ក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី១០ ខែមេសា បានចេញសេចក្តីណែនាំសស្តីពីវិធានការដោះស្រាយបញ្ហានៃការធ្លាក់ចុះផលិតផលផ្លែស្វាយ ដែលបានធ្លាក់ចុះមកសល់ត្រឹម៣២០រៀលក្នុងមួយគីឡូក្រាម ខណៈរយៈពេលដូចគ្នាកាលពីឆ្នាំ២០១៩ មានតម្លៃ ៨០០រៀលក្នុងមួយគីឡូក្រាម។
ផ្លែស្វាយស្រស់។ (រូបថត៖ thmey.thmey.com)
ការរាលដាលជំងឺកូវីដ-១៩ បង្ករឲ្យមានការចុះថយនូវការបញ្ជាទិញ ដែលជាហេតុធ្វើឲ្យតម្លៃផ្លែស្វាយស្រស់ធ្លាក់ចុះ ក្នុងនោះកសិករក៏ពុំបានអនុវត្តគោលការដាំដុះឲ្យបានត្រឹមត្រូវ ហើយរោងចក្រ សិប្បកម្មកែច្នៃផ្លែស្វាយ មួយចំនួនក៏ត្រូវបានផ្អាកដោយសារផលិតផលនាំចេញបានតិចតួច។ ក្នុងនោះតម្លៃស្វាយត្រូវធ្លាក់ត្រឹម៣២០រៀលក្នុងមួយគីឡូប៉ុណ្ណោះ។
ផ្អែកលើបញ្ហានេះ រដ្ឋមន្ត្រីកសិកម្ម លោក វេង សាខុន បានចេញវិធានការដោះស្រាយ ដោយណែនាំមន្ទីរកសិកម្មរាជធានី-ខេត្តត្រូវសហការជាមួយនាយកដ្ឋានកសិ-ឧស្សាហកម្ម ជំរុញកសិករបង្កើតជាក្រុមផលិត ឬជាសហគមន៍ និងចុះបញ្ជី ដែលងាយស្រួលរៀបចំផែនការ បណ្ដុះបណ្ដាលបច្ចេកទេស និងផ្សាភ្ជាប់ទីផ្សារតាមរយៈការចុះកិច្ចសន្យាទិញ លក់។
មួយវិញទៀត លោកស្នើឲ្យមន្ត្រីក្រោមឱវាទត្រូវជំរុញឲ្យមានការប្រើប្រាស់បណ្ដាញព័ត៌មានទីផ្សារកសិកម្មទំនើប ដល់កសិករ ការដាំដុះ និងបច្ចេកទេសក្រោយប្រមូលផល និងស្តុកទុករយៈពេលវែង។
ក្នុងនោះ ក៏ត្រូវមានការលើកទឹកចិត្តលើការកែច្នៃលក្ខណៈគ្រួសារ ពីផលិតផលស្រស់ ឲ្យមកជាដំណាប់ និងទឹកស៊ីរ៉ូស្វាយ និងអាចលក់ក្នុងស្រុក។
ក្រៅពីនោះអគ្គនាយកដ្ឋាន ត្រូវចរចាក្នុងក្របខណ្ឌបច្ចេកទេសពីបញ្ហាពាក់ព័ន្ធភូតគាមអនាម័យ ដើម្បីឲ្យផលិតផលស្វាយនាំចេញទាន់ពេលវេលា។ តាមលោក ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យឆ្លាស់វេនក្រសួងពាណិជ្ជកម្ម បានបញ្ជាក់យ៉ាងដូច្នេះថា៖ «ផ្លែស្វាយ យើងនាំបានក្នុងឆ្នាំ២០១៩ គឺជាង៥ម៉ឺន៨ពាន់តោន (៥៨,១៦២.១៦តោន) ដែលនាំទៅកាន់ប្រទេសវៀតណាម ថៃ សិង្ហបូរី បារាំង រុស្ស៉ី និងចិន»./.
（សរុបដោយឌីណា）
មតិពីមិត្តអ្នកអាន