វៀតណាមនិងម៉ិកស៊ិកបានធ្វើការពិគ្រោះយោបល់នយោបាយលើកទី ៥

អនុរដ្ឋមន្ត្រីអចិន្រ្តៃយ៍លោក Bui Thanh Son និងអនុរដ្ឋមន្រ្តីក្រសួងការបរទេសJulián Ventura Valero ។ (ប្រភព៖ Vietnam +)

តាមការអញ្ជើញរបស់ក្រសួងការបរទេសម៉ិកស៊ិក គណៈប្រតិភូក្រសួងការបរទេសនៃសាធារណរដ្ឋសង្គមនិយមវៀតណាមដឹកនាំដោយសមាជិកគណៈកម្មាធិការមជ្ឈឹមបក្សនិងជាអនុរដ្ឋមន្រ្តីអចិន្ត្រៃយ៍លោក Bui Thanh Son បានបំពេញទស្សនកិច្ចជាផ្លូវការនៅប្រទេសម៉ិកស៊ិកពីថ្ងៃទី ១៥-១៨ ខែកញ្ញា។

យោងតាមអ្នកយកព័ត៌មាននៃទីភ្នាក់ងារសារព័ត៌មានវៀតណាម នៅថ្ងៃទី ១៧ ខែកញ្ញា នៅទីក្រុងម៉ិកស៊ិក អនុរដ្ឋមន្រ្តី អចិន្រ្តៃយ៍លោក Bui Thanh Son និងអនុរដ្ឋមន្រ្តីក្រសួងការបរទេសម៉ិកស៊ិក Julián Ventura Valero បានបើកសម័យប្រជុំពិគ្រោះយោបល់នយោបាយលើកទី ៥ រវាងក្រសួងការបរទេសនៃប្រទេសទាំងពីរ។

នៅក្នុងសម័យប្រជុំពិគ្រោះយោបល់នយោបាយ ភាគីទាំងពីរបានជូនដំណឹងគ្នាអំពីស្ថានភាពរបស់ប្រទេសនីមួយៗ ពិភាក្សាអំពីវិធានការណ៍នានាដើម្បីជំរុញទំនាក់ទំនងរវាងប្រទេសទាំងពីរ និងក្រសួងការបរទេសទាំងពីរផ្លាស់ប្តូរយោ បល់អំពីស្ថានភាពនៅសមុទ្រខាងកើតរួមទាំងបញ្ហាតំបន់និងអន្តរជាតិដែលភាគីទាំងពីរមានការយកចិត្តទុកដាក់ដូចគ្នា។

ក្រសួងការបរទេសនៃប្រទេសទាំងពីរបានវាយតម្លៃថាទំនាក់ទំនងទ្វេភាគីកំពុងរីកចម្រើនជាវិជ្ជមាន ជាពិសេសផ្នែកសេដ្ឋកិច្ចដោយមានពាណិជ្ជកម្មទ្វេភាគីក្នុងឆ្នាំ ២០១៨ ឈានដល់ ៣,៤ ពាន់លានដុល្លារអាមេរិក។ ម៉ិកស៊ិកគឺជាដៃគូពាណិជ្ជកម្មធំជាងគេទី ២ របស់វៀតណាមនៅអាមេរិកឡាទីន។

