មិត្តភក្តិជនជាតិប៉ាឡេស្ទីន ដែលមានទំនាក់ទំនងយ៉ាងជិតស្និទ្ធជាមួយវៀតណាមអស់រយៈពេលជាង ៤០ ឆ្នាំ ទទួលបានមេដាយរំលឹកអនុស្សាវរីយ៍

នាថ្ងៃទី ២០ ខែឧសភា នៅ Ha Noi សហព័ន្ធបណ្ដាអង្គការមិត្តភាពវៀតណាម បានរៀបចំពិធីប្រគល់ជូនមេដាយរំលឹកអនុស្សាវរីយ៍ «ដើម្បីសន្តិភាព មិត្តភាពរវាងបណ្ដាប្រជាជាតិ» ជូនចំពោះឯកអគ្គរដ្ឋទូត ប៉ាឡេស្ទីន ប្រចាំនៅ វៀតណាម លោក Saadi Salama សំដៅកត់ត្រានូវរាល់ការរួមចំណែកដ៏សកម្មរបស់លោកចំពោះទំនាក់ទំនងមិត្តភាព, សាមគ្គីភាព និងកិច្ចសហប្រតិបត្តិការរវាងប្រជាជន វៀតណាម និង ប៉ាឡេស្ទីន។

មេដាយរំលឹកអនុស្សាវរីយ៍ គឺជារង្វាន់ខ្ពស់បំផុតរបស់សហព័ន្ធបណ្ដាអង្គការមិត្តភាពវៀតណាម ដែលផ្តល់ជូនបណ្ដាបុគ្គលក្នុង និងក្រៅប្រទេសដែលមានការរួមចំណែកយ៉ាងឆ្នើមសម្រាប់បុព្វហេតុសន្តិភាព, សាមគ្គីភាព និងមិត្តភាពរវាងបណ្ដាប្រជាជាតិ។

ប្រធានសហព័ន្ធបណ្ដាអង្គការមិត្តភាពវៀតណាម លោក Phan Anh Son ប្រគល់ជូនមេដាយរំលឹកអនុស្សាវរីយ៍ «ដើម្បីសន្តិភាព មិត្តភាពរវាងបណ្ដាប្រជាជាតិ» ជូនចំពោះឯកអគ្គរដ្ឋទូត ប៉ាឡេស្ទីន ប្រចាំនៅ វៀតណាម លោក Saadi Salama។

ថ្លែងមតិនៅក្នុងពិធីនេះ លោក Phan Anh Son ប្រធានសហព័ន្ធបណ្ដាអង្គការមិត្តភាពវៀតណាម បានឱ្យដឹងថា វៀតណាម និង ប៉ាឡេស្ទីន រួមគ្នាចែករំលែកនូវចំណុចស្រដៀងគ្នាជាច្រើន នៅពេលដែលសុទ្ធតែបានឆ្លងកាត់សង្គ្រាម និងការតស៊ូដណ្តើមឯករាជ្យជាតិ។ ថ្នាក់ដឹកនាំបក្ស, រដ្ឋ និងប្រជាជន វៀតណាម តែងតែគោរព និងដឹងគុណចំពោះការគាំទ្ររបស់សហគមន៍អន្តរជាតិ, បណ្ដាចលនាវឌ្ឍនភាពនៅលើពិភពលោក ក្នុងនោះមានប្រជាជន ប៉ាឡេស្ទីន ជាច្រើនជំនាន់ដែលបានគាំទ្រការតស៊ូដ៏ត្រឹមត្រូវរបស់ វៀតណាម។

យោងតាមលោក Phan Anh Son រួមជាមួយកម្លាំងនៃសាមគ្គីភាព និងជំនឿចិត្ត ការគាំទ្ររបស់មិត្តភក្តិអន្តរជាតិ ក្នុងនោះមានប្រជាជន ប៉ាឡេស្ទីន បានរួមចំណែកជួយឱ្យ វៀតណាម បង្រួបបង្រួមប្រទេសជាតិ, ជម្នះផលវិបាកនៃសង្គ្រាម, ធ្វើសមាហរណកម្មអន្តរជាតិ និងបន្តអភិវឌ្ឍ។

