យុគសម័យ - សន្និសីទការទូតលើកទី៣០ដោយប្រធានបទ “ការទូតវៀតណាម៖ ម្ចាស់ការ ច្នៃប្រឌិត ប្រសិទ្ធិភាព អនុវត្តន៍ប្រកបដោយជោគជ័យនូវសេចក្តីសម្រេចចិត្តមហាសន្និបាតលើកទី៣០របស់បក្ស” បានប្រារព្ធជាផ្លូវការនាថ្ងៃទី១៣ខែសីហានៅទីក្រុងហាណូយ។
ថ្នាក់ដឹកនាំបក្សនិងរដ្ឋ អញ្ជើញចូលរួមក្នុងសន្និសីទ (រូបថត៖ VGP/Hai Minh)
អញ្ជើញចូលរួមក្នុងសន្និសីទ មានវត្តមានតំណាងជាង៧០០នាក់ ជាថ្នាក់ដឹកនាំជាន់ខ្ពស់របស់បក្សនិងរដ្ឋ ថ្នាក់ដឹកនាំក្រសួង ស្ថាប័ននានាពីមជ្ឈឹមដល់តំបន់ តំណាងស្ថាប័នវៀតណាមនៅឯបរទេស រួមទាំងថ្នាក់ដឹកនាំក្រសួងការបរទេសផងដែរ។
អគ្គលេខាបក្ស លោក Nguyen Phu Trong ប្រធានរដ្ឋ លោក Tran Dai Quang នាយករដ្ឋមន្ត្រីរដ្ឋាភិបាល លោក Nguyen Xuan Phuc និងប្រធានរដ្ឋសភា លោកស្រី Nguyen Thi Kim Ngan អញ្ជើញចូលរួមនិងថ្លែងមតិនៅក្នុងសម័យប្រជុំមួយចំនួននៃសន្និសីទ។
អញ្ជើញថ្លែងមតិបើកសន្និសីទ ឧបនាយករដ្ឋមន្ត្រី រដ្ឋមន្ត្រីការបរទេសវៀតណាម លោក Pham Binh Minh បានចាត់ទុកថា សមិទ្ធផលកិច្ចការបរទេសដែលទទួលបាននាពេលកន្លងមកគឺដោយសារតែគោលនយោបាយកិច្ចការបរទេសត្រឹមត្រូវរបស់បក្ស ការដឹកនាំយ៉ាងជិតស្និទ្ធរបស់ការិយាល័យនយោបាយ លេខាធិការដ្ឋាននិងការដឹកនាំដោយផ្ទាល់ពីថ្នាក់ដឹកនាំបក្សនិងរដ្ឋ។
ទន្ទឹមនឹងនោះ ការសម្របសម្រួលយ៉ាងជិតស្និទ្ធនិងការគាំទ្រប្រកបដោយប្រសិទ្ធភាពពីគណៈកម្មាធិការ ក្រសួង ស្ថាប័ន តំបន់នានា រួមទាំងការយកចិត្តទុកដាក់និងការរួមដំណើររបស់ប្រជាជននិងសហគ្រាសបានបង្កើតនូវសមិទ្ធផលសំខាន់ ៗលើរណសិរ្សកិច្ចការបរទេស។
ឧបនាយករដ្ឋមន្ត្រី រដ្ឋមន្ត្រីការបរទេសវៀតណាម លោក Pham Binh Minh អញ្ជើញថ្លែងមតិក្នុងសន្និសីទ (រូបថត៖ VGP/Hai Minh)
កិច្ចសហប្រតិបត្តិការយ៉ាងជិតស្និទ្ធជាមួយកងទ័ព រវាងកិច្ចការបរទេស ការទូតរដ្ឋ ជាមួយកិច្ចការបរទេសប្រជាជន រវាងវិស័យការទូត-ការពារជាតិ-សន្តិសុខជាកត្តាសំខាន់នាំមកនូវជោគជ័យ។
រដ្ឋមន្ត្រីការបរទេសវៀតណាមលោក Pham Binh Minh បានលើកឡើងច្បាស់ថា សន្និសីទការទូតលើកទី៣០នេះបានប្រារព្ធចំទៅនឹងពេលវេលាដ៏សំខាន់មួយ។ នេះគឺជាឱកាសដើម្បីពិនិត្យមើលឡើងវិញរយៈពេលពាក់កណ្តាលនៃការអនុវត្ត ន៍គោលនយោបាយការបរទេសរបស់មហាសន្និបាតបក្សទី១២ ឆ្ពោះទៅរកការអនុវត្តប្រកបដោយជោគជ័យនូវសេចក្តីសម្រេចចិត្តរបស់មហាសន្និបាតបក្សលើកទី១២ និងដាក់ចេញផែនការអភិវឌ្ឍន៍សេដ្ឋកិច្ចសង្គមសម្រាប់ដំណាក់កាល ២០១៦ - ២០២១។
ក្នុងរយៈពេល២ឆ្នាំកន្លងមកនេះ ចាប់តាំងពីសន្និសីទការទូតលើកទី២៩នៅឆ្នាំ ២០២៦មក ដោយក្តាប់ជាប់នូវគោលមាគាកិច្ចការបរទេសនៃមហាសន្និបាតបក្សលើកទី១២នោះ ផ្នែកការទូតបានម្ចាស់ការអនុវត្តប្រកបដោយប្រសិទ្ធិភាពលទ្ធផលជាច្រើន។
អគ្គលេខាបក្ស លោក Nguyen Phu Trong អញ្ជើញថ្លែងមតិក្នុងសន្និសីទ (រូបថតៈ VGP/Hai Minh)
អញ្ជើញថ្លែងមតិក្នុងសន្និសីទ អគ្គលេខាបក្ស លោក Nguyen Phu Trong បានសង្កត់ធ្ងន់ថា សមិទ្ធផលសំខាន់ៗក្នុងកិច្ចការបរទេសដែលអាស្រ័យលើសសរស្តម្ភនិងវិស័យកិច្ចការបរទេសក្នុងរយៈពេល ២ ឆ្នាំកន្លងមក បានរួមចំណែកក្នុង ការ បង្កើតបរិយាកាសសប្បាយរីករាយ ការជឿជាក់លើការដឹកនាំដ៏ត្រឹមត្រូវរបស់បក្សនិងរដ្ឋព្រមទាំងការស្រុះចិត្តគំនិតរបស់ប្រជាជន។
ដោយឈរលើមូលដ្ឋាននៃការណែនាំទិសដៅមួយចំនួនសម្រាប់សន្និសីទការទូតលើកនេះ អគ្គលេខាបក្ស លោក Nguyen Phu Trong បានស្នើឱ្យវិស័យការទូតពិនិត្យមើលទិសដៅចំនួន៨ក្នុងពេលខាងមុខនេះ។ តាមនោះ វិស័យការទូតគប្បបន្តការច្នៃប្រឌិតថ្មីនៅក្នុងកិច្ចការបរទេស។ ទន្ទឹមជាមួយនោះ បន្តស្វែងយល់ឱ្យបានម៉ត់ចត់នូវគោលនយោបាយកិច្ចការបរទេសឯករាជ្យ ម្ចាស់ការដើម្បីផលប្រយោជន៍ជាតិ ជាពិសេសនាំទំនាក់ទំនងជាមួយប្រទេសជិតខាងនិងប្រពៃណីឲ្យកាន់តែស៊ីជម្រៅប្រកបដោយប្រសិទ្ធភាព៕
（យោងតាម chinhphu.vn បកប្រែដោយស្រីពេជ្រ）
មតិពីមិត្តអ្នកអាន