លោកឯកអគ្គរដ្ឋទូត Abdelhamid Boubazine៖ នឹងខិតខំប្រឹងប្រែងជំរុញទំនាក់ទំនងមិត្តភាពប្រពៃណី និងកិច្ចសហប្រតិបត្តិការរវាងអាល់ហ្សេរី និងវៀតណាម

ប្រធាន VUFO ទទួលប្រធានរដ្ឋសភាម៉ូសំប៊ិក

VUFO និងស្ថានទូតកាហ្សាក់ស្ថានប្រចាំនៅវៀតណាមបន្តជំរុញទំនាក់ទំនងការទូតប្រជាជន

លោកស្រីឯកអគ្គរដ្ឋទូត Nguyen Phuong Nga - ប្រធានសម្ព័ន្ធអង្គការមិត្តភាពវៀតណាមបានស្វាគមន៍ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាធិបតេយ្យប្រជាមានិតអាល់ហ្សេរី Abdelhamid Boubazine។ (រូបថត៖ Thanh Luan)

លោកឯកអគ្គរដ្ឋទូត Abdelhamid Boubazine បានថ្លែងអំណរគុណចំពោះរដ្ឋាភិបាល និងប្រជាជន វៀតណាមដែលតែងតែកៀកស្មាជាមួយប្រជាជនអាល់ហ្សេរីក្នុងការតស៊ូនិង​ដណ្តើមឯករាជ្យជាតិ។

វៀតណាមគឺជាប្រទេសមួយក្នុងចំណោមប្រទេសដំបូងគេដែលទទួលស្គាល់រដ្ឋាភិបាលបណ្តោះអាសន្ននៃសាធារណរដ្ឋអាល់ហ្សេរីនៅថ្ងៃទី ២៦ ខែកញ្ញាឆ្នាំ ១៩៥៨ ហើយភ្លាមៗ បន្ទាប់ពីអាល់ហ្សេរីទទួលបានឯករាជ្យនៅឆ្នាំ ១៩៦២ វៀតណាមបានបើកស្ថានទូតនៅរដ្ឋធានីអាល់ហ្សេរី។

លោក Abdelhamid Boubazine មានកិត្តិយស និងមោទនភាពយ៉ាងខ្លាំងដែលបានទទួលតំណែងជាឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាធិបតេយ្យប្រជាមានិតអាល់ហ្សេរីប្រចាំនៅវៀតណាម។ លោកឯកអគ្គរដ្ឋទូតបានអះអាងថា ក្នុងអាណត្តិនេះ លោកនឹងខិតខំប្រឹងប្រែងជំរុញនិងពង្រឹងទំនាក់ទំនងមិត្តភាព និងកិច្ចសហប្រតិបត្តិការជាប្រពៃណីរវាងអាល់ហ្សេរី និងវៀតណាម។ លោកឯកអគ្គរដ្ឋទូតក៏សង្ឃឹមថា នឹងទទួលបានជំនួយ និងការសម្របសម្រួលរបស់សម្ព័ន្ធអង្គការមិត្តភាពវៀតណាម និងសមាគមមិត្តភាពវៀតណាម-អាល់ហ្សេរី ក្នុងការអនុវត្តសកម្មភាពមិត្តភាព និងបង្កើនការយល់ដឹង។

លោកស្រីប្រធាន VUFO Nguyen Phuong Nga បានស្វាគមន៍ចំពោះ លោក ឯកអគ្គរដ្ឋទូត Abdelhamid Boubazine ហើយបានជូនពរលោកបំពេញ​បេសកកម្មនៅប្រទេសវៀតណាមប្រកបដោយជោគជ័យ បន្តជំរុញកិច្ចសហប្រតិបត្តិការរវាងវៀតណាម និងអាល់ហ្សេរី ឱ្យកាន់តែរីកចម្រើន។

លោកស្រីឯកអគ្គរដ្ឋទូត Nguyen Phuong Nga បានថ្លែងអំណរគុណចំពោះជំនួយ និងការគាំទ្ររបស់បងប្អូនជនរួមជាតិអាល់ហ្សេរីនាពេលកន្លងមក ក៏ដូចជា ជានិច្ចកាលជួយឧបត្ថម្ភវៀតណាមនៅវេទិកាពហុភាគី និងអន្តរជាតិនាពេលបច្ចុប្បន្ន។ វៀតណាមយកចិត្តទុកដាក់យ៉ាងខ្លាំងចំពោះការអភិវឌ្ឍន៍ទំនាក់ទំនងជាមួយអាល់ហ្សេរី ដែលជាប្រទេសធំមួយមានកិត្យានុភាព និងតួនាទីសំខាន់ក្នុងតំបន់។

លោកស្រីឯកអគ្គរដ្ឋទូត Nguyen Phuong Nga បានអះអាងថា VUFO នឹងសម្របសម្រួលយ៉ាងសកម្មជាមួយស្ថានទូតអាល់ហ្សេរីប្រចាំនៅវៀតណាម ដើម្បីរៀបចំសកម្មភាពជួបប្រាស្រ័យ​រវាងប្រជាជននិងប្រជាជន ដូចជាសិក្ខាសាលា កិច្ចពិភាក្សា ការផ្លាស់ប្តូរវប្បធម៌ និងសិល្បៈ និងរំលឹកដល់ព្រឹត្តិការណ៍សំខាន់ៗ នៃប្រទេសទាំងពីរ ... ជាពិសេសនៅឆ្នាំ ២០២២ នៅពេលដែលប្រទេសទាំងពីរនឹងប្រារព្ធខួបលើកទី ៦០ ឆ្នាំនៃការបង្កើតទំនាក់ទំនងការទូត សំដៅបង្កើនការយល់ដឹង និងជំរុញកិច្ចសហប្រតិបត្តិការរវាងប្រជាជនទាំងពីរ៕

ឌីណា

thoidai.com.vn