លោកបានឱ្យដឹងថា ការយកចិត្តទុកដាក់, ថែរក្សាបណ្ដាប្រជាជាតិ និងបណ្ដាមិត្តភក្តិដែលធ្លាប់ឈរប្រកៀកស្មាគ្នានាពេលអតីតកាល គឺជាចំណុចដ៏មុតមាំនិងស្របគ្នានៅក្នុងនយោបាយកិច្ចការបរទេសរបស់ វៀតណាម ទន្ទឹមនឹងនោះ បង្ហាញពីប្រពៃណីគោរពសេចក្តីថ្លៃថ្នូរនិងមនោសញ្ចេតនារបស់ប្រជាជន វៀតណាម។

ប្រធានសហព័ន្ធបណ្ដាអង្គការមិត្តភាពវៀតណាម បានវាយតម្លៃឯកអគ្គរដ្ឋទូត លោក Saadi Salama ថាជាមនុស្សដែលមានការយល់ដឹងយ៉ាងជ្រាលជ្រៅអំពីប្រវត្តិសាស្ត្រ, វប្បធម៌, នយោបាយ និងសង្គម វៀតណាម បន្ទាប់ពីរយៈពេលច្រើនទសវត្សរ៍នៃការសិក្សា, ធ្វើការងារ និងមានទំនាក់ទំនងយ៉ាងជិតស្និទ្ធជាមួយប្រទេសជាតិ។

លោកបានឱ្យដឹងថា ស្ទើរតែនៅក្នុងរាល់សកម្មភាពរបស់សហព័ន្ធ និងបណ្ដាអង្គការជាសមាជិក នៅពេលទទួលបានការអញ្ជើញ ឯកអគ្គរដ្ឋទូត លោក Saadi Salama តែងតែចំណាយពេលវេលាចូលរួម និងរួមដំណើរជាមួយបណ្ដាសកម្មភាពកិច្ចការបរទេសប្រជាជន។

«ជាងពាក់កណ្តាលនៃជីវិតពេញវ័យរបស់ខ្ញុំ គឺរស់នៅវៀតណាម»

ដោយក្តីគោរព និងថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំសហព័ន្ធបណ្ដាអង្គការមិត្តភាពវៀតណាម ឯកអគ្គរដ្ឋទូត លោក Saadi Salama បានឱ្យដឹងថា លោកចាត់ទុកមេដាយរំលឹកអនុស្សាវរីយ៍នេះជាកាដូដ៏ពិសេសមួយ មិនត្រឹមតែសម្រាប់រូបលោកផ្ទាល់ប៉ុណ្ណោះទេ ប៉ុន្តែថែមទាំងសម្រាប់ប្រជាជន ប៉ាឡេស្ទីន ទាំងមូលផងដែរ។

លោកឯកអគ្គរដ្ឋទូតបានថ្លែងថា៖ «ខ្ញុំមានមោទនភាពដោយសារផ្នែកមួយដ៏សំខាន់នៅក្នុងការយល់ដឹង, ចំណេះដឹង និងបទពិសោធន៍របស់ខ្ញុំ គឺត្រូវបានបង្កើតឡើងនៅវៀតណាម»។

លោកបានឱ្យដឹងថា លោកបានភ្ជាប់និស្ស័យជាមួយ វៀតណាម អស់រយៈពេលជាង ៤០ ឆ្នាំមកហើយ ក្នុងនោះពេលវេលារស់នៅ, សិក្សា និងធ្វើការងារនៅ វៀតណាម គឺជិត ២៤ ឆ្នាំ ដែលជាចន្លោះពេលយកពាក់កណ្តាលនៃជីវិតពេញវ័យរបស់ខ្លួន។ «វៀតណាម បានយកចំណែកយ៉ាងសំខាន់នៅក្នុងគំនិត និងបេះដូងរបស់ខ្ញុំ» លោកបានថ្លែងមតិ។

