យុគសម័យ - ដោយមានខ្សែបន្ទាត់ព្រំដែនប្រវែងជិត ៣៦៩ គីឡូម៉ែត្រ ជាប់ជាមួយខេត្តចំនួន ៣ របស់ប្រទេសកម្ពុជា ខេត្ត Tay Ninh កំពុងផ្តោតសំខាន់លើការកែលម្អផែនការមេឱ្យកាន់តែពេញលេញ ការលើកកម្ពស់ហេដ្ឋារចនាសម្ព័ន្ធតំបន់សេដ្ឋកិច្ចច្រកទ្វារព្រំដែន និងការពង្រីកការតភ្ជាប់ផ្លូវគមនាគមន៍។ ទាំងនេះគឺជាភារកិច្ចស្នូល ក្នុងគោលបំណងអភិវឌ្ឍសេដ្ឋកិច្ចពាណិជ្ជកម្មតាមព្រំដែន ទាក់ទាញការវិនិយោគ និងពង្រីកកិច្ចសហប្រតិបត្តិការពាណិជ្ជកម្មជាមួយប្រទេសកម្ពុជា ព្រមទាំងបណ្តាប្រទេសនៅក្នុងតំបន់។
| ខេត្ត Cao Bang អភិវឌ្ឍទេសចរណ៍តំបន់ព្រំដែនផ្សារភ្ជាប់នឹងអត្តសញ្ញាណវប្បធម៌ កងទ័ពការពារព្រំដែនខេត្ត Tay Ninh ប្រគល់អាហារូបករណ៍ជូនសិស្សានុសិស្សកម្ពុជា |
![]() |
| ច្រកទ្វារព្រំដែន Moc Bai ខេត្ត Tay Ninh ដើរតួនាទីយ៉ាងសំខាន់នៅក្នុងការផ្លាស់ប្តូរពាណិជ្ជកម្ម និងវិស័យទេសចរណ៍។ |
ស្ថិតនៅលើអ័ក្សច្រករបៀងសេដ្ឋកិច្ចបូព៌ា-បស្ចិម ខេត្ត Tay Ninh មានទីតាំងជាច្រកទ្វារតភ្ជាប់តំបន់សេដ្ឋកិច្ចភាគខាងត្បូងជាមួយប្រទេសកម្ពុជា។ បន្ទាប់ពីការច្របាច់បញ្ចូលគ្នា ខេត្តនេះមានខ្សែបន្ទាត់ព្រំដែនប្រវែងប្រមាណ ៣៦៨,៦៩៥ គីឡូម៉ែត្រ ជាប់ជាមួយខេត្តចំនួន ៣ របស់ប្រទេសកម្ពុជា ដែលមានឃុំព្រំដែនចំនួន ១៩ និងប្រព័ន្ធច្រកទ្វារព្រំដែនដ៏សម្បូរបែប។
មូលដ្ឋានកំពុងផ្តោតសំខាន់លើការទាញយកផលប្រយោជន៍ពីឧត្តមភាពភូមិសាស្ត្រសេដ្ឋកិច្ច ការកែលម្អផែនការមេនៃតំបន់សេដ្ឋកិច្ចច្រកទ្វារព្រំដែនឱ្យកាន់តែពេញលេញ ការវិនិយោគលើហេដ្ឋារចនាសម្ព័ន្ធគមនាគមន៍ និងការរៀបចំលំហអភិវឌ្ឍន៍ឡើងវិញ ដើម្បីជំរុញការផ្លាស់ប្តូរពាណិជ្ជកម្ម បង្កើនការតភ្ជាប់តំបន់ និងកិច្ចសហប្រតិបត្តិការអន្តរជាតិ។
ការកែលម្អហេដ្ឋារចនាសម្ព័ន្ធ និងការពង្រីកការតភ្ជាប់ច្រកទ្វារព្រំដែន
