នាយឧត្ដមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ នៅព្រឹកថ្ងៃទី២៤ ខែកញ្ញា ឆ្នាំ២០២០នេះ បានដឹកនាំប្រតិភូចូលរួម កិច្ចប្រជុំអគ្គមេបញ្ជាការកងទ័ពអាស៊ានលើកទី១៧ (ACDFM-17) តាមរយៈប្រព័ន្ធវីដេអូ (Video Conference) ដែលរៀបចំឡើងដោយប្រទេសវៀតណាម។
នាយឧត្ដមសេនីយ៍ វង្ស ពិសេន ដឹកនាំប្រតិភូចូលរួមកិច្ចប្រជុំអគ្គមេបញ្ជាការកងទ័ពអាស៊ាន លើកទី១៧ (ACDFM-17)
ក្នុងកិច្ចប្រជុំដែលមានទិសស្លោក «កិច្ចសហប្រតិបត្តិការការពារជាតិ ដើម្បីអាស៊ានប្រកបដោយភាពស្អិតរមួត និងការឆ្លើយតប» នេះ នាយឧត្ដមសេនីយ៍ វង្ស ពិសេន បានបង្ហាញពីទស្សនៈ នៃការលើកកម្ពស់កិច្ចសហប្រតិបត្តិការការពារជាតិ សម្រាប់សមាគមន៍អាស៊ាន ប្រកបដោយឋាមវន្ត និងការប្តេជ្ញាចិត្ត កិច្ចសហប្រតិបត្តិការតំបន់ ដោយបន្តកសាងទំនុកចិត្តគ្នា ក្នុងចំណោមកងទ័ពអាស៊ាន ចែករំលែកពត៌មានទាន់ពេលវេលា និងសហការធ្វើការរួមគ្នាដោះស្រាយ រាល់បញ្ហាប្រឈម កើតឡើងជាប្រពៃណី និងមិនប្រពៃណីនៅក្នុងតំបន់ឲ្យទទួលបានជោគជ័យ រួមចំណែកក្នុងការថែរក្សាសន្តិភាព ស្ថិរភាព សន្តិសុខក្នុងតំបន់ និងពិភពលោក។
ទាក់ទិនដល់បញ្ហាជំងឺរាតត្បាតកូវីដ-១៩ ដែលបណ្ដាលឲ្យមនុស្សជាច្រើនក្នុងពិភពលោកបានស្លាប់ និងប៉ះពាល់ធ្ងន់ធ្ងរដល់សេដ្ឋកិច្ច សុខភាពសាធារណៈ នាយឧត្ដមសេនីយ៍ អគ្គមេបញ្ជាការ បានគូសបញ្ជាក់ពីកិច្ចខិតខំរបស់រាជរដ្ឋាភិបាលកម្ពុជា ក្នុងការដាក់ចេញវិធានការទប់ស្កាត់ទាន់ពេលវេលា និង មានប្រសិទ្ធភាព កាត់បន្ថយជំងឺភ័យខ្លាចហួសហេតុ និងបានបង្ហាញពីទឹកចិត្តមនុស្សធម៌របស់កម្ពុជា ចំពោះការមិនប្រកាន់ពូជសាសន៍ ឬរើសអើង។
បន្ថែមលើនេះ នាយឧត្ដមសេនីយ៍ វង្ស ពិសេន បានគូសបញ្ជាក់ថា បើទោះបីស្ថិតក្នុងស្ថានភាពវិបត្តិជំងឺឆ្លងកូវីដ-១៩ ក៏ដោយ ក៏កងយោធពលខេមរភូមិន្ទ នៅតែរក្សាការប្តេជ្ញាចិត្តរបស់ខ្លួន ក្នុងបេសកកម្មមនុស្សធម៌ក្រោមឆ័ត្រអង្គការសហប្រជាជាតិ ដោយបានបញ្ជូនកងកម្លាំងបន្ថែម ទៅចូលរួមក្នុងប្រតិបត្តិការថែរក្សាសន្តិភាព៕
（ប្រភពព័ត៌មាន: freshnews）
មតិពីមិត្តអ្នកអាន