លោក ថោង រដ្ឋសក្តិ អគ្គនាយកនៃក្រសួងទេសចរណ៍ បានដឹកនាំក្រុមការងារចូលរួមកិច្ចប្រជុំក្រុមការងារទេសចរណ៍ភាគខាងត្បូងលើកទី៦ នៅក្រុងកាន់ធើ ប្រទេសវៀតណាម នៅថ្ងៃទី១៤ សីហា ដោយមានការចូលរួមពីប្រទេសទាំង ០៤ (កម្ពុជា-មីយាន់ម៉ា-ថៃ-វៀតណាម)។
តំណាងនានាបានថតរូបទុកអនុស្សាវរីយ៍ (រូបថត៖ vayofm.com)
ស្របតាមកាលានុវត្តភាពថ្មីៗនៃតំបន់ និងអន្តរជាតិ សភាពការណ៍រីកចម្រើននៃវិស័យទេសចរណ៍ ការរៀបចំប្រែក្លាយតំបន់សក្តានុពលទេសចរណ៍ភាគខាងត្បូង គឺជាកត្តាយុទ្ធសាស្ត្រដ៏សំខាន់មួយក្នុងការជំរុញកិច្ចអភិវឌ្ឍក្នុងក្របខណ្ឌសេដ្ឋកិច្ច-សង្គម ទាំងមូល តាមរយៈវិស័យទេសចរណ៍ ដោយបង្កើតឡើងនូវផលិតផលទេសចរណ៍ថ្មី ហើយផ្តល់ឱកាសឲ្យទេសចរ និងអ្នកវិនិយោគមានសិទ្ធិចូល-ចេញច្រើនដង ការទស្សនា ការស្នាក់នៅ និងការចូលរួមការវិនិយោគលើវិស័យទេសចរណ៍នៅកម្ពុជា។
តំណាងនានាបានថតរូបទុកអនុស្សាវរីយ៍ (រូបថត៖ vayofm.com)
នៅក្នុងកិច្ចប្រជុំបានពិភាក្សាលើចំណុចមួយចំនួន ដូចជា ការអភិវឌ្ឍផលិតផល និងវិនិយោគលើវិស័យទេសចរណ៍។ ការសិក្សាទីផ្សារ និងផ្សព្វផ្សាយទេសចរណ៍រួមគ្នា។ ការអភិវឌ្ឍន៍ធនធានមនុស្ស។ ការសម្រួលការធ្វើដំណើរដល់ភ្ញៀវទេសចរ។ ការតភ្ជាប់នាវាទេសចរណ៍តំបន់សមុទ្រ និងទន្លេមេគង្គ។ការជម្រុញឲ្យប្រទេសមីយ៉ាន់ម៉ា តភ្ជាប់នាវាទេសចរណ៍សមុទ្រក្នុងតំបន់ភាគខាងត្បូង។ការតភា្ជប់ទេសចរណ៍បេតិកភណ្ឌភាគខាងត្បូង។ ការជម្រុញរៀបចំខ្សែទស្សនកិច្ចបែប Caravan Tour និងទេសចរបើកបរដោយខ្លួនឯង Self-Driving Tour និងការតភ្ជាប់ការហោះហើរត្រង់នៅតំបន់ភាគខាងត្បូង។
គួរបញ្ជាក់ថា កិច្ចប្រជុំនេះរៀបចំឡើងដើម្បីផ្សព្វផ្សាយផលិតផល នៅតាមច្រករបៀងទេសចរណ៍ និងពិនិត្យការជំរុញឲ្យផ្នែកឯកជន រៀបចំកញ្ចប់ទស្សនកិច្ចនៃប្រទេសទាំងបួន ក្នុងការរៀបចំកញ្ចប់ទស្សនកិច្ចឲ្យកាន់តែមាន ប្រសិទ្ធភាពខ្ពស់ រួមចំណែកការអភិវឌ្ឍ ទេសចរណ៍ប្រកបដោយចិរភាព និងការទទួលខុសត្រូវ ជាពិសេសជំរុញកិច្ចអភិវឌ្ឍន៍សេដ្ឋកិច្ច សង្គម ការថែរក្សា ការការពារ និងការអភិរក្សសម្បត្តិវប្បធម៌ ប្រវត្តិសាស្ត្រ និងធនធានធម្មជាតិ បង្កើតឱកាសការងារ កាត់បន្ថយភាពក្រីក្ររបស់ប្រជាពលរដ្ឋ លើកស្ទួយកិត្យានុភាពជាតិលើឆាកអន្តរជាតិ និងកិច្ចសហប្រតិបត្តិការទេសចរណ៍ក្នុងតំបន់៕
（ប្រភព៖ vayofm.com សរុបដោយ ហេង វុធ្ធី）
មតិពីមិត្តអ្នកអាន