យោងតាមគណៈកម្មាធិការប្រជាជនខេត្ត Tay Ninh ប្រព័ន្ធច្រកទ្វារព្រំដែននៅលើភូមិសាស្ត្រខេត្តរួមមាន ច្រកទ្វារព្រំដែនអន្តរជាតិចំនួន ៤ គឺ Moc Bai, Xa Mat, Tan Nam និង Binh Hiep; ច្រកទ្វារព្រំដែនទ្វេភាគី (ច្រកទ្វារសំខាន់) ចំនួន ៤ រួមមាន My Quy Tay, Phuoc Tan, Chang Riec និង Ka Tum; រួមជាមួយនឹងច្រកទ្វារព្រំដែនតំបន់ចំនួន ១៣ និងច្រករបៀង ផ្លូវលំជាច្រើនទៀត។
បច្ចុប្បន្ន ខេត្តមានតំបន់សេដ្ឋកិច្ចច្រកទ្វារព្រំដែនចំនួន ៣ រួមមាន Long An, Moc Bai, Xa Mat និងកំពង់ផែអន្តរជាតិ Long An ចំនួន ១។ ទាំងនេះគឺជាលក្ខខណ្ឌដ៏សំខាន់ដើម្បីអភិវឌ្ឍពាណិជ្ជកម្មតាមព្រំដែន សេវាកម្មភស្តុភារកម្ម និងការតភ្ជាប់សេដ្ឋកិច្ចជាមួយប្រទេសកម្ពុជា។
ទន្ទឹមនឹងសក្តានុពលអភិវឌ្ឍន៍សេដ្ឋកិច្ច ស្ថានភាពសន្តិសុខនយោបាយ សណ្តាប់ធ្នាប់ និងសុវត្ថិភាពសង្គមនៅតាមបណ្តាឃុំព្រំដែន មានស្ថិរភាពជាមូលដ្ឋាន។ យោងតាមគណៈកម្មាធិការប្រជាជនខេត្ត នៅលើភូមិសាស្ត្រមិនមានកើតឡើងនូវករណីដែលបង្កឱ្យមានចំណុចក្តៅ មិនមានស្ថានភាពនៃការចូលទៅបង្កបង្កើនផលខុសច្បាប់ ការចូលទៅតាំងទីលំនៅខុសច្បាប់ ឬការរំលោភបំពានព្រំដែនឡើយ។
នេះគឺជាលក្ខខណ្ឌដ៏អំណោយផលសម្រាប់ខេត្តក្នុងការអនុវត្តភារកិច្ចអភិវឌ្ឍន៍សេដ្ឋកិច្ច-សង្គម ដោយផ្សារភ្ជាប់ជាមួយនឹងការធានាការពារជាតិ និងសន្តិសុខនៅតំបន់ព្រំដែន។
ក្នុងគោលបំណងទាញយកផលប្រយោជន៍ប្រកបដោយប្រសិទ្ធភាពពីប្រព័ន្ធច្រកទ្វារព្រំដែន ខេត្ត Tay Ninh កំពុងពន្លឿនការកែលម្អផែនការមេសាងសង់ឱ្យកាន់តែពេញលេញ ដើម្បីបង្កើតមូលដ្ឋានគតិយុត្តសម្រាប់ការវិនិយោគលើហេដ្ឋារចនាសម្ព័ន្ធ និងការរៀបចំលំហអភិវឌ្ឍន៍។
ចំពោះតំបន់សេដ្ឋកិច្ចច្រកទ្វារព្រំដែន Moc Bai ផែនការមេទូទៅនៃការសាងសង់រហូតដល់ឆ្នាំ ២០៤៥ ត្រូវបាននាយករដ្ឋមន្ត្រីអនុម័តតាមសេចក្តីសម្រេចលេខ 1126/QD-TTg ចុះថ្ងៃទី ១១ ខែមិថុនា ឆ្នាំ ២០២៥។
ឈរលើមូលដ្ឋាននោះ ផែនការមេកំណត់តំបន់សាងសង់ក្នុងមាត្រដ្ឋាន ១/២.០០០ នៃតំបន់ច្រកទ្វារព្រំដែនអន្តរជាតិ Moc Bai ត្រូវបានអនុម័តតាមសេចក្តីសម្រេចលេខ 332/QD-BQLKKT ចុះថ្ងៃទី ២៥ ខែកញ្ញា ឆ្នាំ ២០២៦។
