ស្នាមរបាយវិទ្យាសាស្ត្រ - បច្ចេកវិទ្យា ក្នុងដំណើរ "រស់ឡើងវិញ" នៃអណ្តូងប្រេង Dai Hung

តំណាងគណៈគ្រប់គ្រងគម្រោង PTM Dai Hung Nam បង្ហាញអំពីទិដ្ឋភាពទូទៅនៃគម្រោង។

ជាមួយនឹងសម្លេងឆ្នោតយល់ព្រម ៩/៩ នៅឯក្រុមប្រឹក្សាកាត់សេចក្តីពានរង្វាន់ Ho Chi Minh និងពានរង្វាន់រដ្ឋផ្នែកវិទ្យាសាស្ត្រ និងបច្ចេកវិទ្យា លើកទី ៧ ថ្នាក់ក្រសួងហិរញ្ញវត្ថុ កាលពីថ្ងៃទី ១០ ខែមេសា ឆ្នាំ ២០២៦ គម្រោងនេះមិនត្រឹមតែបញ្ជាក់ពីតម្លៃវិទ្យាសាស្ត្រប៉ុណ្ណោះទេ ប៉ុន្តែថែមទាំងបង្ហាញពីប្រសិទ្ធភាពជាក់ស្តែងដ៏ឆ្នើមផងដែរ។

នៅថ្ងៃទី ១៤ ខែមេសា ឆ្នាំ ២០២៦ គណៈប្រតិភូចម្រុះវិស័យចំណុះក្រសួងហិរញ្ញវត្ថុ និងក្រសួងវិទ្យាសាស្ត្រ និងបច្ចេកវិទ្យា បានចុះអង្កេតផ្ទាល់នៅទីតាំងអនុវត្តគម្រោងជើងទម្រ Dai Hung Nam ដែលជាអណ្តូងប្រេងទាញយកទីបីនៃតំបន់នេះ។ ព្រឹត្តិការណ៍នេះបានកត់សម្គាល់នូវជំហានអភិវឌ្ឍន៍បន្ទាប់ ក្នុងដំណើរការម្ចាស់ការលើបច្ចេកវិទ្យាសមុទ្រជ្រៅនៃវិស័យប្រេងកាតវៀតណាម។

មុននោះ ចាប់តាំងពីឆ្នាំ ២០១១ ជើងទម្រសម្រាប់រន្ទា WHP-DH02 ដែលជាជើងទម្រអណ្តូងប្រេងដំបូងគេនៅតំបន់ទឹកជ្រៅនៃអាង Nam Con Son ត្រូវបានរចនា ផលិត និងតម្លើងរួចរាល់នៅវៀតណាម ដែលបើកនូវដំណាក់កាលធ្វើសញ្ជាតិរូបនីយកម្ម (Nội địa hóa) គ្រប់ជ្រុងជ្រោយក្នុងវិស័យរចនា ផលិត និងតម្លើងសំណង់សមុទ្រ។

ជាពិសេស ក្នុងដំណើរការចុះអង្កេតផ្ទាល់ គណៈប្រតិភូបានវាយតម្លៃខ្ពស់ចំពោះលក្ខណៈវិទ្យាសាស្ត្រ លក្ខណៈប្រព័ន្ធ និងតម្លៃជាក់ស្តែងដែលគម្រោងនាំមកជូន។ គណៈប្រតិភូបានសន្និដ្ឋានថា នេះមិនត្រឹមតែជាការសិក្សាស្រាវជ្រាវដែលមានលក្ខណៈអនុវត្តសាមញ្ញប៉ុណ្ណោះទេ ប៉ុន្តែគឺជាគំរូសមាហរណកម្មរវាងការគិតបែបវិទ្យាសាស្ត្រ សមត្ថភាពច្នៃប្រឌិត និងបទពិសោធន៍ប្រតិបត្តិការជាក់ស្តែង ដោយបង្កើតឱ្យមានប្រសិទ្ធភាពខ្ពស់បំផុតក្នុងខ្សែច្រវាក់សកម្មភាពស្វែងរុករក អភិវឌ្ឍន៍ និងទាញយកទាំងមូល។ លទ្ធផលដែលសម្រេចបាននៅគម្រោង Dai Hung ត្រូវបានចាត់ទុកថាជាភស្តុតាងច្បាស់លាស់សម្រាប់សមត្ថភាពម្ចាស់ការ ការប្រើប្រាស់ការកែលម្អ និងការអភិវឌ្ឍបច្ចេកវិទ្យារបស់ក្រុមវិស្វករវៀតណាម ក្នុងលក្ខខណ្ឌភូមិសាស្ត្រដ៏ស្មុគស្មាញ និងបរិយាកាសទាញយកដ៏លំបាក។