ភាគីទាំងពីរបានឯកភាពគ្នាសម្របសម្រួលការពង្រឹងការផ្លាស់ប្តូរគណៈប្រតិភូនិងទំនាក់ទំនងទ្វេភាគីដោយពិភាក្សាគ្នាអំពីការបង្កើតក្របខ័ណ្ឌសមស្របមួយដើម្បីជំរុញថែមទៀតនូវទំនាក់ទំនងសហប្រតិបត្តិការដ៏រឹងមាំនិងអភិវឌ្ឍន៍។ ធ្វើឱ្យប្រសើរឡើងនូវប្រសិទ្ធភាពនៃយន្តការសហប្រតិបត្តិការដែលមានស្រាប់ ជាពិសេសគណៈកម្មាធិការចម្រុះស្តីពីសេដ្ឋកិច្ចពាណិជ្ជកម្មនិងវិនិយោគ លើកកម្ពស់ប្រសិទ្ធភាពនៃកិច្ចព្រមព្រៀងគ្រប់ជ្រុងជ្រោយនិងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP) ដែលវៀតណាមនិងម៉ិកស៊ិកជាសមាជិកដើម្បីពង្រីកទំនាក់ទំនងសេដ្ឋកិច្ចពាណិជ្ជកម្មនិងវិនិយោគទ្វេភាគី។ បន្តកែលម្អក្របខ័ណ្ឌច្បាប់សម្រាប់កិច្ចសហប្រតិបត្តិការរយៈពេលវែង ជំរុញគម្រោងលើវិស័យកសិកម្មការពារជាតិវិទ្យាសាស្ត្រនិងបច្ចេកវិទ្យាវប្បធម៌កីឡានិងទេសចរណ៍។ សម្របសម្រួលរៀបចំសកម្មភាពនយោបាយសេដ្ឋកិច្ចនិងវប្បធម៌ផ្លាស់ប្តូរប្រជាជនឆ្ពោះទៅខួបលើកទី ៤៥ នៃការបង្កើតទំនាក់ទំនងការទូតរវាងវៀតណាមនិងម៉ិកស៊ិក (១៩ ខែឧសភា ឆ្នាំ ១៩៧៥ - ១៩ ខែឧសភា ឆ្នាំ២០២០) ។

ដោយឈរលើមូលដ្ឋាននៃការជឿទុកចិត្តគ្នាទៅវិញទៅមក ភាគីទាំងពីរក៏បានផ្លាស់ប្តូរគ្នាយ៉ាងទូលំទូលាយលើបញ្ហាអន្តរជាតិនិងក្នុងតំបន់ដែលភាគីទាំងពីរមានផលប្រយោជន៍រួម។ ចែករំលែកគោលការណ៍ឯករាជ្យស្វ័យភាពសន្តិភាពនិងការគោរពច្បាប់អន្តរជាតិក្នុងការដោះស្រាយបញ្ហាក្នុងតំបន់និងពិភពលោក។

ភាគីទាំងពីរបានឯកភាពគ្នាសម្របសម្រួលនិងគាំទ្រគ្នានៅអង្គការអន្តរជាតិនិងវេទិកាពហុភាគីជាពិសេសអង្គការសហប្រជាជាតិ វេទិកាសហប្រតិបត្តិការសេដ្ឋកិច្ចអាស៊ី - ប៉ាស៊ីហ្វិក (APEC) វេទិកាសហប្រតិបត្តិការ អាស៊ីបូព៌ា - អាមេរិកឡាទីន (FEALAC) ក៏ដូចជាការពង្រឹងទំនាក់ទំនងរវាងអាស៊ាននិងសហភាពប៉ាស៊ីហ្វិក (AP) ។

គណៈប្រតិភូថ្វាយផ្កានៅវិមានលោកប្រធានាធិបតីហូជីមីញនៅទីក្រុងម៉ិកស៊ិក

ក្នុងដំណើរទស្សនកិច្ចនេះអនុរដ្ឋមន្រ្តីអចិន្ត្រៃយ៍លោក Bui Thanh Son បានជួបជាមួយប្រធានគណៈកម្មាធិការកិច្ចការបរទេសអាស៊ី - ប៉ាស៊ីហ្វិកនិងអាហ្វ្រិកនៃព្រឹទ្ធសភាម៉ិចស៊ីកូលោក Cora Cecilia Pinedo Alonso ប្រធានគណៈកម្មាធិការទំនាក់ទំនងការបរទេសនៃសភានិងជាប្រធានក្រុមសមាជិកសភាមិត្តភាពជាមួយវៀតណាមលោក Alfredo Femat Bañuelos ជួបជាមួយអគ្គលេខាធិការនិងជាមេដឹកនាំបក្សការងារម៉ិកស៊ិក។ ធ្វើទស្សនានិងធ្វើការជាមួយស្ថាន ទូតវៀតណាមប្រចាំនៅម៉ិចស៊ីកូ ធ្វើទស្សនាការតាំងពិព័រណ៍រូបថត "វៀតណាម - ភាពទាក់ទាញគ្មានទីបញ្ចប់" នៅលើវិថី Reforma ថ្វាយផ្កានៅវិមានលោកប្រធានាធិបតីហូជីមីញនៅទីក្រុងម៉ិកស៊ិក៕

（ប្រែសម្រូលដោយវិច្ឆិកា）

（ប្រែសម្រូលដោយវិច្ឆិកា）