បច្ចុប្បន្ន ខេត្តកំពុងពិនិត្យអនុម័តលើសំណុំឯកសារផែនការមេលម្អិតនៃការសាងសង់ក្នុងមាត្រដ្ឋាន ១/៥០០ សម្រាប់គម្រោងសមាសភាគទី ២ ស្តីពីការលើកកម្ពស់ និងពង្រីកប៉ុស្តិ៍ត្រួតពិនិត្យចម្រុះច្រកទ្វារព្រំដែន Moc Bai និងការកែលម្អទេសភាពនៅតំបន់បង្គោលព្រំដែនលេខ ១៧១។
ការកែលម្អផែនការមេទាំងនេះឱ្យបានពេញលេញ គឺក្នុងគោលបំណងធ្វើឱ្យច្បាស់លាស់នូវទិសដៅអភិវឌ្ឍន៍តំបន់សេដ្ឋកិច្ចច្រកទ្វារព្រំដែន Moc Bai បង្កើតមូលដ្ឋានសម្រាប់រៀបចំការវិនិយោគលើហេដ្ឋារចនាសម្ព័ន្ធ និងទាញយកផលប្រយោជន៍ប្រកបដោយប្រសិទ្ធភាពពីសក្តានុពលពាណិជ្ជកម្ម និងសេវាកម្មនៅក្នុងតំបន់។
ចំពោះតំបន់សេដ្ឋកិច្ចច្រកទ្វារព្រំដែន Xa Mat ភារកិច្ចកែសម្រួលផែនការមេទូទៅនៃការសាងសង់រហូតដល់ឆ្នាំ ២០៥០ ត្រូវបាននាយករដ្ឋមន្ត្រីអនុម័តតាមសេចក្តីសម្រេចលេខ 238/QD-TTg ចុះថ្ងៃទី ៥ ខែកុម្ភៈ ឆ្នាំ ២០២៦។
ខេត្ត Tay Ninh កំពុងពន្លឿនការរៀបចំ ការវាយតម្លៃ និងការដាក់ស្នើសុំការអនុម័តលើគម្រោងកែសម្រួលផែនការមេទូទៅ ដើម្បីធ្វើជាមូលដ្ឋានក្នុងការកសាង និងកែសម្រួលផែនការមេដែលពាក់ព័ន្ធ ព្រមទាំងអនុវត្តគម្រោងវិនិយោគហេដ្ឋារចនាសម្ព័ន្ធច្រកទ្វារព្រំដែននានា។
ក្រៅពីការងាររៀបចំផែនការមេ ខេត្តកំពុងត្រៀមបើកការដ្ឋានសាងសង់គម្រោងលើកកម្ពស់ និងពង្រីកស្ពាន និងផ្លូវតភ្ជាប់គូច្រកទ្វារព្រំដែនអន្តរជាតិ Tan Nam - Meun Chey។
យោងតាមលោក Dang Xuan Truong អនុប្រធានក្រុមប្រឹក្សាគ្រប់គ្រងគម្រោងវិនិយោគសាងសង់សំណង់គមនាគមន៍ខេត្ត Tay Ninh គម្រោងនេះមានអង្គភាពរបស់លោកជាម្ចាស់គម្រោង ដោយមានប្រវែងសរុប ៣១៣ ម៉ែត្រ ក្នុងនោះផ្នែកស្ពានមានប្រវែង ៧៣,៩៥ ម៉ែត្រ។
សំណង់នេះត្រូវបានរចនាឡើងដើម្បីពង្រីកឱ្យស៊ីសង្វាក់គ្នាទៅសងខាងនៃស្ពានដែលមានស្រាប់ ដោយមានទុនវិនិយោគសរុបចំនួន ១៨៦,៣ ពាន់លានដុង មកពីប្រភពថវិការដ្ឋ។
