ថ្នាក់ដឹកនាំបក្សនិងរដ្ឋវៀតណាម អញ្ជើញទទួលជួបនូវែលសេឡង់

ថ្នាក់ដឹកនាំបក្សនិងរដ្ឋវៀតណាម អញ្ជើញទទួលជួបជាមួយប្រធានព្រឹទ្ធសភានៃព្រះរាជាណាចក្រកម្ពុជា សម្តេច សាយ ឈុំ

ថ្នាក់ដឹកនាំបក្សនិងរដ្ឋវៀតណាម អញ្ជើញទទួលជួបរដ្ឋមន្ត្រីការបរទេសរុស្ស៊ី លោក Sergei Lavrov

នាយករដ្ឋមន្ត្រីលោក Pham Minh Chinh និងនាយករដ្ឋមន្ត្រី លោកស្រី Jacinda Arden ត្រួតពលកិត្តិយសនៃកងទ័ពប្រជាជនវៀតណាម (រូបថត៖ TTXVN)

ក្នុងដំណើរបំពេញទស្សនកិច្ចផ្លូវការនៅវៀតណាម រួមនឹងការជួបពិភាក្សាជាមួយនាយករដ្ឋមន្ត្រី លោក Pham Minh Chinh មក លោកស្រីនាយករដ្ឋមន្ត្រី Jacinda Ardern អញ្ជើញចូលជួបសម្តែងការគួរសមអគ្គលេខាគណៈកម្មាធិការមជ្ឈិមបក្សកុម្មុយនិស្តវៀតណាម លោក Nguyen Phu Trong និងជួបសវនការជាមួយប្រធានរដ្ឋ Nguyen Xuan Phuc ជួបសន្ទនាជាមួយប្រធានរដ្ឋសភា លោក Vuong Dinh Hue ចូលរួមកិច្ចសន្ទនាធុរកិច្ចវៀតណាម - នូវែលសេឡង់ និងការតភ្ជាប់កសិកម្មនូវែលសេឡង់ ហើយទៅបំពេញទស្សនកិច្ចនិងធ្វើការនៅទីក្រុងហូជីមិញ។

ក្នុងក្របខ័ណ្ឌនៃដំណើរទស្សនកិច្ចរបស់នាយករដ្ឋមន្ត្រីនូវែលហ្សេឡង់នៅវៀតណាម នាយករដ្ឋមន្ត្រីលោក Pham Minh Chinh និងនាយករដ្ឋមន្ត្រីនូវែលសេឡង់ លោកស្រី Jacinda Ardern បានអញ្ជើញចូលរួមពិធីចុះហត្ថលេខាលើឯកសារសហប្រតិបត្តិការរវាងក្រសួង ស្ថាប័ននៃប្រទេសទាំងពីរ។ ឯកសារកិច្ចសហប្រតិបត្តិការរួមមាន៖ កិច្ចព្រមព្រៀងសហប្រតិបត្តិការលើវិស័យអប់រំរវាងក្រសួងអប់រំ និងបណ្តុះបណ្តាលវៀតណាម និងក្រសួងអប់រំនូវែលសេឡង់; កិច្ចព្រមព្រៀងសហប្រតិបត្តិការរវាងក្រសួងគមនាគមដឹកជញ្ជូន វៀតណាម និងក្រសួងគមនាគមដឹកជញ្ជូននូវែលសេឡង់ ស្តីពីកិច្ចសហប្រតិបត្តិការអាកាសចរណ៍ស៊ីវិល។

មុននេះនាយករដ្ឋមន្ត្រីទាំងពីរបានអនុវត្តកិច្ចពិភាក្សា។ នៅក្នុងសន្និសីទសារព័ត៌មានមួយដើម្បីប្រកាសលទ្ធផលនៃកិច្ចពិភាក្សា លោកនាយករដ្ឋមន្ត្រី Pham Minh Chinh បានលើកឡើងថា លោកនិងលោកស្រីនាយករដ្ឋមន្ត្រី Jacinda Ardern បានអនុវត្តកិច្ចពិភាក្សាប្រកបដោយជោគជ័យ។ ភាគីទាំងពីរបានដាក់ចេញនូវទិសដៅដើម្បីធ្វើឱ្យទំនាក់ទំនងភាពជាដៃគូយុទ្ធសាស្ត្រវៀតណាម-នូវែលហ្សេឡង់បន្តរីកចម្រើនខ្លាំងនិងស៊ីជម្រៅថែមទៀតនាពេលខាងមុខ ដើម្បីផលប្រយោជន៍របស់ប្រទេសនីមួយៗ រួមចំណែកដល់សន្តិភាពនិងវិបុលភាព កិច្ចសហប្រតិបត្តិការនិងការអភិវឌ្ឍន៍ក្នុងតំបន់អាស៊ី-ប៉ាស៊ីហ្វិក។ ភាគីទាំងពីរបានឯកភាពគ្នាសម្របសម្រួលដើម្បីរៀបចំឱ្យបានល្អសម្រាប់ដំណើរទស្សនកិច្ចជាផ្លូវការនៅនូវែលសេឡង់របស់ប្រធានរដ្ឋសភាវៀតណាម លោក Vuong Dinh Hue។ វៀតណាម - នូវែលហ្សេឡង់បន្តជំរុញកិច្ចសហប្រតិបត្តិការលើវិស័យការពារជាតិ - សន្តិសុខ ដើម្បីឆ្លើយតបប្រកបដោយប្រសិទ្ធភាពចំពោះការកើនឡើងនូវបញ្ហាប្រឈមសន្តិសុខប្រពៃណី និងមិនប្រពៃណីនៅក្នុងតំបន់ រួមទាំងឧក្រិដ្ឋកម្មឆ្លងដែនជាដើម។ លើវិស័យសេដ្ឋកិច្ច ភាគីទាំងពីរនឹងខិតខំប្រឹងប្រែង នាំទំហំពាណិជ្ជកម្មទ្វេភាគីឡើងកម្រិត ២ពាន់លានដុល្លា នៅឆ្នាំ ២០២៤។

