភាព រាជធានីភ្នំពេញ។
បើតាមការបញ្ជាក់របស់នាយករដ្ឋមន្ត្រីកម្ពុជា ក្នុងចំណោមប្រាក់ខែដែលនឹងត្រូវផ្ដល់ជូនកម្មករកម្មការិនី ៦០% នៃប្រាក់ខែសរុប ក្នុងអំឡុងពេលរោងចក្របិទបណ្ដោះអាសន្ន ព្រោះតែកង្វះវត្ថុធាតុដើមសម្រាប់ផលិតកម្មនោះ ថៅកែរោងចក្រនឹងត្រូវផ្ដល់ជូន៤០% និង រាជរដ្ឋាភិបាលកម្ពុជា នឹងផ្ដល់ជូនបន្ថែម ២០% សរុបទៅ គឺកម្មករកម្មការិនី នឹងទទួលបាន ៦០% ឬស្មើនឹងប្រមាណជាង ១២០ ដុល្លារអាមេរិក ក្នុងមួយខែ នៅក្នុងអំឡុងពេលព្យួរការងាររយៈពេល ៦ខែ។
ជាមួយគ្នានេះ រាជរដ្ឋាភិបាលក៏លើកលែងពន្ធពី ៦ខែដល់ទៅ ១ឆ្នាំ ដល់រោងចក្រដែលប៉ះពាល់ធ្ងន់ធ្ងរផងដែរ។
មិនតែប៉ុណ្ណោះ សម្ដេច ហ៊ុន សែន បានគូសបញ្ជាក់ថា រាជរដ្ឋាភិបាលដាក់ចេញវិធានការមួយចំនួនដើម្បីជួយវិស័យកាត់ដេរ និងកម្មករ ក្រោយមានរោងចក្រមួយចំនួនបានព្យួរជាបណ្តើរៗ។
បើតាមការអះអាងរបស់សមាគមរោងចក្រកាត់ដេរកម្ពុជា នាពេលកាលពីពេលថ្មីៗនេះ បានបញ្ជាក់ថា ច្ចុប្បន្នវត្ថុធាតុដើមប្រហែលជាង ៦០% សម្រាប់បម្រើឲ្យផលិតកម្មក្នុងវិស័យកាត់ដេរសម្លៀកបំពាក់ និងផលិតផលស្បែកជើងត្រូវបាននាំចូលពីប្រទេសចិន។ ដោយសារតែ បញ្ហារីករាលដាល នៃវីរុស Covid 19 បានធ្វើឲ្យរោងចក្រមួយចំនួន ដែលជាដៃគូផ្គត់ផ្គង់វត្ថុធាតុដើមសម្រាប់រោងចក្រកាត់ដេរនៅកម្ពុជា ត្រូវបានបិទទ្វារ លែងផ្គត់ផ្គង់មកឲ្យកម្ពុជា ដែលធ្វើឲ្យរោងចក្រកាត់ដេរនៅកម្ពុជាមួយចំនួនកំពុងជួបបញ្ហាខ្វះវត្ថុធាតុដើម សម្រាប់ការផលិត។ បើតាមសមាគរោងចក្រកាត់ដេរកម្ពុជា នៅខែមីនា ឆ្នាំ២០២០ នឹងមានរោងចក្រមួយចំនួន នឹងបិទទ្វារបណ្ដោះអាសន្ន ដែលអាចបិទរហូទដល់ពេញមួយខែ ឬ២ខែតែម្ដង។
គួរបញ្ជាក់ថា នាពេលថ្មីៗនេះ វិស័យកាត់ដេរកម្ពុជា មិនត្រឹមតែជួបបញ្ហាធំ ដោយសារតែបញ្ហាវីរុស Covid 19 ប៉ុណ្ណោះទេ ប៉ុន្ដែ វិស័យនេះ ក៏ត្រូវបានអឺរ៉ុបទើបតែសម្រេចព្យួរផ្នែកខ្លះ នៃប្រព័ន្ធអនុគ្រោះពន្ធ EBA ផងដែរ ដែលផលប៉ះពាល់នេះ អាចនឹងមានទំហំប្រមាណ ២០% នៃការនាំចេញសរុបនៃវិស័យកាត់ដេរកម្ពុជា ទៅកាន់ទីផ្សារអឺរ៉ុប។