បណ្ដាប្រតិភូថតរូបអនុស្សាវរីយ៍។

នៅពេលរំលឹកដល់ការយល់ចិត្តគ្នាយ៉ាងពិសេសរវាងប្រជាជន ប៉ាឡេស្ទីន និង វៀតណាម ឯកអគ្គរដ្ឋទូត លោក Saadi Salama បានចាត់ទុកថា ស្មារតីសាមគ្គីភាព និងការបង្រួបបង្រួមជាតិ គឺជាកត្តាសំខាន់មួយក្នុងចំណោមកត្តាសំខាន់ៗដែលជួយឱ្យ វៀតណាម ឈានទៅរកជ័យជម្នះក្នុងការតស៊ូរំដោះជាតិ ក៏ដូចជានៅក្នុងបុព្វហេតុអភិវឌ្ឍន៍ប្រទេសជាតិនាពេលបច្ចុប្បន្ន។ ប៉ាឡេស្ទីន តែងតែចាត់ទុក វៀតណាម ថាជាប្រភពកម្លាំងចិត្ត និងជាមេរៀនបទពិសោធន៍ដ៏មានតម្លៃ។

ឯកអគ្គរដ្ឋទូត លោក Saadi Salama បានឱ្យដឹងថា ចាប់តាំងពីបណ្ដាថ្ងៃដំបូងបង្អស់ដែលមកដល់ វៀតណាម លោកបានចាប់ផ្តើមរួមដំណើរជាមួយសហព័ន្ធបណ្ដាអង្គការមិត្តភាពវៀតណាម។ យោងតាមលោក សហព័ន្ធគឺជា «ទ្វារដែលបើកចំហ» ជួយឱ្យប្រជាជន ប៉ាឡេស្ទីន និងប្រជាជន វៀតណាម យល់ដឹងពីគ្នាទៅវិញទៅមកកាន់តែច្បាស់ តាមរយៈបណ្ដាសកម្មភាពដោះដូរ, សាមគ្គីភាពអន្តរជាតិ និងកិច្ចសហប្រតិបត្តិការកិច្ចការបរទេសប្រជាជន។ អ្វីដែលធ្វើឱ្យលោកពេញចិត្តបំផុតនៅក្នុងអាណត្តិការងារនៅ វៀតណាម គឺបានរួមចំណែកជំរុញបណ្ដាសកម្មភាពដោះដូររវាងប្រជាជននិងប្រជាជន, ការតភ្ជាប់បណ្ដាគណៈប្រតិភូជាន់ខ្ពស់ និងការរក្សាទំនាក់ទំនងយ៉ាងជិតស្និទ្ធរវាងប្រជាជាតិទាំងពីរ។

នៅក្នុងចំណែកថ្លែងមតិ ឯកអគ្គរដ្ឋទូត លោក Saadi Salama បានរំលឹកជាច្រើនដងអំពី Ha Noi ដូចជាផ្នែកមួយនៃកេរការចងចាំក្នុងវ័យក្មេងរបស់ខ្លួន។ លោកបានរៀបរាប់ឡើងវិញអំពីបណ្ដាថ្ងៃដែលរស់នៅក្នុងអន្តេវាសិកដ្ឋាននិស្សិតនាសម័យអាហារូបត្ថម្ភផ្ត់ផ្គង់, បណ្ដាពេលព្រឹកដែលដើរលម្ហែកាយជាមួយមិត្តភក្តិ វៀតណាម ឬបណ្ដាពេលរសៀលរដូវស្លឹកឈើជ្រុះនៅ Ha Noi។

លោកបានថ្លែងថា បន្ទាប់ពីបញ្ចប់អាណត្តិការងារ លោកនឹងនៅតែបន្តត្រឡប់មក វៀតណាម វិញ មិនត្រឹមតែដោយសារការងារប៉ុណ្ណោះទេ ប៉ុន្តែថែមទាំងដោយសារទំនាក់ទំនងយ៉ាងជិតស្និទ្ធក្នុងជីវភាពប្រចាំថ្ងៃជាមួយ Ha Noi និងវប្បធម៌ វៀតណាម ទៀតផង។ លោកឯកអគ្គរដ្ឋទូតបានថ្លែងថា៖ «ខ្ញុំគិតថានឹងមានការលំបាកខ្លាំងណាស់ ប្រសិនបើក្នុងរយៈពេលពីរ ឬបីខែដែលមិនមានទឹកត្រីបន្តិចបន្តួចនៅក្នុងរបបអាហារ»។

