ប្រទេសរុស្ស៉ី តាមរយៈលោកនាយករដ្ឋមន្ត្រី ឌីមីទ្រី មីដវីដេវ (Dmitry Medvedev) បានបង្ហាញជំហរយ៉ាងមុតមាំរបស់ខ្លួន បន្តចូលរួមអភិវឌ្ឍកម្ពុជា ឱ្យកាន់តែរីកចម្រើនបន្ថែមទៀត តាមរយៈពង្រឹងទំនាក់ទំនង និងកិច្ចសហប្រតិបត្តិការនានា ទាំងផ្នែកនយោបាយ សេដ្ឋកិច្ច ពាណិជ្ជកម្ម ការវិនិយោគ និងអប់រំ។
សម្ដេចតេជោហ៊ុន សែននិងឯកឧត្តម ឌីមីទ្រី មីដវីដេវ។ (ប្រភព៖ AKP)
ការអះអាង និងបញ្ជាក់របស់ឯកឧត្តម ឌីមីទ្រី មីដវីដេវ បានធ្វើឡើងនៅក្នុងជំនួបពិភាក្សាការងារជាមួយសម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅរសៀលថ្ងៃទី៣ ខែវិច្ឆិកា ឆ្នាំ២០១៩ នៅប្រទេសថៃ ទីដែលនាយករដ្ឋមន្ត្រីទាំងពីរ ចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ។
យោងតាមឯកឧត្តម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រីបានបញ្ជាក់ថា ក្នុងជំនួបនេះ សម្តេចតេជោ ហ៊ុន សែន និងនាយករដ្ឋមន្ត្រីរុស្ស៉ី បានបង្ហាញនូវក្តីរីករាយ ដែលបានជួបពិភាក្សាគ្នាជាថ្មីម្ដងទៀត ជាពិសេសនៅក្នុងក្របខណ្ឌវេទិកាអន្តរជាតិ។
ឯកឧត្តម នាយករដ្ឋមន្ត្រីរុស្ស៉ីបានថ្លែងថា កម្ពុជាជាមិត្តជិតស្និទ្ធរបស់រុស្ស៉ី។ លោកនាយករដ្ឋមន្ត្រី បង្ហាញក្តីរំពឹងថា ទំនាក់ទំនងប្រទេសទាំងពីរនឹងកាន់តែជិតស្និទ្ធ ដោយបន្តពង្រីកពង្រឹងកិច្ចសហប្រតិបត្តិការ និងទំនាក់ទំនងទ្វេភាគីបន្ថែមទៀត ជាពិសេសរវាងរដ្ឋាភិបាល និងរដ្ឋាភិបាល និងក្របខណ្ឌផ្សេងៗទៀត។
ក្នុងជំនួបនេះ សម្ដេចតេជោ ហ៊ុន សែន បានថ្លែងអំណរអរគុណប្រទេសរុស្ស៉ី ដែលបន្តត្រៀមធ្វើកិច្ចសហប្រតិបត្តិការលើវិស័យមួយចំនួន រួមទាំងវិស័យវប្បធម៌ផងដែរ។ សម្ដេចតេជោ ក៏បានអរគុណរុស្ស៉ីដែលគាំទ្រកម្ពុជា ឱ្យក្លាយជាប្រទេសសង្កេតការណ៍ នៃអង្គការកិច្ចសហប្រតិបត្តិការសៀងហៃ ហើយផ្ដល់នូវវគ្គបណ្ដុះបណ្ដាលដល់មន្ត្រីយោធាកម្ពុជា និងផ្ដល់ជំនួយបច្ចេកទេស ក្នុងវិស័យកម្ចាត់មីនផងដែរ។
