បង្កើនកិច្ចសហប្រតិបត្តិការរវាងរដ្ឋសភាវៀតណាម ឡាវ និងកម្ពុជា បន្ថែមទៀត

លំហាត់ហ្វឹកហ្វឺនសង្គ្រោះគ្រោះមហន្តរាយលើកដំបូងរវាងកងទ័ពនៃប្រទេសទាំងបី គឺវៀតណាម ឡាវ និងកម្ពុជា

វៀតណាម ឡាវ និងកម្ពុជា ជំរុញកិច្ចសហប្រតិបត្តិការលើវិស័យការពារជាតិ

បង្កើនកិច្ចសហប្រតិបត្តិការរវាងរដ្ឋសភាវៀតណាម ឡាវ និងកម្ពុជា បន្ថែមទៀត

នាថ្ងៃទី១៨ ខែតុលា នៅខេត្ត Lao Cai គណៈកម្មការកិច្ចការបរទេសនៃរដ្ឋសភាវៀតណាម គណៈកម្មការកិច្ចការបរទេសនៃរដ្ឋសភាឡាវ និងគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភាកម្ពុជា បានរៀបំកិច្ចប្រជុំពិគ្រោះយោបល់រវាងស្ថាប័នទាំងបី។

លោក Vu Hai Ha ប្រធានគណៈកម្មការកិច្ចការបរទេសនៃរដ្ឋសភាវៀតណាម; លោក Sanya Praseuth ប្រធានគណៈកម្មការកិច្ចការបរទេសនៃរដ្ឋសភាឡាវ; លោក សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការនិងព័ត៌មាននៃរដ្ឋសភាកម្ពុជាអញ្ជើញជាសហប្រធាននៃកិច្ចប្រជុំពិគ្រោះយោបល់នេះ។

កិច្ចប្រជុំពិគ្រោះយោបល់គឺជាសកម្មភាពសហប្រតិបត្តិការលើកដំបូងរវាងគណៈកម្មការកិច្ចការបរទេសទាំងបីនៃរដ្ឋសភាកម្ពុជា ឡាវ និងវៀតណាមដើម្បីត្រៀមរៀបចំសម្រាប់កិច្ចប្រជុំថ្នាក់ប្រធានរដ្ឋសភារវាងប្រទេសទាំងបី កម្ពុជា ឡាវ និងវៀតណាម ដែលគ្រោងនឹងប្រព្រឹត្តទៅនៅឆ្នាំ២០២៣។

លោក Vu Hai Ha បានលើកឡើងថា គោលបំណងសំខាន់នៃកិច្ចប្រជុំគឺអនុវត្តគោលការណ៍ដែលបានព្រមព្រៀង ដោយថ្នាក់ដឹកនាំរដ្ឋសភានៃប្រទេសទាំងបី រៀបចំសេចក្តីព្រាងស្ដីពីកិច្ចប្រជុំថ្នាក់ប្រធានរដ្ឋសភាកម្ពុជា ឡាវ និងវៀតណាម ពិភាក្សាការងារចាំបាច់ដើម្បីត្រៀមរៀបចំកិច្ចប្រជុំថ្នាក់ប្រធានរដ្ឋសភាលើកដំបូងរវាងប្រទេសទាំងបី និងបញ្ហាផ្សេងៗទៀត។

លោក Vu Hai Ha បានវាយតំលៃខ្ពស់ចំពោះកិច្ចសហប្រតិបត្តិការ នៃគណៈកម្មការទាំងបី។ លោក Vu Hai Ha បានសម្តែងការជឿជាក់ថា ការរៀបចំប្រកបដោយជោគជ័យនៃកិច្ចប្រជុំថ្នាក់ប្រធានរដ្ឋសភានៃប្រទេសទាំងបី និងការអនុវត្តប្រកបដោយប្រសិទ្ធភាពនៃកិច្ចប្រជុំកំពូលនេះនឹងរួមចំណែកលើកកម្ពស់ទំនាក់ទំនងមិត្តភាពជាប្រពៃណីរវាងប្រទេសទាំងបី និងរដ្ឋសភានៃប្រទេសទាំងបីឱ្យកាន់តែមានប្រសិទ្ធភាព និងស៊ីជម្រៅ ដើម្បីផលប្រយោជន៍របស់ប្រជាជនកម្ពុជា-ឡាវ-វៀតណាម ដើម្បីសន្តិភាព ស្ថិរភាព ការអភិវឌ្ឍ និងវិបុលភាពក្នុងតំបន់។

លោក Sanya Praseuth ប្រធានគណៈកម្មការកិច្ចការបរទេសនៃរដ្ឋសភាឡាវ បានមានប្រសាសន៍ថា កិច្ចប្រជុំពិគ្រោះយោបល់នេះគឺជាជំហានដ៏សំខាន់ រួមចំណែកក្នុងការជំរុញកិច្ចសហប្រតិបត្តិការរវាងរដ្ឋសភានៃប្រទេសទាំងបី ធ្វើឱ្យកាន់តែប្រសើរថែមទៀតនូវទំនាក់ទំនងមិត្តភាពជាប្រពៃណីដ៏ល្អរវាងប្រទេសទាំងបី កម្ពុជា-ឡាវ-វៀតណាម; ព្រមទាំងជំរុញការឃ្លាំមើលការអនុវត្តកិច្ចព្រមព្រៀងសហប្រតិបត្តិការនៅក្នុងតំបន់អភិវឌ្ឍន៍ត្រីកោណកម្ពុជា-ឡាវ-វៀតណាម ផ្លាស់ប្តូរបទពិសោធន៍ជាក់ស្តែងលើតួនាទី និងភារកិច្ចនីតិបញ្ញត្តិនៃប្រទេសនិមួយៗ។

នៅចុងបញ្ចប់នៃកិច្ចប្រជុំ ប្រធានគណៈកម្មាធិការកិច្ចការបរទេសទាំងបីបានឯកភាពគ្នាបន្តសហការយ៉ាងជិតស្និទ្ធដើម្បីបញ្ចប់សេចក្តីព្រាងស្ដីពីការត្រៀមរៀបចំកិច្ចប្រជុំលើកដំបូងដែលប្រធានរដ្ឋសភានៃប្រទេសទាំងបីធ្វើជាសហប្រធាន; ធានាបាននូវខ្លឹមសារសហប្រតិបត្ដិការរវាងប្រទេសទាំងបី និងរដ្ឋសភាទាំងបី ហើយនឹងដាក់ជូនប្រធានរដ្ឋសភានៃប្រទេសទាំងបីអនុម័តឲ្យបានឆាប់ៗ៕

យោងតាមកាសែតកងទ័ពប្រជាជន