មន្ត្រីខេត្តកំពង់ធំ បានអះអាងថា ខេត្តកំពង់ធំ មានសក្ដានុ ពលខ្លាំងទៅលើដំណាំស្រូវ និងកៅស៊ូ ព្រមទាំងដំណាំរួមផ្សំជាច្រើនទៀត មានដូចជា ដំឡូងមី, ស្វាយចន្ទី, ដំឡូងមី និងស្វាយកែវល្មៀតជាដើម។
ឯកឧត្តម សុខ លូ អភិបាលខេត្តកំពង់ធំ។
ថ្ងៃទី២៧ ខែឧសភា សន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់រដ្ឋបាលខេត្តកំពង់ធំ» បានរៀបចំឡើងដែលមានការអញ្ជើញចូលរួមរបស់ ឯកឧត្តម សុខ លូ អភិបាលខេត្តកំពង់ធំ។
ថ្លែងក្នុងសន្និសិទនេះ ឯកឧត្តម សុខ លូ អភិបាលខេត្តកំពង់ធំ បានលើកឡើងថា ខេត្តកំពង់ធំ មានសក្ដានុ ពលខ្លាំងទៅលើដំណាំស្រូវ និងកៅស៊ូ ព្រមទាំងដំណាំរួមផ្សំជាច្រើនទៀត មានដូចជា ដំឡូងមី, ស្វាយចន្ទី, ដំឡូងមី និងស្វាយកែវល្មៀតជាដើម។ ឯកឧត្តម បន្តថា ខេត្តកំពង់ធំប្រៀបដូចជាគ្រាប់ពេជ្រ ដែលមិនទាន់កែច្នៃ។ ឯកឧត្តមថា ខេត្តមួយនេះ មានសក្ដានុពលខ្លាំងអំណោយផលពីធម្មជាតិ និងសេដ្ឋកិច្ច វប្បធម៌សង្គម សម្រាប់កិច្ចដំណើរការអភិវឌ្ឍន៍។
ឯកឧត្តមបញ្ជាក់ថា ខេត្តត្រូវការអ្នកវិនិយោគ ដើម្បីមកវិនិយោគសាងសង់ រោងចក្រកែច្នៃ ផលិតផលសម្រេច ឬឡសម្ងួតស្រូវ។ ត្រង់ចំណុចនេះ ឯកឧត្តមអំពាវនាវ អ្នកវិនិយោគគួរងាកមកវិនិយោគលើវិស័យនេះនៅខេត្តកំពង់ធំ ដែលមានសក្ដានុពលខ្លាំង និងជាខេត្តមួយដែលនៅកណ្ដាលប្រទេសកម្ពុជា។
ឯកឧត្តមបន្ថែមថា បើទោះបីខេត្តមួយនេះ មានសក្ដានុពលលើវិស័យកសិកម្ម ក៏ពិតមែន ប៉ុន្ដែខេត្តមិនទាន់មានរោងចក្រកែច្នៃផលិតផលសម្រេចនៅឡើយទេ។ ឯកឧត្តម បន្ថែមទៀតថា នៅពេលប្រមូលផលបានម្ដងៗ បន្ទាប់ពីលក់ដូរក្នុងតំបន់ហើយនោះ ប្រជាកសិករ បានលក់ឱ្យឈ្មួញដើម្បីនាំចេញទៅប្រទេសជិតខាង ដែលមានប្រទេសថៃ និងប្រទេសវៀតណាមជាដើម៕
(សរុបដោយវិច្ឆិកា)
មតិពីមិត្តអ្នកអាន