គម្រោងនេះត្រូវបានរំពឹងថានឹងបើកការដ្ឋានសាងសង់នៅចុងខែវិច្ឆិកា ឆ្នាំ ២០២៦ និងបញ្ចប់ការសាងសង់នៅក្នុងឆ្នាំ ២០២៩។
នៅពេលបញ្ចប់ការសាងសង់ សំណង់នេះត្រូវបានរំពឹងថានឹងធ្វើឱ្យប្រសើរឡើងនូវការតភ្ជាប់ផ្លូវគមនាគមន៍ឆ្លងកាត់ព្រំដែន បង្កលក្ខណៈងាយស្រួលដល់សកម្មភាពផ្លាស់ប្តូរពាណិជ្ជកម្ម កិច្ចសហប្រតិបត្តិការសេដ្ឋកិច្ច និងរួមចំណែកពង្រឹងទំនាក់ទំនងមិត្តភាពវៀតណាម - កម្ពុជា។
ផែនការមេលំហសេដ្ឋកិច្ចផ្សារភ្ជាប់ជាមួយនឹងការតភ្ជាប់តំបន់
យោងតាមលោក Truong Thanh Liem អនុប្រធានគណៈកម្មាធិការប្រជាជនខេត្ត Tay Ninh ផែនការមេរបស់ខេត្តសម្រាប់ដំណាក់កាលឆ្នាំ ២០២១-២០៣០ និងចក្ខុវិស័យដល់ឆ្នាំ ២០៥០ បានកំណត់នូវទិសដៅសំខាន់ៗ ក្នុងគោលបំណងទាញយកផលប្រយោជន៍ពីសក្តានុពលសេដ្ឋកិច្ចព្រំដែន បង្កើនការតភ្ជាប់តំបន់ និងពង្រីកការផ្លាស់ប្តូរពាណិជ្ជកម្មអន្តរជាតិ។
នៅត្រឹមឆ្នាំ ២០៣០ ខេត្ត Tay Ninh ខិតខំក្លាយជាខេត្តដែលមានការអភិវឌ្ឍប្រកបដោយភាពស្វាហាប់ បៃតង និងចីរភាព ជាកន្លែងដែលគួរទៅទស្សនា និងគួររស់នៅនៅភាគខាងត្បូង ព្រមទាំងមានខឿនសេដ្ឋកិច្ចអភិវឌ្ឍយ៉ាងរឹងមាំ។
ខេត្តបានដាក់ចេញនូវគោលដៅក្លាយជាមជ្ឈមណ្ឌលតភ្ជាប់យុទ្ធសាស្ត្ររវាងតំបន់ភាគអាគ្នេយ៍ និងតំបន់ដីសណ្តទន្លេមេគង្គ ទន្ទឹមនឹងនោះក៏ជាចំណុចប្រសព្វផ្លាស់ប្តូរពាណិជ្ជកម្មដ៏សំខាន់ជាមួយប្រទេសកម្ពុជាផងដែរ។
ចក្ខុវិស័យដល់ឆ្នាំ ២០៥០ ខេត្ត Tay Ninh ឆ្ពោះទៅរកការក្លាយជាមូលដ្ឋានឧស្សាហកម្ម-សេវាកម្មដែលមានការអភិវឌ្ឍ ព្រមទាំងធ្វើសមាហរណកម្មយ៉ាងស៊ីជម្រៅទៅក្នុងខ្សែចង្វាក់តម្លៃ និងបណ្តាញសេដ្ឋកិច្ចក្នុងតំបន់អាស៊ីអាគ្នេយ៍។
យោងតាមទិសដៅនេះ ខេត្តនឹងអភិវឌ្ឍខឿនឧស្សាហកម្មទំនើប ឆ្លាតវៃ និងអេកូឡូស៊ី; វិស័យពាណិជ្ជកម្ម និងទេសចរណ៍អភិវឌ្ឍយ៉ាងខ្លាំងក្លា; និងវិស័យកសិកម្មទំនើប ឆ្លាតវៃ និងប្រកបដោយចីរភាព។
