យុគសម័យ - នាព្រឹកថ្ងៃទី ១៦ ខែតុលានៅទីស្នាក់ការរដ្ឋាភិបាល នាយករដ្ឋមន្ត្រីវៀតណាមលោក Nguyen Xuan Phuc បានអញ្ជើញទទួលជួបជាមួយលោកស្រី កិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រីកម្ពុជា និងជារដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច។
នាយករដ្ឋមន្ត្រីវៀតណាមលោក Nguyen Xuan Phuc អញ្ជើញទទួលជួបជាមួយលោកស្រី កិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រីកម្ពុជា (រូបថត៖ baochinhphu.vn)
លោកនាយករដ្ឋមន្រ្តីវៀតណាមបានមានប្រសាសន៍ថាដំណើរទស្សនកិច្ចរបស់សម្តេចអគ្គមហាសេនាបតីតេជោ ហុនស៊ែន នាយករដ្ឋមន្ត្រីនៃព្រះរាជាណាចក្រកម្ពុជានៅប្រទេសវៀតណាមនាពេលថ្មីៗនេះ ទទួលបានជោគជ័យយ៉ាងខ្លាំងនិងទទួលបានលទ្ធផលគួរឱ្យកត់សម្គាល់។ ភាគីទាំងពីរបានចុះហត្ថលេខាលើឯកសារសហប្រតិបត្តិការចំនួន ១០ រួមមានឯកសារច្បាប់ព្រំដែនគោកចំនួន ២ ដែលទទួលស្គាល់លទ្ធផលចំនួន ៨៤% នៃការងារខ័ណសីមានិងបោះបង្គោលព្រំដែន ព្រមទាំងជឿជាក់ថាកិច្ចសហប្រតិបត្តិការទ្វេភាគីនឹងរីកចម្រើនថែមទៀតពីមួយថ្ងៃទៅមួយថ្ងៃ។
ឧបនាយករដ្ឋមន្រ្តីកម្ពុជាលោកស្រី ម៉ែនសំអន បានថ្លែងអំណរគុណចំពោះលោកនាយករដ្ឋមន្រ្តីវៀតណាម និងអធិការកិច្ចរដ្ឋាភិបាលវៀតណាមដែលបានស្វាគមន៍យ៉ាងកក់ក្តៅចំពោះ គណៈប្រតិភូ ព្រមទាំងវាយតម្លៃខ្ពស់ចំពោះការដែលលោកនាយករដ្ឋមន្រ្តីនៃប្រទេសទាំងពីរ បានចុះហត្ថលេខាលើឯកសារច្បាប់សំខាន់ៗស្តីពីការងារខ័ណ្ឌសីមាព្រំដែនគោក ក៏ដូចជាសំដែងក្តីសោមន្សរីករាយចំពោះការអភិវឌ្ឍដ៏ល្អប្រពៃរវាងប្រទេសទាំងពីរផងដែរ។ លោកស្រីក៏បានសម្តែងការចាប់អារម្មណ៍ចំពោះសមិទ្ធិផលក្នុងការអភិវឌ្ឍន៍សេដ្ឋកិច្ច - សង្គមរបស់វៀតណាមក្រោមការដឹកនាំររបស់នាយករដ្ឋមន្រ្តីវៀតណាម លោក Nguyen Xuan Phuc ហើយលោកស្រីអះអាងថាប្រទេសកម្ពុជាប្តេជ្ញាការពារនិងពង្រឹងពង្រីកចំណោងមិត្តភាពជាប្រពៃណីដ៏ល្អរវាងប្រទេសទាំងពីរ។
នាយករដ្ឋមន្ត្រីវៀតណាមលោក Nguyen Xuan Phuc និងលោកស្រី កិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រីកម្ពុជា (រូបថត៖ vietnamplus.vn)
លោកស្រីបានបន្តទៀតថាទំនាក់ទំនងរបស់ស្ថាប័នអធិការកិច្ចរដ្ឋាភិបាលទាំងពីរកំពុងមានការរីកចម្រើនយ៉ាងខ្លាំងក្លា។ ភាគីទាំងពីរបានផ្លាស់ប្តូរបទពិសោធន៍ក្នុងកិច្ចការអធិការកិច្ច។ជារៀងរាល់ឆ្នាំ អធិការកិច្ចរដ្ឋាភិបាលវៀតណាមទទួលសិក្ខាកាមកម្ពុជាច្រើនដើម្បីបណ្តុះ បណ្តាលជំនាញវិជ្ជាជីវៈ ហើយចំណុចនេះមានសារៈសំខាន់ខ្លាំងណាស់ក្នុងការជួយរដ្ឋាភិបាលកម្ពុជាក្នុងការបង្ការនិងប្រយុទ្ធប្រឆាំងនឹងភាពអវិជ្ជមាន។ កម្ពុជាមានគោលបំណងចង់ជំរុញកិច្ចសហប្រតិបត្តិការរវាងស្ថាប័នអធិការកិច្ចរដ្ឋាភិបាលទាំងពីរ ព្រមទាំងអះអាងថាកម្ពុជានឹងខិតខំប្រឹងប្រែងអនុវត្តកិច្ចព្រមព្រៀងដែលសម្រេចបានដោយរដ្ឋាភិបាលនៃប្រទេសទាំងពី ក៏ដូចជាបង្កើនការផ្លាស់ប្តូរប្រតិភូគ្រប់លំដាប់ថ្នាក់ដើម្បីជំរុញទំនាក់ទំនងមិត្តភាពរឲ្យកាន់តែល្អប្រសើរនាពេលខាងមុខផងដែរ៕
（ហេង វុធ្ធី）
（ប្រភពព័ត៌មាន: baochinhphu.vn）
មតិពីមិត្តអ្នកអាន