នាយករដ្ឋមន្ត្រីវៀតណាមលោក Nguyen Xuan Phuc សាទរសាធារណរដ្ឋឆេកដែលបានផ្តល់ទិដ្ឋាការពលករឡើងវិញសម្រាប់ប្រជាពលរដ្ឋវៀតណាម

នាយករដ្ឋមន្ត្រីវៀតណាមលោក Nguyen Xuan Phuc និងអនុប្រធានសភាជាន់ទាបនៃសាធារណរដ្ឋឆែកនិងជាប្រធានបក្សកុម្មុយនីស្តឆេក - Morava លោក Vojtech Filip (រូបថត: VGP / Quang Hieu)

ក្នុងជំនួបនេះ អនុប្រធានសភាជាន់ទាបនៃសាធារណរដ្ឋឆែកនិងជាប្រធានបក្សកុម្មុយនីស្តឆេក - Morava លោក Vojtech Filip បានឲ្យដឹងថា មាតិកាមួយក្នុងកិច្ចពិភាក្សារវាងនាយករដ្ឋមន្ត្រីវៀតណាមនិងនាយករដ្ឋមន្ត្រីសាធារណរដ្ឋឆែក កាលពីខែមេសាឆ្នាំ ២០១៩កន្លងទៅ ក្នុងឱកាសនៃដំណើរទស្សនកិច្ចរបស់នាយករដ្ឋមន្ត្រីវៀតណាម លោក Nguyen Xuan Phuc គឺជាការផ្តល់ទិដ្ឋាការពលករឡើងវិញសម្រាប់ប្រជាពលរដ្ឋវៀតណាម ហើយសាធារណរដ្ឋឆែកបានចាប់ផ្តើមឡើងវិញនៅខែមិថុនាឆ្នាំនេះតែម្តង។

លោក Vojtech Filip ក៏បានសម្តែងនូវការជឿជាក់ថា សាធារណរដ្ឋឆែកកំពុងទន្ទឹងរង់ចាំបើកជើងហោះហើរត្រង់រវាងទីក្រុងហាណូយនិងក្រុង Praha។ គម្រោងកិច្ចសហប្រតិបត្តិការមួយផ្សេងទៀតដែលលោក Vojtech Filip បានលើកឡើង នោះគឺជាការចុះហត្ថលេខាលើកិច្ចសហប្រតិបត្តិការរវាងក្រុមហ៊ុនរថយន្ត Skoda នៃសាធារណរដ្ឋឆែកនិងដៃគូវៀតណាម។ ហេតុដូច្នេះ នាពេលខាងមុខ ខ្សែចង្វាក់ផលិតកម្មរថយន្តមួយផ្នែកនឹងដាក់ទីតាំងនៅប្រទេសវៀតណាម។ លោក Vojtech Filip បានមានប្រសាសន៍ថា “ខ្ញុំសង្ឃឹមថានៅពេលគម្រោងនេះបានបើកឲ្យដំណើរការនោះ លោកនាយករដ្ឋមន្ត្រីនៃសាធារណរដ្ឋឆែក Andrej Babis នឹងអញ្ជើញមកប្រទេសវៀតណាមដោយផ្ទាល់ផងដែរ”។

ដោយមានទំនាក់ទំនងល្អនិងទំនុកចិត្តចំពោះវៀតណាម អនុប្រធានសភាជាតិឆែកបានបញ្ជាក់អះអាង ចំពោះការគាំទ្រវៀតណាមឈរឈ្មោះជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិសម្រាប់អាណត្តិ ២០២០-២០២១។

អញ្ជើញឆ្លើយតបវិញ នាយករដ្ឋមន្ត្រីវៀតណាម លោក Nguyen Xuan Phuc បានវាយតំលៃខ្ពស់ ចំពោះការបន្តការផ្តល់ទិដ្ឋាការដល់ពលករវៀតណាមរបស់រដ្ឋាភិបាលឆែក ហើយសង្ឃឹមថា ប្រទេសទាំងពីរនឹងបន្តខិតខំប្រឹងប្រែងថែមទៀត ដើម្បីពង្រឹងនិងពង្រីកកិច្ចសហប្រតិបត្តិការក្នុងវិស័យសេដ្ឋកិច្ច ពាណិជ្ជកម្មនិងការវិនិយោគ ដើម្បីរួមចំណែកដល់ការធ្វើឲ្យស៊ីជម្រៅថែមទៀត ទំនាក់ទំនងមិត្តភាពជាប្រពៃណីយ៉ាងល្អប្រសើររវាងប្រទេសទាំងពីរ។ នាយករដ្ឋមន្ត្រី លោក Nguyen Xuan Phuc ក៏បានសាទរវិនិយោគិនឆែកក្នុងការវិនិយោគលើឧស្សាហកម្មផលិតរថយន្តនៅវៀតណាម ហើយបានសង្កត់ធ្ងន់ថា រដ្ឋាភិបាលវៀតណាមនឹងបង្កលក្ខណៈងាយស្រួលសម្រាប់វិនិយោគិនឆែក។ លោកនាយករដ្ឋមន្ត្រីវៀតណាមបានអះអាងថា រដ្ឋាភិបាលវៀតណាមបានត្រៀមជាស្រេច ចាត់វិធានការសមស្របគ្រប់លើជ្រុងជ្រោយ ដើម្បីលើកកម្ពស់ទំនាក់ទំនងរវាងប្រទេសទាំងពីរឲ្យមានការអភិវឌ្ឍកាន់តែប្រសើរឡើងនាពេលអនាគត៕

（សរុបព័ត៌មាន ដោយ ស្រីព្រេជ）

（សរុបព័ត៌មាន ដោយ ស្រីព្រេជ）