ថ្លែងក្នុងពិធីបើកការដ្ឋានស្តារ និងសាងសង់ផ្លូវជាតិលេខ២ និង២២ នៅព្រឹកថ្ងៃទី១១ ខែកុម្ភៈ ឆ្នាំ២០២០នេះ សម្តេចតេជោ ហ៊ុន សែន បានថ្លែងថា ចំពោះបញ្ហាការដក ឬរក្សាប្រព័ន្ធអនុគ្រោះពន្ធទំនិញគ្រប់យ៉ាងលើកលែងតែសព្វាវុធ ហៅកាត់ថា EBA នេះពីកម្ពុជា សម្តេចនឹងមិនស្នើឲ្យអឺរ៉ុបរក្សាទុក ឬដកនោះទេ។ តែសម្តេចនៅតែរក្សាជំហរ មិនយកអធិបតេយ្យជាតិ និងឯករាជ្យ ទៅដោះដូរនឹងអ្នកណានោះឡើយ។
សម្តេចហ៊ុន សែន ៖ការបិទរោងចក្រណាមួយនៅកម្ពុជា វាមិនបានពាក់ព័ន្ធនឹងEBA នោះទេ។ (ប្រភព៖ asia.nikkei.com)
សម្តេច ហ៊ុន សែននាយករដ្ឋមន្ត្រីនៃកម្ពុជាអះអាងយ៉ាងច្បាស់ថា ទោះបីជាស្អែកនេះលទ្ធផលនៃការប្រកាសប្រព័ន្ធអនុគ្រោះពន្ធEBA ទៅជាយ៉ាងណាក៏ដោយ ក៏កម្ពុជាមិនខ្វល់ដែរ។
សម្តេចថា៖ «សូមប្រជាពលរដ្ឋកម្ពុជាគិតឲ្យបានច្បាស់លាស់ថាពេលនេះកម្ពុជាត្រូវការអ្វីពិតប្រាកដ។ កម្ពុជាត្រូវការសន្តិភាព មិនអាចឲ្យអ្នកណាបំផ្លាញសន្តិភាពបានទេ។ បើទោះបីបង់ថ្លៃប៉ុណ្ណាក៏ដោយចុះ កម្ពុជាត្រូវតែជាប្រទេសដែលមានសន្តិភាព មានឯករាជ្យ និងអធិបតេយ្យភាពពេញលេញ ច្បាប់របស់ខ្លួនត្រូវតែបានអនុវត្តន៍ ទោះបីនរណាក៏ដោយ ត្រូវនៅក្រោមច្បាប់របស់កម្ពុជា»។
«យើងចង់ធ្វើមិត្តភក្តិ និងដៃគូទាំងអស់ជាមួយប្រទេសនៅលើពិភពលោក។ ប្រសិនបើគេមិនយល់ពីយើង ហើយចង់ចាប់បង្ខំយើង ក៏យើងមិនព្រមដែរ យើងធ្លាប់ភ្លក់រសជាតិរួចហើយ នៃសោកនាដ្ឋកម្មសង្គ្រាមរាប់មិនអស់ ដែលពួកគេបានកសាងឡើងសម្រាប់យើង តែយើងមិនបានស្លាប់ទេ។ អញ្ចឹងសុំអំពាវនាវចំពោះប្រជាពលរដ្ឋកម្ពុជា ងើបឈរឡើង ដើម្បីការពារឯករាជ្យ អធិបតេយ្យភាព និងសន្តិភាពរបស់កម្ពុជា។ អត់ត្រូវឱនក្បាលចំពោះនរណាទាំងអស់ យើងត្រូវខិតខំរស់»។
លើសពីនេះទៅទៀត អំពីការបិទរោងចក្រមួយចំនួននៅកម្ពុជានាពេលខាងមុខ សម្តេចថា៖ « នៅពេលខាងមុខនេះប្រសិនបើមានការបិទរោចក្រណាមួយមិនមែនមកពីអា EBA នោះទេ នៅពេលខាងមុខចាំមើលទៅ បើទោះបីមានឬគ្មានអា EBA ហ្នឹង។ ព្រោះខ្វះខាតមានវត្ថុធាតុដើមមួយចំនួន ដែលកំពុងតែយកមកដេរនៅស្រុកខ្មែររួចហើយបន្តនាំចេញទៅ យើងអត់សាច់ក្រណាត់ តើយើងមានអីដេរ ដូច្នេះកម្មករច្បាស់ជាជួបប្រទះនូវបញ្ហាខ្វះការងារធ្វើ ត្រូវគិតរឿងហ្នឹងឲ្យហើយ។ រឿង EBA បើទោះបីគេដកទាំងស្រុង ឫដកផ្នែកខ្លះ ក៏គង់ទៅដល់ខែ៨ឯណោះបានវាចាប់ផ្តើម អ៊ីចឹងវាអត់មានទេ ។ ហើយសុំកុំឆ្កួតៗ និយាយរួមគឺថា អាពុលក្តួច ភ័យខ្លាច ទាំងមិនដឹងថា EBA ជាស្អី» ។សម្តេចបានអះអាងយ៉ាងមុតមាំថា « ខ្ញុំមិនយកឯកភាពរាជ្យ អធិបតេយ្យភាពកម្ពុជា ទៅដូរជាមួយជំនួយនិងភាពអនុគ្រោះណាទាំងអស់»។
គូសបញ្ជាក់ថា ថ្ងៃទី១២ ខែកុម្ភៈ ស្អែកនេះ គណៈកម្មាអឺរ៉ុបនឹងប្រកាសលទ្ធផលជាផ្លូវការ នូវការពិភាក្សាស្តីពីការដកឬមិនដកប្រព័ន្ទអនុគ្រោះពន្ធ EBAហើយ ៕
（សរុបដោយវិច្ឆិកា）
មតិពីមិត្តអ្នកអាន