យុគសម័យ - នៅព្រឹកថ្ងៃទី ៨ ខែធ្នូ នៅវិមានរដ្ឋសភា ប្រធានរដ្ឋសភាវៀតណាមលោកស្រី Nguyen Thi Kim Ngan បានអញ្ជើញទទួលជួបសវនាការជាមួយនាយករដ្ឋមន្ត្រីនៃព្រះរាជាណាចក្រកម្ពុជា សម្តេច តេជោហ៊ុនសែន ដែលសម្តេចកំពុងបំពេញទស្សនកិច្ចជាផ្លូវការនៅវៀតណាម តាមការអញ្ជើញរបស់នាយករដ្ឋមន្ត្រីវៀតណាមលោក Nguyen Xuan Phuc។
ប្រធានរដ្ឋសភាវៀតណាមលោកស្រី Nguyen Thi Kim Ngan អញ្ជើញទទួលជួបជាមួយនាយករដ្ឋមន្ត្រីកម្ពុជាសម្តេច តេជោ ហ៊ុនសែន (រូបថតៈ TTXVN)
ក្នុងជំនួបនេះ ប្រធានរដ្ឋសភាវៀតណាម លោកស្រី Nguyen Thi Kim Ngan បានអញ្ជើញស្វាគមន៍យ៉ាងកក់ក្តៅបំផុត ចំពោះវត្តមាននៃដំណើរទស្សនកិច្ចផ្លូវការរបស់ សម្តេចតេជោនាយករដ្ឋមន្រ្តី មកកាន់ប្រទេសវៀតណាម។ លោកស្រីប្រធានរដ្ឋសភាវៀតណាមក៏បានអប អរសាទរជូនចំពោះសម្តេចតេជោនាយករដ្ឋមន្រ្តីផងដែរ ដែលត្រូវបានជ្រើសតាំងជានាយករដ្ឋមន្រ្តីសាជាថ្មីសម្រាប់រាជរដ្ឋាភិបាល នីតិកាលទី៦ ដែលគណបក្សប្រជាជនកម្ពុជា ទទួលបានជ័យជំនះអំពីការបោះឆ្នោតកាលពី ថ្ងៃទី២៩ ខែកក្កដា កន្លងទៅថ្មីៗនេះ។
ជាមួយគ្នានេះដែរ លោកស្រី Nguyen Thi Kim Ngan បានអបអរសាទរចំពោះជោគជ័យ ដែលប្រទេសកម្ពុជាត្រូវបានអង្គការបេតិកភណ្ឌពិភពលោក ទទួលស្គាល់និងចុះល្ខោនខោលខ្មែរជាសម្បត្តិអរូបិរបស់ពិភពលោក ដែលនេះគឺជាមោទនភាពរបស់កម្ពុជា។ លោកស្រីបានបញ្ជាក់សារជាថ្មីថា រដ្ឋសភាវៀតណាមបានគាំទ្រពេញទំហឹងចំពោះលទ្ធផលនៃការចរចា និងឯកសារនៃកិច្ចព្រមព្រៀងនានា ដែលភាគីរដ្ឋាភិបាលប្រទេសទាំងពីរ បានចុះហត្ថលេខាក្នុងពេលទស្សនកិច្ចផ្លូវការរបស់សម្តេចតេជោនៅពេលនេះ។ ក្រោមការដឹកនាំរបស់សម្តេចតេជោ កិត្យានុភាពជាតិរបស់កម្ពុជា ទទួលបាននូវភាពល្បីល្បាញលើឆាកអន្តរជាតិ ពិសេសទៅទៀតនោះ សម្តេចតេជោនឹងបន្តបេសកកម្មរបស់សម្តេចក្នុងការដោះស្រាយបញ្ហាព្រំដែន នៃប្រទេសទាំងពីរវៀតណាម-កម្ពុជាឲ្យបានរួចរាល់ជាស្ថាពរ ដើម្បីជាឧត្តមប្រយោជន៍សម្រាប់មនុស្សជំនាន់ក្រោយ។
ទន្ទឹមនឹងនោះ សម្តេចតេជោ ហ៊ុន សែន បានមានប្រសាសន៍អំពីកំណើនសេដ្ឋកិច្ចកម្ពុជាក្នុងឆ្នាំ២០១៨ដែលមានការកើនឡើង រហូតដល់៧,៣% ដែលជាលទ្ធផលនៃការខិតខំប្រឹងប្រែងរបស់រាជរដ្ឋាភិបាលកម្ពុជា។ សម្តេចតេជោ នឹងខិតខំធ្វើការដោះស្រាយបញ្ហាព្រំដែនឲ្យបានចប់សព្វគ្រប់ ដើម្បីបម្រើឧត្តមប្រយោជន៍របស់ប្រទេស និងប្រជាជនទាំងពីរកម្ពុជា និងវៀតណាម អោយបានកាន់តែល្អប្រសើរឡើង៕
（សរុបព័ត៌មាន ដោយ ស្រីព្រេជ）
មតិពីមិត្តអ្នកអាន