នៅថ្ងៃទី២៤ ខែធ្នូនេះ នាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន បានដឹកនាំប្រតិភូកម្ពុជា ទៅចូលរួមកិច្ចប្រជុំទ្វេភាគី កម្ពុជា-ចិន លើកទី៨ ស្តីពីកិច្ចសហប្រតិបត្តិការត្រួតពិនិត្យគ្រឿងញៀននៅខេត្តឆាងសា និងខេត្តហួណាន ប្រទេសចិន។
ទិដ្ឋភាពនៃកិច្ចប្រជុំ។ (ប្រភព៖ dap-news)
ប្រតិភូមកម្ពុជា មានការចូលរួមភាគីមានតំណាងពីក្រសួង-ស្ថាប័នពាក់ព័ន្ធ ដូចជា ក្រសួងសង្គមកិច្ច អគ្គស្នងការដ្ឋាននគរបាលជាតិ អគ្គនាយកដ្ឋានគយ និងរដ្ឋាករកម្ពុជា កងរាជអាវុធហត្ថលើផ្ទៃប្រទេស និងភាគីចិន មានការចូលរួមពីលោក លាង យុន អគ្គលេខាធិការរង នៃគណៈកម្មការជាតិត្រួតពិនិត្យគ្រឿងញៀនចិន និងជាអគ្គនាយក នៃអគ្គនាយកដ្ឋានត្រួតពិនិត្យគ្រឿងញៀន នៃក្រសួងសន្តិសុខសាធារណចិន តំណាងមូលនិធិត្រួតពិនិត្យគ្រឿងញៀនចិន និងតំណាងខេត្តហ៊ូណាន និងខេត្តយូណាន។
បើតាមនាយឧត្តមសេនីយ៍ មាស វិរិទ្ធ បានឱ្យដឹងថា កិច្ចប្រជុំនេះ គឺជាកិច្ចប្រជុំផ្លាស់វេនគ្នាប្រចាំឆ្នាំ ដោយផ្តោតទៅលើកិច្ចការសំខាន់ៗមួយចំនួន ដូចជា ការចែករំលែកព័ត៌មានស្តីពីគ្រឿងញៀនទៅវិញទៅមក និងកិច្ចសហប្រតិបត្តិការក្នុងការងារអនុវត្តច្បាប់ កិច្ចសហប្រតិបត្តិការក្នុងវិស័យកាត់បន្ថយតម្រូវការ និងការគាំទ្រការបណ្តុះបណ្តាល និងសម្ភារ។
នាយឧត្តមសេនីយ៍ មាស វិរិទ្ធ ក៏បានបញ្ជាក់ផងដែរថា តាមរយៈកិច្ចប្រជុំនេះ ភាគីទាំងពីរ កម្ពុជា-ចិន បានឯកភាពគ្នា នឹងពង្រឹងពង្រីកនូវកិច្ចសហប្រតិបត្តិការត្រួតពិនិត្យគ្រឿងញៀន ដើម្បីរឹតចំណងសាមគ្គីភាពរវាងប្រទេសទាំងពីរ។
ជាមួយគ្នានេះ លោក យ៉ាង ហ្វេនរី ប្រធានមូលនិធិត្រួតពិនិត្យគ្រឿងញៀន នៃគណៈកម្មការជាតិត្រួតពិនិត្គ្រឿងញៀនចិន បានផ្តល់សម្ភារតេស្តបឋម ស្វែងរកសារធាតុញៀន ដែលមានតម្លៃ ៥០០,០០០យ័ន ដល់កម្ពុជាផងដែរ។
សូមបញ្ជាក់ថា កម្ពុជា នឹងទទួលធ្វើជាម្ចាស់ផ្ទះនៃប្រជុំទ្វេភាគី កម្ពុជា-ចិន ថ្នាក់មន្ត្រីជាន់ខ្ពស់ លើកទី៩ ឆ្នាំ២០២០ នៅប្រទេសកម្ពុជា៕
（សរុបដោយវិច្ឆិកា）
មតិពីមិត្តអ្នកអាន