អ្នកការទូត ប៉ាឡេស្ទីន ដែលនិយាយភាសាវៀតណាមដូចជាប្រជាជន Ha Noi

ចំពោះប្រជាជន វៀតណាម ជាច្រើនរូប លោក Saadi Salama គឺជាអ្នកការទូតដ៏ពិសេសម្នាក់។ លោកនិយាយភាសាវៀតណាមដោយប្រើសំឡេងប្រជាជន Ha Noi, អានរឿង Kieu, សរសេរសៀវភៅជាភាសាវៀតណាម និងតែងតែបង្ហាញមុខជាប្រចាំនៅក្នុងបណ្ដាសកម្មភាពវប្បធម៌ និងកិច្ចការបរទេសប្រជាជននៅ Ha Noi។

នៅក្នុងការសន្ទនាជាច្រើនជាមួយបណ្ដាទីភ្នាក់ងារសារព័ត៌មាន វៀតណាម លោកធ្លាប់បានចែករំលែកថា៖ «នៅក្នុងខ្លួនរបស់ខ្ញុំ មានចំណែក វៀតណាម ធំធេងណាស់» - ដែលជាឃ្លាសម្តីបន្ទាប់មកត្រូវបានបោះពុម្ពនៅលើគម្របសៀវភៅ «រឿងរ៉ាវវៀតណាមរបស់ខ្ញុំ» របស់លោក ដែលបានបោះពុម្ពផ្សាយនាឆ្នាំ ២០២៣។

លោក Saadi Salama ជាមួយអ្នកគ្រូ Le Thanh និងអ្នកគ្រូ Nguyen Hanh - គ្រូបង្រៀនភាសាវៀតណាមទាំងពីររូបរបស់លោកនៅ Ha Noi នាឆ្នាំ ១៩៨២។

លោក Saadi Salama បានមកដល់ វៀតណាម នាឆ្នាំ ១៩៨០ ក្នុងវ័យទើបតែ ១៩ ឆ្នាំប៉ុណ្ណោះ។ លោកបានរៀបរាប់ថា កាលពីវ័យកុមារនៅ ប៉ាឡេស្ទីន លោកតែងតែតាមដានព័ត៌មានអំពីសង្គ្រាមនៅ វៀតណាម និងមានអារម្មណ៍យល់ចិត្តគ្នាយ៉ាងពិសេសរវាងប្រជាជាតិទាំងពីរ។

លោកធ្លាប់បានរៀបរាប់ថា នារយៈពេលបណ្ដាឆ្នាំដំបូងនៅ Ha Noi និស្សិតបរទេសក៏រស់នៅក្នុងជីវភាពដូចជានិស្សិត វៀតណាម នាសម័យអាហារូបត្ថម្ភផ្គត់ផ្គង់ផងដែរ៖ ជិះកង់, ឈរតម្រង់ជួរ និងប្រើប្រាស់ប័ណ្ណរបប។ គឺចន្លោះពេលនោះហើយដែលបានជួយឱ្យលោកយល់ដឹងពីប្រជាជនវៀតណាមយ៉ាងឆាប់រហ័ស។

ពីនិស្សិតបរទេស ប៉ាឡេស្ទីន ម្នាក់ លោកបានក្លាយជាមុខមាត់ដ៏ស៊ាំធ្លាប់ម្នាក់របស់សហគមន៍ការទូតអន្តរជាតិនៅ វៀតណាម។ ក្នុងឋានៈជាឯកអគ្គរដ្ឋទូត ប៉ាឡេស្ទីន ប្រចាំនៅ វៀតណាម ចាប់តាំងពីឆ្នាំ ២០០៩ មកទល់ពេលនេះ លោកតែងតែសហការជាប្រចាំជាមួយសហព័ន្ធបណ្ដាអង្គការមិត្តភាពវៀតណាម និងគណៈកម្មាធិការវៀតណាមសាមគ្គីភាពជាមួយប្រជាជន ប៉ាឡេស្ទីន ដើម្បីរៀបចំបណ្ដាសកម្មភាពដោះដូររវាងប្រជាជននិងប្រជាជន, ការតាំងពិព័រណ៍, ការដោះដូរវប្បធម៌ និងបណ្ដាកម្មវិធីសាមគ្គីភាពជាមួយប្រជាជន ប៉ាឡេស្ទីន។