ទន្ទឹមនឹងនេះ មូលដ្ឋានយកចិត្តទុកដាក់លើការធានាសន្តិសុខស្បៀង ការផ្គត់ផ្គង់ប្រភពវត្ថុធាតុដើមដែលមានគុណភាពខ្ពស់ ដើម្បីបម្រើដល់ការកែច្នៃ និងការនាំចេញ ព្រមទាំងក្លាយជាច្រកទ្វារផ្លាស់ប្តូរពាណិជ្ជកម្មអន្តរជាតិរបស់តំបន់ភាគអាគ្នេយ៍ និងទូទាំងប្រទេសជាជំហានៗ។
ដើម្បីសម្រេចបាននូវគោលដៅទាំងនេះ ដំណោះស្រាយនៃការរៀបចំលំហសេដ្ឋកិច្ច-សង្គម ត្រូវបានកំណត់តាមគំរូតំបន់សេដ្ឋកិច្ច-សង្គមចំនួន ៣ មជ្ឈមណ្ឌលចំនួន ៣ ច្រករបៀងសេដ្ឋកិច្ចចំនួន ៦ អ័ក្សចលករចំនួន ៣ និងខ្សែក្រវាត់ព្រំដែនចំនួន ១។
គំរូនេះគឺក្នុងគោលបំណងបង្កើតការតភ្ជាប់រវាងតំបន់នានា លើកកម្ពស់ឧត្តមភាពនៃភូមិសាស្ត្រនីមួយៗ និងធានាបាននូវការអភិវឌ្ឍប្រកបដោយតុល្យភាព និងចីរភាព។
នៅក្នុងតំបន់សេដ្ឋកិច្ច-សង្គមទាំងបី ខេត្ត Tay Ninh តម្រង់ទិសអភិវឌ្ឍតំបន់សេដ្ឋកិច្ចច្រកទ្វារព្រំដែន ដោយផ្សារភ្ជាប់ជាមួយនឹងកសិកម្មបច្ចេកវិទ្យាខ្ពស់ កសិកម្មសរីរាង្គ និងទេសចរណ៍អេកូឡូស៊ី។
លំហនេះផ្សារភ្ជាប់ជាមួយនឹងខ្សែផ្លូវល្បឿនលឿនលេខ ០២ តំបន់ Dong Thap Muoi និងតំបន់ព្រំដែនភាគខាងលិច ដែលបង្កលក្ខណៈងាយស្រួលក្នុងការតភ្ជាប់ការផលិតកសិកម្ម សេវាកម្ម និងសកម្មភាពផ្លាស់ប្តូរពាណិជ្ជកម្មឆ្លងកាត់ព្រំដែន។
ចំពោះប្រព័ន្ធច្រករបៀងសេដ្ឋកិច្ចទាំងប្រាំមួយ មានច្រករបៀងចំនួនពីរដែលផ្សារភ្ជាប់ដោយផ្ទាល់ជាមួយនឹងការអភិវឌ្ឍសេដ្ឋកិច្ចព្រំដែន។
ច្រករបៀងសេដ្ឋកិច្ចលេខ ២ តភ្ជាប់ជាមួយផ្លូវល្បឿនលឿនទីក្រុង Ho Chi Minh - Moc Bai ផ្លូវល្បឿនលឿន Go Dau - Xa Mat ផ្លូវជាតិលេខ ២២ និងផ្លូវជាតិលេខ ២២B។
នេះគឺជាប្រព័ន្ធគមនាគមន៍ដែលដើរតួនាទីតភ្ជាប់តំបន់សេដ្ឋកិច្ចនានាជាមួយនឹងច្រកទ្វារព្រំដែនសំខាន់ៗ ដើម្បីបម្រើដល់ការដឹកជញ្ជូនទំនិញ និងការផ្លាស់ប្តូរពាណិជ្ជកម្មជាមួយប្រទេសកម្ពុជា។
ច្រករបៀងសេដ្ឋកិច្ចលេខ ៤ ផ្សារភ្ជាប់ជាមួយនឹងខ្សែផ្លូវចលករ ដែលរួមមានផ្លូវគោក និងផ្លូវដែក ចាប់ពី Bau Bang រហូតដល់ច្រកទ្វារព្រំដែន Moc Bai។
ច្រករបៀងនេះគឺជាផ្នែកមួយនៃខ្សែផ្លូវអាស៊ាន - Moc Bai ដែលតភ្ជាប់ Cai Mep - Bau Bang - តំបន់សេដ្ឋកិច្ចច្រកទ្វារព្រំដែន Moc Bai និងតំបន់អាស៊ីអាគ្នេយ៍។