ឯខ្លួនវិញ នាយករដ្ឋមន្ត្រីនូវែលហ្សេឡង់ លោកស្រី Jacinda Ardern បានចាត់ទុកថា៖ វៀតណាម និងនូវែលសេឡង់នឹងជំរុញទំនាក់ទំនងលើវិស័យនយោបាយ ការទូត សន្តិសុខ ពាណិជ្ជកម្ម វិនិយោគ ការផ្លាស់ប្តូរប្រជាជន និងប្រជាជន។ល។ នូវែលសេឡង់ត្រៀមជាស្រេចជួយឧបត្ថម្ភវៀតណាមក្នុងការអភិវឌ្ឍកសិកម្មស្និទ្ធស្នាលជាមួយបរិស្ថាន ប្រយុទ្ធប្រឆាំងនឹងការប្រែប្រួលអាកាសធាតុ និងរួមចំណែកកាត់បន្ថយការបំភាយឧស្ម័ន។

បន្ទាប់ពីចូលរួមពិធីចុះហត្ថលេខាលើឯកសារសហប្រតិបត្តិការរវាងក្រសួង ស្ថាប័ននានានៃប្រទេសទាំងពីរ និងជួបជាមួយអ្នកសារព័ត៌មាន នាយករដ្ឋមន្ត្រីទាំងពីរបានប្រគល់ជូនគ្នាទៅវិញទៅមក នូវអាវរបស់ក្រុមបាល់ទាត់នារីនៃប្រទេសនីមួយៗ ដោយក្តីសង្ឃឹមថា ក្រុមបាល់ទាត់នារីវៀតណាម និងបាល់ទាត់នារីនូវែលសេឡង់ នឹងចូលរួមប្រកួតប្រជែងដោយជោគជ័យក្នុងព្រឹត្តិការណ៍ FIFA Women's World Cup ដែលនឹងធ្វើឡើងនៅប្រទេសអូស្ត្រាលី និងនូវែលសេឡង់ក្នុងឆ្នាំ ២០២៣។

នាយករដ្ឋមន្ត្រីទាំងពីរបានប្រគល់ជូនគ្នាទៅវិញទៅមក នូវអាវរបស់ក្រុមបាល់ទាត់នារីនៃប្រទេសនីមួយៗ ដោយក្តីសង្ឃឹមថា ក្រុមបាល់ទាត់នារីវៀតណាម និងបាល់ទាត់នារីនូវែលសេឡង់

នារសៀលថ្ងៃទី១៤ ខែវិច្ឆិកា នៅទីក្រុងហាណូយ អគ្គលេខាបក្សលោក Nguyen Phu Trong បានអញ្ជើញទទួលជួបជាមួយនាយករដ្ឋមន្ត្រីនូវែលសេឡង់លោកស្រី Jacinda Ardern ដែលកំពុងបំពេញទស្សនកិច្ចជាផ្លូវការនៅវៀតណាម ចាប់ពីថ្ងៃទី ១៤ ដល់ថ្ងៃទី ១៧ ខែវិច្ឆិកា ឆ្នាំ ២០២២ តបតាមការអញ្ជើញរបស់លោកនាយករដ្ឋមន្ត្រី Pham Minh Chinh។

