មេដឹកនាំពិភពលោកសន្យាគាំទ្រពហុភាគីនិយម

ប្រធានមហាសន្និបាតអង្គការសហប្រជាជាតិ នីតិកាលទី ៧៥ លោក Volkan Bozkir ថ្លែងនៅក្នុងកិច្ចពិភាក្សាទូទៅ នៃមហាសន្និបាតអង្គការសហប្រជាជាតិ

សម័យពិភាក្សាទូទៅលើកទី ៧៥ នៃមហាសន្និបាតអង្គការសហប្រជាជាតិ នីតិកាលទី ៧៥ បានបិទបញ្ចប់នាថ្ងៃទី ២៩ ខែកញ្ញា នៅទីស្នាក់ការអង្គការសហប្រជាជាតិប្រចាំទីក្រុងញូវយ៉ក (សហរដ្ឋអាមេរិក) ដោយមានសញ្ញាវិជ្ជមាន នៅពេលដែលមេដឹកនាំភាគច្រើននិងតំណាងនៃប្រទេសដែលចូលរួម បានបង្ហាញការគាំទ្រយ៉ាងខ្លាំង ចំពោះពហុភាគីនិយមនិងអង្គការសហប្រជាជាតិ។

អញ្ជើញថ្លែងសុន្ទរកថាបិទនៅក្នុងសម័យប្រជុំនៃកិច្ចពិភាក្សាទូទៅ ប្រធានមហាសន្និបាតអង្គការសហប្រជាជាតិ នីតិកាលទី ៧៥ លោក Volkan Bozkir បានមានប្រសាសន៍ថា នៅក្នុងសុន្ទរកថាដែលបានផ្ញើមកកាន់សម័យប្រជុំនេះ មេដឹកនាំពិភពលោកភាគច្រើន បានបញ្ជាក់ពីការប្តេជ្ញាចិត្តរបស់ខ្លួន ចំពោះពហុភាគីនិយមនិងអង្គការសហប្រជាជាតិ។ ជាក់ស្តែងគឺ ប្រមុខរដ្ឋ ប្រមុខរដ្ឋាភិបាលនិងរដ្ឋមន្រ្តីនានា បានដាក់ចេញនូវរបៀបវារៈពេញលេញ មិនត្រឹមតែគាំទ្រដល់អាទិភាពដែលលោកបានកំណត់ប៉ុណ្ណោះទេ ថែមទាំងផ្តល់ការណែនាំជាក់ស្តែងសម្រាប់ជំនះដល់ឧបសគ្គនានា ដែលពិភពលោកកំពុងប្រឈមមុខ។ មេដឹកនាំទាំងអស់បានឯកភាពថាដំណោះស្រាយអាចកើតចេញពីសកម្មភាពពហុភាគី ដោយយកអង្គការសហប្រជាជាតិជាមជ្ឈភាពតែប៉ុណ្ណោះ។

សូមគូសបញ្ជាក់ថា សម័យប្រជុំពិភាក្សាទូទៅនៃមហាសន្និបាតអង្គការសហប្រជាជាតិបានធ្វើឡើងក្នុងរយៈពេលមួយសប្តាហ៍ចាប់ពីថ្ងៃទី ២២ ដល់ថ្ងៃទី ២៩ ខែកញ្ញា។ អគ្គលេខាបក្ស ប្រធានរដ្ឋវៀតណាម លោក Nguyen Phu Trong និងនាយករដ្ឋមន្ត្រីវៀតណាម លោក Nguyen Xuan Phuc បានផ្ញើសារសំខាន់ទៅកាន់អង្គប្រជុំដោយសង្កត់ធ្ងន់ថា យន្តការពហុភាគីសកលនិងតំបន់ត្រូវតែគោរពនិងលើកកម្ពស់ជានិច្ច៕

（ប្រភពព័ត៌មាន: vov）