កងទ័ពនៃវៀតណាមនិងកម្ពុជាមានបណ្តាសកម្មភាពដើម្បីត្រៀមរៀបចំធ្វើលំហាត់ហ្វឹកហ្វឹនសង្គ្រោះគ្រោះធម្មជាតិរួមនៅខេត្តស្វាយរៀង
ទិដ្ឋភាពនៃកិច្ចប្រជុំនៅបញ្ជាការដ្ឋានយោធភូមិភាគទី ៧ កងទ័ពប្រជាជនវៀតណាម។ (ប្រភព៖ qdnd)
នាថ្ងៃទី ១៣ ខែធ្នូ បញ្ជាការដ្ឋានយោធភូមិភាគទី ៧ កងទ័ពប្រជាជនវៀតណាមបានរៀបចំកិច្ចប្រជុំដើម្បីផ្តល់ព័ត៌មានដល់សារព័ត៌មានស្តីពីការរៀបចំសមយុទ្ធជួយសង្គ្រោះគ្រោះមហន្ដរាយធម្មជាតិនៅតាមតំបន់ព្រំដែនគោកដែលរៀបចំដោយក្រសួងការពារប្រទេសវៀតណាមនិងក្រសួងការពារជាតិកម្ពុជាឆ្នាំ ២០១៩។
នៅថ្ងៃទី១៦ ខែធ្នូ ឆ្នាំ២០១៩ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និងជាប្រធានសម្របសម្រួល ដឹកនាំលំហាត់សមយុទ្ធ បានដឹកនាំក្រុមការជំនាញចុះ ត្រួតពិនិត្យទីតាំងរៀបចំធ្វើលំហាត់ហ្វឹកហ្វឺន នៅភូមិដូនទៃ ឃុំទួលស្តី ស្រុកចន្រ្ទា ខេត្តស្វាយរៀង។
ការធ្វើលំហាត់យោធានេះ គឺក្នុងគោលបំណងចែករំលែកបទពិសោធន៍រួមគ្នា និងផ្តល់នូវផលប្រយោជន៍ដល់ប្រជាជននៃប្រទេសទាំងពីរ នៅពេលដែលមានគ្រោះមហន្តរាយកើតឡើង ដូចជា គ្រោះធម្មជាតិ ទឹកជំនន់ ភ្លើងឆេះព្រៃ ឬគ្រោះធម្មជាតិផ្សេងៗ ដែលកើតឡើងជាយថាហេតុ ព្រមជាមួយនឹងការចូលរួមចំណែកលើកកម្ពស់កិច្ចសហប្រតិបត្តិការ និងការអភិវឌ្ឍនៅតាមតំបន់ព្រំដែនឱ្យមានការរីកចម្រើន។
នាយឧត្តមសេនីយ៍ ឥត សារ៉ាត់ ដឹកនាំក្រុមការងារចុះត្រួតពិនិត្យទីតាំងធ្វើលំហាត់ហ្វឹកហ្វឺនសង្រ្គោះគ្រោះធម្មជាតិរួមគ្នារវាងកម្ពុជា-វៀតណាម នៅខេត្តស្វាយរៀង។ (ប្រភព៖ FN)
រយៈពេលនៃការធ្វើលំហាត់ហ្វឹកហ្វឺន មានរយៈពេល៩ថ្ងៃ គិតចាប់ពីថ្ងៃទី១០ ដល់១៨ ខែធ្នូ ឆ្នាំ២០១៩។ កម្លាំងចូលរួម ខាងភាគីវៀតណាម ២៦៥នាក់ ខាងភាគីកម្ពុជា ៤៧១នាក់ រួមនឹងកម្លាំងចូលរួម ១,១៤៣នាក់។
ខ្លឹមសារនៃការអនុវត្តធ្វើលំហាត់ចែកចេញជា២ ដំណាក់កាល គឺលំហាត់លើទីលាន និងការងារមនុស្សធម៌។
* លំហាត់លើទីលាន មានស៊ើបការណ៍ ការប្រមូលផ្ដុំជនរងគ្រោះទៅកាន់កន្លែងសុវត្ថិភាព ការលាងសម្អាត ការបន្សាបជាតិពុល ការព្យាបាលបឋម និងការបញ្ជូនទៅមន្ទីរពេទ្យដើម្បីសង្រ្គោះបន្ទាន់។
* ការងារមនុស្សធម៌ មានការជួយព្យាបាល ការផ្សព្វផ្សាយវិធានការទប់ស្កាត់រោគរាតត្បាត និងការផ្តល់អំណោយជូនប្រជាជន។
ការរៀបចំសមយុទ្ធរវាងកងទ័ពកម្ពុជា និងកងទ័ពវៀតណាម ដែលធ្វើឡើងនៅខេត្តស្វាយរៀង នាថ្ងៃទី១៨ ខែធ្នូ ឆ្នាំ២០១៩ ខាងមុខនេះ គឺជាគំនិតផ្តួចផ្តើមរបស់សម្តេចតេជោ ហ៊ុន សែន ផ្ទាល់ ដែលធ្វើឡើងក្នុងគោលបំណងត្រៀមសហការជួយប្រជាពលរដ្ឋនៅតាមព្រំដែន ក្នុងករណីមានគ្រោះមហន្តរាយផ្សេងៗ។ តាមរយៈការធ្វើសមយុទ្ធនេះ ក៏រួមចំណែកពង្រឹងនិងពង្រីកទំនាក់ទំនងមិត្ដភាពជាប្រពៃណីសាមគ្គីភាពកិច្ចសហប្រតិបត្តិការនិងជួយគ្នាទៅវិញទៅមករវាងកងទ័ពនិងប្រជាជននៃប្រទេសវៀតណាមនិងកម្ពុជាផងដែរ៕
（សរុបដោយវិច្ឆិកា）
មតិពីមិត្តអ្នកអាន