ចំណុចលេចធ្លោនៃគម្រោង គឺការផ្លាស់ប្តូរលក្ខណៈយុទ្ធសាស្ត្រពី "ការប្រើប្រាស់បច្ចេកវិទ្យា" ទៅជា "ការច្នៃប្រឌិត និងការកែតម្រូវបច្ចេកវិទ្យា"។ ជំនួសឱ្យការពឹងផ្អែកលើដំណោះស្រាយដែលមានស្រាប់ ក្រុមវិស្វករបានម្ចាស់ការ "កាត់ដេរ" បច្ចេកវិទ្យាឱ្យសមស្របនឹងលក្ខខណ្ឌភូមិសាស្ត្រពិសេសនៃអណ្តូងប្រេង Dai Hung ដែលជាតំបន់មានរចនាសម្ព័ន្ធស្មុគស្មាញ និងលក្ខខណ្ឌទាញយកដ៏តឹងរ៉ឹង។ គឺវិធីសាស្ត្រនេះហើយដែលបានជួយដោះស្រាយបញ្ហាចង្អៀតជាបន្តបន្ទាប់ ដែលក្រុមហ៊ុនម៉ៅការអន្តរជាតិកាលពីមុនមិនទាន់អាចដោះស្រាយបានដាច់ស្រឡះ ចាប់ពីផ្នែកភូមិសាស្ត្រ ការខួង ការអភិវឌ្ឍអណ្តូង រហូតដល់ប្រតិបត្តិការទាញយក។

លទ្ធផលដែលសម្រេចបានមានអត្ថន័យបំបែកទម្លាយ៖ ពីគម្រោងមួយដែលប្រឈមនឹងហានិភ័យនៃការបិទកិច្ចសន្យា ជាមួយនឹងតម្លៃផ្ទេរសិទ្ធិជានិមិត្តរូបត្រឹមតែ 1 USD ប៉ុណ្ណោះ គម្រោង Dai Hung បាន "រស់ឡើងវិញ" ក្លាយជាអណ្តូងប្រេងដែលមានចំណូលរាប់ពាន់លានដុល្លារ ព្រមទាំងរួមចំណែកថវិកាជាតិបានជាង ៦០០ លានដុល្លារ។ ជោគជ័យនេះគឺជាភស្តុតាងច្បាស់លាស់សម្រាប់តួនាទីនៃវិទ្យាសាស្ត្រ - បច្ចេកវិទ្យា ក្នុងការបង្កើតតម្លៃសេដ្ឋកិច្ចប្រកបដោយចីរភាព។

ក្នុងបរិបទដែលបណ្តាអណ្តូងប្រេងប្រពៃណីមានការថយចុះទិន្នផល គម្រោង Dai Hung បាននិងកំពុងដើរតួនាទីយ៉ាងសំខាន់ក្នុងការធានាសន្តិសុខថាមពលជាតិ។ ជាមួយនឹងទិន្នផលឈានដល់កម្រិតខ្ពស់បំផុតជិត ៣០.០០០ បារ៉ែល/ថ្ងៃ និងទិន្នផលសរុបរំពឹងថានឹងសម្រេចបាន ១២៣ លានបារ៉ែល នៅឆ្នាំ ២០៣៤ អណ្តូងប្រេងនេះបានក្លាយជាសសរស្តម្ភដ៏រឹងមាំនៃប្រភពផ្គត់ផ្គង់ប្រេងឆៅ និងកាត់បន្ថយការពឹងផ្អែកលើការនាំចូល៕

វៀតណាមគឺជា «មេដែក» ទាក់ទាញ ក្រុមហ៊ុនយក្ស បច្ចេកវិទ្យា semiconductor មកស្វែងរកអ្នកមានទេពកោសល្យ ប្រធាននិងជានាយកប្រតិបត្តិនៃសម្ព័ន្ធក្រុមហ៊ុន Alchip Technologies លោក Johnny Shen បានសង្កត់ធ្ងន់ថា ប្រភពវិស្វករដែលមានទេពកោសល្យពោរ ពេញទៅដោយសក្ដានុពលរបស់វៀតណាមបានក្លាយជាជម្រើសដ៏គួរឱ្យទាក់ទាញសម្រាប់ Alchip Technologies។

កិច្ចប្រជុំរដ្ឋមន្រ្តីអាស៊ាន ផ្នែកវិទ្យាសាស្រ្ត បច្ចេកវិទ្យា និងនវានុវត្តន៍លើកទី២០ ពីថ្ងៃទី៣ ដល់ថ្ងៃទី៧ ខែមិថុនា កម្ពុជាធ្វើជាម្ចាស់ផ្ទះនៃកិច្ចប្រជុំរដ្ឋមន្រ្តីអាស៊ាន ផ្នែកវិទ្យាសាស្រ្ត បច្ចេកវិទ្យា និងនវានុវត្តន៍លើកទី២០ (AMMSTI-20) កិច្ចប្រជុំគណៈកម្មាធិការអាស៊ាន ផ្នែកវិទ្យាសាស្រ្ត បច្ចេកវិទ្យា និងនវានុវត្តន៍លើកទី៨៥ (COSTI-85) និងកិច្ចប្រជុំពាក់ព័ន្ធនៅខេត្តសៀមរាប។

ហេង វុធ្ធី