ក្នុងជំនួបនេះ អគ្គលេខាបក្ស លោក Nguyen Phu Trong បានវាយតម្លៃខ្ពស់ចំពោះលទ្ធផលនៃកិច្ចពិភាក្សារវាងលោកស្រីនាយករដ្ឋមន្ត្រី Jacinda Ardern និងលោកនាយករដ្ឋមន្ត្រី Pham Minh Chinh ដើម្បីពង្រឹងទំនាក់ទំនងនយោបាយ កិច្ចសហប្រតិបត្តិការសេដ្ឋកិច្ច ជំរុញការជួបប្រាស្រ័យរវាងប្រជាជន ក៏ដូចជាចុះហត្ថលេខាលើកិច្ចព្រមព្រៀងសហប្រតិបត្តិការមួយចំនួន។ អគ្គលេខាបក្ស លោក Nguyen Phu Trong បានអះអាងថា វៀតណាមតែងតែយកចិត្តទុកដាក់ចំពោះទំនាក់ទំនងជាមួយនូវែលសេឡង់ក្នុងគោលនយោបាយការបរទេសរបស់ខ្លួន; ទន្ទឹមនឹងនោះ ក៏ថ្លែងអំណរគុណចំពោះកិច្ចសហប្រតិបត្តិការ និងការគាំទ្ររបស់នូវែលសេឡង់ក្នុងរយៈពេលជាច្រើនឆ្នាំ រួមទាំងការអនុវត្ត “កម្មវិធីសកម្មភាពវៀតណាម - នូវែលសេឡង់ ដំណាក់កាល ២០២១-២០២៤” និងការជួយឧបត្ថម្ភវៀតណាមក្នុងការបង្ការ និងទប់ស្កាត់ជំងឺរាតត្បាតកូវីដ ១៩។

ចំណែកឯលោកស្រីនាយករដ្ឋមន្ត្រី Jacinda Ardern បានវាយតម្លៃខ្ពស់ចំពោះភាពស្រដៀងគ្នានៃគោលនយោបាយការបរទេសរបស់ប្រទេសទាំងពីរ ដែលស្រឡាញ់សន្តិភាព ឯករាជ្យ និងពឹងផ្អែកលើខ្លួនឯង និងមានគោលជំហរដោះស្រាយជម្លោះ និងការខ្វែងគំនិតគ្នាដោយសន្តិវិធី។

ថ្នាក់ដឹកនាំទាំងពីរក៏បានផ្លាស់ប្តូរយោបល់លើបញ្ហាអន្តរជាតិ និងតំបន់ដែលមានការយកចិត្តទុកដាក់គ្នាទៅវិញទៅមក ដោយសង្កត់ធ្ងន់លើការពង្រឹងការសម្របសម្រួលលើបញ្ហាអន្តរជាតិ និងនៅវេទិកាពហុភាគីសម្រាប់សន្តិភាព កិច្ចសហប្រតិបត្តិការក្នុងតំបន់ និងពិភពលោក។

អគ្គលេខាបក្ស លោក Nguyen Phu Trong និងនាយករដ្ឋមន្ត្រីនូវែលសេឡង់លោកស្រី Jacinda Ardern (រូបថត៖ VOV)

នារសៀលថ្ងៃដរដែលនៅទីក្រុងហាណូយ ក្នុងជំនួបទទួលជួបជាមួយនាយករដ្ឋមន្ត្រីនូវែលហ្សេឡង់លោកស្រី Jacinda Ardern ប្រធានរដ្ឋវៀតណាម លោក Nguyen Xuan Phuc បានស្នើឲ្យប្រទេសទាំងពីរបង្កើនកិច្ចសហប្រតិបត្តិការលើវិស័យថ្មីៗដូចជា ផ្លាស់ប្តូរថាមពល កំណើនបៃតង និងបើកផ្លូវហោះហើរតាមរដូវកាល និងកិច្ចសហប្រតិបត្តិការរវាងបណ្តាសាកលវិទ្យាល័យ។

ប្រធានរដ្ឋ លោក Nguyen Xuan Phuc ទទួលជួបនាយករដ្ឋមន្ត្រីនូវែលសេឡង់ លោកស្រី Jacinda Ardern (រូបថត៖ Thong Nhat/TTXVN)

ចំណែកលោកស្រី នាយករដ្ឋមន្ត្រី Jacinda Ardern បានមានប្រសាសន៍ថា ក្នុងឆ្នាំ ២០១៨ បន្ទាប់ពីបង្កើតភាពជាដៃគូយុទ្ធសាស្ត្រ នូវែលហ្សេឡង់បានចាប់ផ្តើមសហការជាមួយវៀតណាមលើការស្រាវជ្រាវអំពីពូជផ្លែស្រកានាគ។ នាពេលខាងមុខ បន្ទាប់ពីលទ្ធផលនេះត្រូវបានធ្វើពាណិជ្ជកម្ម ផ្លែស្រកានាគវៀតណាមនឹងមានឱកាសជោគជ័យដូចផ្លែគីវីអូស្ត្រាលីដែរ។ លោកស្រីនាយករដ្ឋមន្ត្រី Jacinda Ardern បានយល់ព្រមគាំទ្រវៀតណាមក្នុងការពង្រឹងទំនាក់ទំនងជាមួយប្រទេសកោះនៅប៉ាស៊ីហ្វិកខាងត្បូង ជាពិសេសក្នុងកិច្ចសហប្រតិបត្តិការដើម្បីឆ្លើយតបទៅនឹងការប្រែប្រួលអាកាសធាតុតាមសំណើរបស់លោកប្រធានរដ្ឋ Nguyen Xuan Phuc៕