ក្នុងខណៈដឹកនាំគណៈប្រតិភូទៅចូលរួមកិច្ចប្រជុំកំពូលពិភពលោក ឆ្នាំ២០២០ នៃអង្គការសហព័ន្ធសន្តិភាពសកល ស្ដីពីសន្តិភាព សន្តិសុខ និងការអភិវឌ្ឍមនុស្ស នៅទីក្រុងសេអ៊ូល សាធារណរដ្ឋកូរ៉េនោះ នារសៀលថ្ងៃទី០៣ ខែកុម្ភៈឆ្នាំ២០២០ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជួបសួរសុខទុក្ខ និងសំណេះសំណាលជាមួយបងប្អូនប្រជាពលរដ្ឋ និងសិស្ស និស្សិតខ្មែរ ដែលកំពុងរស់នៅ និងបន្តការសិក្សានៅប្រទេសកូរ៉េចំនួនប្រមាណ ១,២០០នាក់។
សម្តេចតេជោ ហ៊ុន សែន ជួបសំណេះសំណាលជាមួយបងប្អូនប្រជាពលរដ្ឋខ្មែរដែលកំពុង រស់នៅ និងធ្វើការក្នុងប្រទេសកូរ៉េខាងត្បូង
សម្តេចតេជោនាយករដ្ឋមន្ត្រី បានសម្ដែងនូវក្ដីរីករាយ ដែលបានអញ្ជើញមកជួបបងប្អូនកូនក្មួយយុវជន សិស្ស និងនិស្សិតខ្មែរដែលបានមករស់នៅ និងបន្តការសិក្សានៅកូរ៉េ។ សម្តេចតេជោមានប្រសាសន៍ថា ពេលនេះកម្ពុជា និងសាធារណរដ្ឋកូរ៉េបាននិងកំពុងយកចិត្តទុកដាក់ទៅលើការជំរុញទំនាក់ទំនងលើវិស័យការទូត ការផ្លាស់ប្តូរយោបល់ទៅលើការជំរុញទំនាក់ទំនងពាណិជ្ជកម្ម វិនិយោគទេសចរណ៍ និងវិស័យផ្សេងៗទៀត ក្នុងនោះរួមទាំងការជំរុញឱ្យមានការហោះហើរត្រង់ពីកូរ៉េ មកកាន់ព្រះរាជាណាចក្រកម្ពុជា ដើម្បីជំរុញកំណើនទេសចរណ៍ ពាណិជ្ជកម្ម និងវិនិយោគ។ សម្តេចតេជោនាយករដ្ឋមន្ត្រីបានថ្លែងថា បច្ចុប្បន្ននេះ មាននិស្សិតកម្ពុជាដែលកំពុងបន្តការសិក្សានៅប្រទេសកូរ៉េចំនួន៤៥០នាក់ ហើយបើសរុបពលរដ្ឋទាំងអស់ដែលបានមករស់នៅកូរ៉េទាំងស្របច្បាប់ និងមិនស្របច្បាប់មានប្រមាណជា៦៥,៥០០នាក់ កំពុងបម្រើការងារ ជាមួយប្រាក់ឈ្នួលសមរម្យ ដែលជាការរួមចំណែកមួយដល់ការអភិវឌ្ឍសេដ្ឋកិច្ចកម្ពុជា។ សម្តេចតេជោបានស្នើឱ្យម្ចាស់ក្រុមហ៊ុន ឬម្ចាស់សហគ្រាសនានានៅប្រទេសកូរ៉េ ជួយមើលថែកូនក្មួយកម្មករ កម្មការិនីដែលកំពុងបម្រើការងារនៅប្រទេសកូរ៉េនេះឱ្យបានល្អផង។
សម្តេចតេជោ ហ៊ុន សែន ជួបសំណេះសំណាលជាមួយបងប្អូនប្រជាពលរដ្ឋខ្មែរដែលកំពុង រស់នៅ និងធ្វើការក្នុងប្រទេសកូរ៉េខាងត្បូង
សម្ដេចតេជោបានលើកឡើងថា ទំហំពាណិជ្ជកម្មរវាងកម្ពុជា និងសាធារណរដ្ឋកូរ៉េនៅឆ្នាំ២០១៩ មានជិត១ពាន់លានដុល្លារអាម៉េរិក ក្នុងនោះការនាំចេញរបស់កម្ពុជា ទៅកាន់ប្រទេសកូរ៉េមានប្រមាណ ៣០ភាគរយ ហើយកូរ៉េខាងនាំចូលកម្ពុជាមានប្រមាណ ៧០ភាគរយ។ ចំពោះទំនិញកម្ពុជានាំទៅកាន់ប្រទេសកូរ៉េខាងត្បូងមានច្រើនបំផុតជាសម្លៀកបំពាក់ គ្រឿងអេឡិចត្រូនិក ស្បែកជើង ភេសជ្ជៈ កាបូប កៅស៊ូ ឱសថ ក្រដាសកាតុង និងផលិតផលកសិកម្មមួយចំនួនទៀត។ ចំណែក ទំនិញកម្ពុជានាំចូលពីប្រទេសកូរ៉េវិញ មានដូចជា ក្រណាត់ត្បាញ រថយន្ត ភេសជ្ជៈ គ្រឿងអេឡិចត្រូនិក គ្រឿងម៉ាស៊ីន វត្ថុតុបតែងលម្អផ្ទះ ឱសថ សាប៊ូ និងផលិតផលប្លាស្ទិកជាដើម។
សម្ដេចតេជោនាយករដ្ឋមន្ត្រី ក៏បានបង្ហាញនូវមោទនភាពចំពោះផលិតផលផ្លែស្វាយរបស់ប្រទេសកម្ពុជា ដែលត្រូវបាននាំចូលមកកាន់ទីផ្សាររបស់ប្រទេសកូរ៉េក្នុងពេលថ្មីៗកន្លងទៅនេះ ដែលនេះក៏ជាការបង្ហាញអំពីភាពរីកចម្រើននៃវិស័យកសិកម្មផលិតផលផ្លែស្វាយរបស់ប្រទេសកម្ពុជាដែលមានគុណភាពល្អ អាចនាំមកកាន់ទីផ្សាររបស់ប្រទេសកូរ៉េបាន។ សម្តេចតេជោក៏ជំរុញឱ្យមានការគាំទ្រផ្លែស្វាយកម្ពុជា និងជំរុញលើកទឹកចិត្តឱ្យកសិករកម្ពុជាបង្កើនការដាំដុះផលដំណាំស្វាយបន្ថែមផងដែរ ដើម្បីមានឱកាសនាំចេញមកកាន់ទីផ្សារកូរ៉េជាបន្តបន្ទាប់ទៀត។ សម្ដេចតេជោនាយករដ្ឋមន្ត្រី ក៏បានផ្តាំផ្ញើឱ្យពលរដ្ឋ សិស្ស និងនិស្សិតទាំងអស់ដែលរស់នៅ និងសិក្សានៅប្រទេសកូរ៉េ ត្រូវគោរពច្បាប់ប្រទេសកូរ៉េ ហើយត្រូវខិតខំប្រឹងប្រែងធ្វើការ និងរៀនសូត្រដើម្បីអនាគតរបស់ខ្លួនឯង គ្រួសារនិងប្រទេសជាតិ៕
（ប្រភពព័ត៌មាន: information.gov.kh）