ក្រៅពីច្រករបៀងសេដ្ឋកិច្ចនានា នៅក្នុងអ័ក្សចលករទាំងបីរបស់ខេត្ត មានអ័ក្សចំនួនពីរដែលផ្សារភ្ជាប់ជាមួយនឹងការអភិវឌ្ឍសេដ្ឋកិច្ចព្រំដែន។
អ័ក្សចលករលេខ 5A ផ្សារភ្ជាប់ជាមួយនឹងផ្លូវជាតិលេខ N1 និងផ្លូវល្បាតតាមព្រំដែន ដោយបង្កើតការតភ្ជាប់បូព៌ា-បស្ចិម ជាមួយតំបន់ Dong Thap Muoi និងតំបន់សេដ្ឋកិច្ចច្រកទ្វារព្រំដែន Long An។
អ័ក្សចលករលេខ 5B ផ្សារភ្ជាប់ជាមួយនឹងខ្សែផ្លូវ Tan An - Binh Hiep និងផ្លូវជាតិលេខ ៦២ ដោយតភ្ជាប់តំបន់សេដ្ឋកិច្ចច្រកទ្វារព្រំដែន Binh Hiep ជាមួយមជ្ឈមណ្ឌលសង្កាត់ Long An។
យោងតាមគណៈកម្មាធិការប្រជាជនខេត្ត Tay Ninh ផែនការមេច្រកទ្វារព្រំដែននៅលើខ្សែបន្ទាត់ព្រំដែនគោកវៀតណាម - កម្ពុជា សម្រាប់ដំណាក់កាលឆ្នាំ ២០២១-២០៣០ និងចក្ខុវិស័យដល់ឆ្នាំ ២០៥០ ដែលត្រូវបាននាយករដ្ឋមន្ត្រីអនុម័ត បានបង្កើតច្រករបៀងគតិយុត្តដ៏សំខាន់សម្រាប់ការវិនិយោគ ការសាងសង់ និងការអភិវឌ្ឍប្រព័ន្ធច្រកទ្វារព្រំដែន។
ទន្ទឹមនឹងនោះ ផែនការមេទូទៅនៃការសាងសង់តំបន់សេដ្ឋកិច្ចច្រកទ្វារព្រំដែន Moc Bai និង Xa Mat គឺជាមូលដ្ឋានដើម្បីធ្វើឱ្យច្បាស់លាស់នូវទិសដៅអភិវឌ្ឍន៍លំហ ហេដ្ឋារចនាសម្ព័ន្ធបច្ចេកទេស និងប្រព័ន្ធច្រកទ្វារព្រំដែន។
នេះក៏ជាមូលដ្ឋានសម្រាប់ខេត្តក្នុងការទាក់ទាញការវិនិយោគចូលទៅក្នុងវិស័យពាណិជ្ជកម្ម សេវាកម្ម ភស្តុភារកម្ម និងការអភិវឌ្ឍទីក្រុងនៅតំបន់ព្រំដែនផងដែរ។
នៅក្នុងដំណើរការអនុវត្ត ការងារសម្របសម្រួលរវាងស្ថាប័ន កងកម្លាំងមានសមត្ថកិច្ច និងអាជ្ញាធរមូលដ្ឋាន ក្នុងការគ្រប់គ្រង ការវិនិយោគ និងការទាញយកផលប្រយោជន៍ពីច្រកទ្វារព្រំដែន ត្រូវបានពង្រឹងជាជំហានៗ។
ការយល់ដឹងរបស់ប្រជាពលរដ្ឋ និងសហគ្រាសអំពីតួនាទី និងផលប្រយោជន៍នៃសេដ្ឋកិច្ចច្រកទ្វារព្រំដែន ក៏កាន់តែត្រូវបានលើកកម្ពស់ផងដែរ ដែលបង្កលក្ខណៈងាយស្រួលដល់ការងារផ្សព្វផ្សាយ ការចលនា និងការអនុវត្តភារកិច្ចអភិវឌ្ឍន៍នៅតំបន់ព្រំដែន។