សម្តេចហ៊ុន សែន ៖ការបិទរោងចក្រណាមួយនៅកម្ពុជា វាមិនបានពាក់ព័ន្ធនឹងEBA នោះទេ។ (រុបថត៖ nikkei)
ទាក់ទងនឹងរឿង EBA នាយករដ្ឋមន្ត្រីកម្ពុជា បានអះអាងទៀតថា «ហ៊ុនសែន មិនស្នើសុំមកវិញ (EBA) ដើម្បីដោះដូរអធិបតេយ្យភាពរបស់ជាតិនោះទេ»។
សម្ដេច បន្ថែមទៀតថា នៅពេលដែលមានការដក EBA ផ្នែកខ្លះ ដែលមានប្រមាណ២០% នៃទំនិញនាំចេញទៅអឺរ៉ុបនោះ កម្ពុជានឹងត្រូវបង់ពន្ធប្រមាណ តែ ១០០ លានដុល្លារអាមេរិកប៉ុណ្ណោះ ក្នុងមួយឆ្នាំ ដូច្នេះ រាជរដ្ឋាភិបាលមិនដោះដូរអធិបតេយ្យភាព ជាមួយនឹងលុយ១០០ លានដុល្លារអាមេរិកនោះទេ។
សម្តេច ហ៊ុន សែន បញ្ជាក់ថា «យើងមិនអាចតាម EU ទេ។
សម្តេច ហ៊ុន សែន បានស្នើដល់វិនិយោគិនចិន កុំឲ្យរត់ចោលកម្ពុជានៅពេល EBA ត្រូវបានដក ហើយរាជរដ្ឋាភិបាលក៏នឹងបន្តស្វែងរកទីផ្សារបន្ថែមទៀត ដើម្បីជំរុញដល់ការនាំចេញ។ ជាមួយគ្នានេះ សម្តេច ក៏បានស្នើឲ្យរោងចក្រចិន បន្តការផ្គត់ផ្គង់វត្ថុធាតុដើមសម្រាប់ការផលិតរបស់រោងចក្រកាត់ដេរកម្ពុជាឡើងវិញ ខណៈដែលបច្ចុប្បន្នរោងចក្រកាត់ដេរនៅកម្ពុជាកំពុងរងផលប៉ះពាល់ដោយសារតែកង្វះវត្ថុធាតុដើមផលិត ក្រោយពីមានការផ្ទុះឡើងនៃវីរុស Covid 19។
សូមបញ្ជាក់ថា បើតាមសហភាពអឺរ៉ុប បានលើកឡើងនៅក្នុងសេចក្ដីថ្លែងការរបស់ខ្លួននាពេលថ្មីៗនេះ បានឲ្យដឹងថា ការសម្រេចដក EBA ផ្នែកខ្លះ ដែលប៉ះពាល់ ដល់ទំហំការនាំចេញរបស់កម្ពុជាទៅអរ៉ុបប្រមាណ ២០% នោះ នឹងត្រូវអនុវត្តចាប់ពីថ្ងៃទី ១២ ខែ សីហា ឆ្នាំ២០២០នេះ។ បើតាមសហភាពអឺរ៉ុប ទំហំ២០% នៃការដកនេះ អាចនឹងប៉ះពាល់ទឹកប្រាក់នាំចេញប្រមាណជាង ១ពាន់លានដុល្លារអាមេរិក និងបាត់បង់ការងាររបស់កម្មករកម្មការិនីរាប់ម៉ឺននាក់។
សម្តេច ហ៊ុន សែន ក៏បានគូសបញ្ជាក់ដែរថា “ទាំង EBA និង បញ្ហា Covid 19 សុទ្ធតែប៉ះពាល់ដល់វិស័យកាត់ដេរកម្ពុជា ប៉ុន្ដែ តិចតួចប៉ុណ្ណោះ”។
ទោះយ៉ាងណា នាយករដ្ឋមន្ត្រីកម្ពុជា គូសបញ្ជាក់ដែរថា រាជរដ្ឋាភិបាលនឹងលើកលែងពន្ធ ៦ខែ ទៅ១ឆ្នាំ ដល់រោងចក្រកាត់ដេរទាំងឡាយណា ដែលមានផលប៉ះពាល់ធ្ងន់ធ្ងរ ដោយសារតែបញ្ហាដែលបានកើតឡើងខាងលើនេះ៕
（សរុបដោយវិច្ឆិកា）
មតិពីមិត្តអ្នកអាន