រដ្ឋសភានៅថ្ងៃនេះបានផ្តល់សច្ចាប័ន ៨៤ ភាគរយនៃការងារបោះបង្គោលព្រំដែនដែលបានបញ្ចប់រវាងកម្ពុជា និងវៀតណាម។
រដ្ឋសភាផ្តល់សច្ចាប័នលើការងារបោះបង្គោលព្រំដែនរវាងកម្ពុជា និងវៀតណាម
សមាជិកសភាចំនួន ១១៦ រូបបានអនុម័តសេចក្តីព្រាងច្បាប់ស្តីពីពិធីសារខណ្ឌសីមា និងបោះបង្គោលព្រំដែនគោករវាងកម្ពុជា និងវៀតណាមក្នុងសម័យប្រជុំពេញអង្គថ្ងៃនេះ។
លោក វ៉ា គឹមហុង ប្រធានគណៈកម្មាធិការចម្រុះកិច្ចការព្រំដែនកម្ពុជាបាននិយាយនៅក្នុងអង្គប្រជុំថាសន្ធិសញ្ញាបំពេញបន្ថែមកម្ពុជា – វៀតណាមឆ្នាំ ២០០៥ សន្ធិសញ្ញាកំណត់ព្រំដែនរដ្ឋឆ្នាំ ១៩៨៥ បានអនុញ្ញាតឱ្យភាគីទាំងពីរបង្កើតផែនទីព្រំដែនរដ្ឋ និងពិធីសារខណ្ឌសីមា និងបោះបង្គោលព្រំដែន ដើម្បីកំណត់ព្រំដែន និងទីតាំងបង្គោលនៅតាមព្រំដែន។
លោក គឹមហុង បានបន្តថា យោងតាមសន្ធិសញ្ញាបំពេញបន្ថែមឆ្នាំ ២០០៥ ប្រទេសកម្ពុជា និង
វៀតណាមបានបញ្ចប់ពិធីសារទទួលយកការងារ ៨៤ ភាគរយនៃខ្សែព្រំដែនរួម និងផែនទីភូមិសាស្ត្រព្រំដែនចំនួន ៩២ ដែលមានទំហំត្រឹម ១ : ២៥ ០០០ ហើយត្រូវបានចុះហត្ថលេខាកាលពីឆ្នាំមុននៅទីក្រុងហាណូយ។
លោកនិយាយថា៖ «ពិធីសារត្រូវបានធ្វើឡើងដើម្បីកត់ត្រាលទ្ធផលដែលភាគីទាំងពីរទទួលបានលើការដាំបង្គោលព្រំដែននិងការបោះបង្គោលព្រំដែន»។
លោកបានបន្ថែមថា៖ «ពិធីសារនេះក៏ជាផ្នែកមួយនៃសមាសធាតុដែលមិនអាចបំបែកចេញពីសន្ធិសញ្ញាព្រំដែនរដ្ឋ ១៩៨៥ សន្ធិសញ្ញាបំពេញបន្ថែមឆ្នាំ ២០០៥ និងសន្ធិសញ្ញាបំពេញបន្ថែមឆ្នាំ ២០១៩»។
តំណាងរាស្ត្រនៅក្នុងកិច្ចប្រជុំពេញអង្គរដ្ឋសភាកាលពីម្សិលមិញ។ (រូប Heng Samrin Page)
លោក ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងសហការីជាតំណាងរាជរដ្ឋាភិបាលជាអ្នកការពារសេចក្ដីព្រាងច្បាប់នេះ។ សេចក្ដីប្រកាសដដែលបញ្ជាក់ថា៖ «រដ្ឋសភាបានអនុម័តយល់ព្រមលើសេចក្ដីព្រាងច្បាប់ទាំងមូលមានចំនួន ១១៦ សំឡេង»។
លោក ហេង សំរិន សរសេរលើហ្វេសប៊ុករបស់លោកកាលពីម្សិលមិញថា សេចក្តីព្រាងច្បាប់ដែលរដ្ឋសភាលើកយកមកពិភាក្សា អនុម័តនាពេលនេះ នឹងក្លាយជាច្បាប់សម្រាប់រាជរដ្ឋាភិបាលយកទៅអនុវត្តក្នុងការដឹកនាំប្រទេសជាតិ ទាំងកិច្ចការក្នុងប្រទេស តំបន់ និងពិភពលោក។
លោកសរសេរថា៖ «សេចក្ដីព្រាងច្បាប់ដែលរដ្ឋសភាលើកយកមកពិភាក្សាអនុម័តនេះ សំដៅបង្កើនការអភិវឌ្ឍសង្គមជាតិ និងកិច្ចសហប្រតិបត្តិការទ្វេភាគី និងពហុភាគីជាមួយប្រទេសជិតខាងប្រទេសជាមិត្តក្នុងតំបន់ និងសកលលោកលើការងារកិច្ចការព្រំដែន សេដ្ឋកិច្ច ពាណិជ្ជកម្ម និងសន្តិសុខ ជាដើម»។
ចំណែកសេចក្ដីព្រាងច្បាប់ចំនួន ៥ ទៀតដែលរដ្ឋសភាបានអនុម័តទាំងស្រុងដែរនោះរួមមាន សេចក្តីព្រាងច្បាប់ស្តីពីការអនុម័តយល់ព្រមលើសន្ធិសញ្ញាស្តីពី ការហាមឃាត់អាវុធនុយក្លេអ៊ែរ។ ការពិភាក្សា និងអនុម័តសេចក្តីព្រាងច្បាប់ស្តីពីការអនុម័តយល់ព្រមលើពិធីសារទី ១ ធ្វើវិសោធនកម្មកិច្ចព្រមព្រៀងស្តីពីភាពជាដៃគូសេដ្ឋកិច្ចទូលំទូលាយ រវាងរដ្ឋជាសមាជិក សមាគមប្រជាជាតិអាស៊ីអាគ្នេយ៍ និងជប៉ុន។
សេចក្តីព្រាងច្បាប់ស្តីពីការអនុម័តយល់ព្រមលើពិធីសារ អនុវត្តកញ្ចប់សន្យាទី ១០ ក្រោមកិច្ចព្រមព្រៀងក្របខ័ណ្ឌអាស៊ានស្តីពីសេវាកម្ម។ សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងស្តីពីការវិនិយោគក្រោមកិច្ចព្រមព្រៀងក្របខ័ណ្ឌស្តីពីសហប្រតិបត្តិការសេដ្ឋកិច្ចទូលំទូលាយ រវាងសមាគមប្រជាជាតិអាស៊ីអាគ្នេយ៍ និងសាធារណរដ្ឋឥណ្ឌា និងសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងស្តីពីការវិនិយោគរវាងបណ្តារដ្ឋសមាជិកនៃសមាគមប្រជាជាតិអាស៊ីអាគ្នេយ៍ និងរដ្ឋាភិបាលនៃតំបន់រដ្ឋបាលពិសេសហុងកុងនៃសាធារណរដ្ឋប្រជាមានិតចិន។
（សរុបដោយវិច្ឆិកា）
មតិពីមិត្តអ្នកអាន