យុគសម័យ - នាថ្ងៃទី ៤ ខែកញ្ញា ធនាគារ MB Cambodia (ដែលជាក្រុមហ៊ុនបុត្រសម្ព័ន្ធនៃធនាគារភាគហ៊ុនពាណិជ្ជកម្មកងទ័ពវៀតណាម) បានបើកសម្ពោធទីស្នាក់ការថ្មី និងសាខាថ្មីមួយទៀតនៅរាជធានីភ្នំពេញនៃព្រះរាជាណាចក្រកម្ពុជា។
ពិធីបើកសម្ពោធទីស្នាក់ការថ្មីរបស់ធនាគារ MB Cambodia (រូបថត៖ nhandan.com.vn)
ថ្លែងនៅក្នុងពិធីបើកទីស្នាក់ការថ្មី និងផ្តល់អាជ្ញាប័ណ្ណប្រតិបត្តិការដល់ធនាគារ MB Cambodia ទេសភិបាលធនាគារជាតិនៃកម្ពុជា លោក ជា ចាន់តូ បានអះអាងថា ការសម្រេចចិត្តពង្រីកការ វិនិយោគរបស់ខ្លួនទៅក្នុងទីផ្សារកម្ពុជារបស់ធនាគារ MB Cambodia ក្រោយរយៈពេល ៩ ឆ្នាំគឺជាសក្ខីភាពនៃការផ្តល់ទំនុកចិត្តរបស់វិនិយោគិនវៀតណាមនៅទីផ្សារកម្ពុជា។ អង្គភាពអាជីវកម្ម វៀតណាមមកវិនិយោគនៅកម្ពុជា ក្នុងគោលបំណងចង់នាំមកនូវផលប្រយោជន៍សេដ្ឋកិច្ចនិងវិបុលភាពដល់ប្រទេសទាំងពីរ ព្រមទាំងរួមចំណែកក្នុងការរឹតបន្តឹងចំណងសាមគ្គីភាពរវាងប្រជាជននៃទាំងពីរ កម្ពុជា - វៀតណាម។
ទេសភិបាលធនាគារជាតិនៃកម្ពុជា លោក ជា ចាន់តូ (រូបថត៖ vov.vn)
យោងតាមអ្នកជំនាញបានឱ្យដឹងថា ក្នុងរយៈពេល ១០ ឆ្នាំកន្លងមក ធនាគារវៀតណាមដូចជា MB, BIDC, Agribank, Sacombank Cambodia និង SHB បានចូលរួមចំណែកយ៉ាងធំធេងដល់សេដ្ឋកិច្ចម៉ាក្រូរបស់ប្រទេសកម្ពុជាតាមរយៈការផ្តល់ប្រាក់កម្ចីដល់ប្រជាជនក្នុងអត្រាការប្រាក់ទាប។ គួរជម្រាបថា នៅពេលដែលមិនមានធនាគារវៀតណាម ប្រជាជនកម្ពុជាត្រូវរងទទួល អត្រាការប្រាក់ពី ១២ ទៅ ១៥% ក្នុងមួយឆ្នាំ។ ធនាគារវៀតណាមដែលវិនិយោគនៅកម្ពុជាបានបង្កើតការប្រកួតប្រជែង ដែលធ្វើឱ្យអត្រាការប្រាក់ធ្លាក់ចុះនៅត្រឹមតែ ៦.៥ - ៧.៥% ក្នុងមួយ ឆ្នាំ។
ទេសភិបាលធនាគារជាតិនៃកម្ពុជា លោក ជា ចាន់តូ អញ្ជើញផ្តល់អាជ្ញាប័ណ្ណប្រតិបត្តិការដល់ធនាគារ MB Cambodia (រូបថត៖ vov.vn)
ម្យ៉ាងវិញទៀត នាពេលបច្ចុប្បន្ន វៀតណាមមានគម្រោងវិនិយោគចំនួន ២១៤ នៅកម្ពុជាដែលមានទឹកប្រាក់សរុប ៣,២ ពាន់លានដុល្លារអាមេរិក។ ដោយសារការរក្សាបាននូវល្បឿនកំណើនសេដ្ឋកិច្ចខ្ពស់ក្នុងកំរិត ៧% / ឆ្នាំ រូមជាមួយនឹងស្ថានភាពនយោបាយនិងសន្តិសុខមានស្ថេរភាពនោះ កម្ពុជាកំពុងជាទីផ្សារមួយដែលទាក់ទាញការវិនិយោគយ៉ាងខ្លាំងសម្រាប់សហគ្រាសវៀតណាម។ បើគិតក្នុងរយៈពេល ៧ ខែដើមនៃឆ្នាំនេះ វៀតណាមបានមានគម្រោងវិនិយោគថ្មីចំនួន ៤ បន្ថែមទៀត និងគម្រោងចំនួន ៤ បន្ថែមទៀតដែលត្រូវបានដំឡើងដើមទុននៅកម្ពុជា ដោយមានដើមទុនចុះបញ្ជីសរុបចំនួន ៣៨,៥ លានដុល្លារអាមេរិក ស្មើនឹងដើមទុនចុះបញ្ជីពេញឆ្នាំ ២០១៨ ផងដែរ ៕
（ប្រភព៖ nhandan.com.vn បកប្រែដោយ ហេង វុធ្ធី）
មតិពីមិត្តអ្នកអាន