លោកក៏បានចូលរួមយ៉ាងសកម្មក្នុងការជំរុញបណ្ដាជំនួបរវាងថ្នាក់ដឹកនាំសហព័ន្ធជាមួយថ្នាក់ដឹកនាំជាន់ខ្ពស់ ប៉ាឡេស្ទីន ស្ថិតក្នុងក្របខ័ណ្ឌនៃបណ្ដាដំណើរទស្សនកិច្ច និងធ្វើការងារនៅ វៀតណាម; សហការរៀបចំដំណើរទស្សនកិច្ច និងធ្វើការងារនៅ ប៉ាឡេស្ទីន របស់គណៈប្រតិភូថ្នាក់ដឹកនាំសហព័ន្ធបណ្ដាអង្គការមិត្តភាពវៀតណាមនាឆ្នាំ ២០២៣។

ក្នុងឋានៈជាប្រធានគណៈទូតបរទេសប្រចាំនៅ វៀតណាម ចាប់តាំងពីឆ្នាំ ២០១៩ ឯកអគ្គរដ្ឋទូត លោក Saadi Salama តែងតែតំណាងឱ្យសហគមន៍ការទូតចូលរួម និងថ្លែងមតិនៅក្នុងបណ្ដាសកម្មភាពកិច្ចការបរទេសប្រជាជនជាច្រើន។

លោកក៏បានបកប្រែដោយផ្ទាល់នូវពាក្យអត្ថាធិប្បាយក្នុងឃ្លីបវីដេអូ និងសៀវភៅ «Welcome to Vietnam» ទៅជាភាសាអារ៉ាប់ សំដៅណែនាំរូបភាពប្រទេសជាតិ និងមនុស្សជាតិ វៀតណាម ជូនដល់សហគមន៍បណ្ដាប្រទេសអារ៉ាប់។

នាខែមករា ឆ្នាំ ២០២៦ ឯកអគ្គរដ្ឋទូត លោក Saadi Salama ត្រូវបានប្រគល់ជូននូវគោរម្យងារជាប្រជាពលរដ្ឋកិត្តិយសនៃរដ្ឋធានី Ha Noi៕

ខេត្ត ក្រុងប្រហែល ៤០ ឆ្លើយតបនឹងទិវាយូហ្គាអន្តរជាតិ ឆ្នាំ ២០២៤ យោងតាមផែនការ ទិវាយូហ្គាអន្តរជាតិលើកទី១០ (IDY) ឆ្នាំ ២០២៤ ក្រោមប្រធានបទ “យូហ្គាសម្រាប់ខ្លួនឯង និងសង្គម” គ្រោងនឹងប្រព្រឹត្តទៅនៅខេត្ត ក្រុងប្រមាណ ៤០/៦៣ នៃប្រទេសវៀតណាម ដោយមានការចូលរួមពីមនុស្សរាប់ម៉ឺននាក់។

ស្វែងយល់ពីកន្លែងទេសចរណ៍នៅជិតទីក្រុងហាណូយ ចម្ងាយតិចជាង ៤០ គីឡូម៉ែត្រ យុគសម័យ - ចម្ងាយតិចជាង ៤០ គីឡូម៉ែត្រពីទីក្រុងហាណូយ គោលដៅទេសចរណ៍ទាំងនេះគឺសមរម្យណាស់សម្រាប់ការធ្វើដំណើររយៈពេលខ្លីក្នុងមួយថ្ងៃ។

ឌឹកអាញ់

thoidai.com.vn