សម្ដេចតេជោនាយករដ្ឋមន្ត្រី ក៏បានបង្ហាញក្តីរីករាយអំពីទំហំពាណិជ្ជកម្ម រវាងប្រទេសទាំងពីរដែលមានការកើនឡើងកន្លងមកនេះ។ ក្នុងន័យនេះ ដើម្បីពង្រឹងទំហំពាណិជ្ជកម្មបន្ថែមទៀតនោះ សម្ដេចតេជោបានស្នើសុំឱ្យនាយករដ្ឋមន្ត្រីរុស្ស៉ី ជួយជំរុញវិនិយោគិនរុស្ស៉ី មកវិនិយោគបន្ថែមទៀត នៅប្រទេសកម្ពុជា ក្នុងវិស័យមួយចំនួន ដូចជាវិស័យកែច្នៃម្ហូបអាហារ កសិឧស្សាហកម្ម, ឧស្សាហកម្មអេឡិចត្រូនិក, ឧស្សាហកម្មបង្គំ និងឧស្សាហកម្មផលិតគ្រឿងម៉ាស៊ីនជាដើម។
សម្ដេចក៏បានស្នើភាគីរុស្ស៊ី ពិនិត្យលទ្ធភាពចាប់ផ្ដើមអនុវត្តគម្រោងទំនើបកម្ម មន្ទីពេទ្យមិត្តភាពខ្មែរសូវៀត នៅក្នុងពេលឆាប់ៗខាងមុខនេះ ព្រោះមន្ទីរពេទ្យនេះជានិមិត្តរូបនៃមិត្តភាព រយៈពេលយូរអង្វែងរវាងប្រទេសយើងទាំងពីរ ។
ដោយឡែកពាក់ព័ន្ធនឹងការចរចាកិច្ចព្រមព្រៀង ពាណិជ្ជកម្មសេរីរវាងកម្ពុជា និងសហភាពសេដ្ឋកិច្ចអឺរ៉ាស៊ី សម្តេចតេជោ បានថ្លែងអំណរគុណចំពោះការគាំទ្រ ជាគោលការណ៍របស់រុស្ស៉ី ចំពោះកិច្ចប្រឹងប្រែងឱ្យមានការចរចាកិច្ចព្រមព្រៀងពាណិជ្ជកម្មសេរីរវាងកម្ពុជា និងសហភាពសេដ្ឋកិច្ចអឺរ៉ាស៊ីនេះ។
ដោយសារកម្ពុជានៅឆ្នាំ២០២០ កម្ពុជាធ្វើជាម្ចាស់ផ្ទះកិច្ចប្រជុំកំពូលអាស៊ីអឺរ៉ុបលើកទី១៣នោះ សម្ដេចតេជោ ក៏បានអញ្ជើញលោកនាយករដ្ឋមន្ត្រីរុស្ស៉ី អញ្ជើញចូលរួមកិច្ចប្រជុំនេះផងដែរ។
ទដ្ឋភាពនៃជំនួប។ (ប្រភព៖ FN)
ឯកឧត្តម ឌីមីទ្រី មីដវីដេវ នាយករដ្ឋមន្ត្រីរុស្ស៊ីក៏បានគូសបញ្ជាក់ថា ប្រទេសរុស្ស៊ី ចង់សហការជាមួយកម្ពុជាលើវិស័យជាច្រើន រួមទាំងវិស័យឧស្សាហកម្ម ហើយចង់បន្តផ្ដល់ការគាំទ្រដល់កម្ពុជា នៅក្នុងកិច្ចសហការលើវិស័យថាមពល ដូចជាវិស័យប្រេង វិស័យទូរគមនាគមន៍ ជលផល និងការបង្កើតកិច្ចសហប្រតិបត្តិការផ្សេងៗទៀតនៅកម្ពុជា។
ចំពោះពាណិជ្ជកម្មសេរីរវាងកម្ពុជា និងសហភាពសេដ្ឋកិច្ចអឺរ៉ាស៊ី ឯកឧត្តមបានគូសបញ្ជាក់ថា នេះជាកិច្ចការមានសារៈសំខាន់ណាស់ ហើយជាគំនិតផ្ដួចផ្ដើមដ៏ល្អ ដែលយើងអាចចុះកិច្ចព្រមព្រៀងនៅពេលខាងមុខនេះក្រោយពីការចរចារួចហើយនោះ។ ឯកឧត្តមបានបន្ដថា យើងអាចមានកិច្ចសហការយ៉ាងល្អលើវិស័យឧស្សាហកម្ម វិទ្យាសាស្រ្ត និងវិស័យផ្សេងៗទៀត ជាពិសេសនៅក្នុងការដោះមីន និងក្នុងវិស័យការពារជាតិដែលប្រទេសរុស្ស៊ីចង់បន្តក្នុងការបណ្ដុះបណ្ដាលផ្នែកមន្ត្រីយោធាកម្ពុជា។