ជាមួយនឹងការកែលម្អផែនការមេឱ្យកាន់តែពេញលេញ ការវិនិយោគលើហេដ្ឋារចនាសម្ព័ន្ធ និងការរៀបចំលំហសេដ្ឋកិច្ចឡើងវិញ ខេត្ត Tay Ninh កំពុងលើកកម្ពស់ឧត្តមភាពជាច្រកទ្វារផ្លាស់ប្តូរពាណិជ្ជកម្មជាមួយប្រទេសកម្ពុជាជាជំហានៗ។
ទិសដៅទាំងនេះត្រូវបានរំពឹងថានឹងជំរុញការអភិវឌ្ឍសេដ្ឋកិច្ចពាណិជ្ជកម្មតាមព្រំដែន ពង្រីកការតភ្ជាប់រវាងមូលដ្ឋាននានារបស់វៀតណាម - កម្ពុជា ព្រមទាំងនាំយកខេត្ត Tay Ninh ឱ្យចូលរួមកាន់តែស៊ីជម្រៅទៅក្នុងបណ្តាញពាណិជ្ជកម្ម សេវាកម្ម និងភស្តុភារកម្មនៃតំបន់អាស៊ីអាគ្នេយ៍៕
ខេត្ត Lam Dong - ខេត្ត Mondulkiri ពង្រឹងការសម្របសម្រួលការពារព្រំដែន យុគសម័យ - នាថ្ងៃទី ២០ ខែតុលា ប៉ុស្តិ៍នគរបាលការពារព្រំដែន Dak Lao ចំណុះបញ្ជាការដ្ឋានកងទ័ពការពារព្រំដែនខេត្ត Lam Dong និងវរៈសេនាតូចលេខ ១១៥ ចំណុះតំបន់ប្រតិបត្តិការសឹកខេត្តមណ្ឌលគិរី (ប្រទេសកម្ពុជា) បានរៀបចំពិធីចងសម្ព័ន្ធមេត្រីភាព ដោយបានឯកភាពគ្នំពង្រឹងការសម្របសម្រួលគ្រប់គ្រង ការពារព្រំដែន បង្ការនិងទប់ស្កាត់បទល្មើស ព្រមទាំងកសាងខ្សែព្រំដែនសន្តិភាព មិត្តភាព ស្ថិរភាព កិច្ចសហប្រតិបត្តិការ និងការអភិវឌ្ឍ។ |
ខេត្ត Tay Ninh ពង្រីកកិច្ចសហប្រតិបត្តិការអន្តរជាតិ បញ្ចេញឱ្យអស់ពីសមត្ថភាពនូវផលប្រយោជន៍ច្រកទ្វារព្រំដែន យុគសម័យ - ក្នុងរយៈពេល ៩ ខែ នៃឆ្នាំ ២០២៦ ខេត្ត Tay Ninh បានជំរុញការទូតសេដ្ឋកិច្ច ការជំរុញការវិនិយោគ ការតភ្ជាប់ពាណិជ្ជកម្ម និងការពង្រឹងកិច្ចសហប្រតិបត្តិការជាមួយបណ្តាមូលដ្ឋានជាប់ព្រំដែននៃប្រទេសកម្ពុជា។ រួមជាមួយការអភិវឌ្ឍហេដ្ឋារចនាសម្ព័ន្ធច្រកទ្វារព្រំដែន ភស្តុភារកម្ម និងគមនាគមន៍អន្តរតំបន់ បណ្តាសកម្មភាពកិច្ចការបរទេសកំពុងរួមចំណែកពង្រីកទីផ្សារ កៀរគរប្រភពធនធាន និងបង្កើតបរិយាកាសអំណោយផលសម្រាប់ការអភិវឌ្ឍសេដ្ឋកិច្ច-សង្គមរបស់ខេត្ត។ |

មតិពីមិត្តអ្នកអាន