សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវឱ្យបងប្អូនប្រជាពលរដ្ឋយកចិត្តទុកដាក់ថែរក្សាសុខភាពឱ្យបានគ្រប់គ្នា ជាពិសេសការពារខ្លួនចៀសផុតពីជំងឺឆ្លងកូវីដ-១៩ ខណៈដែលពិធីកាន់បិណ្ឌនៃបុណ្យភ្ជុំបិណ្ឌ នឹងមកដល់នាពេលយ៉ាងខ្លីខាងមុខនោះ។
ប្រមុខរាជរដ្ឋាភិបាលអំពាវនាវឱ្យបងប្អូនប្រជាពលរដ្ឋយកចិត្តទុកដាក់ថែរក្សាសុខភាព ខណៈពិធីកាន់បិណ្ឌនៃបុណ្យភ្ជុំបិណ្ឌ នឹងមកដល់នាពេលយ៉ាងខ្លីខាងមុខនេះ
នៅលើបណ្ដាញទំនាក់ទំនងសង្គមហ្វេសប៊ុក នាថ្ងៃទី ៣១ ខែសីហា ឆ្នាំ២០២០ សម្ដេចតេជោបានសរសេរថា នៅសល់តែបីថ្ងៃទៀតទេ ពិធីកាន់បិណ្ឌនឹងមកដល់តាមប្រពៃណីទំនៀមទម្លាប់សាសនា នៅក្នុងឱកាសនៃពិធីកាន់បិណ្ឌភ្ជុំបិណ្ឌដែលនឹងចូលមកដល់ក្នុងពេលយ៉ាងខ្លីខាងមុខនេះ សូមបងប្អូនប្រជាពលរដ្ឋទាំងអស់យកចិត្តទុកដាក់ថែរក្សាសុខភាពឲ្យបានគ្រប់គ្នា ជាពិសេសសូមការពារខ្លួនចៀសផុតពីជំងឺឆ្លងCovid-19 ហើយស្តាប់តាមការណែនាំរបស់ក្រសួងសុខាភិបាលឱ្យបានខ្ជាប់ខ្ជួន ដោយបន្តពាក់ម៉ាសការពារ ឧស្សាហ៍ដុសសម្អាតលាងដៃជាមួយសាប៊ូ ទឹកអាល់កុល ឬជែលសម្លាប់មេរោគឱ្យបានជាប្រចាំ។ សម្ដេចតេជោនាយករដ្ឋមន្ត្រីបានគូសបញ្ជាក់ថា នៅថ្ងៃនេះ តាមរបាយការណ៍អង្គការសុខភាពពិភពលោក(WHO) ថ្ងៃនេះគឺមានអ្នកឆ្លងសរុប ២៤, ៨៥៤, ១៤០នាក់ ស្លាប់ ៨៣៨,៩២៤នាក់ និងករណីកើតថ្មីចំនួន ២៦៥,៨៨៨ករណី។ ចំណែកប្រទេសកម្ពុជាយើង វិញ មកដល់នេះមានអ្នកឆ្លងសរុប ២៧៤នាក់ បានជាសះស្បើយចំនួន ២៦៦នាក់ នឹងមានអ្នកឆ្លងថ្មីចំនួន ០១នាក់។
សម្ដេចតេជោ ក៏សូមជូនពរឱ្យបងប្អូនប្រជាពលរដ្ឋទាំងអស់រីករាយជាមួយក្រុមគ្រួសារ មិត្តភក្កិ បងប្អូន ក្នុងឱកាសពិធីកាន់បិណ្ឌមុខនេះ និងសូមឱ្យការធ្វើដំណើរជិតឆ្ងាយទទួលបាននូវសុខសុវត្ថិភាព ព្រមទាំងចូលរួមគោរពច្បាប់ចរាចរណ៍ឱ្យបានគ្រប់ៗគ្នា៕
（ប្រភពព័ត៌មាន: AKP）
មតិពីមិត្តអ្នកអាន