ក្រៅពីនេះទៀត ពាក់ព័ន្ធនឹងមន្ទីរពេទ្យមិត្ដភាពខ្មែរ-សូវៀត ឯកឧត្តមគូសបញ្ជាក់ផងដែរថា នេះជាគម្រោងដ៏សំខាន់ ហើយយើងនឹងខិតខំប្រឹងប្រែងនៅក្នុងការធ្វើការងារនេះឱ្យបានឆាប់កាន់តែល្អ។ ក្នុងឱកាសនេះ ឯកឧត្តមក៏បានថ្លែងអំណរគុណចំពោះសម្ដេចតេជោនាយករដ្ឋមន្ត្រី ជាពិសេសក្នុងការជំរុញកិច្ចសហការលើវិស័យជាច្រើនរវាងប្រទេសទាំងពីរ ជាពិសេសនៅក្នុងក្របខ័ណ្ឌអាស៊ានដែលកម្ពុជាបានចូលរួមយ៉ាងច្រើននៅក្នុងក្របខ័ណ្ឌនេះ និងរុស្ស៊ី ដើម្បីកិច្ចសហការបន្តទៀត។
ពាក់ព័ន្ធនឹងកិច្ចប្រជុំកំពូលអាស៊ីអ៊ឺរ៉ុប នៅឆ្នាំ២០២០ ឯកឧត្តមបានថ្លែងអំណរគុណ សម្ដេចតេជោនាយករដ្ឋមន្រ្តី ចំពោះការអញ្ជើញឯកឧត្តម ទៅចូលរួមកិច្ចប្រជុំនៅទីក្រុងភ្នំពេញ នៅឆ្នាំក្រោយនេះ ដោយឯកឧត្តមនឹងអញ្ជើញចូលរួម។ ពាក់ព័ន្ធនឹងវិស័យការបណ្ដុះបណ្ដាល ឯកឧត្តមនាយករដ្ឋមន្ត្រីរុស្ស៊ីបានបញ្ជាក់ថា ប្រទេសរុស្ស៊ីនឹងបន្តជួយដល់វិស័យអប់រំ និងការបណ្ដុះបណ្ដាលដល់កម្ពុជា ហើយជាពិសេសទៀតនៅឆ្នាំក្រោយឆ្នាំ២០២០ ប្រទេសរុស្ស៊ីនឹងបង្កើនចំនួនអាហារូបករណ៍ដល់និស្សិតកម្ពុជាផងដែរ។
នៅក្នុងជំនួបនេះដែរ សម្ដេចតេជោក៏បានមានប្រសាសន៍ថា សម្ដេចពិតជារីករាយដែល កិច្ចសហប្រតិបត្តិការរវាងប្រទេសទាំងពីរដំណើរការទៅយ៉ាងល្អ ហើយប្រទេសទាំងពីរនឹងបន្តពង្រីក និងពង្រឹងទំនាក់ទំនងទ្វេភាគីឱ្យកាន់តែស៊ីជម្រៅបន្ថែមទៀត។ ពាក់ព័ន្ធនឹងការបណ្តុះបណ្តាលធនធានមនុស្ស សម្ដេចតេជោបានលើកឡើងថា នេះគឺជាវិស័យអាទិភាពរបស់រាជរដ្ឋាភិបាលកម្ពុជា ហើយសម្ដេចក៏បានថ្លែងអំណរគុណឯកឧត្តមនាយករដ្ឋមន្ត្រី ដែលបានជំរុញក្នុងការផ្ដល់បន្ថែមអាហាររូបករណ៍ ក៏ដូចជាការបណ្ដុះបណ្ដាលធនធានមនុស្សកម្ពុជា។
ឯកឧត្តមនាយករដ្ឋមន្ត្រីរុស្សី បានបន្ថែមថា ការងារទាំងអស់នេះ ជាពិសេសការបណ្ដុះបណ្ដាលនេះជាមូលដ្ឋាននៃមិត្តភាពរវាងប្រទេសយើងទាំងពីរ ហើយយើងគោរពគ្នាទៅវិញទៅមក និងមានការយោគយល់គ្នាទៅវិញទៅមកផងដែរ៕
(សរុបដោយវិច្ឆិកា)
មតិពីមិត្តអ្នកអាន